ᓄᓇᑦᓯᐊᖅ ᐱᕙᓪᓕᐊᔪᑦ ᐅᐱᒋᔭᖃᖅᑐᑎᑦ ᓴᖅᑮᔪᑦ ᐊᑯᓂᐊᓗ ᐱᕙᓪᓕᐊᔪᓕᕆᔨᐅᓚᐅᖅᑐᒥᑦ ᔨᒻ ᐱᐅᓪᒥᑦ ᐃᖅᑲᐅᒪᔭᐅᓪᓗᓂ ᐃᓕᓐᓂᐊᖅᑎᓄᑦ ᑮᓇᐅᔭᖅᑖᔅᓴᒫᓂᑦ

For an English version of this article, please read: Nunatsiaq News honours longtime editor Jim Bell with memorial bursary

ᔨᒻ ᐱᐅ ᐊᑎᖓ ᐊᑯᓂᐊᓗᒃ ᐃᖅᑲᐅᒪᔭᐅᓂᐊᖅᑐᖅ ᐃᓕᓴᕆᔭᐅᓯᒪᔪᖅ ᐱᓕᕆᓯᒪᔪᕐᔪᐊᕌᓘᖃᑦᑕᓚᐅᖅᓯᒪᓂᖓᓄᑦ ᐱᕙᓪᓕᐊᔪᓂᒃ, ᐅᑭᐅᖅᑕᖅᑐᒥ ᐃᓄᓐᓄᓪᓗ.

ᓄᓇᑦᓯᐊᖅ ᐱᕙᓪᓕᐊᔪᑦ ᐊᑦᑏᑲᓐᓂᖅᑐᓂ ᒪᕐᕉᓐᓂᒃ ᐃᓕᓐᓂᐊᖅᑐᓄᑦ ᑮᓇᐅᔭᖅᑖᔅᓴᒫᓐᓂᒃ ᐃᓄᓐᓂᒃ ᐱᕙᓪᓕᐊᔨᕈᕈᒪᒐᔭᖅᑑᓐᓂᒃ ᐱᐅᓪ ᑭᖑᓂᖓᓂ, ᐊᑯᓂᐊᓗᒃ ᐱᕙᓪᓕᐊᔪᓕᕆᔨᐅᓚᐅᖅᓯᒪᔪᖅ ᐃᖅᑲᓇᐃᔮᕆᓪᓗᓂᐅᒃ − ᐃᓅᓯᓕᒫᑦᑎᐊᖅ − ᐅᓐᓂᒃᑳᓕᐅᖅᐸᑦᑐᓂ ᓄᓇᕗᒻᒥ.

ᐱᐅᓪ ᐃᓅᒍᓐᓃᓚᐅᖅᓯᒪᔪᖅ ᐋᒡᒌᔅᓯ 2021−ᒥ, ᐅᑭᐅᖃᓕᖅᑐᓂ 69−ᓂᒃ, ᐃᖅᑲᓇᐃᔮᕇᓐᓇᓚᐅᖅᑕᖓ ᐱᕙᓪᓕᐊᔪᓕᕆᓂᖅ ᐱᒋᐊᖅᑐᓂᑦ ᐱᒋᐊᕐᖓᕐᓂᖏᓐᓂ 1980−ᑎᑦ ᓄᓇᑦᓯᐊᖅ ᐱᕙᓪᓕᐊᔪᓄᑦ.

“ᐅᑭᐅᓄᑦ 50−ᓄᑦ ᓄᓇᑦᓯᐊᖅ ᐱᕙᓪᓕᐊᔪᑦ, ᔨᒻ ᐱᐅᓪ ᓇᓗᒋᔭᐅᒍᓐᓃᑦᑎᐊᓚᐅᖅᑐᖅ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᐅᒋᐊᖓ ᐊᒻᒪᓗ ᐊᑎᖓ ᐊᔾᔨᑦᑎᐊᕆᓕᖅᑐᓂᐅᒃ ᑎᑎᕋᖅᓯᒪᔪᓂᒃ,” ᐅᖃᖅᑐᓂ ᒫᓐᓇ ᐊᐅᓚᑦᑎᔨᐅᔪᖅ ᑯᐊᕆ ᓚᕌᒃ.

