ᐊᖑᑎ ᐸᓯᔭᒃᓴᙳᕐᑎᑕᐅᕗᖅ ᐸᓖᓯᒃᑯᑦ ᖁᑭᕐᓴᖃᑕᐅᑎᓪᓗᒋ ᐃᓄᒃᔪᐊᒃᒥ

ᐋᓚᓯ ᐃᖃᓗᒃ, 6-ᓂ ᐅᑭᐅᓕᒃ ᐊᕐᓇᖅ ᐃᓄᒃᔪᐊᒃᒥᐅᑕᖅ, ᐅᕙᓂ ᐊᑖᑕᖓᓗ ᐊᔾᔨᖃᖅᑑᒃ ᕙᐃᔅᐳᒃᑯᑦ ᓴᖅᑭᔮᒐᖓᓂ, ᐃᓅᔪᓐᓃᓚᐅᕐᒪᓐ ᖃᓄᐃᓕᐅᖃᑦᑕᐅᑎᓚᐅᕐᑎᓪᓗᒋᑦ ᐸᓖᓯᑦ ᐊᒻᒪ ᐊᑖᑕᖓ ᐋᓐᑐᕉ ᓇᓗᒃᑐᒃ. (ᐊᔾᔨᙳᐊᖅ ᐅᕙᙵᑦ ᐋᓐᑐᕉ ᓇᓗᒃᑐᒃ/ᕙᐃᔅᐳᒃᒥ)

For English version, see Man charged in police-involved shooting in Inukjuak

ᐊᖑᑎ 36-ᓂ ᐅᑭᐅᓕᒃ ᐸᓯᔭᒃᓴᙳᖅᑎᑕᐅᕗᖅ ᐸᓖᓯᒃᑯᓪᓗ ᑖᓐᓇᓗ ᖁᑭᖅᓴᓚᐅᖅᑎᓪᓗᒋᑦ ᐃᓄᒃᔪᐊᒃᒥ ᑎᓯᐱᕆ 20-ᐅᑎᓪᓗᒍ.

ᓄᓇᕕᒃᒥ ᐸᓖᓯᒃᑯᑦ 911-ᒧ ᐅᖄᓚᔪᒥ 3:30-ᒥ ᐅᓪᓛᒃᑯᑦ ᑭᐅᓚᐅᕐᓯᒪᒻᒪᑕ ᐅᖃᐅᔾᔭᐅᑎᓪᓗᒋᑦ ᐊᖏᕐᕋᕆᔭᐅᔪᒥ ᖁᐊᕐᓵᓇᖅᑐᒦᓐᓂᖏᓐᓂᒃ ᐅᖃᓚᐅᕐᑐᑦ ᐅᑯᐊ Bureau des enquêtes indépendantes ᑐᓴᒐᒃᓴᓕᐅᕐᑎᓪᓗᒋᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ ᑎᓯᐱᕆ 21-ᖑᑎᓪᓗᒍ.

ᐸᓖᓯᒃᑯᑦ ᐅᐸᒍᑎᑎᓪᓗᒋᑦ ᐊᖑᑎᒥ ᖁᑭᐅᑦᑎᔭᖅᑐᒥ ᑖᒃᑯᓂᖓ ᓵᑦᑐᖃᓚᐅᕐᓯᒪᔪᖅ, ᑐᓴᒐᒃᓴᐃᑦ ᐅᖃᕐᓯᒪᔪᑦ ᐊᒻᒪᓗ ᖁᑭᕐᓴᖃᑦᑕᐅᑎᓕᖅᖢᑎᒃ.

ᐋᓐᑐᕉ ᓇᓗᒃᑐᒃ ᐊᒻᒪ ᐸᓂᖓ, 6-ᓂ ᐊᕐᕌᒍᓕᖅ ᐋᓚᓯ ᐃᖃᓗᒃ ᖁᑭᖅᑕᐅᓚᐅᕐᑑᑦ ᐊᒻᒪ ᑐᐊᕕᕐᓇᖅᑐᒃᑯᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓪᓗᑎᒃ ᒫᓐᑐᕆᐊᒥ ᐋᓐᓂᐊᕕᐊᓗᒃᒧᑦ.

ᐃᖃᓗᒃ ᐃᓅᔪᓐᓃᓕᓚᐅᕐᑐᖅ ᐅᓪᓗᒐᓴᐃᑦ ᐊᓂᒍᕐᑎᓪᓗᒋᑦ.

Sûreté du Québec, ᑯᐸᐃᒃᒥ ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᑐᑦ ᓇᓗᒃᑐᒃᒥ ᑎᓯᐱᕆ 21-ᒥ ᒪᕐᕈᐃᓂ ᖁᑭᐅᑦᑎᔭᕐᓯᒪᓂᖓᓂ ᖁᑭᐅᑦᑎᔭᖁᔭᐅᓯᒪᙱᖢᓂ.

ᓄᓇᕕᒃᒥ ᐸᓖᓯᒃᑯᑦ ᐸᓯᔭᒃᓴᐅᔾᔪᑎᒃᑲᓐᓂᖃᓚᐅᕐᑐᖅ ᑎᓯᐱᕆ 23-ᒥ.

ᓇᓗᒃᑐᒃ ᐸᓯᔭᒃᓴᐅᔾᔪᑎᖃᓕᕐᒥᔪᖅ ᐸᓖᓯᓄᑦ ᓈᒻᒪᙱᓕᐅᕈᑎᖃᓚᐅᕐᓂᖓᓂ ᓱᒋᐅᑎᖃᖅᖢᓂ; ᐋᓐᓂᕐᓯᓂᕐᒧᑦ; ᒪᓕᒐᕐᓂ ᓱᕋᐃᓂᕐᒧᑦ ᐋᓐᓂᕐᓯᓂᖓᓂ ᐃᓄᖕᒥᑦ; ᖁᑭᐅᑎᒥᓄᑦ ᑐᕌᖅᑎᓯᒪᓚᐅᕐᓂᖓᓂ ᐸᓖᓯᓄᑦ; ᐊᒻᒪᓗ ᖁᑭᕆᐊᓚᐅᕐᓂᖓᓂ ᑎᒍᔭᐅᑦᑕᐃᓕᒪᓪᓗᓂ.

ᐸᓖᓯᒃᑯᑦ ᐊᐅᓚᑦᑎᕕᖓ ᑖᓐᓇᓗ ᑯᐸᐃᒃᒥ ᐸᓖᓯᓄᑦ ᓇᐅᑦᑎᖅᓱᖅᑎᐅᓪᓗᑎᒃ, ᖃᐅᔨᓴᓕᕐᑐᑦ ᖃᓄᐃᓕᐅᕈᑎᕕᓂᕐᓂ ᑕᐃᒪᐃᓕᐅᑲᑕᒃᑎᓪᓗᒋᑦ. ᐊᐅᓚᑦᑎᕕᒃ ᖃᐅᔨᓴᖃᑦᑕᖅᑐᖅ ᐋᓐᓂᖅᑐᖃᕐᓂᕌᖓ ᐅᕝᕙᓘᓐᓃᑦ ᐃᓅᔪᓐᓃᖅᑐᖃᕌᖓ ᐸᓖᓯᓄᑦ ᑲᒪᒋᔭᐅᑎᓪᓗᒋᑦ.

16 ᐃᓄᐃᑦ ᐃᓅᔪᓐᓃᕐᓯᒪᓕᕐᑐᑦ ᓄᓇᕕᒃᒥ ᐸᓖᓯᓄᑦ ᑲᒪᒋᔭᐅᓕᕐᓯᒪᑎᓪᓗᒋᑦ ᑕᐃᒪᙵ 2016-ᖑᓚᐅᕐᓯᒪᔪᒥᑦ. ᑖᒃᑯᓇᙵᖅ ᑎᓴᒪᑦ ᑕᐃᒪᐃᓯᒪᔪᑦ ᑕᕿᑦ 14 ᐊᑐᕋᑖᕐᓯᒪᔪᓂᒃ.

ᔮᓱᐊ ᐸᐱᒐᑐᒃ ᐃᓅᔪᓐᓃᓚᐅᕐᓯᒪᔪᖅ ᓄᕕᐱᕆ 2024-ᒥ ᐊᒻᒪ ᒪᕐᕈᓕᐊᖃᑎᖓ ᒑᓇᑦ ᐋᓐᓂᖅᑕᐅᕐᔪᐊᓚᐅᕐᓯᒪᓪᓗᓂ ᐸᓖᓯᓄᑦ ᖁᑭᖅᑕᐅᓚᐅᖅᑎᓪᓗᒋᑦ ᓴᓪᓗᐃᑦᓂ.

ᒪᐃᖑᑎᓪᓗᒍ ᒫᒃ ᐊᕐ. ᐊᓐᓇᓇᒃ ᐃᓅᔪᓐᓃᓚᐅᕐᓯᒪᔪᖅ ᑲᖏᕐᓱᐊᓗᔾᔪᐊᖅᒥ ᐸᓖᓯᓄᑦ ᐅᐸᒃᑕᐅᑎᓪᓗᒍ. ᐊᒻᒪᓗ ᔪᓚᐃᒥ ᔭᐃᒻᔅ ᑲᕕ ᐃᓄᒃᔪᐊᒃᒥ ᐃᓅᔪᓐᓃᓚᐅᕐᓯᒪᔪᖅ ᐸᓖᓯᓂ ᓈᒻᒪᙱᓕᐅᕈᑎᖃᓚᐅᖅᖢᓂ.

ᓇᓗᒃᑐᒃ ᐃᖅᑲᖅᑐᐃᕕᒃᒥ ᑲᒪᒋᔭᐅᓯᒋᐊᕐᓂᐊᖅᑐᖅ ᔭᓄᐊᕆ 23-ᒥ.