ᐃᓱᖃᕐᑎᓪᓗᒋᑦ ᓄᑖᑦ ᐅᔭᕋᒃᓯᐊᕈᑎᐅᓇᓱᒃᑐᑦ ᑭᓯᐊᓂ ᓄᓇᓂ ᐊᑐᕈᑎᒃᓴᖅ ᐊᖏᖅᑕᐅᒃᐸᑦ: ᐃᑲᔪᖃᑦᑕᖅᑐᑦ

ᓄᓇᕗᒦᑦᑐᖅ ᓄᓇᒥ ᐊᑐᕈᓐᓇᕐᓂᕐᒥ ᐃᑲᔪᖅᑐᐃᔨᐅᔪᑦ ᐱᖁᔨᔪᑦ ᓄᖅᑲᖅᑎᑦᑎᖁᔨᓪᓗᑎᒃ ᓄᑖᓂ ᐅᔭᕋᒃᓯᐊᕈᑎᐅᔪᓂ ᓴᐳᔾᔨᔭᐅᓯᒪᓇᔭᕐᑐᑦ ᑭᖑᓪᓕᖅᐹᒃᑯᑦ ᑎᑎᕋᖅᑕᐅᓯᒪᔪᓂᒃ ᓄᓇᕗᒥᑦ ᓄᓇᓂ ᐊᑐᕈᑎᒃᓴᓂ ᑭᓯᐊᓂ ᓄᑖᓂ ᐸᕐᓇᐅᑎᓂ ᐋᖅᑭᒃᓯᐊᓂᒃᐸᑕ.

ᐱᖃᓐᓇᕆᔭᐅᔪᑦ ᐅᑯᓄᖓ ᓄᓇᓂ ᐊᑐᕈᑎᒃᓴᓂ ᐸᕐᓇᐅᑎᓂᒃ ᑐᓂᓯᓚᐅᕐᒪᑕ ᐃᓱᒪᓕᐊᕆᔭᖏᓐᓂ ᔪᓚᐃ 9-ᒥ ᑐᓴᒐᒃᓴᓕᐅᖅᖢᑎᒃ, ᐅᓇ ᓄᓇᓂ ᐊᑐᕈᑎᒃᓴᖅ ᐊᖏᖅᑕᐅᙱᑎᓪᓗᒍ ᑭᖑᓪᓕᖅᐹᒥ.

ᓄᓇᓂ ᐊᑐᕈᑎᒃᓴᓂ ᐸᕐᓇᐅᑎ ᐃᓚᒋᔭᐅᔭᕆᐊᖃᕐᒪᑦ ᐃᓚᒋᔭᐅᓂᖓᓄᑦ 1993-ᒥ ᓄᓇᕗᒥᑦ ᐊᖏᕈᑎᓂ. ᐊᑐᕈᑎᖓ ᐊᕕᒃᓯᒪᑎᑦᑎᓇᓱᒃᖢᓂ ᐃᓄᐃᑦ ᓇᖕᒥᓂᖅ ᓄᓇᖏᓐᓂ ᓄᓇᕗᒥᑦ ᐊᕙᑎᒋᔭᒧᑦ ᐊᒻᒪ ᐆᒪᔪᐃᑦ ᐃᓂᖏᑦ ᓴᐳᔾᔭᐅᓯᒪᓂᐊᕐᒪᑕ ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ.

ᐊᕐᕌᒎᓕᕐᑐᓂᒃ 16-ᓂ, ᑎᓴᒪᓂ ᑎᑎᕋᖅᑕᐅᓂᑯᓂ ᑐᓂᓯᓯᒪᔪᑦ ᐅᑯᓄᖓ – ᑭᓯᐊᓂᓕ ᐊᖏᖅᑕᐅᓯᒪᙱᖢᑎᒃ ᐅᑯᓄᖓ – ᓄᓇᕗᑦ ᑐᙵᕕᒃᑯᓐᓄᑦ, ᒐᕙᒪᑐᖃᒃᑯᓐᓄᓪᓗ ᐊᒻᒪᓗ ᓄᓇᕗᒥᑦ ᒐᕙᒪᒃᑯᓐᓄᑦ. ᑕᒪᕐᒥ ᐱᖓᓱᑦ ᑎᒦᑦ ᐊᑎᓕᐅᕆᐊᖃᕐᒪᑕ ᐸᕐᓇᐅᑎᓂ ᐊᑐᓕᖅᑎᑕᐅᓕᕈᓐᓇᖁᓪᓗᒍ.

ᑭᖑᓪᓕᕐᐹᖅ ᑎᑎᕋᖅᑕᐅᓂᑯ ᐃᓚᖃᓚᐅᕐᑐᖅ ᑐᒃᓯᕋᐅᓯᐊᕐᓂ ᓄᓇᓂ ᐱᕙᓪᓕᐊᕝᕕᐅᔪᓐᓇᖅᑐᓂᒃ, ᒪᑐᐃᖓᔪᓂᒃ ᐱᕙᓪᓕᐊᓂᕐᒧᑦ ᑭᓯᐊᓂ ᐊᑐᖁᔭᐅᔪᓂ ᐊᑐᕆᐊᖃᖅᖢᑎᒃ, ᐊᒻᒪᓗ “ᐃᓱᖃᕐᓗᑎ ᐊᑐᕐᕕᐅᔪᓐᓇᖅᑐᓄᑦ” ᐃᓂᒋᔭᐅᔪᓂ ᐱᕙᓪᓕᐊᔪᓕᕆᓂᕐᒥᓪᓗ ᐱᓕᕆᕝᕕᐅᔪᓐᓇᙱᓪᓗᑎᒃ ᒪᑯᓄᖓ ᐊᕙᑎᒋᔭᒧᑦ, ᐃᓕᖅᑯᓯᓕᕆᓂᕐᒧᑦ ᐅᕝᕙᓘᓐᓃᑦ ᐃᑦᑕᕐᓂᓴᓕᕆᓂᕐᒧᑦ.

ᐊᑎᓕᐅᖅᑎᒋᔭᐅᔪᑦ ᓴᖅᑭᑎᑦᑎᓚᐅᕐᑐᑦ ᑎᑎᖃᓂ ᔪᓚᐃ 6-ᖑᑎᓪᓗᒍ ᐃᓱᒪᓕᐅᕆᓯᒪᔪᓂᒃ ᐋᖅᑭᒋᐊᖅᓯᒍᑎᒃᓴᓂᒃ, ᐊᒻᒪᓗ ᐃᓄᖕᓂ ᐅᖃᖃᑎᖃᕐᓂᕐᓴᐅᖃᑦᑕᖁᔨᓪᓗᑎᒃ.

ᑕᐃᒪᐃᑎᓪᓗᒋᑦ, ᓴᕕᕋᔭᒃᓴᓂ ᕿᓂᖃᑦᑕᕐᓂᖅ ᐊᒻᒪ ᐊᓯᖏᑦᑎᒍᑦ ᐱᕙᓪᓕᐊᓂᖅ ᓱᓕ ᑲᔪᓯᔪᖅ ᓄᓇᕗᒥᑦ ᐸᕐᓇᐅᑎᑕᖃᙱᑎᓪᓗᒍ.

“ᓈᒻᒪᙱᓕᐅᕈᑎᑦ ᓴᖅᑭᑉᐸᓪᓕᐊᓕᕐᑐᑦ. ᒪᐃ 2025-ᒥ, ᓄᓇᕗᒥᑦ ᓇᑉᐸᖓᑕ ᐅᖓᑖᓃᑦᑐᑦ ᓄᓇᕗᒥ 52,000 ᑭᑉᐹᕆᒃᓯᒪᔪᓂ ᑭᓛᒥᑕᓂ ᐅᔭᕋᒃᓯᐅᕈᒪᔪᓂ ᐋᖅᑭᒃᓯᕕᐅᓯᒪᔪᖅ ᐊᕐᕌᒎᓵᖅᑑᖕᓂ ᒪᕐᕉᖕᓂ,” ᐅᖃᕐᓯᒪᓚᐅᕐᑐᖅ ᑐᓴᒐᒃᓴᑦ ᐱᖃᓐᓇᕆᔭᐅᔪᓂᒃ ᓄᓇᓂ ᐊᑐᕈᑎᒃᓴᓄᑦ ᐸᕐᓇᐅᑎᓂ.

ᒫᓂ 15,000 ᑭᑉᐹᕆᒃᓯᒪᔪᓂ ᑭᓛᒥᑕᓂ ᐱᓇᓱᒍᑎᓂ ᒪᑯᓇᓃᑦᑐᑦ ᐃᓱᖃᕐᓗᑎ ᐊᑐᕐᕕᐅᔪᓐᓇᖅᑐᓄᑦ ᐃᓂᒋᔭᐅᔪᓂᒃ, ᑕᒫᓂᓗ ᖃᓄᐃᓕᐅᕈᑎᐅᔪᒪᔪᑦ ᑮᓇᐅᔭᓕᐅᕋᓱᖕᓂᕐᒧᑦ ᐊᑐᖁᔭᐅᓇᔭᙱᖢᑎᒃ ᐃᓱᒪᒋᔭᐅᓪᓗᓂ ᐊᕙᑎᒋᔭᒥᐅᑕᑦ, ᑐᓴᒐᒃᓴᕆᔭᐅᔪᑦ ᐅᖃᕐᓯᒪᓚᐅᕐᑐᑦ.

ᓗᐊᔭᐃᑦ ᐱᖃᓐᓇᕆᔭᐅᔪᓄᑦ ᐃᑲᔪᖅᑐᐃᔪᓄᑦ ᐅᔾᔨᕈᓱᖁᔨᓯᒪᓚᐅᕐᑐᑦ ᒫᓐᓇ ᓄᓇᑖᕈᑎ ᐃᒡᓗᐊᓄᙶᖅ ᐋᖅᑭᒃᑕᐅᓇᓱᖕᓂᐊᖅᐸ ᒪᑯᓇᓂ ᐃᓱᖃᕐᓗᑎ ᐊᑐᕐᕕᐅᔪᓐᓇᖅᑐᓂ “ᐊᑭᑐᔪᐊᓗᖕᒥ ᒪᓕᒐᓕᕆᓕᕈᑎᐅᔪᓐᓇᖅᑐᖅ ᑕᒪᒃᑯᐊ ᑲᒻᐸᓂᐅᔪᑦ ᓄᖅᑲᖅᑎᑦᑎᙱᑐᐊᖅᐸᑕ ᐱᓇᓱᒍᑎᒋᔭᖏᓐᓂ.”

“ᑕᒪᒃᑯᐊ ᓂᐲᑦ ᓱᖁᑎᒋᔭᐅᙱᑉᐸᑕ ᓈᒻᒪᙱᓕᐅᕈᑎᑕᖃᒃᑲᓐᓂᕋᔭᕐᑐᖅ ᐊᒻᒪ ᐅᒃᐱᕈᓱᒍᓐᓃᕐᓇᕐᓗᓂ,” ᑐᓴᒐᒃᓴᓕᐊᑦ ᐅᖃᕐᓯᒪᓚᐅᕐᑐᑦ.

ᑭᒡᒐᖅᑐᐃᔨᐅᔪᑦ ᐱᖃᓐᓇᕆᔭᐅᔪᓄᑦ ᐃᑲᔪᖅᑐᐃᔪᓄᑦ ᓄᓇᓂ ᐊᑐᕈᑎᒃᓴᓄᑦ ᐸᕐᓇᐅᑎᓂ ᑭᐅᓚᐅᙱᑦᑐᖅ ᑕᒪᑐᒧᖓ ᐅᖃᐅᓯᖃᕆᐊᒃᓴᖏᓐᓂᒃ.

ᓄᓇᕗᑦ ᑐᙵᕕᒃᑯᑦ ᐱᓕᕆᖃᑎᖃᕐᑐᑦ ᓱᓕ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓂ ᐸᕐᓇᐅᑎᓂ ᐱᐊᓂᒃᓯᓇᓱᒃᖢᑎᒃ, ᓄᓇᕗᒥᑦ ᑐᙵᕕᒃᑯᑦ ᑎᑎᕋᓚᐅᕐᑐᑦ ᖃᕋᓴᐅᔭᒃᑯᑦ ᐊᑎᓕᐅᕐᓯᒪᙱᖢᓂ.

“ᒫᓐᓇᐅᔪᖅ, ᐊᑎᓕᐅᕐᑎᐅᔪᑦ ᐃᓱᒪᓕᐅᕆᐊᓂᙱᒻᒪᑕ ᓄᓇᐅᑉ ᒥᒃᓵᓅᖓᔪᓂ,” ᑖᓐᓇ ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᖅ ᐅᖃᕐᓯᒪᓚᐅᕐᑐᖅ ᑭᐅᔾᔪᑎᖃᖅᖢᑎᒃ ᑐᒃᓯᕋᐅᑎᒋᔭᐅᔪᒥ ᓄᖅᑲᖅᑎᑦᑎᑯᔨᓂᕐᒥ ᓄᑖᓂ ᐅᔭᕋᒃᓯᐅᕐᕕᐅᔪᒪᔪᓂᒃ ᑕᒫᓂ ᓴᐳᔾᔭᐅᓯᒪᔪᓄᑦ ᑎᑎᕋᐅᓯᐅᕙᓪᓕᐊᔪᑎᒍᑦ.

ᒐᕙᒪᑐᖃᒃᑯᑦ ᐊᒻᒪ ᓄᓇᕗᒥᑦ ᒐᕙᒪᒃᑯᑦ ᑕᒪᑐᒧᖓ ᑭᐅᓚᐅᙱᑦᑐᑦ ᓱᓕ.