ᑭᓕᒃᕙᒃ ᑲᓪᓘᓇ ᐃᓚᐅᓕᕐᐳᖅ ᑲᓇᑕᒥ ᐋᖅᑭᒋᐊᒃᑲᓐᓂᕐᓂᕐᒧᑦ ᑲᑎᒪᔨᓂ
ᓄᓇᕗᒥᑦ ᒥᓂᔅᑕᒧᑦ ᑐᒡᓕᕆᔭᐅᓂᑰᓪᓗᓂ ᐃᓚᒋᔭᐅᓕᕐᑐᖅ ᐆᒧᖓ ᔫᓴᕝ ᒨᑕᒃ-ᕙᓚᐅᕙᔅᒥ, ᐃᖃᓗᖕᓂ ᓗᐊᐃᔭ ᑲᑎᒪᔨᐅᖃᑕᐅᓯᒪᔪᖅ ᐱᒋᐊᖅᖢᓂ 2025
ᑭᓕᒃᕙᒃ ᑲᑉᓘᓇ, ᐅᕙᓂ ᐊᔾᔨᖃᕐᑐᖅ 2025-ᖑᑎᓪᓗᒍ, ᐃᓚᐅᑎᑕᐅᓂᐊᓕᕐᑐᖅ ᑲᓇᑕᒥ ᑲᑎᒪᔨᓂ ᐋᖅᑭᒋᐊᒃᑲᓐᓂᕐᓂᕐᒧᑦ (National Coucil for Reconciliation), ᑲᒪᒋᔭᖃᕐᓗᓂ ᖃᓄᐃᑉᐸᓪᓕᐊᓂᖏᓐᓂᒃ ᐋᖅᑭᒃᓱᐃᕙᓪᓕᐊᓂᒃᑯᑦ ᑲᓇᑕᒥ. (ᐊᔾᔨᙳᐊᖁᑎᖓ ᐋᑎ ᓵᑭᓯᐊᓐ)
For the English version of this story, please see Kilikvak Kabloona joins National Council for Reconciliation.
ᐊᖓᔪᖅᑳᖑᓪᓗᓂ ᐊᐅᓚᑦᑎᔨᕕᓂᖅ ᓄᓇᕗᑦ ᑐᙵᕕᒃᑯᓐᓂ ᑕᐃᔭᐅᓚᐅᕐᒪᓐ ᐱᓕᕆᐊᖃᖅᑐᓂ ᖃᐅᔨᓴᖅᐸᓪᓕᐊᓂᕐᒥ ᑲᓇᑕ ᐋᖅᑭᒋᐊᒃᑲᓐᓂᕐᓂᕐᒧᑦ ᐊᑐᕆᐊᖃᖅᑕᖏᓐᓂ ᐊᑐᕋᓗᐊᕐᒪᖔᑕ
ᑭᓕᒃᕙᒃ ᑲᑉᓘᓇ ᐃᓚᐅᓂᐊᓯᔪᖅ ᑲᓇᑕᒥ ᑲᑎᒪᔨᓂ ᐋᖅᑭᒋᐊᒃᑲᓐᓂᕐᓂᕐᒧᑦ
“ᐱᒃᑯᓇᑦᑎᐊᕐᑐᖅ,” ᑲᑉᓘᓇ ᐅᖃᓚᐅᕐᑐᖅ ᓯᑎᐱᕆ 17-ᒥ ᐊᐱᕐᓱᖅᑕᐅᑎᓪᓗᒍ.
ᓯᕗᓂᐊᓂ ᐃᖅᑲᓇᐃᔭᓚᐅᖅᑎᓐᓇᒍ ᓄᓇᕗᑦ ᑐᙵᕕᒃᑯᓐᓂ, ᓄᓇᕗᒥᑦ ᒐᕙᒪᒃᑯᓐᓄ ᐃᓚᒋᔭᐅᓚᐅᕐᑐᖅ ᒥᓂᔅᑕᓄ ᑐᒡᓕᕆᔭᐅᔪᓄᑦ, ᑲᒪᒋᔭᖃᖅᖢᓂ ᐃᓅᓯᖃᑦᑎᐊᕐᓂᕐᒥᓐ, ᐱᓕᕆᐊᖑᔪᖅ ᓄᓇᕗᒥᑦ ᐃᒻᒥᓃᖃᑦᑕᕐᓂᕐᒧᑦ ᐱᓕᕆᐊᓂ.
