ᐅᓇᑕᖅᑐᕐᓴᓄᑦ ᐊᑐᕐᑕᐅᓇᔭᕐᑐᑦ ‘ᐊᔪᕐᑕᐅᓇᔭᕐᒪᑦ’ ᕼᐋᒻᒪᓚᓄᑦ: ᒪᐃᓐ

For English version, see Military spending shouldn’t ‘fly in the face’ of impoverished communities: Main

ᐋᑐᕚᒥ ᑮᓇᐅᔭᓂ ᐊᑐᑐᐃᓐᓇᕆᐊᖃᕐᓯᒪᓕᕐᑐᑦ ᐅᑭᐅᕐᑕᖅᑐᕐᒥ ᓴᐳᔾᔨᓯᒪᓂᕐᒨᖓᔪᓄᑦ, ᓄᓇᕗᒥᑦ ᓯᕗᓕᐅᕐᑎ ᔮᓐ ᒪᐃᓐ ᐅᖃᐅᓯᖃᕐᑎᓪᓗᒍ ᓄᓇᓖᑦ ᐋᓐᓂᐊᖃᖅᑕᐃᓕᔭᕆᐊᖃᕐᓂᖏᓐᓂᒃ ᐊᒻᒪ ᖃᓄᐃᑦᑕᐃᓕᔭᕆᐊᖃᕐᓂᖏᓐᓂ ᑕᒪᓐᓇᓗ ᐱᒻᒪᕆᐅᖃᑕᐅᓪᓗᓂ ᐅᓇᑕᖅᑐᒃᓴᓕᕆᓂᕐᒥ ᐋᖅᑭᒃᓱᐃᓇᓱᒃᑎᓪᓗᒍ ᑲᓇᑕ ᐅᑭᐅᕐᑕᖅᑐᕐᒥ ᐱᖃᒻᒪᕆᒐᓱᖕᓂᖏᓐᓂᒃ.

ᐅᑭᐅᕐᑕᖅᑐᕐᒥ ᓴᐳᔾᔨᓯᒪᓂᖅ ᐃᓱᒪᒋᔭᐅᓛᖑᑲᑕᓕᕐᑐᖅ ᑲᓇᑕᒧᑦ ᑕᐃᒪᙵᑦ ᐊᒥᐊᓕᑲᒥᐅᑕᑦ ᐊᖓᔪᖅᑳᖓ ᑖᓄᑦ ᑐᕋᒻᑉ ᐊᐃᑉᐸᖓᓂ ᐊᖓᔪᖅᑳᙳᒃᑲᓐᓂᖅᑎᓪᓗᒍ ᔭᓄᐊᕆ 2025-ᒥ.

ᒐᕙᒪᑐᖃᒃᑯᑦ ᑐᓴᖅᑎᑦᑎᓯᒪᔪᖅ ᐱᓕᐊᓐ ᑖᓚᑲᓪᓚᖕᓂ ᐊᑐᕐᓂᐊᕐᓂᕋᖅᖢᑎᒃ ᐊᔾᔨᒌᙱᑦᑐᓄᑦ ᐅᓇᑕᖅᑐᒃᓴᓄᑦ ᐱᓕᕆᐊᕆᔭᐅᕙᒃᑐᓄᑦ, ᐃᓚᖃᕐᓗᓂ $2.67 ᐱᓕᐊᓐ ᐊᐅᓚᑦᑎᔾᔪᑎᒃᓴᓂ ᐃᖃᓗᖕᓂ, ᔭᓗᓇᐃᒥ ᐊᒻᒪ ᕗᐊᐃᑦᕼᐆᔅ, ᐊᒻᒪᓗ $6 ᐱᓕᐊᓐ ᓇᐹᕐᑐᒃᓴᓄᑦ ᖃᐅᔨᓴᕈᑎᖃᕐᕕᐅᓂᐊᖅᑐᓂᒃ (radar system).

ᑭᓯᐊᓂᓕ ᑮᓇᐅᔭᐃᑦ ᐊᑐᕐᑕᐅᓂᐊᕐᓗᑎᒃ ᐃᑲᔪᖅᑕᐅᔭᕆᐊᖃᕐᒪᑕ ᐃᓄᖕᓄᑦ, ᒪᐃᓐ ᐅᖃᐅᓯᖃᓚᐅᕐᑐ ᑲᑎᒪᖃᑎᖃᓕᓚᐅᖅᑎᓐᓇᓄ ᑲᓇᑕᒥ 12-ᓂ ᓯᕗᓕᐅᖅᑎᒋᔭᐅᔪᓂ ᐋᑐᕚᒥ ᔭᓄᐊᕆ 28-ᖑᑎᓪᓗᒍ ᐅᖃᐅᓯᖃᕐᓂᐊᖅᑎᓪᓗᒋᑦ ᐃᓱᒫᓘᑎᒋᔭᐅᔪᓂᒃ ᐃᓚᖃᖅᖢᑎᒃ ᓴᐳᔾᔨᓯᒪᓂᕐᒥᒃ ᐊᒻᒪ ᓂᐅᕐᕈᑎᖃᖃᑦᑕᕐᓂᕐᒥᒃ.