2020−ᒥ, ᓄᓇᑦᓯᐊᖅ ᓴᖅᑮᓚᐅᖅᓯᒪᔪᖅ ᒪᕐᕉᓐᓂᒃ $5,000−ᓂᒃ ᐃᓕᓐᓂᐊᖅᑐᓄᑦ ᑮᓇᐅᔭᖅᑖᔅᓴᒫᖅ ᐃᓄᓐᓄᑦ ᓄᓇᕗᒻᒥ ᓄᓇᕕᒻᒥᓪᓘᓐᓃᑦ ᐱᕙᓪᓕᐊᔨᕈᕋᓱᐊᖅᑐᓄᒃ, ᑐᓴᐅᒪᖃᑦᑕᐅᑎᓕᕆᓂᕐᒥᑦ, ᐱᕙᓪᓕᐊᔪᓂᓪᓘᓐᓃᑦ ᓯᓚᑦᑐᖅᓴᕐᕕᒻᒥ ᓯᓚᑦᑐᖅᓴᕐᕕᔾᔪᐊᕐᒥᓪᓘᓐᓃᑦ.

ᑕᕝᕙᓂ ᐊᕐᕌᒍᒥ ᐱᒋᐊᕐᖓᕐᓂᖓᓂ, ᐊᑎᖓ ᐊᓯᔾᔨᖅᑕᐅᓚᐅᖅᑐᖅ ᐃᒫᒃ ᓄᓇᑦᓯᐊᖅ ᐱᕙᓪᓕᐊᔪᑦ – ᔨᒻ ᐱᐅᓪ ᐃᖅᑲᐅᒪᔭᐅᓂᖓᓐᓄᑦ ᐃᓕᓐᓂᐊᖅᑐᓄᑦ ᑮᓇᐅᔭᖅᑖᔅᓴᒫᑦ .

ᐊᑎᖓ ᐊᓯᔾᔨᖅᑕᐅᓪᓗᓂ, ᐃᓕᓯᒪᑦᑎᐊᓂᖅᓴᐅᒐᔭᕐᖓᑦ, ᓄᓇᑦᓯᐊᖅ ᐱᕙᓪᓕᐊᔪᑦ ᐅᑭᐅᖃᓕᖅᑎᓪᓗᒋᑦ 50−ᓂᒃ 2023 ᑎᑭᑦᑐᒍ. ᐱᒋᐊᓚᐅᖅᓯᒪᔪᖅ 1973−ᒥ ᐃᓄᒃᓱᒃ ᐱᕙᓪᓕᐊᔪᒃᑰᓪᓗᑎᑦ, ᓄᓇᑦᓯᐊᖅ ᐱᕙᓪᓕᐊᔪᕈᖅᑐᓂ 1976−ᒥ.

“ᔨᒻ ᑕᐃᑲᓃᓚᐅᖅᓯᒪᔪᖅ, ᑕᑯᓐᓇᖅᑕᐅᓯᒪᓪᓗᓂ, ᐱᒻᒪᕆᐅᔪᓂᒃ ᐱᕙᓪᓕᐊᔪᓂ ᓄᓇᕗᑦ ᖃᓄᐃᓐᓂᕆᓯᒪᔭᖏᓐᓂ ᐅᑭᐅᓄᑦ 50−ᓕᖅᑐᓄᑦ. ᐊᔾᔨᐅᓐᖏᑦᑐᓕᑐᐃᓐᓇᓂᓐᖏᑦᑐᖅ ᓄᑖᕐᒥ ᓄᓇᕗᕈᖅᐸᓪᓕᐊᔪᒥᑦ, ᑭᓯᐊᓂ ᐊᑎᖓ ᖃᐅᔨᒪᔭᐅᓂᖅᓴᐅᓕᖅᑐᓂᓗ ᑲᑉᐱᐊᑕᐃᑦᑐᓂᓗ ᐱᕙᓪᓕᐊᔪᓕᕆᓂᕐᒥᑦ ᐱᔪᒪᓂᖃᓪᓚᕆᑦᑐᓂ,” ᓚᕌᒃ ᐅᖃᖅᑐᓂ.

ᐃᓄᒍᓐᓃᕐᖓᑦ, ᐃᖅᑲᓇᐃᔭᖃᑎᒋᑦ ᐅᐱᒋᔭᖃᖅᑐᑎᑦ ᐱᐅᓪᒥᑦ ᐅᖃᐅᓯᖃᓚᐅᖅᓯᒪᔪᑦ ᖃᐅᔨᒪᔭᐅᑦᑎᐊᓕᖅᑐᓂ “ᑲᑉᐱᐊᑕᐃᑦᑐᒥᑦ”ᐱᕙᓪᓕᐊᔪᓕᕆᔨᐅᓪᓗᓂ.