ᑕᐃᑲᓂᓕ ᐃᑲᔪᓚᐅᕐᑐᖅ ᐃᑲᔫᑎᒃᓴᖅᑖᕋᓱᖕᓂᒃᑯᑦ ᐅᑯᓄᖓ ᐊᖅᑯᓴᕆᐊᖅ ᒪᒥᓴᕐᕕᒃᒧᑦ ᐃᖃᓗᖕᓂᑦ, ᐅᖃᕐᑐᖅ, ᐱᓕᕆᐊᒃᓴᖅ ᒪᓕᒃᓯᒪᔪᖅ ᐃᓚᒋᔭᐅᔪᓂᒃ ᓱᓕᓂᕐᒧᑦ ᐊᒻᒪ ᐋᖅᑭᒋᐊᕐᓂᕐᒧᑦ ᑲᒥᓴᓐᑯ ᐊᑐᖁᓯᒪᔭᖏᓐᓂᒃ ᐱᐅᓯᕚᓪᓕᖅᑎᑦᑎᓂᕐᒥ ᓄᓇᖃᖅᑳᖅᑐᑦ ᒪᒥᓴᖅᐸᓪᓕᐅᔾᔪᑎᒃᓴᖏᓐᓂ.
“ᐃᖅᑲᓇᐃᔮᖃᕐᓂᓐᓂ ᑕᑯᓯᒪᕗᖓ ᐱᕙᓪᓕᐊᔪᓐᓇᕐᓂᕐᒥ ᖃᓄᐃᙱᓐᓂᕐᓴᐅᓂᒃᑯᑦ ᐃᓅᖃᑎᒌᑦᑎᐊᕐᓂᕐᒥ ᒪᐅᓇ ᐊᑐᓕᖅᑎᑦᑎᓂᒃᑯ ᐅᓂᒃᑳᓕᐊᕆᔭᐅᓯᒪᔪᓂ,” ᑲᑉᓘᓇ ᐅᖃᕐᑐᖅ.
ᐋᓐᓂᐊᖃᖅᑕᐃᓕᓂᕐᒥ ᑲᒪᒋᔭᖃᕐᓂᖅ ᓄᓇᕗᒥᑦ ᐱᐅᓯᕚᓪᓕᒃᑲᓐᓂᕆᐊᖃᕐᒪᓐ, ᐅᖃᕐᑐᖅ. ᐅᓄᕐᓂᕐᓴᐃᑦ ᐃᓄᐃᑦ ᑖᒃᑯᓇᓂ ᐱᓕᕆᐊᖃᕐᓂᕐᓴᐅᔭᕆᐊᖃᕐᒪᑦ ᐊᒻᒪ ᐊᔪᕈᓐᓃᖅᓴᕐᕕᒃᓴᓂ ᐊᑐᐃᓐᓇᖃᕐᓗᓂ, ᑖᓐᓇᑦᑕᐅᖅ ᓇᓗᓇᐃᖅᑕᐅᓯᒪᓚᐅᕐᑐᖅ ᖃᓄᐃᓕᐅᕈᑎᐅᔭᕆᐊᖃᕐᓂᖓᓂ, ᐅᖃᕐᑐᖅ.
“ᖃᓄᐃᓕᐅᕈᑎᒃᓴᑦ ᐊᑐᖅᑕᐅᑲᐅᑎᒋᔪᓐᓇᔾᔮᙱᑦᑐᑦ, ᖃᓄᐃᓕᐅᖅᐸᓪᓕᐊᓂᒃᑰᖓᓂᖓᓄᑦ ᐊᒻᒪᓗ ᐱᒻᒪᕆᐅᓪᓗᓂ ᐱᓕᕆᐊᖃᐃᓐᓇᕐᓂᕐᒥ ᐋᖅᑭᒋᐊᖅᐸᓪᓕᐊᓂᕐᒥᒃ, ᐅᓇ ᐅᖃᐅᓯᒃᓴᑐᐃᓐᓇᐅᙱᑦᑐᖅ,” ᐅᖃᕐᑐᖅ.
ᔫᓴᕝ ᒨᑖᒃ-ᕙᓚᐅᕙᔅ, ᐃᓚᐅᓕᕐᓂ ᐱᒋᐊᓕᖅᑎᓪᓗᒋᑦ ᑲᑎᒪᔩᑦ ᒫᔅᓯ 2025-ᒥ, ᐅᖃᕐᑐᖅ ᑲᑉᓘᓇᒎ ᐃᓱᒪᒋᑦᑎᐊᕐᓇᕐᒪᓐ ᑖᓐᓇᓗ ᐃᖅᑲᓇᐃᔭᕐᓂᑰᓪᓗᓂ ᐅᖃᐅᔾᔪᐃᔨᐅᓂᕐᒥ ᐱᓕᕆᓕᒪᓂᕐᓴᒃᑯᑦ ᐃᒻᒥᓃᖅᑎᑦᑎᑦᑕᐃᓕᓂᕐᒥᒃ.
