ᑰᔾᔪᐊᑉ ᐃᓄᑐᖃᕐᓄᑦ ᐊᖏᕐᕋᕆᓚᐅᖅᑕᖓ ᐊᖅᑭᒃᓱᖅᑕᐅᔪᒃᓴᐅᑕᐅᕗᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᔨᕐᔪᐊᑦ ᐅᖃᖅᐳᑦ ᐃᒡᓗᕐᔪᐊᖅ ᐊᑦᑕᓇᙱᓐᓂᖅᓴᐅᓂᐊᖅᐳᖅ ᐃᖏᕐᕋᔾᔪᑎᓕᖕᓂ ᐃᒡᓗᖃᖅᑎᐅᔪᓄᑦ ᑭᓯᐊᓂ ᑭᐅᔾᔮᙱᓚᖅ ᐊᑯᓂᐅᔪᒃᑯᑦ ᐸᖅᑭᓂᕐᒥ ᓈᒻᒪᒋᔭᐅᔪᓄᑦ ᒪᓕᒐᒃᓴᓂ
ᑐᓵᔨᐊᐱᒃ ᐃᓄᑐᖃᒃᑯᑦ ᐊᖏᕐᕋᕕᓂᖓ ᑰᔾᔪᐊᕐᒥ ᕿᓚᒻᒥᐅᔪᒥ ᐊᖏᕐᕋᖃᙱᑦᑐᒃᑯᕕᙳᖅᑐᒃᓴᐅᑕᐅᕗᖅ ᐋᖅᑭᒃᓱᖅᑕᐅᕌᓂᒃᐸᑦ, ᐃᓚᖃᖅᑐᒥ ᐱᓕᕆᓂᕐᒥ ᐅᖅᑰᓴᐅᑎᖓᓂ ᐱᓕᕆᔾᔪᓯᖓᓂ, ᐱᔭᕇᖅᑕᐅᕙᒃᐸᑕ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᑑᒥᓂᒃ ᔩᓐᒧᑦ)
For the English version of this story, please see Kuujjuaq’s former elders’ home to undergo repairs before shelter opens.
ᑰᔾᔪᐊᑉ ᑐᓵᔨᐊᐱᒃ ᐃᓄᑐᖃᕐᓄᑦ ᐊᖏᕐᕋᖓ ᐱᓕᕆᐊᖃᕐᓂᐊᖅᐳᖅ ᐋᖅᑭᒃᓱᖅᑕᐅᓂᐅᔪᓂ ᐊᑦᑕᓇᙱᑦᑐᒥ ᐃᓄᖃᕈᓐᓇᕐᓂᐊᕐᒪᑕ ᓄᓇᓕᐅᑉ ᐊᖏᕐᕋᖃᙱᑦᑐᓂ ᐃᓄᒋᐊᖑᔪᓂ, ᑭᓯᐊᓂ ᓱᓕ ᑭᐅᔾᔮᙱᒻᒪᑦ ᓈᒻᒪᒋᔭᐅᔪᓂ ᒪᓕᒐᒃᓴᓂ.
ᐃᒡᓗᕐᔪᐊᖅ ᒪᑐᐃᓚᐅᙱᓐᓂᖓᓂ ᕿᓚᒻᒥᐅᔪᒥ ᐊᖏᕐᕋᖃᙱᑦᑐᒃᑯᕕᐅᓂᖓᓂ, ᓯᒥᒃᑕᐅᑎᑦ ᐅᖅᑰᓴᐅᑎᖓᓂ ᐱᓕᕆᔾᔪᓯᖓᓂ ᐃᓇᖏᖅᑕᐅᓂᐊᖅᐳᖅ, ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒥ ᑲᑎᒪᔨᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ ᐱᔨᑦᑎᕋᖅᑎᒃᑯᓐᓂ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐋᔩᖃᑎᒌᖕᓂᐅᔪᒥ ᐱᓕᕆᔨ ᔭᓐᑐᓪ ᐱᓕᐊᑦ−ᔫᓯᐱ ᓇᒃᓯᐅᔾᔭᖓᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐅᒃᑐᐱᕆ 27−ᒥ.
ᑕᐃᒪᐃᑦᑕᕆᐊᒃᓴᖅ, ᐅᖅᑰᓴᐅᑎᖓᓂ ᐱᓕᕆᔾᔪᓯᐅᔪᒥ ᖃᒥᑎᑕᐅᔭᕆᐊᖃᕐᓂᐊᖅᐳᖅ ᐅᓪᓗᓄᑦ ᑕᓪᓕᒪᓄᑦ.
ᐊᐃᑉᕆᓕᒥ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪ ᐅᖓᕙ ᑐᓚᑦᑕᕐᕕᒃ ᐋᓐᓂᐊᕕᖓ ᐅᖃᐅᓯᖃᓚᐅᖅᐳᑦ ᐊᑲᐅᙱᓕᐅᕈᑕᐅᔪᓂ ᐃᒡᓗᕐᔪᐊᑉ ᐅᖅᑰᓴᐅᑎᖓᓂ ᐱᓕᕆᔾᔪᓯᐅᔪᒥ ᐊᒻᒪ ᐊᓯᖏᓐᓂ “ᐊᖏᔪᓂ ᐱᔭᕆᑐᔪᓂ ᐃᓚᖏᓐᓂ.” ᑕᐃᒪᐃᓐᓂᖓᓄᑦ, ᑲᑐᔾᔨᖃᑎᒌᖑᔪᑦ ᓅᑎᑦᑎᓚᐅᖅᐳᑦ ᐃᒡᓗᖃᖅᑎᐅᔪᓂ ᒪᓐᑐᕆᐋᓪᒧᑦ ᐊᒻᒪ ᒪᑐᓯᓚᐅᖅᐳᖅ ᐊᖏᕐᕋᐅᔪᒥ.
ᐅᒃᑐᐱᕆ 23−ᒥ, ᑰᔾᔪᐊᖅ ᒪᐃᔭᐅᑉ ᑐᒡᓕᖓ ᑯᓘᑦ ᒑᑦᐳᐊᐃ ᐅᖃᐅᔾᔨᓚᐅᖅᐳᖅ ᕼᐋᒻᓚᒃᑯᓐᓂ, ᐃᒡᓗᓕᕆᔨᕐᔪᐊᒃᑯᓐᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᓐᓂᑦ ᐊᒻᒪ ᐋᓐᓂᐊᕕᖓ ᐱᔪᓐᓇᖅᑎᑦᑎᕗᖅ ᐃᒡᓗᕐᔪᐊᒥ ᐊᑐᖅᑕᐅᓂᖓᓂ ᐊᖏᕐᕋᖃᙱᑦᑐᒃᑯᕕᐅᓂᖓᓂ ᑎᑭᓐᓇᓱᐊᕐᓂᖓᓂ ᐅᒃᑐᐱᕆ 2027−ᒧᑦ.
ᐅᖃᓚᐅᕆᕗᖅ ᐃᒡᓗᕐᔪᐊᖅ ᐊᐅᓚᔪᒥ ᐃᒥᕐᒥᒃ ᑎᖕᒥᑳᕈᑎᖃᙱᓚᖅ.
ᒪᓕᒃᑐᒥ 2014−ᒥ ᐃᑭᑦᑐᒥ ᐃᓄᑐᖃᒃᑯᕕᖕᒥ ᐊᖏᕐᕋᖓᓂ L’Isle-Verte−ᒥ ᑐᖂᑦᑎᓚᐅᖅᑐᒥ 32−ᓂ ᐃᓄᖕᓂ, ᑯᐸᐃᒃ ᓴᖅᑭᑎᑦᑎᓚᐅᖅᐳᖅ ᐱᔭᕆᐊᖃᕐᓂᐅᔪᓂ ᐃᕐᙲᓐᓇᑲᐅᑎᒋ ᐃᒥᕐᒥᒃ ᑎᖕᒥᑳᕈᑎᒥ ᐱᓕᕆᔾᔪᓯᐅᔪᓂ ᐃᓄᑐᖃᒃᑯᕕᖕᓂ ᐊᖏᕐᕋᕆᔭᐅᔪᓂ ᐊᖏᕐᕋᖃᖅᑎᑦᑎᔪᓂ 10−ᓂ ᐅᓄᕐᓂᖅᓴᓂᒡᓘᓐᓃᑦ ᐃᓄᖕᓄᑦ. ᐃᓱᓕᕝᕕᒃᓴᖓ ᐃᒡᓗᕐᔪᐊᓄᑦ ᒪᓕᒋᐊᑦᑎᐊᕐᓂᕐᒧᑦ ᐅᖓᕙᕆᐊᖅᑕᐅᓚᐅᖅᐳᖅ ᑎᓯᐱᕆ 2027−ᒧᑦ.
ᐊᐱᕆᔭᐅᒐᒥᒃ ᖃᓄᐃᒻᒪᑦ ᐃᓄᑐᖃᐃᑦ ᓅᑕᐅᓚᐅᕐᒪᖔᑕ ᐊᕐᕌᒍᑦ ᐅᖓᑖᓄᑦ ᓯᕗᓂᓪᓗᐊᖓᓂ ᐃᓱᓕᕝᕕᒃᓴᖓᓄᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦᑕ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐅᖃᓚᐅᖅᐳᖅ “ᖃᔅᓯᒐᓚᖕᓂ ᐊᑲᐅᙱᓕᐅᕈᑎᖃᕐᓂᖓᓂ” ᐃᒡᓗᕐᔪᐊᒥ ᐋᖅᑭᒃᑕᐅᑲᐅᑎᒋᔪᓐᓇᙱᑦᑐᓂ ᕿᓚᒻᒥᐅᔪᒥ. ᓇᓗᓇᐃᖅᓯᓚᐅᙱᓚᑦ ᐃᒥᕐᒥᒃ ᑎᖕᒥᑳᕈᑎᖓ ᐱᓕᕆᔾᔪᓯᐅᔪᒥ ᐊᑲᐅᙱᓕᐅᕈᑕᐅᓂᖓᓂ.
ᐃᒪᓐᓇᖔᖅ, ᑐᓂᓯᓚᐅᖅᐳᑦ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐋᓐᓂᐊᕕᖕᒧᑦ ᐅᓂᒃᑳᕆᒃᑲᓐᓂᕐᓂᕐᒧᑦ.
ᐋᓐᓂᐊᕕᒃ ᑭᐅᓚᐅᙱᓚᖅ ᑐᒃᓯᕋᕐᓂᐅᔪᒧᑦ ᐅᖃᐅᓯᒃᓴᓕᐅᕐᓂᕐᒧᑦ.
ᐊᖏᕈᑕᐅᔪᒥ ᒫᓐᓇᐅᔪᒥ ᑎᑎᕋᖅᑕᐅᒋᐊᙵᕈᑕᐅᔪᒥ, ᓄᓇᕕᖕᒥ ᐃᒡᓗᓕᕆᔨᕐᔪᐊᒃᑯᑦ ᑲᒪᒋᔭᖃᐃᓐᓇᕐᓂᐊᖅᐳᑦ ᐋᖅᑭᐅᒪᑎᑦᑎᓂᕐᒧᑦ ᐊᒻᒪ ᒥᑭᑦᑐᓂ ᐋᖅᑭᒃᓱᐃᓂᐅᔪᓂ ᓇᖕᒥᓂᖃᕐᒪᑦ ᐃᒡᓗᕐᔪᐊᒥ. ᓇᖕᒥᓂᖃᕐᓂᐅᔪᒥ ᓅᑕᐅᔪᒃᓴᐅᑕᐅᕗᖅ ᐋᓐᓂᐊᕕᖕᒧᑦ, ᑲᒪᒋᔭᖃᕐᓂᐊᖅᑐᒥ ᐅᑯᓂᖓ ᑲᒪᒋᔭᕆᐊᖃᕐᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᐅᖃᓚᐅᖅᐳᖅ.
ᑐᓴᖅᑎᑦᑎᔾᔪᑎ ᓇᓗᓇᐃᖅᓯᒋᕗᖅ ᕼᐋᒻᓚᒃᑯᑦ ᐃᓄᑑᓗᑎᒃ ᑲᒪᒋᔭᖃᕐᓂᐊᖅᐳᑦ ᐊᐅᓚᑦᑎᓂᕐᒥ ᐊᖏᕐᕋᖃᙱᑦᑐᒃᑯᕕᐅᔪᒥ ᓄᕕᐱᕆ 5, 2026−ᒥ, ᐅᒃᑐᐱᕆ 21, 2027−ᒧᑦ.
ᑰᔾᔪᐊᑉ ᓯᕗᓂᐊᓂ ᐊᖏᕐᕋᖃᙱᑦᑐᒃᑯᕕᒋᓚᐅᖅᑕᖓ ᒪᑐᓚᐅᖅᐳᖅ ᓯᑎᐱᕆᒥ ᐱᐅᙱᓐᓂᖓᓂ ᖃᓄᐃᓕᖓᓂᖓᓂ, ᐃᓚᖃᖅᑐᒥ ᐃᒡᓘᑉ ᖄᖓ ᑯᑐᒃᐸᖕᓂᖓᓂ, ᐅᖁᖃᕐᓂᖓᓂ ᐃᓚᖏᓐᓂ ᐃᓂᐅᔪᓂ ᐊᒻᒪ ᑕᐃᒪᐃᖏᓐᓇᖅᑐᓂ ᑯᑐᒃᑐᓂ ᐱᑎᑕᐅᔪᒥ ᐊᑲᐅᙱᓕᐅᕈᑕᐅᔪᓂ ᕿᕿᓯᒪᔪᓄᑦ ᓱᓪᓗᑯᑖᓄᑦ, ᒑᑦᐳᐊᐃ ᐅᖃᓚᐅᖅᐳᖅ.
ᐃᓄᐃᑦ ᐊᑐᖅᐸᓚᐅᖅᑐᓂ ᐊᖏᕐᕋᖃᙱᑦᑐᒃᑯᕕᖕᒥ ᑐᐱᕐᓃᖃᑦᑕᖅᓯᒪᕗᑦ ᐃᒡᓗᕐᔪᐊᑉ ᖃᓂᒋᔭᖓᓂ.
ᕼᐋᒻᓚᒃᑯᑦ ᓱᓕ ᕿᓂᖅᐳᑦ ᑮᓇᐅᔭᖃᖅᑎᑕᐅᓂᕐᒥ ᐃᓕᓯᒪᐃᓐᓇᕐᓂᐊᖅᑐᒥ, 25-ᓂ−ᐃᒡᓕᓕᖕᒥ ᐊᖏᕐᕋᖃᙱᑦᑐᒃᑯᕕᖕᒥ, ᑕᐃᑲᓂᓪᓗᐊᑕᖅ ᐅᕝᕙᓘᓐᓃᑦ ᖃᓂᒋᔭᖓᓂ ᐃᓂᒋᔭᖓᓂ ᓄᑕᐅᙱᑦᑐᖅ ᐃᒡᓗᕐᔪᐊᖅ ᐃᒍᑦᑎᖅᑕᐅᒍᓂ.
15−ᓂ 25−ᐸᓗᖕᓄᑦ ᐃᓄᖕᓂ ᐱᔭᕆᐊᖃᖅᐳᑦ ᐊᖏᕐᕋᖃᙱᑦᑐᒃᑯᕕᖕᒥ ᑰᔾᔪᐊᕐᒥ ᖃᖓᑐᐃᓐᓇᑦᑎᐊᖅ ᐅᓪᓗᒥ, ᒑᑦᐳᐊᐃ ᐅᖃᓚᐅᖅᐳᖅ, ᐃᓚᖃᙱᑦᑐᒥ ᑕᐃᒃᑯᐊ ᑐᔪᕐᒥᔪᓂ ᐃᓚᒥᓂᑦ ᐅᕝᕙᓘᓐᓃᑦ ᓇᓚᕈᕐᕕᖕᒥ ᓯᓂᒃᐸᒃᑐᓂ.
(0) Comments