ᐃᖃᓗᐃᑦ ᑐᐊᕕᕐᓇᖅᑐᒦᓐᓂᕋᖅᑐᑦ ᐃᒪᖃᙱᓗᐊᓕᕐᓂᕐᒧᑦ

For English version, see Iqaluit declares local state of emergency over drought

ᓯᕗᓪᓕᖅᐹᒥ ᐊᕐᕌᒍᑦ ᐱᖓᓱᑦ ᐃᓗᐊᓂᒃ ᐃᖃᓗᐃᑦ ᑐᐊᕕᕐᓇᖅᑐᖃᓕᖅᑐᑦ ᐃᒪᖃᑦᑎᐊᕈᓐᓃᓗᐊᕐᓂᕐᒥᒃ.

ᓄᓇᓕᐸᐅᔭᓄᑦ ᑲᑎᒪᔩᑦ ᑲᑎᒪᓚᐅᕐᒪᑕ ᐋᒐᓯ 12ᒥ ᑐᐊᕕᕐᓇᖅᑐᓕᕆᓪᓗᑎᒃ ᐅᑭᐅᖅ ᐊᓂᒍᐃᑦᑎᐊᕈᓐᓇᕐᓂᐊᕐᒪᑕ ᐃᒪᖃᑦᑎᐊᕐᓗᑎ ᐅᕙᙶᖅᑐᒥᒃ ᑕᓯᖅ ᔨᐅᕈᑏᓐᒥ, ᓄᓇᓕᐸᐅᔭᐃᑦ ᐃᒥᖅᑕᕐᕕᒋᕙᒃᑕᖓ.

ᑕᒪᒃᑭᖅᖢᑎᒃ ᓂᕈᐊᓚᐅᕐᑐᑦ ᑐᐊᕕᓐᓇᖅᑐᒦᓐᓂᕋᕐᓗᑎᒃ ᑕᐃᒪᓐᓇᓗ ᑐᓴᐅᒪᑎᑦᑎᔾᔪᑎᐅᓂᐊᕐᓗᓂ ᐊᓯᖏᓐᓂᒃ ᒐᕙᒪᓕᕆᔨᐅᔪᓂᒃ ᐃᖃᓗᐃᑦ ᐃᒪᖓ ᓈᒻᒪᙱᓗᐊᓕᕐᓂᖓᓂᒃ, ᐅᖃᕐᑐᖅ ᓄᓇᓕᖕᓄᑦ ᐊᐅᓚᑦᑎᔨ ᐊᐃᒥ ᐃᐊᒍᔅᒪ.

“ᐅᕙᑦᑎᓐᓄᓪᓕ, [ᓄᓇᓕᖕᓂ ᑐᐊᕕᕐᓇᖅᑐᓕᕆᓂᖅ] ᖃᐅᔨᑎᑦᑎᔪᓐᓇᕐᓂᐊᕐᑐᑦ ᐃᒪᕐᒧᑦ ᑲᑎᒪᔨᒃᑯᑦ … ᐊᒻᒪᓗ ᐱᕈᔭᖃᖅᑎᑦᑎᔨᐅᔪᑦ ᑕᒪᓐᓇ ᐱᒻᒪᕆᐊᓘᓂᖓᓂᒃ,” ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ.

ᓄᓇᓕᐸᐅᔭᐃᑦ ᐱᓇᓱᒍᒪᔪᑦ ᐋᖅᑭᒋᐊᕈᑎᒃᓴᓂᒃ ᐃᒪᕐᒧᑦ ᓚᐃᓴᓐᓯᖓᓂᒃ ᐃᒪᕐᒥᒃ ᐱᔪᓐᓇᖅᑕᖓᑕ ᐅᖓᑖᓂ ᐱᔪᒪᔾᔪᑎᒃᓴᓂᒃ ᐅᕙᙵᑦ ᓂᐊᖁᙴᑉ ᑰᖓᓂᒃ, ᐊᒻᒪᓗ ᐅᕙᙵᑦ ᐊᑎᖃᙱᑦᑐᒥᒃ ᑕᓯᕐᒥ ᐅᕗᖓ ᓂᐊᖁᙴᑉ ᑰᖓᓄᑦ ᐊᒻᒪ ᐅᕗᙵᖅᑕᐅᓕᕐᓗᓂ ᑕᓯᖅ ᔨᐅᕈᑏᓐᒧ.

ᐅᓇ ᓄᓇᓕᐸᐅᔭᐃᑦ ᐊᑐᓚᐅᕐᓯᒪᓂᑯᖓ 2019-ᖑᑎᓪᓗᒍ.

ᑭᓯᐊᓂᓕ ᒫᓐᓇ ᐊᔪᕐᓇᙱᓐᓂᕐᓴᐅᓂᐊᖅᑐᖅ ᓲᖃᐃᒻᒪ ᒪᑯᐊ ᐱᓕᕆᔾᔪᑏᑦ — ᒥᓪᓗᐊᕈᑏᑦ, ᓱᓪᓗᓖᓪᓗ — ᐃᖃᓗᖕᓃᒻᒪᑕ ᐊᒻᒪᓗ ᓄᓇᓕᐸᐅᔭᐃᑦ ᑕᒪᑐᒧᖓ ᐱᓕᕆᐊᖃᓚᐅᕐᓯᒪᓕᖅᖢᑎᒃ ᐱᖁᔭᓕᕆᓂᒃᑯᑦ, ᐃᐊᒍᔅᒪ ᐅᖃᕐᑐᖅ.