“ᐱᓇᓱᑦᑎᐊᒻᒪᕆᖕᒪᓐ ᐊᒻᒪ ᐱᓇᓱᐊᑦᑎᐊᖅᖢᓂ ᐱᓕᕆᓂᒃᑯᑦ ᐊᑐᖅᑕᐅᔭᕆᐊᓕᖕᓂ ᐋᖅᑭᒋᐊᖅᐸᓪᓕᐊᓂᕐᒧᑦ. ᐊᒃᑐᐃᓯᒪᓂᖃᕐᒪᓐ ᓄᓇᓕᖕᓂ ᓄᓇᖃᖅᑎᑕᐅᕙᓪᓕᐊᓂᑯᓂ ᐊᒻᒪᓗ ᐋᖅᑭᒋᐊᒃᑲᓐᓂᕐᓂᕐᒥ ᐱᓕᕆᐊᖃᕆᐊᖃᕐᓂᕐᒥ ᑕᒪᑐᒧᖓ,” ᐅᖃᕐᑐᖅ ᒨᑖᒃ-ᕙᓚᐅᕙᔅ.
ᑲᓇᑕᒥ ᑲᑎᒪᔩᑦ ᐱᑕᖃᖅᑎᑕᐅᔪᑦ ᑲᓇᑕ ᒪᓕᒃᑲᓗᐊᕐᒪᖔᑦ 94-ᓂ ᖃᓄᐃᓕᐅᖁᔭᐅᔪᓂ ᐅᓂᒃᑳᓕᐊᑎᒍᑦ ᐅᑯᓇᙵᑦ ᓱᓕᓂᕐᒧᓐ ᐊᒻᒪ ᐋᖅᑭᒋᐊᕐᓂᕐᒧᑦ ᑲᒥᓴᓐᑯᓐᓂ, ᑖᒃᑯᐊᓗ 2015-ᒥ ᑎᑎᕋᐅᓯᖃᖅᐸᓪᓕᐊᓚᐅᕐᓯᒪᓪᓗᑎᒃ ᖃᓄᐃᓕᐅᕈᑎᕕᓂᕐᓂ ᐊᒻᒪ ᐊᒃᑐᐃᓯᒪᔾᔪᑎᖏᓐᓂᒃ ᐃᓕᓐᓂᐊᕆᐊᕕᐅᖃᑦᑕᕐᓂᑯᓄᑦ.
ᐃᒻᒥᒃᑰᖓᓪᓗᑎᒃ ᐊᒻᒪ ᓄᓇᖃᖅᑳᖅᑐᓄᑦ ᐊᐅᓚᑕᐅᓪᓗᓂ ᑲᒪᒋᔭᖃᖅᑐᑦ ᐅᓂᒃᑳᓕᐅᖃᑦᑕᕆᐊᖃᕐᓂᕐᒥᒃ ᑲᓇᑕᐅᑉ ᖃᓄᐃᓕᐅᖅᐸᓪᓕᐊᓂᖓᓂ ᐊᕐᕌᒍᙳᕌᖓᑦ. ᐋᖅᑭᒃᑕᐅᓚᐅᕐᓯᒪᔪᑦ 2025-ᒥ ᐊᒻᒪ ᐅᓂᒃᑳᓕᐊᖏᓐᓂ ᐊᐅᔭᖅ ᑐᓂᓯᑕᐃᓐᓇᖅᖢᑎᒃ.
ᑕᕝᕙᓂᓕ ᐅᓂᒃᑳᓂ ᐅᖃᕐᓯᒪᓚᐅᕐᑐᖅ ᑲᓇᑕ ᑕᒪᑐᒥᖓ ᐱᓕᕆᐊᖃᖅᐸᓪᓕᐊᓂᖓᓂᒃ ᐊᑐᖁᔭᐅᓯᒪᔪᓂᒃ ᒪᐅᓇ ᓴᖅᑭᑎᑦᑎᓂᒃᑯᑦ ᐱᔪᓐᓇᐅᑎᒃᑰᖓᔪᓂ ᒪᓕᒐᓕᐅᕐᓂᕐᒥ, ᓱᕈᓯᕐᓄᑦ ᐱᑦᑎᐊᖅᑕᐅᙱᔾᔪᑎᕕᓂᕐᓄᑦ ᐋᖅᑭᒋᐊᖅᓯᓂᒃᑯᑦ, ᐃᑲᔫᑎᖃᒃᑲᓐᓂᒃᑯᑦ ᐊᒻᒪ ᐊᖏᒡᓕᕚᓪᓕᖅᑎᑦᑎᓂᕐᒥ ᐱᓕᕆᖃᑎᒌᖃᑎᖃᕐᓂᕐᒥᒃ.
