ᐃᖃᓗᖕᓂ ᐃᓕᓐᓂᐊᕐᕕᒃᒥ ᐊᓂᒍᐃᓂᑯ ᓵᒃᓚᒃᓴᖃᑕᐅᔪᖅ ᐃᓕᓐᓂᐊᕈᑎᒃᓴᒃᑲᓐᓂᕐᓂ

For an English version of this song, please see: Iqaluit graduate one of 20 selected nationwide for Indigenous scholarship.

ᐃᖃᓗᖕᓂ ᐃᓕᓐᓂᐊᕐᕕᐊᓗᒃᒥ ᐊᓂᒍᐃᓂᑯ ᑲᑎᒪᔨᕐᔪᐊᓂᒡᓗ ᐅᐸᒍᑎᓚᐅᕐᓯᒪᓪᓗᓂ ᐊᕐᕌᓂ ᐅᖃᐅᓯᖃᖅᖢᓂ ᐱᒻᒪᕆᐊᓘᓂᖓᓂ ᐃᓅᓱᒃᑐᑦ ᐃᓄᐃᑦ ᐃᓕᓐᓂᐊᖅᑐᑦ ᐃᓄᒃᑎᑐᑦ ᐃᓚᒋᔭᐅᒍᓂ ᐅᑯᓇᙵᑦ 20-ᓂ ᓂᕈᐊᖅᑕᐅᓇᓱᒃᑐᓂ ᑲᓇᑕᓕᒫᒥ ᐆᒧᖓ $10,000 ᕈᐃᐅᓪ ᐹᖕᒃ ᓯᕗᓂᒃᓴᒧᑦ ᐃᓕᓐᓂᐊᕈᑎᓄᒃ ᐃᑲᔫᑎᖏᓐᓂ ᓄᓇᖃᖅᑳᖅᑐᑦ ᐃᓅᓱᒃᑐᖏᓐᓄᑦ.

ᐃᐊᓚ ᐊᔅᑎ ᖃᖓᑦᑎᐊᓵᖅ ᐊᓂᒍᐃᓚᐅᕐᑐᖅ ᒍᕇᑦ 12-ᒥ ᐃᓄᒃᓱᒃ ᐃᓕᓐᓂᐊᕐᕕᐊᓗᒃᒥ ᐊᒻᒪᓗ ᐃᓕᓐᓂᐊᕆᐊᓛᖅᖢᓂ ᓯᓚᑦᑐᖅᓴᕐᕕᐊᓗᒃᒥ ᐋᑐᕚᒥ (University of Ottawa) ᐅᑭᐊᒃᓵᙳᖅᐸᑦ.

ᐃᓕᓐᓂᐊᕈᑎᓄᑦ ᐃᑲᔫᑎᒃᓴᓂ ᓵᓚᒃᓴᖅᑐᑦ ᑐᓂᔭᐅᕙᒃᑐᑦ $10,000 ᐊᕐᕌᒍᒧᑦ ᑎᑭᓪᓗᒍ ᐊᕐᕌᒍᑦ ᑎᓴᒪᑦ ᐃᑲᔪᕈᑎᐅᓗᑎ ᐃᓕᓐᓂᐊᕈᑎᖏᓐᓄᑦ. ᓂᕈᐊᕆᔭᐅᔪᑦ ᐃᒪᓐᓇ ᓂᕈᐊᕆᔭᐅᕙᒃᑐᑦ ᐃᓕᓐᓂᐊᑦᑎᐊᕐᓂᖏᓐᓄᑦ ᐊᒻᒪ ᓄᓇᓕᖕᓂ ᖃᓄᐃᓕᐅᖃᑕᐅᕙᖕᓂᖏᑦᑎᒍᑦ.

ᐊᔅᑎ ᐃᓕᓐᓂᐊᕆᐊᑎᖅᑐᓕᒑᔪᖅ ᓯᓚᑦᑐᖅᓴᕐᕕᐊᓗᒃᒥ ᓇᓗᓇᐃᒃᑯᑎᑖᕋᓱᒃᖢᓂ ᐃᓕᓐᓂᐊᒐᒃᓴᓂ ᐊᔾᔨᒌᙱᑦᑐᓂ ᐊᒻᒪᓗ ᐃᖅᑲᓇᐃᔮᖅᑖᓛᕈᒪᓪᓗᓂ ᒪᓕᒐᓕᕆᓂᕐᒥ ᐅᕝᕙᓘᓐᓃᑦ ᒪᓕᒐᓕᐅᖅᑎᐅᓂᕐᒥ.

“ᖃᐅᔨᒪᔪᖓ ᑕᐃᒪᙵᑦ ᒥᑭᑎᓪᓗᖓ ᐃᖅᑲᓇᐃᔮᖃᓛᕈᒪᓪᓗᖓ ᐃᓄᖕᓂ ᐃᑲᔪᕈᑎᒋᔪᓐᓇᖅᑕᓐᓂ ᐊᒻᒪ ᓄᓇᓕᖕᓂ, ᐊᒻᒪᓗ ᐅᑯᐊ ᒪᕐᕉᒃ ᐊᖅᑯᑏᒃ ᑕᐃᒪᐃᓕᐅᕈᑎᒋᔪᓐᓇᕋᒃᑭ,” ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ

“ᓗᐊᐃᔭᐅᓗᓂᓘᓐᓃᑦ ᐊᒻᒪ ᐃᓄᖕᓂ ᐱᓕᕆᖃᑎᖃᕐᓗᓂ ᐊᑕᐅᓯᐅᓈᖅᑕᕐᓗᒋ ᐊᒻᒪ ᐃᑲᔪᕋᓱᒡᓗᒋᑦ ᖃᓄᐃᓕᖓᓂᖏᓐᓄ, ᐅᕝᕙᓘᓐᓃᑦ ᒪᓕᒐᓕᐅᖅᑎᐅᓂᕐᒥ ᑭᒡᒐᖅᑐᐃᔪᓐᓇᕐᓂᐊᕋᒪ ᓄᓇᒋᔭᓐᓂ.”