ᒫᓐᓇᑎᒍᓪᓕ ᑭᖑᓂᕆᓕᖅᑕᑦᑎᓐᓂ ᐊᕐᕌᒎᓚᐅᕐᑐᓂᒃ ᑖᓐᓇ ᐃᒥᖅᑕᕐᕕᒃ ᑕᑕᓯᒪᓂᕐᓴᐅᓇᔭᓚᐅᕐᒪᑦ.

ᑭᓯᐊᓂᓕ ᐅᓇ ᓂᐊᖁᙴᑉ ᑰᖓ ᒫᓐᓇ ᐊᑦᑎᓛᖑᑲᑕᖕᒪᑕ ᐃᒥᖓ, ᐅᖃᕐᓯᒪᔪᑦ ᑲᑎᕐᓱᖅᑕᐅᓯᒪᔪᓂᒃ ᐊᕐᕌᒍᓂᒃ 40-ᓂ ᑕᐃᒪᓕ ᓄᓇᓕᐸᐅᔭᐃᑦ ᑕᕝᕙᙵᑦ ᐃᒪᕐᒥ ᐱᔪᓐᓇᓗᐊᖃᑦᑕᕐᓯᒪᙱᑦᑐᑦ.

“ᑐᓴᖃᑦᑕᕐᓯᒪᒐᒪ ᐃᓄᖕᓂ ᐱᓱᕋᔭᖃᑦᑕᖅᑐᓂᒃ ᐅᔾᔨᕆᓂᕋᖅᖢᑎᒃ ᐃᒪᖃᙱᓗᐊᕐᓂᐊᕐᓂᖓᓂᒃ ᐊᕐᕌᒎᓂᐊᕐᑐᖅ ᐊᒻᒪᓗ ᑕᒪᓐᓇ ᓇᖕᒥᓂᖅ ᑕᑯᔪᓐᓇᖅᖢᒍ.” ᐃᐊᒍᔅᒪ ᐅᖃᕐᑐᖅ.

ᓄᓇᓕᐸᐅᔭᐃᑦ ᐃᒪᕐᒥ 201,000 ᑭᐅᐱᒃ ᒦᑕᓂ ᐱᓯᒪᓕᕐᑐᑦ ᑰᖕᒥ ᐃᒥᕐᑕᖅᕕᖕᒧᐊᕐᓂᐊᖅᑐᓂᒃ ᑕᐃᒪᙵᑦ ᐱᓕᕆᓕᓚᐅᕐᒪᑕ ᔫᓂ 10-ᒥ.

ᑖᓐᓇ ᐃᒥᕐᑕᖅᕕᒃ 413,000 ᑭᐅᐱᒃ ᒦᑕᓂ ᐃᒪᖃᕈᓐᓇᕐᒪ, ᑖᓐᓇᓗ ᓇᓕᒧᒋᔭᖃᖅᖢᓂ ᓲᕐᓗ 12,400-ᓂ 6 ᒦᑕ ᑕᑭᓂᓕᖕᓂ ᓴᕕᕋᔭᖕᓂ ᐱᖁᑎᖃᕐᕕᖕᓂᒃ.

ᐃᐊᒍᔅᒪ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐃᓱᒪᔪᑦ ᐅᓪᓗᓂ 40-ᓂ, ᓯᓚᓗᑲᑕᖕᓂᖅ ᒪᓕᒡᓗᒍ, ᑖᓐᓇ ᐃᒥᕐᑕᖅᕕᒃ ᑕᑕᑕᐅᓇᓱᒡᓗᓂ ᐊᒻᒪᓗ ᐃᒪᕐᒥ ᒥᒡᓗᐊᕈᑲᑕᓕᖕᓂ ᐱᒋᐊᕋᔭᕐᖢᓂ ᓯᑎᐱᕆ 1 ᐅᖓᑖᓂᐅᙱᑦᑐᖅ.

ᐅᓇ ᑐᑭᖃᕐᑐᖅ ᐃᒥᕐᑕᖅᕕᒃ ᑕᑕᑕᐅᓇᔭᕐᓂᖓᓂᒃ ᐅᒃᑑᐱᕆ 10 ᒥᒃᓵᓂ.

ᑲᑎᒪᔨ ᑲᐃᐅᓪ ᓯᐊᐳᑦ ᐅᖃᓚᐅᕐᑐᖅ ᓄᓇᓕᐸᐅᔭᐃ ᓄᑖᓂᒃ ᑐᓴᐅᒪᑎᑦᑎᔾᔪᑎᖃᕆᐊᖃᕐᓂᖏᓐᓂᒃ ᓄᓇᖃᖅᑐᓂᒃ ᐃᒪᕐᒥ ᐊᑐᓗᐊᖅᑕᐃᓕᒪᓂᕐᒧᑦ.

“ᑐᐊᕕᕐᓇᖅᑐᒃᑯᑦ ᑐᓴᖅᑎᑕᐅᓯᒪᙱᓐᓇᑦᑕᖅ ᒪᐅᓇ ᐃᒪᕐᒧᑦ ᑐᐊᕕᕐᓇᖅᑐᓕᕆᓂᒃᑯᑦ ᐊᕐᕌᒍᒐᓴᐅᓕᖅᑐᓂᒃ,” ᓴᐳᑦ ᐅᖃᕐᑐᖅ.

“ᑕᒪᓐᓇ ᐃᓱᒪᒋᔪᓐᓃᕐᓯᒪᒐᑦᑎᒍᑦ ᐃᓚᖓᒍᑦ ᐊᒻᒪᓗ ᐃᓄᐃᑦ ᓱᖁᑎᒃᓴᙱᓐᓂᕐᓴᐅᓕᖅᖢᑎᒃ ᐃᒪᖃᙱᓗᐊᕐᓂᕆᓚᐅᕐᓯᒪᔭᑦᑎᑐᑦ.”