ᑭᓯᐊᓂᓕ, ᓇᓕᒧᒌᒃᑎᑦᑎᓂᖃᙱᓐᓂᖅ ᓱᕈᓯᓕᕆᓂᒃᑯᑦ, ᐃᓕᓐᓂᐊᖅᑐᓕᕆᓂᒃᑯᑦ, ᑮᓇᐅᔭᓕᐅᕈᑎᑎᒍᑦ, ᐋᓐᓂᐊᖃᖅᑕᐃᓕᓂᒃᑯᑦ ᐊᒻᒪ ᒪᓕᒐᓕᕆᓂᒃᑯᑦ ᓱᓕ ᐱᑕᖃᕐᒪᑕ, ᐅᖃᕐᓯᒪᖕᒥᔪᖅ ᐅᓂᒃᑳᑦ.
ᒨᑖᒃ-ᕙᓚᐅᕙᔅ ᐅᖃᓚᐅᕐᑐᖅ ᐅᓄᕐᑐᐃᑦ ᐊᓯᔾᔨᖅᑕᐅᔭᕆᐊᓖᑦ ᓱᓕ ᑲᒪᒋᔭᐅᔭᕆᐊᖃᕐᒪᑕ. ᐅᖃᖅᖢᓂ ᐱᓕᕆᐊᖃᐃᓐᓇᖅᑐᖃᙱᓗᐊᕐᓂᖓᓂᒃ, ᐊᑯᓂᒍᓗᑦ ᐱᓕᕆᐊᒧᑦ ᐃᑲᔫᑎᒃᓴᖃᙱᓐᓂ ᒐᕙᒪᒃᑯᓐᓂ ᐃᓚᒋᔭᐅᓪᓗᓂ.
“ᖃᐅᔨᒪᖕᒥᔪᒍᑦ ᑕᐃᒪᐃᙱᓐᓂᕋᐃᕙᓪᓕᐊᓂᖏᓐᓂᒃ ᑲᓇᑕᒥ,” ᐅᖃᕐᒥᔪᖅ.
ᑲᑉᓘᓇ ᐃᓚᒋᔭᐅᔪᖅ ᐱᖓᓱᓂ ᓄᑖᓂ ᑲᑎᒪᔨᐅᓂᐊᓕᖅᑐᓂ ᑖᒃᑯᓇᓂ, ᑖᒃᑯᐊᓗ ᐱᑕᖃᐃᓐᓇᕐᓂᐊᓕᖅᖢᑎᒃ, ᐅᖃᕐᑐᖅ ᐃᒃᓯᕙᐅᑕᕆᔭᐅᔪᖅ ᔫᓕ ᐋᓐ ᐅᕆᔅᑕ ᑐᓴᒐᒃᓴᓕᐊᑎᒍᑦ.
“ᐋᖅᑭᒃᓱᐃᓂᖅ ᓯᕗᓪᓕᖅᐹᒥ ᑲᑎᒪᔨᓂ ᑲᓇᑕᒥ ᑲᑎᒪᔨᓂ ᐋᖅᑭᒃᓱᐃᕙᓪᓕᐊᓂᕐᒧᑦ ᐱᒋᐊᕈᑎᒻᒪᕆᐅᔪᖅ. ᑐᙵᓱᒃᑎᑉᐸᕗᑦ ᐱᓕᕆᐊᖑᔪᖅ ᐊᒻᒪ ᑲᒪᒋᑦᑎᐊᕆᐊᖃᕐᓂᐊᖅᖢᑎᒍᑦ,” ᐅᕆᔅᑕᓐ ᐅᖃᕐᑐᖅ.
ᐊᒻᒪᓗ ᐃᓚᐅᖃᑕᐅᓕᕐᒥᔪᖅ ᐅᓇ ᐹᐳᕋ ᕕᓕᐊᓐ, ᐃᓚᒋᔭᐅᔪᖅ ᐃᓄ ᓄᓇᖏᓐᓂ ᒪᔅᑎᐅᐊᔅ ᐅᕙᓂ ᓵᒐᓂ-ᓛᒃ-ᓴᐃᓐ-ᔮᓐ (Innu Nation of Mashteuiatsh in Saguenay–Lac-Saint-Jean) ᐊᒻᒪᓗ ᐃᓚᒋᔭᐅᓪᓗᓂ ᑲᓇᑕᒥ ᑲᒥᓴᓐᑯᓐᓂ ᐅᑯᓄᖓ UNESCO, ᐊᒻᒪᓗ ᑯᓗᐊᓐ ᐋᑕᒥᒃ-ᐋᓐᔨᑯᓐᓂ (Kluane Adamek–Aagé), ᑲᑎᒪᔨᐅᓂᑯᑦ ᓄᓇᖃᖅᑳᖅᑐᓄᑦ ᐊᓪᓚᓄᑦ ᔫᑲᓐᒥ ᐊᖓᔪᖅᑳᖅ ᐅᕙᙵᑦ ᑯᓗᐊᓐ ᓄᓇᖃᖅᑳᖅᑐᓂ ᐊᓪᓚᓂ.
(0) Comments