ᐊᔅᑎ, ᐃᓚᖃᕐᑐᖅ ᑲᓇᑕᐅᑉ ᐊᖓᔪᖅᑳᖃᖅᕕᖓᓂ ᐊᒻᒪ ᑕᐃᑯᖓ ᐳᓛᖅᐸᒃᖢᓂ, ᐅᖃᓚᐅᕐᑐᖅ ᖁᕕᐊᓱᑦᑎᐊᕐᓂᖓᓂ ᐃᓕᓐᓂᐊᕆᐊᕐᓂᐊᕐᓂᖓᓂᒃ ᓯᓚᑦᑐᖅᓴᕐᕕᐊᓗᒃᒧᑦ ᐋᑐᕚᒥ. ᖃᓄᐃᒋᙱᑦᑎᐊᕐᒪᒍ ᐃᓕᓐᓂᐊᕆᐊᖅᑐᕐᕕᒋᔭᕆᐊᒃᓴᖅ. ᐃᓕᓐᓂᐊᕐᕕᐊᓗᒃᒦᑎᓪᓗᒍᓕ, ᐃᓚᐅᓚᐅᕐᓯᒪᔪᖅ ᐃᓕᓐᓂᐊᕐᕕᐅᑉ ᐃᙱᖅᑎᖏᓐᓂ ᐊᒻᒪ ᐃᓕᓐᓂᐊᕐᕕᒃᒥ ᖃᓄᐃᓕᐅᕈᑎᐅᕙᓪᓕᐊᔪᓂᒃ ᐃᓚᖃᖅᖢᓂ ᐊᕐᓇᓂ ᐱᑦᑎᐊᖃᑦᑕᙱᓗᐊᕐᓂᕐᒥ ᓄᖅᑲᖅᑎᑦᑎᓇᓱᕐᓂᕐᒧᑦ.

ᐊᔅᑎ ᐃᓕᓐᓂᐊᖅᑎᓂ ᑭᒡᒐᖅᑐᐃᔨᐅᓚᐅᕐᓯᒪᔪᖅ ᐅᖃᐅᓯᖃᑲᑕᒃᑐᓂᒃ ᐃᓕᓐᓂᐊᕐᕕᖓᓂ ᐃᓄᒃᑎᑐᑦ ᐅᖃᐅᓯᖅ ᖃᐅᔨᔭᐅᓇᓱᖁᓪᓗᒍ.

ᐊᐃᕆᓕ 2023-ᒥ, ᐊᐱᕆᔭᐅᓚᐅᕐᓯᒪᔪᖅ ᓄᓇᕗᒧᑦ ᒪᓕᒐᓕᐅᖅᑎᒧᑦ ᓘᕆ ᐃᓪᓚᐅᖅᒧᑦ ᑲᑎᒪᔨᓄ ᓄᓇᖃᖅᑳᖅᑐᓕᕆᓂᕐᒥ ᐊᒻᒪ ᐅᑭᐅᕐᑕᖅᑐᓕᕆᔨᒃᑯᓐᓂ ᒪᓕᒐᓕᕆᕝᕕᒡᔪᐊᒧᑦ ᖃᐅᔨᓇᓱᒃᑎᓪᓗᒋᑦ ᖃᓄᖅ ᐱᐅᓯᕚᓪᓕᖅᑎᑦᑎᒐᔭᕆᐊᒃᓴᖏᓐᓂᒃ ᐊᓂᒍᐃᖃᑦᑕᕈᓯᖅ ᓄᓇᖃᖅᑲᖅᑐᓂᒃ ᐃᓕᓐᓂᐊᖅᑎᓄᑦ.

ᐊᔅᑎ ᐃᑲᔪᖅᑐᐃᓚᐅᕐᓯᒪᔪᖅ ᐱᒻᒪᕆᐊᓘᓂᖓᓂ ᐃᓄᒃᑎᑐᑦ ᐃᓕᓐᓂᐊᖅᑕᐅᔭᕆᐊᖃᕐᓂᖓ ᐊᒻᒪᓗ ᐃᓄᐃᑦ ᐃᓕᖅᑯᓯᖏᓐᓂᒃ ᐃᓕᓐᓂᐊᖅᑎᑦᑎᒃᑲᓐᓂᕐᓗᑎᒃ ᐱᐅᓯᕚᓪᓕᖅᑎᑦᑎᓇᓱᒡᓗᑎᒃ ᐊᓂᒍᐃᖃᑦᑕᕐᓂᕐᒥᒃ ᓄᓇᕗᒥᑦ.

ᐅᖃᕋᓗᐊᖅᖢᓂ ᑲᑎᒪᔨᓄᑦ ᐅᐸᒍᑎᓂᐊᕐᓂᖓᓂ, ᐊᔅᑎ ᐅᖃᓚᐅᕐᑐᖅ ᐃᓪᓚᐅᖅ ᐱᐅᒋᓂᕋᖅᖢᓂᐅᒃ ᐃᓄᖕᓂ ᑭᒡᒐᖅᑐᐃᓂᖓᓂᒃ ᓄᓇᖓᓄᑦ.