ᓄᓇᑦᓯᐊᖅ ᐱᕙᓪᓕᐊᔪᒃᑯᑦ ᐱᓕᕆᖃᑎᖃᖅᑐᑎᑦ ᐊᓯᖏᓐᓂ (Indspire), ᑲᓇᑕᒥ ᑐᓂᓯᕙᑦᑐᓂᒃ ᑮᓇᐅᔭᓂᒃ ᑮᓇᐅᔭᖅᑎᒍᑦ ᐃᑲᔪᖅᓯᒪᔪᑦ ᐃᓄᓐᓂᑦ, ᐊᓪᓚᓂᑦ ᐊᓪᓚᖓᔪᓂᓪᓗ, ᓯᕗᓂᔅᓴᖃᑦᑎᐊᑲᓐᓂᕋᓱᓐᓂᕐᒧᑦ ᐃᑲᔫᑏᑦ.

“ᑕᒪᓐᓇ ᓈᒻᒪᑦᑎᐊᕐᖓᑦ ᐃᓕᓐᓂᐊᖅᑐᓄᑦ ᑮᓇᐅᔭᖅᑖᕈᑎᔅᓴᐃᑦ ᐊᑎᖃᖅᑐᖅ ᔨᒻᒥᑦ ᐅᐱᓐᓇᕋᓂ, ᓄᓇᑦᓯᐊᖅ ᐱᕙᓪᓕᐊᔪᒃᑯᑦ ᓱᓕ 50−ᑯᓐᓂᕐᓄᑦ ᐅᑭᐅᓄᑦ ᐃᖏᕐᕋᒍᒪᔪᑦ, ᑕᒪᒃᑯᐊ ᐃᓄᓐᓄᑦ ᐅᓂᒃᑳᕆᔭᐅᓛᖅᑐᔅᓴᐅᕗᑦ ᓯᕗᓂᑦᑎᓐᓂ ᐃᓅᖃᑎᖏᓐᓄᑦ. ᑕᒪᒃᑯᐊ ᓯᕗᓂᑦᑎᓐᓂ ᐱᕙᓪᓕᐊᔪᓕᕆᔨᔅᓴᐃᑦ ᐅᐱᒋᔭᖃᖅᑐᔅᓴᐅᕗᑦ ᐱᓕᕆᐊᕆᖃᑦᑕᓚᐅᖅᑕᖏᓐᓂ ᔨᒻ ᐱᐅᓪ,” ᐅᖃᖅᑐᓂ ᓚᕌᒃ.

ᐃᓕᓐᓂᐊᖅᑐᓄᑦ ᑮᓇᐅᔭᖅᑖᕈᑎᔅᓴᐃᑦ ᑐᓂᕐᕈᓯᐊᓚᐅᖅᑑᒃ ᒪᕐᕉᒃ ᐃᓅᒃ ᐃᓕᓐᓂᐊᖅᑏᑦ ᓄᓇᕗᒻᒥ 2021−ᖑᑎᓪᓗᒍ ᐊᒻᒪᓗ ᐃᓄ ᐃᓕᓐᓂᐊᖅᑎ 2022−ᒥ.

ᑐᓂᓯᔪᖃᓛᕐᒥᔪᖅ 2022-23−ᒥ ᐅᐱᕐᖔᒃᑯᑦ. ᑐᔅᓯᕋᐅᑏᑦ 2023-24−ᒧᑦ ᐃᓕᓐᓂᐊᖅᑐᓄᑦ ᐱᑎᑦᑎᒍᒪᕐᒥᔪᑦ ᐋᒡᒌᔅᓯ 1−ᒥ ᐊᒻᒪᓗ ᓅᕖᑉᐱᕆ 1−ᒥ ᑕᕝᕙᓂ ᐊᕐᕌᒍᒥ ᐊᒻᒪᓗ ᕖᕝᕗᐊᕆᒥ 1−ᒥ, 2024−ᖑᓕᖅᑲᑦ.

ᓴᖅᑮᑎᑦᑎᔨ ᑎᑎᕋᖅᓯᒪᔪᓂᒃ ᒪᐃᑯ ᕌᐳᑦ ᐃᓕᓴᖅᓯᒍᒪᓚᐅᖅᓯᒪᒻᒪᑦ ᐱᐅᒥᑦ ᐊᑦᑎᓚᐅᖅᓯᒪᔭᖓ ᐃᓕᓐᓂᐊᖅᑐᓄᑦ ᑮᓇᐅᔭᖅᑖᕈᑎᔅᓴᐃᑦ 2022−ᒥ, ᐊᕐᕌᒍᐸᓗᒃ ᐊᓂᒍᖅᑎᓪᓗᒍ ᐃᓅᒍᓐᓃᕐᕕᒥᓂᖓ ᐱᐅᓪ.

