ᐊᖑᑎ ᐊᓄᓪᓚᒃᓯᖅᑕᐅᕗᖅ ᐱᑎᑦᑎᓂᖓᓂ ᐃᖅᑲᓇᐃᔮᕆᔭᐅᔪᒥ-ᐃᓱᓕᑦᑎᔪᒥ ᐋᓐᓂᕐᓂᐅᔪᒥ ᐸᓖᓯᒧᑦ

For an English version of this story, please see: Man jailed 18 months for assaulting police officer, causing career-ending injury.

ᐊᖑᑎ ᐱᒋᐊᖅᓯᓚᐅᖅᑐᒥ ᐸᓖᓯᐅᔪᒥ ᐱᒋᐊᕈᑕᐅᔪᒥ ᓇᐅᔮᓂ, ᐱᑎᑦᑎᔪᒥ ᐃᖅᑲᓇᐃᔮᕆᔭᐅᔪᒥ-ᐃᓱᓕᑦᑎᓂᐅᔪᒥ ᐋᓐᓂᕐᓂᐅᔪᒥ, “ᐅᓗᕆᐊᓇᖅᑑᕗᑎᑦ” ᑭᓇᑐᐃᓐᓇᖅ ᐅᓗᕆᐊᓇᖅᑐᒦᑦᑐᒥ, ᐃᖅᑲᖅᑐᐃᔨᒥ ᐅᖃᓚᐅᖅᐳᖅ ᐊᖑᑕᐅᔪᒥ ᐸᓯᔭᒃᓴᐅᓂᕋᐃᓪᓗᓂ 6-ᖑᔪᓄᑦ ᐃᖅᑲᖅᑐᒐᒃᓴᓂ ᐃᖅᑲᖅᑐᐃᕕᖕᒥ ᔪᓚᐃ 18−ᒥ.

ᐱᔾᔭᒥᓂ ᒪᓕᑭ, 33, ᖃᓄᐃᓕᔭᐅᔾᔪᑎᖓ ᑕᖅᑭᓂ 18−ᓂ ᐊᓄᓪᓚᒃᓯᕐᓂᖓᓂ ᐸᓯᔭᒃᓴᐅᓂᕋᐃᓚᐅᖅᑎᓪᓗᒍ 6-ᖑᔪᓂ 19−ᓂ ᐱᕋᔭᖕᓂᐅᔪᓂ ᐃᖅᑲᖅᑐᒐᒃᓴᙳᓚᐅᕐᓂᖓᓂ, ᐅᕙᙶᖅᑐᓂ ᖃᔅᓯᒐᓚᖕᓂ ᐱᕋᔭᖕᓂᐅᔪᓂ ᐱᓚᐅᖅᑕᖏᓐᓂ ᕿᑎᐊᓂ ᓯᑎᐱᕆ 2023-ᒥ ᐊᒻᒪ ᒪᐃ 2024−ᒧᑦ.

“ᒥᔅᑕ ᒪᓕᑭ, ᐅᓗᕆᐊᓇᖅᑑᕗᑎᑦ,” ᐃᖅᑲᖅᑐᐃᔨ ᑳᓖᓐ ᓱᔅ ᐅᖃᓚᐅᖅᐳᖅ ᑐᓂᓯᑎᓪᓗᒍ ᖃᓄᐃᓕᔭᐅᔾᔪᑎᖓᓂ ᓇᐅᔮᓂ ᐃᖅᑲᖅᑐᐃᕕᖕᒥ.

“ᐊᐅᓚᑕᐅᔪᓐᓇᐃᓐᓂᔪᑎᑦ. ᓄᓇᓕᓕᒫᒥ — ᐃᓚᑎᑦ, ᐃᓪᓗᑎᑦ, ᐊᑖᑕᐃᑦ, ᑲᓇᑕᒥ ᐸᓖᓯᒃᑯᑦ — ᑭᓇᑐᐃᓐᓇᖅ ᐊᑦᑕᓇᖅᑐᒦᑉᐳᑦ ᐃᓕᖕᓄᑦ.”

ᒪᓕᑭ ᐸᓯᔭᒃᓴᐅᓂᕋᓚᐅᖅᐳᖅ ᐱᒋᐊᓚᐅᕐᓂᖓᓂ ᐸᓖᓯᐅᔪᒥ, ᐱᒋᐊᕐᓂᐅᔪᒥ ᐱᒋᐊᕈᑎᒧᑦ, ᓱᕋᐃᓂᖓᓂ ᖃᐅᔨᓴᖅᑕᐅᔭᕆᐊᖃᖅᑎᑕᐅᓂᖓᓂ, ᐱᒋᐊᕐᓂᕐᒥ, ᖁᑭᐅᑕᐃᖅᓯᓇᓱᐊᕐᓂᕐᒥ ᐸᓖᓯᐅᔪᒥ ᐊᒻᒪ ᒪᓕᖕᓂᖃᙱᓐᓂᖓᓂ ᖃᓄᐃᓐᓂᐅᔪᒥ ᐊᓂᑎᑕᐅᓂᖓᓂ ᑎᓕᐅᕈᑕᐅᔪᒥ.

ᑭᒡᒐᖅᑐᐃᔨᐅᔪᖅ ᐊᐃᐳᓪ ᓕ ᐳᑎᓕᐅᕐ ᐅᖃᓚᐅᖅᐳᖅ “ᓈᒻᒪᙱᓚᖅ ᑎᒍᔭᐅᑦᑕᐃᓕᒪᓂᖓᓂ ᐸᓖᓯᒧᑦ, ᐊᒻᒪ ᐱᒋᐊᓪᓚᒃᑐᒥ ᐱᒋᐊᕐᓂᕐᒥ ᐸᓖᓯᐅᔪᒥ ᐱᓕᕆᑎᓪᓗᒍ ᐱᓕᕆᐊᒃᓴᖓᓐᓂ.

“ᐃᓱᒪᒋᓪᓗᒍ ᐱᕐᔪᐊᖑᓂᖓᓂ ᐋᓐᓂᕐᓂᐅᔪᒥ, ᑕᖅᑭᓂᑦ 18−ᓂ [ᐊᓄᓪᓚᒃᓯᕐᓂᖓᓂ] ᓈᒻᒪᖕᓂᖅᓴᐅᓇᔭᖅᐳᖅ.”

ᐃᖅᑲᖅᑐᐃᔨ ᐅᔾᔨᕆᓚᐅᖅᐳᖅ ᒪᓕᑭᐅᑉ ᐊᑲᐅᙱᓕᐅᕈᑎᖓᓐᓂ ᐃᒥᐊᓗᖕᒧᑦ.

“ᑕᒪᒃᑭᐅᒪᔪᒥ ᑎᑎᕋᖅᑕᐅᓯᒪᓂᐅᔪᓂ ᐱᓪᓚᕆᐅᔪᒥ ᐋᖓᔮᓐᓇᖅᑐᖅᑐᖃᑦᑕᓗᐊᕐᓂᐅᔪᒥ” ᐱᓯᒪᔭᖓᓂ ᑕᒪᒃᑭᒐᓚᖕᓂ ᐃᓅᓯᖓᓂ, ᓲᔅ ᐅᖃᓚᐅᖅᐳᖅ.

“ᐅᖃᓚᐅᕐᓂᕐᓂ ᐃᑲᔪᖅᑕᐅᔭᕆᐊᖃᕐᓂᕐᓂ ᐱᒻᒪᕆᐅᓪᓗᓂ ᓯᕗᓪᓕᖅᐸᐅᕗᖅ ᐱᓕᕆᓂᐅᔪᒥ. ᑕᑯᔪᓐᓇᖅᐳᖓ ᐊᑐᕐᓂᑯᖕᓂᑦ ᐃᑲᔪᖅᑕᐅᔭᕆᐊᖃᖅᓯᒪᓂᕐᓂ ᐊᑯᓂᒻᒪᕆᐊᓗᖕᒥ, ᐊᒻᒪ ᐱᕕᒃᓴᖃᕐᓃᑦ ᐃᓱᓕᓕᖅᐳᖅ.”

ᓯᕗᓂᐊᓂ ᖃᓄᐃᓕᔭᐅᔾᔪᑎᖓᓂ, ᐃᖅᑲᖅᑐᐃᔨ ᐊᐱᕆᓚᐅᖅᐳᖅ ᒪᓕᑭ ᐅᖃᐅᓯᒃᓴᖃᕐᒪᖔᑦ.

“ᒪᒥᐊᑉᐳᖓ ᖃᓄᐃᓐᓂᐅᓚᐅᖅᑐᒥ,” ᐅᖃᓚᐅᖅᐳᖅ. “ᐃᖅᑲᐅᒪᓪᓚᕆᙱᓚᖓ ᕿᓱᓕᒫᓂᑦ, ᑭᓯᐊᓂ ᓴᐳᔾᔨᔨᒐ ᐅᕙᓐᓂ ᐅᖃᐅᔾᔨᓚᐅᖅᐳᖅ ᐃᖅᑲᐅᒪᙱᓐᓇᒥ, ᑐᑭᖃᙱᓚᖅ ᐸᓯᔭᒃᓴᐅᙱᓐᓂᓐᓂ.”

ᑭᐅᓂᖓᓂ ᓇᖕᒥᓂᖅ ᐃᓯᐊᓗᖕᒧᑦ ᐊᑲᐅᙱᓕᐅᕈᑕᐅᔪᓄᑦ, ᒪᓕᑭ ᐃᓚᒋᐊᖅᓯᓚᐅᖅᐳᖅ: “ᐃᑕᔪᖅᑕᐅᔭᕆᐊᖃᖅᐳᖓ.”

ᓱᔅ ᖃᓄᐃᓕᔭᐅᔾᔪᑎᖃᓚᐅᖅᐳᖅ ᑕᖅᑭᓄᑦ 18−ᓄᑦ ᐱᒋᐊᕐᓂᐅᔪᒧᑦ ᐸᓖᓯᒧᑦ ᐊᒻᒪ ᖁᑭᐅᑏᖅᓯᓇᓱᐊᕐᓂᕐᒥ ᐸᓖᓯᒥᒃ.

ᐱᒋᐊᕐᓂᐅᔪᒥ ᐱᒋᐊᕈᑕᐅᔪᒥ ᐊᒻᒪ ᓱᕋᐃᓂᖓᓂ ᖃᐅᔨᓴᖅᑕᐅᔭᕆᐊᖃᖅᑎᑕᐅᓂᕐᒥ ᐱᓯᔭᐅᓂᖓᓂ, ᖃᓄᐃᓕᔭᐅᔾᔪᑎᖃᓚᐅᖅᐳᖅ ᑕᖅᑭᓂᑦ−18-ᓂ ᐊᓄᓪᓚᒃᓯᕈᑎᑖᖅᑎᑕᐅᕗᖅ. ᐊᓄᓪᓚᒃᓯᕈᑎᑖᖅᑎᑕᐅᓚᐅᕆᕗᖅ ᐅᓪᓗᓂ 40−ᓂ ᐱᒋᐊᕐᓂᕐᒧᑦ, ᒪᓕᖃᑦᑕᐅᑎᓂᐊᖅᑐᒥ.

ᐅᓪᓗᓂ 110−ᓂ ᒪᓕᑭ ᐊᓄᓪᓚᒃᓯᓚᐅᕐᓂᖓᓂ ᐃᖅᑲᖅᑐᖅᑕᐅᓂᐊᕐᓂᖓᓂ ᐅᑕᖅᑭᓪᓗᓂ ᐊᑐᖅᑕᐅᑎᑕᐅᓚᐅᖅᐳᑦ ᑕᐃᑦᑯᓄᖓ ᐊᓄᓪᓚᒃᓯᕈᑎᐅᔪᓄᑦ.