ᑭᙳᒻᒧᑦ ᑕᑯᒋᐊᕐᓂᖅ, ᓯᕗᒧᒃᐸᓪᓕᐊᓂᖅ

ᐅᑭᐅᖃᓕᕐᖢᖓ 13-ᓂ ᐃᖅᑲᐅᒪᔪᖓ ᒪᓕᒐᓕᕆᔨᓂᒃ ᐃᓕᓐᓂᐊᕐᕕᑦᑎᓄᐊᑲᑕᓕᖅᑐᓂᒃ, ᐃᓕᓐᓂᐊᖅᑎᓪᓗᑕ ᐃᓯᑐᐃᓐᓇᖅᐸᒃᖢᑎᒃ ᐅᖃᐅᓯᖃᕆᐊᖅᑐᕐᖢᑎᒃ ᓄᓇᑖᕋᓱᖕᓂᕐᒥᒃ ᐊᒻᒪ ᐋᕿᒃᓱᐃᓂᐊᕐᓂᕐᒥᒃ ᓄᑖᒥᑦ ᑎᐅᕆᑑᕆᒥ.

ᓯᕗᓪᓕᖅᐹᒥᑦ ᑐᓴᕆᐅᓚᐅᕐᐳᖓ ᐃᓱᔾᔪᑲᑕᒃᑐᓂᑦ ᐊᕕᑦᑎᓂᐊᕐᓂᕋᕐᓂᕐᒥᒃ ᓄᓇᑦᓯᐊᕐᒥᑦ ᑕᕝᕙᓕ ᐅᖃᐅᓯᐅᑲᑕᒻᒪᕆᐊᓗᓕᖅᖢᓂ.

ᐊᕕᑦᑎᓂᐊᕐᓂᖅ ᓴᕿᔮᒻᒪᕆᖂᔨᓕᕐᑎᓪᓗᒍ, ᒪᓕᒐᓕᕆᔨᐅᔪᑦ ᐳᓛᑲᑕᖕᓂᕐᓴᐅᖂᔨᓕᓚᐅᕐᑐᑦ. ᐅᖃᓪᓚᖕᓂᖏᑦ ᐃᓅᓱᒃᑐᓂᒃ ᐃᓚᐅᖃᑕᐅᖁᔨᖂᔨᓪᓗᑎᒃ ᐅᖃᓪᓚᑲᑕᖕᓂᕐᒧᑦ, ᐅᕝᕙᓘᓐᓃᑦ ᑐᓴᖅᑎᑦᑎᓇᓱᖂᔨᓪᓗᑎᒃ ᐅᕙᑦᑎᓐᓂᒃ ᒪᓕᒐᓕᕆᓂᒃᑯᑦ ᐊᒻᒪ ᐃᓕᖁᓯᓕᕆᓂᒃᑯᑦ ᖃᓄᐃᑉᐸᓪᓕᐊᔪᖃᕐᓂᖓᓂᒃ.

ᑭᖑᒻᒧᑦ ᑕᑯᓪᓗᒍ, ᖃᐅᔨᓕᓚᐅᕐᐳᖓ ᐅᔾᔨᕈᓱᑦᑎᐊᓚᐅᙱᓐᓂᓐᓂ. ᐃᓕᓐᓂᐊᕐᓂᑦᑎᓐᓄᑦ ᓄᖃᑲᑕᖕᓂᐅᓚᐅᕐᑐᑦ ᖃᓄᐃᒋᓚᐅᙱᑕᒃᑲ ᖁᕕᐊᒋᕈᓘᔭᖅᖢᒋᑦ ᐊᒻᒪ ᓈᒻᒪᒋᙱᒻᒪᕆᒃᖢᒋᑦ. ᓇᐃᓴᐅᓯᕆᔭᕆᐊᖃᙱᓐᓂᖅ, ᑭᓯᐊᓂᓕ ᑐᓵᔭᕆᐊᖃᕐᓂᕐᒧᑦ ᑕᐅᕐᓰᒍᑎᑦᑎᐊᕙᐅᓚᐅᙱᑦᑐᖅ. ᐃᓅᓱᒃᑑᓗᐊᒧᑦ ᐃᔨᒃᑲ ᐅᐃᔾᔮᖅᑎᑐᐃᓐᓇᖅᑕᒃᑲ ᐊᒻᒪ ᐊᓂᕐᓴᐅᒥᕐᔪᐊᑲᑕᒃᖢᖓ. ᐃᖅᑲᐅᒪᔪᖓ ᐊᒥᓱᑎᒍᑦ ᐃᓛᒡᓕ ᒫᓃᑐᓪᓖᒫᑦ ᑐᓄᖅᐸᓯᐊᓂᑦ ᐃᓕᓐᓂᐊᕐᕕᐅᑉ ᑕᒪᓐᓇ ᐱᕕᖃᕈᑎᒋᔪᓐᓇᖅᖢᑎᒍᑦ ᖃᓄᐃᓕᐅᙱᑦᑎᐊᓚᐅᑲᖕᓂᕐᒧᑦ ᑖᒃᑯᐊ ᒪᓕᒐᓕᕆᔨᐅᔪᑦ ᐱᓕᕆᐊᖏᓐᓂᒃ ᐊᔪᙱᑕᖏᓐᓂᒃ ᐱᓕᕆᑎᓪᓗᒋᑦ, ᐅᖃᓪᓚᖕᓂᕐᒥᒃ.

ᐃᓱᒫᓗᒃᐸᓚᐅᙱᓚᖓ, ᐅᒃᐱᕈᓱᓗᐊᖅᐸᙱᖢᖓᓗ ᐊᒻᒪᓗ ᖁᔭᓈᕐᓯᑐᐃᓐᓇᖅᐸᒃᖢᖓ ᐃᓅᓱᒃᑑᓂᓐᓄᑦ. ᖃᓄᐃᒻᒪ ᑲᒪᒋᔭᕆᐊᖃᖅᐸᕋ? ᐃᓱᒫᓗᒋᓚᐅᙱᑕᕋ. ᐊᑎᖓ ᐱᐅᒋᓚᐅᙱᓐᓇᒃᑯ; ᐃᓂᒋᔭᐅᓂᐊᖅᑐᑦ ᓄᓇᒋᔭᐅᓂᐊᖅᑐᑦ ᒥᑭᖂᔨᑯᓗᒃᖢᓂ. “ᑕᒪᓐᓇ ᑕᒪᕐᒥᒃ ᐱᒋᙱᒃᑲᓗᐊᕋᑦᑎᒎ?” ᐃᓱᒪᔪᖓ. “ᐱᒌᓐᓇᐅᔭᙱᓐᓇᑦᑎᒎ?” ᐊᒻᒪ “ᖃᓄᖅ ᖃᐅᔨᒪᖕᒪᑕ ᐱᕋᔭᒃᑕᐅᙱᒃᑲᓗᐊᕆᐊᒃᓴᑦᑎᓐᓂ?”

ᐱᓕᕆᓂᐊᕋᓗᐊᕆᐊᒃᓴᖏᓐᓂᑦ ᐃᓐᓇᐃᑦ ᐅᒃᐱᕆᓗᐊᓚᐅᙱᑕᒃᑲ, ᐅᑯᐊᓘᓐᓃᑦ ᒐᕙᒪᐅᔪᑦ. ᓄᓇᑦᓯᐊᕐᒥᑦ ᐃᓚᒋᔭᐅᑐᐃᓐᓇᕈᑦᑕ ᖃᓄᐃᒋᓚᐅᙱᑕᕋ. ᐅᖃᖅᑕᐅᓂᖓ ᑐᓴᕐᓂᓚᐅᕐᒪᑦ, ᐅᕝᕙᓘᓐᓃᑦ ᓱᖏᐅᑎᓯᒪᓗᐊᒧᑦ. ᐃᕿᐊᙳᓕᓚᐅᕐᑐᖓ ᐊᓯᙳᖅᐸᓪᓕᐊᖏᓐᓇᖅᑐᓂᒃ. ᒍᕇᑦ 3-ᒥᑦ ᐃᓕᓐᓂᐊᕆᐊᖃᓕᓚᐅᕐᓯᒪᕗᒍᑦ ᓄᑖᓂᒃ ᐆᒃᑐᕋᐅᑎᐅᓕᖅᑐᓂ—ᐃᒻᐱᐅᕆᐅᒥ ᒥᑐᕆᒃᒧᑦ. ᐃᓕᓐᓂᐊᓵᑦᑎᐊᖅᖢᑕ ᓄᑕᐅᙱᑦᑐᓂᒃ ᐆᒃᑐᕋᐅᓯᓕᕆᓂᕐᒥ, ᐃᓕᓴᐃᔨᑦᑕ ᐅᖃᐅᑎᓪᓗᓂᑎᒍᑦ ᒥᑐᕆᒃᑯᑦ ᐆᒃᑐᕋᐅᓯᓕᕆᓂᖅ ᑐᑭᖃᕐᓂᕐᓴᐅᓂᖓᓂᒃ, ᐊᒻᒪᓗ ᐊᔪᕐᓇᙱᓐᓂᕐᓴᐅᓪᓗᓂ ᐃᓕᓐᓂᐊᕆᐊᒃᓴᖅ. ᑕᒪᓐᓇᓕ ᖃᐅᔨᑲᐅᖅᑐᓚᐅᕐᑕᕗᑦ … ᓱᓕᓚᐅᕐᑐᖅ, ᑕᐃᒪᐃᓚᐅᕋᑦᑕ.

ᐊᓈᓇᑦᑎᐊᒪ ᓴᓂᑦᑎᐊᖓᓂ ᐃᒃᓯᕚᖅᖢᖓ ᖁᕕᐊᓱᓗᐊᙱᖢᖓ ᓂᕆᓐᓇᐅᑎᓪᓗᒍ ᐅᖃᐅᑎᓪᓗᓂᖓ, ᐊᓯᙳᕐᓂᖅ ᐃᓚᒋᔭᐅᓂᖓᓂᒃ ᐃᓅᓯᕐᒧᑦ ᐊᒻᒪᓗ ᑕᑯᓕᒪᓂᕋᖅᖢᓂ ᐊᓯᔾᔨᖃᑦᑕᖅᑐᓂᒃ, ᐅᓂᐅᓕᒡᔪᐊᕐᓂᒡᓘᓐᓃᑦ, ᑕᒪᒃᑯᐊᓗ ᐃᓅᓯᖓᓄᑦ ᐱᐅᓯᕚᓪᓕᕈᑎᐅᕙᒃᑐᑦ ᐊᒻᒪ ᖁᕕᐊᓇᙱᓗᐊᓕᖅᐸᒃᑐᑦ. ᑖᓐᓇᓕ, ᓲᖃᐃᒻᒪ, ᖃᐅᔨᒪᓚᐅᕐᒪᑦ ᐊᒥᓱᓂᒃ ᐊᖑᑎᓂᒃ ᐊᒻᒪ ᐊᕐᓇᓂᒃ ᐱᓇᓱᒻᒪᕆᒃᓯᒪᔪᓂᒃ ᐸᕐᓇᐅᓯᐅᖅᖢᑎᒃ ᓄᑖᒥ ᑎᐅᕆᑑᕆᒃᓴᒧ. ᑏᑐᖃᑎᒋᓯᒪᓪᓗᓂᒋᑦ ᐊᒻᒪᓗ ᑐᒃᓯᐊᕆᐊᖃᑎᒋᓯᒪᓪᓗᓂᒋᑦ: ᓂᕆᑎᑦᑎᓯᒪᔪᖅ, ᑐᒃᓯᐊᖃᑎᖃᕐᓯᒪᔪᖅ ᐊᒻᒪᓗ ᐃᑲᔪᖅᑐᐃᕙᒃᖢᓂ ᒪᓕᒐᓕᕆᔨᓂᒃ ᐃᒡᓗᖓᓄᐊᖅᑐᓂᒃ. ᖃᓄᐃᓕᐅᕈᓐᓇᑦᑎᐊᓚᐅᕐᑐᖅ ᐊᒻᒪ ᐅᐱᒍᓱᒃᖢᓂ.

ᑕᒪᓐᓇ ᐃᖅᑲᐅᒪᓇᓚᐅᕐᑐᖅ, ᐊᑐᓕᕐᓂᖅ ᐊᕕᑦᑎᓂᕐᒥᒃ ᑭᓱᓕᒫᓂᒃ—ᐃᓅᖃᑎᒌᖕᓂᕗᑦ ᐊᒻᒪ ᓄᓇᕗᑦ ᓄᓇᑦᓯᐊᕐᒥᑦ, ᖃᐅᔨᒪᔭᑐᐊᕋ ᐊᐃᕐᕋᕆᓚᐅᓐᓂᓐᓂᑦ.

ᓲᕐᓗ ᓯᑯ ᓄᑎᒃᑐᖅ: ᓲᕐᓗ ᓇᖏᖅᖢᑕ ᐊᑭᓕᕇᒃᖢᑕ ᐋᔪᕋᖅ ᕿᑎᑦᑎᓐᓃᖢᓂ, ᑖᓐᓇ ᐊᖏᔪᐊᓗᒃ, ᕿᕐᓂᖅᖢᓂ, ᑖᖢᐊᓗᒃ ᐃᑳᕆᐊᖃᖃᑦᑕᖅᑕᕗᑦ ᐊᐅᓪᓛᕈᒪᓂᕐᒧᑦ ᐊᒻᒪ ᐃᖃᓗᒐᓱᒍᒪᓂᕐᒧᑦ.

ᐊᕕᓯᒪᓂᖅ ᐃᓛᓐᓂ ᓯᓕᒃᑐᐊᓘᖂᔨᓕᖅᖢᓂ ᐊᒻᒪ ᖁᐊᕐᓵᕐᓇᓗᐊᖅᖢᓂ ᖃᐅᔨᓇᓱᒋᐊᒃᓴᖅ. ᑕᑯᓯᒪᔭᕋ ᐊᑖᑕᑦᑎᐊᕋ ᐊᒻᒪ ᐊᒃᑲᒃᑲ ᕿᑐᕐᖓᖏᓪᓗ ᐱᓕᕆᓯᒪᔪᑦ ᑖᒃᑯᓂᖓ ᓯᑰᖕᓂ ᖃᓂᒡᓕᒋᐊᖅᑎᑦᑎᓇᓱᒃᖢᑎᒃ ᑐᐊᒃᓕᕚᓪᓕᖅᑎᒐᓱᒃᖢᒍ ᒪᑯᐊ ᐊᕐᓇᐃᑦ ᓱᕈᓰᓪᓗ ᐃᑳᕈᓐᓇᕐᓂᐊᕐᒪᑕ. ᐱᓕᕆᖃᑦᑕᐃᓐᓇᓚᐅᕐᓯᒪᔪᖅ ᐊᒃᓱᕈᕐᓇᓗᐊᔾᔮᙱᒻᒪᑦ ᓄᑲᖅᖠᕐᓄᑦ, ᐅᓚᕕᓴᕋᐃᑦᑐᓄᑦ ᒪᑯᓄᖓ ᐊᔪᕐᓂᕐᓴᐅᕙᒃᑐᓄᑦ.

ᐃᓛᓐᓂᒃᑯᑦ ᑐᐊᒡᓕᑎᑦᑎᔭᕆᐊᒃᓴᖅ ᐊᔪᕐᓇᒻᒪᕆᖃᑦᑕᓚᐅᕐᓯᒪᖕᒪᑦ ᑕᐃᒪᓕ ᓯᑭᑑᑯᑦ ᓱᒃᑲᓕᓪᓗᑕ ᐃᑳᖅᓵᕋᓱᒃᐸᒃᓗᑕ. ᐃᓛᓐᓂ ᖃᒧᑏ ᑕᑭᓂᖏ ᓈᒻᒪᒃᑯᑎ ᐃᑳᕈᑎᐅᕙᓚᐅᕐᑐᑦ; ᐃᓛᓐᓂ ᐅᒥᐊᙵᕐᓄᑦ ᐊᑐᖅᑕᐅᕙᒃᑐᓂᒃ ᓇᑦᑎᖅᑕᐅᔪᓂᒃ ᓯᓈᓂ ᐊᐃᒃᖠᕈᑎᐅᕙᒃᑐᓂ ᐃᑳᕈᑎᖃᕆᐊᖃᖅᐸᒃᖢᑕ. ᑐᓗᕐᓇᖅᑐᖃᕋᓗᐊᖅᐸᑦ, ᓇᓂᓯᔪᓐᓇᓚᐅᕐᑐᑦ ᐃᑳᕈᑎᐅᔪᓐᓇᖅᑐᒥᒃ. ᐅᕙᒍᓪᓕ ᐅᓂᐊᖅᑕᐅᓪᓗᑕ, ᐊᓂᕐᓵᓗᐊᖅᑕᐃᓕᓪᓗᑕ.

ᑭᓯᐊᓂᓕ ᑖᓐᓇ ᐋᔪᕋᙳᐊᖅ ᐱᔮᕆᔭᐅᓯᒪᔪᖅ—ᐊᒻᒪᓗ ᑭᓯᓕᕆᓇᑕ ᑐᐊᒡᓕᑎᒐᓱᖕᓂᒃᑯᑦ, ᑭᓯᐊᓂᓕ ᐊᕕᒐᓱᖕᓂᕐᒥᑦ ᑖᓐᓇᓗ ᐊᑯᓂᐊᓗ ᓂᕆᐅᓇᓕᖅᖢᓂ.

ᑖᓐᓇ ᐅᓪᓗᖅ ᑎᑭᑕᐃᓐᓇᕐᒪᑦ ᐄᐳᕈᒥ 1999-ᖑᑎᓪᓗᒍ ᐊᒻᒪᓗ ᓯᕗᓕᖅᐹᒥ ᑕᕐᓴᕆᔭᐅᔪᖅ ᓴᕿᑕᐅᑎᓪᓗᒍ ᐅᑯᓄᖓ ᓄᑖᓄᑦ ᓄᓇᕗᑦ ᒐᕙᒪᐅᓂᐊᓕᖅᑐᓄᑦ, ᐱᐅᒋᙱᒻᒪᕆᓚᐅᕐᓯᒪᔭᕋ. ᑎᑎᕋᐅᔭᖅᑕᐅᓯᒪᓪᓗᓂ ᐃᓕᓴᕆᔭᐅᓯᒪᑦᑎᐊᖅᑐᒥᒃ ᑎᑎᕋᐅᔭᒐᖅᑎᒥᑦ ᐋᓐᑐᕉ ᖄᐱᒃ, ᓇᓄᙳᐊᖅ ᓴᕿᔮᕐᓯᒪᓪᓗᓂ ᑐᖑᔪᖅᑐᒧᑦ ᑐᓄᖓᓂ ᓄᖃᓚᐅᑲᙳᐊᖅᖢᓂ ᒪᔪᕋᕐᓂᕐᒥᓂ, ᑐᓄᒻᒧ ᕿᕕᐊᖅᖢᓂ ᐅᓪᓗᕆᐊᕐᔪᐊᒧᑦ.

ᑕᒪᐃᓐᓂ ᐃᓂᐅᔪᓐᓇᖅᑐᖅ ᐅᓂᒃᑳᖅᑎᐅᔫᑉ ᐃᒡᓗᖓᓂ ᐃᓂᒋᔭᐅᕗᖅ ᐸᓂᕐᓯᒪᔪᓄᑦ ᓇᐅᓂᕐᓄᑦ, ᑐᓄᓱᐊᑕ ᓴᐅᓂᕕᓂᖏᑦ ᕿᓚᓗᒐᐃᑦ ᐊᒻᒪ ᑐᒃᑐᐃᑦ (ᐆᒻᒪᑎᙳᐊᖑᖅᑰᔨᔪᑦ), ᓴᓇᔭᐅᓂᐊᖅᖢᑎᒃ ᑖᔅᓱᒧᖓ ᓇᓗᓇᙱᔾᔪᑎᓂᒃ ᓯᐅᑎᕈᑎᓂᒃ ᐅᕙᓂ Ugly Fish ᓴᓇᕝᕕᖓᓂᒃ. (ᐊᔾᔨᙳᐊᖅ ᐅᕙᙵᑦ ᑕᕐᕋᓕᒃ ᑕᕕ)

ᑕᐃᔅᓱᒪᓂ, ᐃᒪᐃᓚᐅᕐᓯᒪᒐᒪ ᑭᓲᓃᓐᓂᑦ ᖃᓄᐃᕈᓘᔭᕈᑎᖃᖅᖢᖓ ᐃᒪᐃᓕᕈᑎᒋᔪᓐᓇᖅᑕᓐᓂ ᓱᖁᑎᒋᙱᑦᑎᐊᒻᒪᕆᒡᓗᒍ ᐊᒻᒪ ᕿᒫᓗᖓ ᐃᓕᖁᓯᓐᓂᒃ, ᐊᒻᒪᓗ ᐆᒥᖓ ᓄᑖᙳᓵᖅᑐᒥ ᑎᐅᕆᑑᕆᒥ ᓄᓇᕗᒥ, ᐊᕐᕌᒍᓂᒃ ᖁᓕᓂ.

ᓇᒧᙵᐅᔪᓐᓇᕋᕕᓪᓕ ᑭᖑᒻᒧᑦ ᑕᑯᑲᑕᐃᓐᓇᐅᔭᕐᓗᓂ? ᐊᔪᕐᓯᓇᔭᙱᓐᓇᑦᑖ ᑕᐅᑐᒃᑕᒧᑦ ᐅᓂᐊᖅᑕᐅᔭᐃᓐᓇᕐᓗᓂ? ᐃᔾᔪᔪᓂᖃᐃ ᐃᓕᓯᒪᙱᓗᐊᓚᐅᕋᒪ. ᕿᑐᕐᖓᕆᔭᐅᓪᓗᓂ ᐸᓐᑎᑳᔅᑐᓂᒃ ᐃᓚᒌᓂᒃ, ᐊᔪᕐᓇᖅᑐᐊᓘᓚᐅᕐᑐᖅ ᐸᐃᑉᐹᓕᕆᙱᑦᑕᕆᐊᒃᓴᖅ. ᐅᓇ ᑭᖑᒻᒧᑦ ᑕᑯᒋᐊᕐᓂᖅ ᑐᑭᖃᓗᐊᖅᑰᔨᔪᓐᓃᖅᖢᓂ ᐊᒻᒪᓗ ᐅᖄᓪᓚᓚᐅᖅᖢᓂ ᐊᐅᓪᓚᕈᒪᙱᓐᓂᕐᒥᒃ, ᐆᑐᓇᖅ ᓛᑦ ᓄᓕᐊᖓᑎᑐᑦ ᑕᕆᐅᙳᕐᓂᑯ. ᐱᓗᐊᕐᑐᒥᓪᓕ ᓇᓗᓕᕐᓯᒪᑐᐃᓐᓇᓚᐅᕐᓯᒪᔪᓂ ᓄᑕᕋᐅᓪᓗᖓ.

ᑕᐃᔅᓱᒪᓂ ᐱᒃᑯᒋᔭᖃᙱᑦᑎᐊᒻᒪᕆᓚᐅᕐᑐᖓ ᐃᓅᓂᓐᓂ. ᐱᓯᒪᓕᓚᐅᕐᓯᒪᔪᖓ ᐊᔾᔨᒌᙱᑎᑦᑎᓂᐊᓗᖕᒥᑦ ᐊᒻᒪ ᑲᙳᓲᑎᖃᕐᓂᕐᒥᒃ. ᐅᓇ ᑲᙳᓇᖅᑑᒐᓗᐊᖅ ᐅᖃᐅᓯᖅ, ᑭᓯᐊᓂᓕ ᐊᐅᓪᓚᓚᐅᕐᓯᒪᓂᕋ ᐅᔾᔨᕈᓱᒍᑎᒋᓕᓚᐅᕐᑕᕋ ᑖᔅᓱᒪ ᑕᕐᓴᐅᑉ ᖃᓄᐃᓕᖓᓂᕆᔭᖓ ᐊᒻᒪᓗ ᐱᒃᑯᒋᓕᖅᖢᒍ ᐱᕈᓚᐅᕐᓯᒪᓐᓂᓐᓂ ᓄᓇᑦᓯᐊᕐᒥᑦ/ᓄᓇᕗᑦ ᐊᕕᑉᐸᓪᓕᐊᓕᖅᑎᓪᓗᒋ ᐊᒻᒪᓗ ᐅᖃᐅᓯᕈᓘᔮᓗᐃᑦ ᐅᖃᐅᓯᐅᔭᕆᐊᖃᓚᐅᙱᑦᑐᑦ ᑕᒪᐅᖓᒥᐊᖅ. ᑕᒪᒃᑯᐊᓘᓐᓃ ᓈᒻᒪᒋᙱᑕᕋᓗᐊᒃᑲ ᐃᓅᓱᒃᑑᓂᓐᓄ.

ᑕᒪᓐᓇ ᑕᐃᒪᐃᓕᕙᓪᓕᐊᖑᔭᓚᐅᕐᑐᖅ, ᓲᕐᓗ ᓇᖏᖅᖢᖓ ᐅᑯᓄᖓ ᐊᓪᓛᓗᖕᓄᑦ ᐃᓚᒋᔭᑦᑎᓐᓄᑦ ᐸᒡᕕᓵᕆᔭᑦᑐᓂᒃ, ᑭᓯᐊᓂᓕ ᑐᑭᓯᔪᓐᓇᖅᖢᒋᑦ ᐊᒻᒪᓗ ᐃᒃᐱᒋᑦᑎᐊᒻᒪᕆᐊᓗᒃᖢᒋᑦ: ᑕᐃᓐᓇ ᐅᖃᐅᓯᕆᕈᓘᔭᖅᐸᒃᑕᐃᑦ ᑭᓲᙱᑎᖢᒍ, ᑭᓯᐊᓂᓕ ᐊᓯᕕᑦ ᑕᐃᒪᐃᓕᐅᕈᑎᒋᔪᓐᓇᙱᖢᓂᐅᒃ. ᐊᖏᕐᕋᓐᓂ ᐅᖓᓯᒃᓯᕙᓪᓕᐊᓪᓗᖓ, ᐱᔪᒪᓗᐊᙱᒃᑲᓗᐊᖅᖢᖓ ᑭᒡᒐᖅᑐᐃᔨᙳᓚᐅᕐᐳᖓ. ᐅᖃᓪᓚᐅᓯᒃᑲ ᑕᒪᐃᓐᓂᑦ ᓄᓇᓐᓂ ᐅᖃᐅᓯᖃᕈᑎᒋᔭᓚᐅᕐᑕᒃᑲ. ᖃᐅᔨᓕᖅᖢᖓᓗ ᑭᐅᑲᑕᒃᑐᖓ ᒪᑯᓇᙵᑦ ᖃᐅᔨᒪᙱᓐᓂᕐᒧᑦ ᐱᐅᒃᓴᙱᔾᔪᑎᓄᑦ (“ᐋᒃᑲ, ᐊᓛᔅᑲᒥᐅᑕᐅᙱᑦᑐᖓ. ᐋᒃᑲ, ᐃᒡᓗᕕᒐᕐᒦᖃᑦᑕᙱᑦᑐᒍᑦ. ᐄ, ᐃᒡᓗᖃᖅᑐᒍᑦ ᓱᓪᓗᓕᖃᖅᑐᓂᒃ.”)—ᐅᕝᕙᓘᓐᓃᑦ ᓴᐳᔾᔨᓪᓗᖓ ᖃᓄᐃᓕᐅᕈᓯᕕᓂᑐᖄᓗᖕᓂ ᒪᑯᓂᖓ ᓂᕿᓂᒃ ᓂᕆᕙᖕᓂᕐᒥᒃ ᐊᓯᖏᓐᓄᑦ ᓄᓇᓕᕐᔪᐊᒥᑦ ᐃᓱᒪᒋᔭᐅᔪᖅ ᐱᐅᙱᑦᑐᐊᓘᓂᖓᓂᒃ. ᐅᕙᓐᓂᑦ ᐅᔾᔨᕆᓗᐊᙱᓐᓂᕐᒧᑦ ᐃᓄᖕᓂᑦ ᑕᒻᒪᖅᓯᒪᔪᓂᒃ ᑐᑭᓯᑎᑦᑎᑦᑎᐊᕋᓱᖕᓂᕋ ᐊᒻᒪᓗ ᖃᐅᔨᒪᙱᓐᓂᕋ ᐅᑭᐅᕐᑕᖅᑐᕐᒥᑦ, ᐊᖏᕐᕋᓐᓂᑦ, ᐅᔾᔨᕆᓇᖓ ᐃᓗᒻᒥᕐᓯᒪᓕᓚᐅᕐᑐᖓ ᐱᒃᑯᓕᓂᖃᒻᒪᕆᖕᓂᕐᒥᒃ ᓯᕗᕚᓐᓂᒃ ᐊᒻᒪᓗ ᓯᕗᕚᑦᑕ ᓄᓇᕗᒥᑦᓗ ᐱᒋᐊᖅᑎᑦᑎᔨᐅᔪ ᑕᒪᐅᖓ ᑎᑭᐅᑎᓯᒪᖕᒫᑎᒍᑦ. ᐃᒻᒪᖄᓕ ᐱᓯᒪᐃᓐᓇᖅᑕᕋᓗᐊᕋ, ᑭᓯᐊᓂᓕ ᓯᕗᒧᑦ ᐱᓇᓱᒃᑎᓪᓗᖓ ᐃᓅᓯᖕᓂ, ᐅᔾᔨᕆᓕᖅᐳᖓ ᑭᖑᒻᒧᑦ ᑕᑯᒡᓗᒋᑦ ᐱᑕᖃᒻᒪᕆᖕᓂᖓ ᑭᐅᕚᕕᓂᕗᑦ (ᐱᐅᔪᒧᑦ ᐱᐅᙱᑦᑐᒧᓪᓘᓐᓃᑦ) ᐃᑲᔪᕈᑎᒋᓐᓈᐅᔭᓚᐅᕐᐸᕋ ᑐᙵᕕᖃᕈᓐᓇᓕᕐᓂᕐᒥᒃ.

ᑕᕐᕋᓕᒃ ᖃᓄᕈᓘᔭᖅ ᑎᑎᕋᐅᔭᖅᑎᐅᔪᖅ ᐊᒻᒪᓗ ᑎᑎᕋᖅᑎᐅᓪᓗᓂ ᐊᖏᕐᕋᖃᖅᖢᓂ ᐃᖅᑲᓇᐃᔭᖅᖢᓂᓗ ᓴᓪᓖᓪᓗ, ᓄᓇᕗᑦ ᐊᒻᒪ ᓵᔅᑲᑑᓐ, ᓴᔅᑳᑦᓱᐊᓐ ᐊᑯᓐᓂᖓᓂᒃ. ᒪᑯᓇᙵᑦ ᑎᑎᕋᖃᑦᑕᕐᓂᕐᒥᒃ, ᐱᐅᓴᐅᓯᐅᕐᓂᕐᒥᒃ ᐊᒻᒪᓗ ᐊᓐᓄᕌᓕᐅᕐᓂᕐᒥᒃᑦ ᒪᐅᖓ ᑎᑎᕋᐅᔭᒐᕐᓄᑦ, ᑕᕕ ᓴᓇᐅᒐᖏ ᓴᕿᔮᕐᓂᖃᖅᑐᑦ ᐃᓄᐃᑦ ᖃᓄᐃᓕᐅᕈᓯᕕᓂᖏᓐᓂᒃ, ᑕᒪᒃᑯᐊᓗ ᐃᓚᖃᓚᐅᖅᐸᒃᖢᑎᒃ ᐃᒡᓚᕐᓇᖅᑐᓂᒃ ᐊᒻᒪ ᐹᑉᓕᕆᓂᕐᒥᑦ.