“ᐱᐅᓪᓚᕆᒃᑐᐊᓗᖕᓂᓪᓗ ᐅᓇᑕᖅᑐᒃᓴᓕᕆᓂᕐᒧᑦ ᐱᓕᕆᔾᔪᑎᖃᙱᖢᑎᒃ ᓄᓇᓕᖕᓂ ᑖᒃᑯᐊᓗ ᐊᔪᕐᓴᖅᖢᑎᒃ ᐊᒻᒪᓗ ᐃᒡᓗᑖᕆᐊᖃᒻᒪᕆᒃᖢᑎᒃ,” ᑐᓴᒐᒃᓴᓕᐅᖅᑎᓄᑦ ᐅᖃᓚᐅᕐᑐᖅ.

ᒪᐃᓐ ᐅᖃᓚᐅᕐᑐᖅ ᐅᖃᐅᓯᐅᑲᑕᒃᑐᒧᑦ ᐃᑲᔪᕐᑕᐅᔪᓐᓇᕐᓂᐊᕋᓱᒋᓪᓗᓂ, ᐊᒻᒪᓗ ᑲᑎᒪᖃᑎᖃᓚᐅᕆᓪᓗᓂ ᔭᓄᐊᕆ 27-ᒥ ᑲᓇᑕᐅᑉ ᐊᖓᔪᖅᑳᖓᓂ ᐳᕋᐃᒻ ᒥᓂᔅᑕ ᒫᒃ ᑳᓂᒥ ᐅᖃᖅᖢᓂ “ᑕᐅᑐᒍᒪᓇᔭᕐᓂᖓᓂ ᑕᒪᓐᓇ ᐱᓕᕆᐊᖑᓗᓂ ᓇᓕᒨᙲᒃᑎᑕᐅᓯᒪᓗᓂ.”

“ᖁᕕᐊᓱᑦᑎᐊᒻᒪᕆᒃᑐᒍ ᐊᒻᒪ ᖃᓄᐃᓕᐅᕈᒪᑦᑎᐊᖅᖢᑕ ᐋᑐᕚᒥ ᐅᖃᐅᓯᖃᕐᓂᕐᓴᐅᓕᕐᑎᓪᓗᒍ ᐅᑭᐅᕐᑕᖅᑐᕐᒥ ᐊᒻᒪ ᐅᖃᐅᓯᖃᑲᑕᒃᖢᑎᒃ ᐅᑭᐅᕐᑕᖅᑐᖅ ᓴᐳᔾᔭᐅᓯᒪᔭᕆᐊᖃᕐᓂᖓᓂ ᐊᒻᒪ ᓄᓇᖁᑎᒋᔭᐅᓂᖓᓂ,” ᒪᐃᓐ ᐅᖃᕐᑐᖅ.

ᑲᑎᖃᑎᖃᓚᐅᕐᒥᔪᖅ ᔭᓄᐊᕆ 28-ᒥ ᐃᖏᕐᕋᔾᔪᑎᓕᕆᓂᕐᒧᑦ ᒥᓂᔅᑕᒥ ᓯᑏᕙᓐ ᒪᒃᑭᓇᓐᒥ ᐅᖃᐅᓯᖃᖅᖢᑎᒃ ᒐᕙᒪᑐᖃᒃᑯᑦ $1 ᐱᓕᐊᓐ ᑖᓚᓂ ᐅᑭᐅᕐᑕᖅᑐᕐᒥ ᐃᒡᓗᓕᐅᕐᓂᕐᒧᑦ ᐃᑲᔫᑎᒃᓴᓂᒃ.

ᒪᐃᓐ ᐅᖃᐅᓯᖃᓚᐅᕐᒥᔪᖅ ᐊᔾᔨᒌᙱᑦᑑᑎᓂ ᓄᓇᕗᒥ ᓯᕗᓪᓕᐅᑎᑕᐅᓯᒪᔪᓂᒃ ᐃᓚᖃᖅᖢᓂ ᓂᐅᕕᕐᕕᖕᓂ ᓂᖀᑦ ᐊᑭᖏᓐᓂ ᐊᒻᒪᓗ ᐋᓐᓂᐊᕕᖕᒥ ᑲᒪᒋᔭᐅᔾᔪᑎᐅᕙᒃᑐᓂᒃ, ᑖᓐᓇᓗ ᓄᓇᕗᒥ ᐊᐅᓚᑕᐅᕙᒃᖢᓂ ᒐᕙᒪᑐᖃᒃᑯᓐᓂ ᐃᑲᔫᑎᖏᑦᑎᒍᑦ ᐊᒻᒪᓗ ᒪᐃᓐ ᑕᒪᑐᒥᖓ ᐱᐅᒃᓴᓗᐊᖅᐸᙱᖢᓂ.

“ᐅᑭᐅᕐᑕᖅᑐᖅ ᐃᓱᒪᒋᓪᓗᒋᑦ, ᐱᓇᓱᖕᓂᖃᕆᐊᖃᕐᓂᐊᖅᑐᑦ ᐊᒻᒪ ᐃᑲᔫᑎᒋᔭᐅᔪᓂᒃ ᐊᐅᓚᔾᔪᑎᖃᐃᓐᓇᕐᓗᑎᒃ ᑕᑯᔪᒪᒍᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᒪᐅᓇ ᐱᕙᓪᓕᐊᔪᓕᕆᓂᒃᑯᑦ ᐃᒡᓗᖃᖅᑐᑦ ᖃᓄᐃᑦᑕᐃᓕᖁᓂᕐᒧᑦ,” ᒪᐃᓐ ᐅᖃᕐᑐᖅ.

ᐅᖃᓪᓚᓚᐅᕐᒥᔪᖅ ