ᐃᓕᓐᓂᐊᕐᓂᖅ ᐅᖃᐅᓯᕗᑦ ᐊᑐᕐᖢᒍ

14-ᓂ ᐅᑭᐅᖃᓚᐅᕐᓯᒪᕗᖓ ᐊᐃᕆᓕ 1, 1999-ᒥᑦ, ᓄᓇᕗᑦ ᐱᒋᐊᓕᖅᑎᓪᓗᒍ. ᖃᐅᔨᒪᓗᐊᓚᐅᕐᓯᒪᙱᓚᖓ ᑕᐃᔅᓱᒪᓂ. ᐅᖃᕈᓐᓇᖅᐳᖓ ᖃᐅᒪᙱᑦᑎᐊᑲᓴᓐᓂᓐᓂᑦ. ᑕᐃᒪᐃᒃᑲᓗᐊᖅᑎᓪᓗᒍ, ᐃᓅᓱᒃᑑᓪᓗᖓ ᐃᖃᓗᖕᓂᑦ ᐃᓅᓂᑰᓪᓗᖓ ᐃᓄᖕᒧᑦ ᐊᓈᓇᓐᓄᑦ ᐊᒻᒪ ᐳᐊᑎᒌᔅᒥ ᐊᑖᑕᖃᖅᖢᖓ, ᖃᐅᔨᕙᓪᓕᐊᓕᖅᖢᖓ ᐃᓅᓯᕐᒥᒃ ᐊᒻᒪ ᓇᖕᒥᓂᐅᔪᓐᓇᕐᓯᓂᕐᒥᒃ, ᐅᔾᔨᕆᓚᐅᕐᐳᖓ ᑖᔅᓱᒥᖓ ᐊᑐᖅᑕᐅᕐᔪᐊᕐᓂᑯᒥᑦ—ᓄᓇᕗᑦ ᐱᒋᐊᕐᓂᖓᓂᒃ.

ᐅᐱᒍᓱᒃᖢᖓ ᐅᖃᕈᓐᓇᖅᐳᖓ ᓄᓇᕗᑦ ᓯᕗᓂᒃᓴᕗᑦᒧᑦ ᐃᓚᒋᔭᐅᓂᓐᓂᑦ (NS). ᐃᓕᓐᓂᐊᕐᓂᒧᑦ ᐱᔪᓐᓇᕐᓯᓯᒪᓂᓐᓂᑦ ᓄᓇᕗᑦ ᓯᕗᓂᒃᓴᕗᑦᒥᑦ, ᐃᓕᑦᑎᓚᐅᖅᐳᖓ ᓂᕆᐅᒋᔭᐅᓂᑯᓂᒃ ᐊᒻᒪ ᐃᓱᒪᒋᔭᐅᓯᒪᔪᓂᒃ ᐊᒥᓱᓄᑦ ᐃᓄᖕᓄᑦ ᓴᙱᔪᕕᓂᕐᓂᒃ ᒐᕙᒪᐅᔪᓂᒃ ᑭᐅᓗᒍᓐᓇᖅᑐᓂᒃ ᑲᑕᒍᑎᒋᓯᒪᔭᖏᓐᓂᒃ ᐃᓕᓐᓂᐊᓚᐅᕐᓂᓐᓂᒡᓕ ᓄᓇᕗᒥᑦ ᐃᓕᓐᓂᐊᕐᕕᐊᓗᖕᒥᑦ ᐊᑐᖅᑕᐅᕙᒃᑐᓂᒃ.

ᐃᓱᒪᒋᔭᒃᑯᓪᓕ, ᓄᓇᕗᒥᑦ ᐃᓕᓐᓂᐊᕐᕕᐊᓗᖕᒥᑦ ᐃᓕᓐᓂᐊᕈᓯᖅ ᐃᓱᒪᖃᕐᓂᕐᓴᐅᖂᔨᑎᑦᑎᓯᒪᖕᒪᑦ ᐃᐅᕈᑉᒥᑦ ᖃᓄᐃᓕᐅᕈᓯᕕᓂᕐᓂᒃ ᒪᑯᓂᖓᐅᙱᑦᑐᖅ ᐃᓄᐃᑦ ᖃᐅᔨᒪᔭᖏᓐᓂᒃ ᐊᒻᒪ ᐊᑐᖅᓯᒪᓂᑯᖏᓐᓂᒃ. ᑕᐃᒪᐃᑎᑦᑎᓯᒪᓂᖓ ᐊᒥᓱᓂᒃ ᐃᓅᓱᒃᑐᓂᒃ ᐃᓄᖕᓂᑦ ᓯᕗᓂᓐᓂᑦ ᑭᖑᓂᓐᓂᓪᓗ, ᓄᓇᕗᑦ ᓯᕗᓂᒃᓴᕗᑦ ᐃᓕᓯᒃᑲᓐᓂᓚᐅᕐᐳᖅ ᐱᒃᑯᓕᒍᑎᒃᓴᓐᓂᒃ ᑭᓇᐅᓂᓐᓂᒃ ᐊᒻᒪᓗ ᓇᑭᙶᕐᓂᓐᓂ.

ᐊᓱᐃᓛᒃ ᐊᓂᒍᖅᐸᓪᓕᐊᑎᓪᓗ ᐊᒻᒪ ᐃᓕᑦᑎᕙᓪᓕᐊᓪᓗᖓ ᓂᕆᐅᒋᔭᐅᓂᑯᓂᒃ ᐊᒻᒪ ᐃᓱᒪᒋᔭᐅᓯᒪᔪᓂᒃ ᓯᕗᓕᐅᕐᑎᑦᑎᓐᓄᑦ, ᓴᕿᑕᐅᓯᒪᓗᐊᕐᑐᑦ ᐊᒥᓲᙱᑦᑐᓄᑦ ᐅᖃᕈᓐᓇᑦᑎᐊᖅᑐᓄᑦ ᐃᓄᖕᓄᑦ, ᑐᑭᓯᕙᓪᓕᐊᕗᖓ ᖃᓄᖅ ᐱᒻᒪᕆᐅᓂᖓᓂᒃ ᓄᓇᕗᑦ ᐱᒋᐊᕐᓂᕆᓚᐅᕐᑕᖓ—ᐊᒻᒪᓗ ᑕᐃᒪᐃᑦᓗᐊᖅᖢᓂ ᒫᓐᓇ—ᐃᓄᒃᓄᑦ. ᑕᐃᒪᐃᓐᓂᖓᓄᑦ, ᓂᕆᐅᒃᐳᖓ ᓇᖕᒥᓂᖅ ᖃᓄᐃᓕᐅᕐᓂᒃᑯᑦ ᐱᓇᓱᐊᒐᕗᑦ ᓯᕗᒧᕐᑎᒃᑲᓐᓂᕐᓗᒋ, ᐊᑐᕐᓗᑕ ᐊᒥᓱᓂᒃ ᖃᓄᐃᓕᐅᕈᑎᐅᔪᓐᓇᖅᑐᓂᒃ, ᒪᑯᑎᑐᓇᖅ ᐅᖃᖃᑎᖃᕈᓐᓇᖅᑐᓂᒃ (ᑕᒪᑐᒧᖓ ᐅᖃᐅᓯᒃᓴᓂᒃ) ᐊᒻᒪ ᓇᖕᒥᓂ ᐱᓕᕆᓂᒃᑯᑦ (ᑭᓱᓕᕆᓂᖅ ᐃᓱᒫᓘᑎᓂᒃ).

ᓲᕐᓗ ᐃᒪᓐᓇ, ᐃᓛᓐᓂᒃᑯᑦ ᓈᒻᒪᖏᓗᐊᕋᓱᒋᖃᑦᑕᕋᒪ ᒪᐅᓇ ᐅᖃᕈᓐᓇᕐᓂᒃᑯᑦ ᐃᓄᒃᑎᑐᑦ, ᑕᐃᒪᐃᔾᔪᑎᖃᖅᖢᓂ ᖃᓪᓗᓇᐅᔭᒻᒪᕆᓕᕐᓂᖏᓐᓂᒃ ᐃᖃᓗᖕᓂ. ᑕᒪᓐᓇ ᐅᖃᐅᓯᕆᓚᐅᖅᐸᒃᐸᕋ, ᑭᓯᐊᑦᑕᐅᖅ ᐃᓄᒃᑎᑐᑦ ᐃᓕᓐᓂᐊᒃᑲᓐᓂᕋᓱᖃᑦᑕᖅᐸᕋ, ᑕᐃᒪᓐᓇᓗ ᐊᔪᕈᓐᓃᖅᐹᓪᓕᖅᖢᓂᒡᖓ ᐊᒻᒪ ᐅᕙᓐᓂᒃ ᐃᓄᒃᑎᑐᑦ ᐅᖃᓪᓚᒍᓐᓇᕐᓂᕐᓴᐅᒋᓕᖅᖢᖓ.

ᐅᔾᔨᕆᕗᖓ ᑕᐃᔅᓱᒪᓂ ᒫᓐᓇᓘᓐᓃᑦ, ᐃᒪᓐᓇ ᐃᓅᓯᑦᑎᓐᓂᒃ ᓴᐳᔾᔨᓯᒪᔪᐃᓐᓇᐅᔪᒪᓚᐅᕐᐳᒍᑦ—ᐱᓗᐊᕐᑐᒥᒃ ᓵᖓᑎᓪᓗᑕ ᓇᓗᓇᖅᑐᒥᑦ ᐊᒻᒪ ᐊᓯᙳᖅᐸᓪᓕᐊᔪᒥᒃ. ᐅᖃᐅᓯ ᐅᖃᖅᑕᕋ ᐱᐊᓂᒃᓯᒪᔪᑎᑐᑦ ᐅᖃᖅᑐᖅ ᐃᓕᓴᕆᓯᒪᓪᓗᒋᑦ ᐃᓄᐃᑦ ᑕᒪᑐᒧᖓ ᓴᐱᓕᕐᓯᒪᓕᕐᑐᑦ ᓴᐳᔾᔨᓯᒪᓂᕐᒥᒃ ᐃᓅᓯᑦᑎᓐᓂ. ᐃᓄᐃᑦ ᑐᑭᓯᓯᒪᔭᕆᐊᖃᖅᑐᑦ ᐊᑐᖅᑐᕕᓂᕐᓂᒃ ᑕᐅᑐᓚᐅᕐᓯᒪᔭᑦᑎᓐᓂᒃ.

ᑕᐅᑐᒃᖢᒍ ᐃᓄᐃᑦ ᐅᖃᐅᓯᖓᓂᒃ ᓴᐳᔾᔨᓯᒪᓂᕐᒧᑦ ᐱᖁᔭᕐᔪᐊᖅ, ᐃᓄᐃᑦ ᐱᔪᓐᓇᕐᓂᕐᒥᒃ ᐃᓱᒪᔭᕆᐊᖃᖅᑐᑦ ᐃᓕᓐᓂᐊᖅᑐᓕᕆᓂᕆᔭᕗᑦ ᐃᓕᓴᐃᓕᕈᑎᐅᔪᓐᓇᕐᓂᖓᓂᒃ ᐃᓄᒃᑐᑦ ᐊᑐᕐᓗᑎᒃ ᐃᓕᓐᓂᐊᓕᓵᖅᑐᓂᒃ ᒍᕇᑦ 12-ᒧᑦ 2019 ᑎᑭᓯᒪᓕᕐᑎᓪᓗᒍ. ᑭᓯᐊᓂᓕ, ᒫᓐᓇ, ᓄᓇᕗᑦ ᐃᓕᓐᓂᐊᕐᑐᓕᕆᓂᖓᒍᑦ ᐊᔪᕐᓇᕋᓱᒋᓗᐊᕋᑦᑎᒍᑦ ᐃᓄᒃᑐᑦ ᐅᖃᐅᓯᖅ ᐊᑐᕐᓗᒍ ᐃᓕᓴᐃᔪᓐᓇᕐᓂᖏᓐᓂᒃ ᐱᐅᔪᒃᑯᑦ 2019-ᒥᑦ, ᐱᒋᐊᓕᓵᕐᓂᖏᓐᓂᒡᓘᓐᓃᑦ ᒍᕇᑦ 3-ᒧᑦ.

ᐅᕙᖓᑦᑕᐅᖅ ᐃᕐᓂᖃᕋᒪ ᒫᓐᓇ ᐃᓕᓐᓂᐊᓕᕐᑐᒥᒃ ᒍᕇᑦ 1-ᒥᑦ ᐃᓄᒃᑑᕐᑐᓂᒃ. ᑐᒥᑯᓗᐃᑦ ᓱᕈᓯᓛᓄᑦ ᐃᖃᓗᖕᓂ ᐃᓚᒋᔭᐅᓯᒪᓪᓗᖓ, ᐅᕙᓐᓂ ᐊᐱᕆᓯᒪᕗᖓ ᐃᓕᓐᓂᐊᖅᑎᒋᐊᖃᖅᐸᕌ ᐃᓄᒃᑐᑦ ᐃᓕᓐᓂᐊᖅᑐᓕᕆᓂᕐᒥᒃ ᐃᓕᓐᓂᐊᕐᕕᒃᒦᑦ, ᐃᓱᒪᖃᖅᖢᖓ ᑐᓴᕐᓯᒪᔭᓐᓂ ᓄᓇᕗᑦ ᐃᓄᒃᑐᑦ ᐅᖃᐅᓯᕐᒥᑦ ᐊᑐᖅᖢᑎᒃ ᐃᓕᓴᐃᕙᖕᓂᖏᓐᓂᒃ. ᐅᑯᐊ ᐃᓚᖃᖅᑐᑦ ᐃᓄᖕᓂᑦ ᐃᓕᓴᐃᔨᓂᒃ ᑐᓴᕐᓯᒪᔭᖕᓂᑦ ᐃᓕᓐᓂᐊᕈᑎᓕᐅᕆᐊᖃᖅᑐᓂᒃ ᐃᑲᔪᖅᑕᐅᑦᑎᐊᙱᖢᑎᒃ ᐃᓕᓐᓂᐊᖅᑐᓕᕆᔨᒃᑯᓐᓂᑦ. ᐅᑯᐊ ᐃᓕᓴᐃᔩ ᐱᒋᐊᖅᑎᑦᑎᔨᐅᑎᑕᐅᓇᓱᒃᑐᑦ ᐋᕿᒃᓱᐃᕙᓪᓕᐊᓂᕐᒥᒃ ᐃᓄᒃᑐᑦ ᐅᖃᐅᓯᒃᑯᑦ ᐃᓕᓐᓂᐊᕈᑎᒃᓴᓂᒃ ᐊᒻᒪ ᐃᑲᔫᑎᒃᓴᓂᒃ ᓄᓇᕗᑦ ᐃᓕᓴᐃᔨᖏᓐᓄᑦ. ᐱᒋᐊᒃᑲᓐᓂᕋᓱᖕᓂᕐᒧᑦ, ᑕᐅᑐᓗᐊᓚᐅᕐᑐᖓ ᖃᓄᐃᓕᐅᕐᓂᖏᓐᓂᒃ ᐃᓕᓐᓂᐊᖅᑐᓕᕆᔨᒃᑯᑦ ᐃᓱᒪᓕᐅᕆᓚᐅᕐᓂᖏᓐᓂᒃ “ᐱᓕᕆᐊᖃᐅᕐᓗᑎᒃ” ᐱᒻᒪᕆᐅᓂᖏᑦᑎᒍᑦ ᐊᒻᒪ ᐱᓕᕆᐊᒃᓴᒻᒪᕆᖕᓂ ᐃᓄᖕᓄᑦ ᑐᓂᓯᓪᓗᑎᒃ ᐃᓚᓕᐅᔾᔨᑲᑕᖕᓂᐊᕐᒪᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓕᓐᓂᐊᖅᑐᓕᕆᓂᑦᑎᓐᓄᑦ (ᑕᑯᓗᒍ https://bit.ly//2BMnimA).

ᖃᐅᔨᒪᔪᖓ ᐊᒥᓱᑦ ᐃᓄᐃᑦ ᐃᒪᐃᓯᒪᓕᕐᒪᑕ—ᑕᐃᒪᐃᑐᐃᓐᓇᕆᐊᖃᓕᖅᖢᑎᒡᓘᓐᓃᑦ—ᒐᕙᒪᑦᑎᓐᓂᒃ ᐅᒃᐱᕈᓱᓗᐊᕈᓐᓃᖅᖢᑎᒃ ᐅᖃᐅᓯᑦᑎᓐᓂᒃ ᓴᐳᔾᔨᓯᒪᔪᓐᓇᕆᐊᒃᓴᖏᓐᓂᒃ ᐃᓅᓯᑦᑎᓐᓂᓪᓘᓐᓃᑦ. ᒐᕙᒪᒋᔭᐅᕗᑦ ᓯᕗᓕᐅᕐᑎᕗᑦ ᐊᒻᒪ ᒪᓕᒐᓕᕆᓂᒃᑯᑦ ᐱᓕᕆᔨᐅᕙᒃᑐᑦ ᐱᔭᒃᓴᖃᕐᓂᕐᓴᐅᖂᔨᖕᒪᑕ ᑕᐅᑐᒃᑕᐅᓂᕐᓴᐅᓇᓱᖕᓂᕐᒥᒃ ᐅᑯᐊ ᓇᒃᓴᖅᑕᐅᓯᒪᓂᑯᓂᒃ ᓄᓇᑐᖃᖏᓐᓂᒃ ᒪᑯᓇᙵᑦ ᐊᐅᓚᑕᐅᓂᑰᓪᓗᑎᒃ ᐊᖓᔪᒃᖠᕐᓄᑦ ᐃᓅᙱᑦᑐᓄᑦ ᒪᓕᒐᓕᕆᓂᕐᒥᑦ ᐱᓕᕆᔨᓄᑦ ᐊᒻᒪ ᐃᖅᑲᓇᐃᔭᖅᑎᓄᑦ.

ᑎᓯᐱᕆ 31, 2018-ᒥᑦ, ᐊᕙᑎᓂᒃ (20) ᐊᐅᓚᑦᑎᓂᕐᒧᑦ ᐃᖅᑲᓇᐃᔮᓂᒃ ᐃᓕᓐᓂᐊᖅᑐᓕᕆᓂᕐᒧ, 16 ᐃᓄᖃᓚᐅᕐᑐᑦ, ᐊᒻᒪᓗ ᐱᑕᖃᓚᐅᙱᑦᑐᖅ (0) ᐃᓄᖕᒥᑦ ᐃᖅᑲᓇᐃᔭᖃᑕᐅᔪᒥᒃ ᑖᒃᑯᓇᓂ. ᐊᒻᒪᓗ ᐃᓚᖏᑦ ᐊᓂᒍᐃᓯᒪᔪᑦ ᓄᓇᕗᒥᑦ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓂ ᐃᓕᓴᐃᔨᐅᓇᓱᒍᓐᓃᖅᑐᑦ ᓲᖃᐃᒻᒪ ᑮᓇᐅᔭᓕᐅᕐᓇᕐᓂᕐᓴᓂᒃ ᐃᖅᑲᓇᐃᔮᖃᓕᕐᒪᑕ ᒐᕙᒪᒃᑯᓐᓃ?

ᐅᓇᖃᐃ ᐊᔾᔨᒌᙱᑎᑦᑎᓂᖅ ᓴᕿᔮᓛᖑᔪᖅ ᐃᖃᓗᖕᓂᑦ, ᓄᓇᕗᑦ ᐊᖓᔪᖅᑳᖃᕐᕕᖓ, ᑮᓇᐅᔭᓕᐅᕐᓇᓛᖑᒋᔭᐅᓪᓗᓂ, ᑕᕝᕙᓂᓗ ᐊᒥᓲᓂᕐᓴᑦ ᑮᓇᐅᔭᓕᐅᕈᑎᐅᔪᑦ ᑐᕌᖓᓂᕐᓴᐅᓪᓗᑎᒃ—ᓈᒻᒪᒋᔭᐅᕙᙱᒃᑲᓗᐊᖅᖢᑎᒃ ᐊᒥᓲᓂᕐᓴᓄᑦ ᐃᓄᖏᓐᓄᑦ, ᐃᓄᖕᓂᑦ ᐊᒻᒪ ᓄᓇᓕᖕᓂ, ᑖᒃᑯᐊ ᑕᐅᑐᙳᐊᕐᓯᒪᓪᓗᑎᒃ ᑮᓇᐅᔭᖅᑖᕈᑎᐅᔪᓐᓇᖅᑐᒥ ᑭᓱᖃᑦᑎᐊᖅᑐᒥ ᑎᐅᕆᑑᕆᒥ ᓄᓇᕗᑦ ᐱᒋᐊᖅᐸᑦ 1999-ᒥ. ᑭᐅᓗᔾᔮᙱᑦᑐᖓ ᓈᒻᒪᒋᔭᐅᔾᔪᑎᐅᓂᑯᓂᒃ. ᖃᓄᕐᓕ?

ᖃᐅᔨᕙᓪᓕᐊᓂᕐᓴᐅᑎᓪᓗᖓ ᐊᒻᒪ ᐊᑐᕐᓯᒪᔭᓐᓄᑦ, ᐅᔾᔨᕆᓂᕐᓴᐅᓕᕐᐳᖓ ᖃᓄᑎᒋ ᐅᖓᓯᒃᓴᕐᓂᕐᓴᐅᓕᕐᓂᑦᑎᓐᓂᒃ ᐃᓄᐃᑦ ᓂᕆᐅᒋᓚᐅᖅᑕᖏᓐᓂᒃ ᐊᒻᒪ ᐃᓱᒪᒋᓚᐅᕐᑕᖏᓐᓂᒃ. ᐊᕐᕌᒍᑦ ᐊᕙᑎᑦ (20) ᐊᓂᒍᕐᑎᓪᓗᒋᑦ, ᓱᓕ ᐊᒃᓱᕉᑎᖃᖅᐳᒍᑦ ᐅᖃᐅᓯᑦᑎᓐᓂ ᓴᐳᔾᔨᓯᒪᓇᓱᒃᖢᑕ, ᐃᓕᖁᓯᑦᑎᓐᓂᒃ, ᐃᓕᓐᓂᐊᕐᓂᕐᒥᒃ ᐊᒻᒪ ᐋᓐᓂᐊᖃᖅᑕᐃᓕᕐᒧ ᐃᓅᖃᑎᑦᑎᓐᓄᑦ. ᖃᓄᐃᒻᒪ ᑕᐃᒪᐃᑉᐸ? ᐃᓱᒪᔪᖓᓕ ᑖᓐᓇ ᐊᐱᖅᑯᑎ ᐃᓱᒪᒋᖃᑦᑕᕐᓂᑦᑎᓐᓂᒃ. ᐱᓗᐊᕐᑐᒥᒃ ᓄᓇᕗᒧᑦ ᐊᖏᕈᑎᑎᒍᑦ ᐱᔪᓐᓇᖅᑎᑕᐅᓯᒪᓪᓗᑕ. ᐱᓗᐊᕐᑐᒥᒃ ᐊᑐᕈᓐᓇᖅᑐᓂᒃ ᐊᒻᒪ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᓴᕿᑎᑦᑎᓯᒪᑎᓪᓗᒋᑦ ᓄᓇᕗᑦ ᐱᒋᐊᓕᓵᕐᓯᒪᑎᓪᓗᒍ, ᐃᓚᖃᖅᖢᓂ “ᑭᙵᐅᒥᑦ ᐊᑐᒐᒃᓴᑦ,” ᐅᓂᒃᑲᐅᓰᑦ ᓄᓇᕗᑦ ᓯᕗᓪᓕᐅᑎᓂᐊᖅᑕᖏᓐᓂᒃ ᓯᕗᓪᓕᖅᐹᓂᒃ ᐊᕐᕌᒍᓂᒃ ᑕᓪᓕᒪᓂᒃ (5) ᐱᒋᐊᕐᓂᖓᓂᒃ. ᐱᓗᐊᕐᑐᒥ 2002-ᒥ “ᐃᓄᐃᑦ ᖃᐅᔨᒪᔭᑐᖃᖏᑦ ᐱᓕᕆᔨᖏᑦᑕ ᐅᓂᒃᑳᖏᓐᓂᒃ.” ᐊᒻᒪᓗ ᐱᓗᐊᕐᑐᒥᑦ 2006-ᒥ “ᓄᓇᕗᒥᑦ ᐱᓕᕆᐊᒃᓴᖅ” ᐅᓂᒃᑳᑦ ᑎᑎᕋᖅᑕᐅᓂᑯᑦ ᑖᒪᔅ ᐴᔪᒧᑦ ᐊᕐᕌᒍᑦ 13 ᑭᖑᓂᑦᑎᓐᓂ  ᐃᓱᒪᓯᒪᓪᓗᓂ ᐅᖃᕐᓯᒪᓪᓗᓂ ᓄᓇᕗᑦ ᖁᐊᕐᓵᕐᓇᖅᑐᒦᓐᓂᖏᓐᓂᒃ ᒪᐅᓇ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᑦᑎᒍᑦ ᐊᒻᒪ ᐃᖅᑲᓇᐃᔮᒃᓴᑎᒍᑦ. ᖁᐊᕐᓵᕐᓇᕐᓂᖅ ᑭᐅᓘᑎᒋᔪᓐᓇᖅᑕᕋ ᐃᓄᐃᑦ ᓄᓇᕗᒥᑦ ᓱᓕ ᑕᐃᒪᐃᓂᖏᓐᓂᒃ.

ᐊᕐᕌᒍᑦ ᐊᕙᑎᑦ ᐊᒡᒋᖅᑐᓂᒃ, ᐱᒻᒪᕆᒃᖢᖓ ᓂᕆᐅᒻᒪᕆᒃᖢᖓᓗ ᐅᖃᕈᓐᓇᕐᓂᐊᕐᓂᑦᑎᓐᓂᒃ ᑕᐅᑐᒃᑕᐅᓛᖑᓇᓱᖕᓂᖅ ᐱᐊᓂᒃᓯᒪᓕᕐᓂᖓᓂᒃ ᓄᓇᕗᑦ ᒪᓕᒐᓕᕆᓂᖏᑦᑎᒍ, ᒪᑯᐊ ᐃᓄᐃ ᐅᒃᐱᕈᓱᒍᓐᓇᕐᓯᓂᐊᕐᒪᑕ ᐱᔪᓐᓇᕐᓯᓕᕐᓂᑦᑎᓐᓂᒃ ᐅᕝᕙᓘᓐᓃᑦ ᐱᐅᓂᒃᓴᒃᑯᑦ, ᐱᔭᖃᓕᓚᐅᕐᓂᑦᑎᓐᓂᒃ ᐃᓄᐃᑦ ᐱᔪᒪᔭᖏᑦᑎᒍᑦ ᒐᕙᒪᓕᕆᓂᕐᒥᒃ, ᐅᖃᐅᓯᕐᒥᒃ ᐊᒻᒪ ᐃᓕᓐᓂᐊᕐᓂᕐᒥᒃ ᐃᑲᔪᖅᑕᐅᓯᒪᔪᒥᑦ ᑕᒪᐃᓐᓄᑦ ᐊᔾᔨᒌᙱᑦᑑᑎᒃᑯᑦ ᒐᕙᒪᓕᕆᓂᒃᑯᑦ ᒪᑯᐊ ᐃᓱᒪᒋᓪᓗᒋᑦ ᕿᑐᕐᖓᒃᑲ ᐊᒻᒪᓗ ᑕᒪᕐᒥ ᐃᓄᐃᑦ ᕿᑐᕐᖓᖏ.

ᑏᓇ ᑎᑰᑐ ᐃᖃᓗᐃᑦᒥᐅᑕᖅ ᐊᒻᒪ ᒪᕐᕉᖕᓄ ᐊᖑᑏᖕᓄᑦ ᐊᓈᓇᒋᔭᐅᓪᓗᓂ. ᐃᓚᒋᔭᐅᔪᖅ ᔭᐃᓐ ᒐᓛᔅᑯ ᐅᑭᐅᕐᑕᖅᑐᕐᒥᑦ ᐱᓕᕆᖃᑎᒌᓄᑦ ᐊᒻᒪ ᒫᓐᓇ ᐃᖅᑲᓇᐃᔭᖅᖢᓂ ᓄᓇᕗᑦ ᑐᙵᕕᒃᑯᓐᓄᑦ ᐊᐅᓚᑦᑎᔨᐅᓪᓗᓂ ᐃᓄᓕᕆᓂᕐᒥᒃ ᐊᒻᒪ ᐃᓕᖁᓯᓕᕆᓂᕐᒥᒃ ᐱᕙᓪᓕᐊᔪᓕᕆᓂᕐᒥᒃ.

ᑕᒪᕐᒥᒃ ᐅᖃᐅᓯᐅᔪᑦ ᐅᕙᓂ ᓇᖕᒥᓂᕆᕙᒃᑯ ᐊᒻᒪ ᑭᓇᒧᑦ ᐃᓱᒪᒋᔭᐅᓇᑎᒃ ᑲᑐᔾᔨᖃᑎᒌᓂᒃ ᓴᓇᖃᑎᒋᔭᓐᓂ, ᐃᓚᖃᖅᖢᑎᒃ ᒍᐊᑕᓐ ᑐᙵᕕᖓᑦ, ᓄᓇᕗᑦ ᑐᙵᕕᒃ ᑎᒥᖓ ᐊᒻᒪ ᑐᒥᑯᓗᐃᑦ.