ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ ᐅᖃᓪᓚᒃᐳᖅ ᐃᓄᐃᑦ ᐃᕐᓂᓱᒃᓰᔨᐅᔪᑦ ᓄᖃᓚᐅᕐᓯᒪᓂᖏᓐᓂᒃ ᐃᓅᓂᕐᒧᑦ ᓈᒻᒪᙱᓕᐅᕈᑎᓄᑦ

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ, ᖁᐊᓴ ᑯᓱᒐᖅ, ᐅᖃᓚᐅᕐᑐᖅ ᐅᖃᓪᓚᖃᑎᖃᓚᐅᕐᓂᕋᖅᖢᓂ ᒪᕐᕉᖕᓂ ᐃᓅᖕᓂ ᐃᕐᓂᓱᒃᓰᔨᐅᖃᑦᑕᓚᐅᕐᑑᖕᓂ, ᑖᒃᑯᐊᓗ ᐅᖃᓚᐅᕐᖢᑎᒃ ᐃᖅᑲᓇᐃᔮᖏᓐᓂᒃ ᓄᖅᑲᓚᐅᕐᓂᕋᖅᖢᑎᒃ ᐊᔾᔨᒌᙱᑎᑕᐅᓂᕐᒥᒃ ᐊᑐᓗᐊᓚᐅᕐᓂᖏᓐᓂᒃ ᑲᖏᖅᖠᓂᕐᒥᒃ ᐃᓂᓱᒃᓰᕕᖕᒥ.

ᐅᖃᓚᐅᕐᑐᖅ ᒪᓕᒐᓕᕆᔨᕐᔪᐊᓄᑦ ᐅᖃᓪᓚᖃᑎᖃᓚᐅᕐᓂᕐᒥᓂᒃ ᒫᔅᓯ 2-ᒥ.

“ᑕᑯᔪᒪᒐᑦᑕ ᖃᓄᐃᓕᐅᕈᑎᕕᓂᐅᓂᑯᓂᒃ,” ᐅᖃᖅᑐᖅ. “ᐊᒻᒪᓗ ᓯᕗᒧᑦ ᐱᓇᓱᑐᐃᓐᓇᕐᓂᐊᕐᓗᑕ ᑕᒪᓐᓇ ᑕᐃᒪᐃᒃᑲᓐᓂᖁᙱᓪᓗᒍ ᑖᒃᑯᓄᖓ ᐊᓯᖏᓐᓄᓪᓘᓐᓃᑦ.”

ᒪᕐᕉᒃ ᐃᕐᓂᓱᒃᓰᔨᐅᓚᐅᕐᓯᒪᔫᒃ ᖃᖓᑦᑎᐊᓵᖅ ᐅᓂᒃᑳᓚᐅᕐᓯᒪᖕᒪᑎᒃ ᐅᑯᓄᖓ ᑲᓃᑎᐊᓐ ᐳᕋᔅ (Canadian Press) ᓄᖅᑲᓚᐅᕐᓯᒪᓂᖏᓐᓂᒃ ᐊᕐᕌᒍᒐᓴᖕᓂ ᐃᖅᑲᓇᐃᔮᙱᑦᑎᒍᑦ ᐱᑦᑎᐊᖅᑕᐅᖃᑦᑕᙱᐊᓪᓚᓚᐅᖅᖢᑎᒃ. ᐃᖅᑲᓇᐃᔭᕈᓐᓃᕐᑎᓪᓗᒋ ᐃᕐᓂᓱᒃᓰᕕᒃᒥᑦ ᐱᔨᑦᑎᕋᐅᑎᐅᔪᑦ ᑲᖏᖅᖠᓂᕐᒥ ᓄᖅᑲᖅᑎᑕᐅᓕᓚᐅᕐᓯᒪᖕᒪᑕ ᐊᐅᔭᐅᓚᐅᕐᓯᒪᔪᒥᑦ.

ᒪᐃᒃ ᑯᐊᑦᓂ, ᑯᓱᒐᐅᑉ ᐊᐅᓚᑦᑎᓂᕐᒧᑦ ᐃᑲᔪᕐᑎᖓ, ᓇᓗᓇᐃᕐᓯᓚᐅᕐᑐᖅ ᐅᖃᓪᓚᖃᑎᖃᓚᐅᕐᓯᒪᓂᖓᓂᒃ ᕕᕝᕗᐊᕆᐅᑎᓪᓗᒍ. ᐅᖃᖅᖢᓂᓗ ᑖᓐᓇ ᒥᓂᔅᑕ ᐱᓇᓱᒻᒪᕆᒃᓯᒪᓂᖓᓂ ᐅᓇ ᑲᖏᖅᖠᓂᕐᒥᑦ ᐃᕐᓂᓱᒃᓰᓂᕐᒧᑦ ᐱᔨᑦᑎᕋᐅᑎᓕᕆᕝᕕᐅᔪᖅ ᑲᔪᓯᖁᓪᓗᓂᐅᒃ, ᑭᓯᐊᓂᓕ ᐊᐅᓚᑕᐅᔾᔪᑎᒋᓚᐅᖅᑕᖓᑎᑑᙱᓪᓗᓂ.

ᐅᖃᓚᐅᕐᑐᖅ ᑯᓱᒐᖅ ᑐᓴᕈᒪᓚᐅᕐᓂᕋᖅᖢᓂᐅᒃ ᑖᒃᑯᓇᙵᑦ ᐊᕐᓈᖕᓂᒃ ᐃᓱᒫᓘᑎᖏᓐᓂᒃ ᑕᐃᒪᙵᑦ ᓄᖅᑲᓚᐅᖅᑎᓪᓗᒋᑦ ᑖᓐᓇ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐱᓕᕆᐊᖃᓚᐅᕐᑎᓐᓇᒍ ᓄᕕᐱᕆ 9, 2020-ᒥᑦ

ᒫᔅᓯ 2-ᒥᑦ, ᑳᑎ ᑕᐅᑐᙱ, ᑲᑎᒪᔨᐅᖃᑕᐅᔪᖅ ᑭᒡᒐᖅᑐᐃᓪᓗᓂ ᑲᖏᖅᖠᓂᐅᑉ ᐅᐊᖕᓇᖓᓂᒃ-ᐃᒡᓗᓕᒑᕐᔪᒃᒥᑦ, ᐊᐱᕆᓚᐅᕐᑐᖅ ᒥᓂᔅᑕᒥ ᒪᓕᒐᓕᕆᕕᒡᔪᐊᒥᑦ ᐊᔾᔨᒌᙱᑎᑦᑎᓂᕐᒥ ᐊᑐᕐᓂᕋᖅᑕᐅᔪᓂᒃ ᕿᒥᕐᕈᐊᕋᔭᕆᐊᒃᓴᖓᓂᒃ ᐊᑐᖅᑕᐅᓂᖓᓂᒃ ᐃᒪᓐᓇᐅᙱᑦᑐᖅ ᐱᐊᓂᒃᓯᒪᓕᖅᑎᓪᓗᒍ ᑭᓯᐊᓂ.

ᑯᓱᒐᖅ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᑕᐅᑐᑐᐃᓐᓇᔾᔮᙱᓐᓂᕋᕐᓯᒪᖕᒪᑕ ᐊᑐᐊᒐᑎᒍ ᐸᒡᕕᓵᕆᓂᐅᕙᒃᑐᓂᒃ ᐊᒻᒪ ᕿᐱᓘᑎᐅᕙᒃᑐᓂᒃ ᖃᐅᔨᒪᔭᐅᑦᑕᐃᓕᓂᒃᑯᑦ.

“ᑭᓇᑐᐃᓐᓇᖅ ᐃᓱᒪᒍᓂ ᓈᒻᒪᙱᓗᐊᖅᑐᒃᑯᑦ ᐱᓕᕆᐊᖑᖃᑦᑕᕈᒥ ᐅᕝᕙᓘᓐᓃᑦ ᐃᓱᒪᒋᔭᖃᕈᑎᒃ ᐊᑐᖅᑕᐅᑐᐃᓐᓇᔭᓐᓂᖏᓐᓂᒃ, ᑕᐃᒪᓕ ᖁᕕᐊᓱᑐᐃᓐᓇᖅᑐᖓ ᑐᓴᕈᒪᓪᓗᖓ ᐅᖄᓚᐅᑎᒃᑯᑦ ᐃᓱᒫᓗᑎᒋᔭᐅᔪᓂᒃ,” ᐅᖃᖅᑐᖅ.

ᑯᓱᒐᖅ ᐅᖃᓚᐅᕐᑐᖅ ᓯᕗᓪᓕᕐᐹᙳᖃᑕᐅᔪᓪᓕ ᐱᓕᕆᐊᒃᓴᕆᔭᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐱᓕᕆᐊᖅᑖᖅᑎᓪᓗᒍ ᐱᓕᕆᐊᖃᕐᓗᓂ ᓈᒻᒪᙱᓕᐅᕈᑎᒋᔭᐅᔪᓂᒃ ᑲᖏᖅᖠᓂᕐᒥᒃ ᐃᕐᓂᓱᒃᓰᕕᖕᒥᑦ.

ᐅᖃᐅᓯᖃᓗᐊᕋᓂᒃ ᖃᓄᓪᓚᕆᒃ ᐸᕐᓇᐅᑎᐅᓇᔭᕐᑐᓂᒃ, ᑯᓱᒐᖅ ᐅᖃᒃᑲᓐᓂᓚᐅᕐᑐᖅ ᒪᓕᒐᓕᕆᕝᕕᖕᒥᑦ ᐃᕐᓂᓱᒃᓰᕝᕕᓕᕆᓂᕐᒧᑦ ᐱᔨᑦᑎᕋᐅᑏ ᐅᑎᖅᑎᑕᐅᓂᖓ ᓯᕗᓪᓕᐅᔾᔭᐅᖃᑕᐅᔭᕆᐊᖃᕐᓂᖓᓂᒃ.

“ᐸᕐᓇᐅᓯᐅᖅᐸᓪᓕᐊᒐᑦᑕ ᐊᒻᒪᓗ ᓇᓗᓇᐃᕐᓯᕙᓪᓕᐊᓪᓗᑕᓗ ᑭᓱᓂᒃ ᐱᔭᕆᐊᖃᕐᒪᖔᑦ … ᐅᓇ ᐃᕐᓂᓱᒃᓰᓕᕆᖃᑦᑕᕐᓂᖅ ᓯᕗᒧᑦ ᑲᔪᓯᑎᑦᑎᐊᕐᓂᐊᕐᓗᒍ,” ᐅᖃᖅᑐᖅ.

ᑯᓱᒐᖅ ᐅᖃᓚᐅᕐᒥᔪᖅ ᑐᕌᒐᐅᔪᒥᒃ ᐃᕐᓂᓱᒃᓰᓂᕐᒥᒃ ᐅᑎᖅᑎᑦᑎᓂᕐᒥᒃ ᑕᒪᐃᓐᓄᑦ ᐱᖓᓱᓄᑦ ᐊᕕᒃᑐᕐᓯᒪᓂᒃᑰᖓᔪᓄᑦ ᓄᓇᕗᒥᑦ, ᑭᓯᐊᓂᓕ ᑕᒪᑐᒧᖓ ᑐᕌᒐᕆᔭᐅᔪᒧᑦ ᖃᖓᒃᑯᑦ ᐱᓕᕆᐊᖑᓂᐊᕐᓂᖓᓂᒃ ᐅᖃᐅᓯᖃᓚᐅᙱᑦᑐᖅ.

ᐃᕐᓂᓱᒃᓰᓂᕐᒧᑦ ᐱᓕᕆᐊᒃᓴᖅ ᐊᒻᒪ ᓄᖅᑲᖅᑎᑕᐅᓚᐅᕐᓯᒪᖕᒪᑦ ᓄᓇᕗᑦ ᓯᓚᑦᑐᖅᓴᕐᕕᒃᒥᑦ 2014-ᖑᑎᓪᓗᒍ.

ᒫᔅᓯ 1-ᒥᑦ, ᐊᒥᑦᑐᕐᒧᑦ ᒪᓕᒐᓕᐅᕐᑎ ᔪᐃᓕ ᖃᐃᕐᓂᖅ ᐊᐱᕆᓚᐅᕐᓯᒪᔪᖅ ᐃᕐᓂᓱᒃᓰᔨᐅᓂᕐᒧᑦ ᐃᓕᓐᓂᐊᕈᑎᒃᓴᖅ ᐅᑎᖅᑎᑕᐅᓂᐊᕆᐊᒃᓴᖓᓂᒃ ᓯᓚᑐᖅᓴᕐᕕᒃᒧᑦ.

ᑯᓱᒐᖅ ᐅᖃᓚᐅᕐᑐᖅ ᐱᓇᓱᖃᑦᑕᖅᑐᑦ ᐅᓄᙱᓗᐊᖃᑦᑕᕐᓂᖏᓐᓂᒃ ᐊᒻᒪᓗ ᐃᓕᓐᓂᐊᕈᑎᒃᓴᐃᑦ ᐊᑭᑐᓗᐊᖅᑐᐊᓘᓂᖏᓐᓂᒃ ᐃᓕᓐᓂᐊᖅᑎᑦᑎᓂᐊᕐᓗᓂ ᐊᑕᐅᓯᕐᒥᓐ ᒪᕐᕉᖕᓂᓪᓘᓐᓃ, ᑭᓯᐊᓂᓕ ᐱᓕᕆᕝᕕᖓ ᕿᒥᕐᕈᐊᕐᑐᑦ ᐊᔪᕈᓐᓃᕐᓴᕐᕕᖕᓂᒃ ᐱᓕᕆᖃᑎᖃᕈᓐᓇᕆᐊᒃᓴᖏᓐᓂᒃ ᐋᖅᑭᒃᓱᐃᓂᒃᑯᑦ ᓈᒻᒪᒃᑐᓂᒃ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ ᓄᓇᕗᑦ ᓯᓚᑦᑐᖅᓴᕐᕕᒃ ᐃᓚᐅᑎᑕᐅᓇᔭᖅᖢᓂ ᑕᒪᑐᒥᖓ ᐅᖃᐅᓯᖃᑲᑕᓕᖅᐸᑕ.

2019-ᒥᑦ, ᓄᓇᕗᒥᑦ ᒐᕙᒪᒃᑯᑦ ᐅᖃᒻᒪᕆᓚᐅᕐᓯᒪᔪᑦ ᐃᕐᓂᓱᒃᓰᕕᒃᓴᒥᑦ ᓴᓇᔪᒪᓪᓗᑎᒃ ᓄᓇᕗᒥᑦ. ᐋᒐᓯ 2020-ᒥᑦ, ᑲᓇᑕᒥ ᓄᓇᖃᖅᑳᖅᑐᑦ ᑲᑎᒪᔨᖏᑦ ᐅᑯᓄᖓ ᐃᕐᓂᓱᒃᓰᔨᓄᑦ ᐅᖃᓚᐅᕐᓯᒪᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᑯᐊ ᐃᕐᓂᓱᒃᓰᔨᐅᖃᑦᑕᖅᑐᑦ ᐃᑲᔪᖅᑕᐅᓂᕐᓴᐅᔭᕆᐊᖃᕐᓂᖏᓐᓂᒃ ᐊᒻᒪᓗ ᐃᕐᓂᓱᒃᓰᕝᕕᐅᕙᒃᑐᑦ ᓄᓇᕗᒥᑦ ᐱᐅᓂᕐᓴᒥ ᐃᑲᔪᖅᑕᐅᖃᑦᑕᕆᐊᖃᕐᓂᖏᓐᓂᒃ ᐊᒻᒪᓗ ᐃᑲᔫᑎᑖᒃᑲᓐᓂᕐᐸᒡᓗᑎᒃ ᐊᑐᖅᑕᐅᖃᑦᑕᕈᓐᓇᕐᓂᐊᕐᒪᑕ.

ᑭᖑᓪᓕᖅᐹᖅ ᐅᓂᒃᑳᓕᐊᖑᓂᑯ ᐊᒻᒪ ᓴᖅᑭᑕᐅᓚᐅᕐᓯᒪᓪᓗᓂ ᐆᒥᖓ ᑲᓇᑕᒥ ᖃᐅᔨᓇᓱᖕᓂᕐᒥᒃ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᐃᓱᒪᓕᐅᕆᓚᐅᕐᓯᒪᔪᑦ ᐱᐅᓯᕚᓕᖅᑎᑕᐅᓗᓂ ᐃᕐᓂᓱᒃᓰᓕᕆᓂᕐᒧᑦ ᐱᔨᑦᑎᕋᐅᑎᐅᔪᑦ ᐃᓄᖕᓂᑦ ᐃᓄᖕᓅᖓᓗᓂ.