ᐊᓪᓛᒃ ᐱᐅᓪ ᐋᓐᓂᐊᕕᒻᒦᑎᓪᓗᒍ, ᐊᖏᔪᖅᑳᖓᓐᓂᑦ ᓂᓪᓕᐊᖃᑎᖃᖅᐸᔪᔪᖅ ᐅᑎᕈᒪᓪᓗᓂ ᐃᖅᑲᓇᐃᔮᒥᓄᑦ. ᐃᓛᓐᓂᑯᐃᓐᓇᐅᒐᓗᐊᖃᐃ ᐃᖅᑲᓇᐃᔭᑲᐃᓐᓇᖃᑦᑕᕐᓗᓂ, ᐊᖏᓚᐅᖅᓯᒪᔪᖅ.

ᐃᓕᓐᓂᐊᖅᑐᓄᑦ ᑮᓇᐅᔭᖅᑖᕈᑎᔅᓴᐃᑦ ᐱᐅᓪᒥᑦ ᐊᑕᐅᓯᑐᐃᓐᓇᖅ ᑐᓂᕐᕈᑎᒋᔭᐅᔪᓂᒃ ᐱᐅᓪᒥᑦ ᐃᓕᓴᖅᓯᓂᐅᔪᖅ ᑕᐃᒪᓐᖓᓂ ᐃᓅᒍᓐᓂᓚᐅᖅᓯᒪᒻᒪᑦ.

ᑯᐸᐃ ᓄᓇᓕᖏᓐᓂ ᐱᕙᓪᓕᔪᓂᒃ ᑲᑐᔾᔨᖃᑎᒌᑦ ᐊᑦᑏᓚᐅᖅᓯᒪᒻᒥᔪᑦ ᐊᑕᐅᓯᕐᒥᑦ ᐊᕐᕌᒍᑕᒫᑦᑕᐅ ᑐᓂᖃᑦᑕᕐᓂᐊᖅᑕᖓᓐᓂ ᐃᖅᑲᐅᒪᔭᐅᓪᓗᓂ ᐱᐅᓪ, ᑲᑉᐱᐊᑦᑕᐃᓐᓂᖓᓐᓄᑦ ᖃᐅᔨᒪᔭᐅᓪᓗᓂ, ᐱᔭᕆᐊᑐᔪᓕᕇᓐᓇᖅᑐᓂᑦ ᑎᑎᕋᖅᑎᐅᓚᐅᖅᑐᒥᑦ.

QCNA−ᑯᑦ ᑐᓂᕐᕈᑎᖃᖅᐸᑦᑐᑦ ᓄᓇᓕᓐᓄ ᐱᕙᓪᓕᐊᔪᓂᑦ ᑎᑎᕋᖅᐸᑦᑐᓂᑦ ᐊᑦᑎᖅᑕᐅᓯᒪᓪᓗᓂ ᔨᒻ ᐱᐅᒥᑦ ᑐᓂᕐᕈᑏᑦ ᐱᐅᓂᖅᐹᒥ ᐱᕙᓪᓕᐊᔪᓕᕆᔪᓂᑦ (ᓄᓇᓕᓐᓂ ᐱᕙᓪᓕᐊᔪᓂᒃ) 2022−ᒥ.

ᓄᓇᕗᑦ ᑐᖅᑯᐃᕕᐅᔪᑦ ᖁᓕᓂᑦ ᐃᑦᑎᕐᕕᐅᔭᑲᓪᓚᓐᓂᑦ ᐱᓚᐅᖅᓯᒪᔪ ᐱᐅᓪ ᑎᑎᕋᖃᑦᑕᖅᑕᒥᓂᖏᓐᓂ, ᐊᔾᔨᓐᖑᐊᓂᑦ ᐊᓪᓛᒃ ᑎᑎᕋᐅᔭᖅᑕᖏᓐᓂ ᐃᓱᒪᑐᒐᓱᐊᕐᓂᕐᒧᑦ ᐱᓕᕆᐊᕆᓯᒪᔭᖏ ᑕᒫᓂ ᐅᑭᐅᖅᑕᖅᑐᒥ ᖃᓄᐃᑦᑑᖃᑦᑕᖅᓯᒪᓂᖏᓐᓂ.

ᐱᐅᓪ ᐱᖃᑎᖏᑦᑕᐅ ᓴᖅᑮᓚᐅᖅᓯᒪᒻᒥᔪᑦ ᐃᓕᓴᕆᔭᐅᔪᒪᓪᓗᓂ ᐃᔅᓯᕚᕐᕕᒻᒥ ᐊᓃᕐᕕᔪᒥᑦ (Rotary Park).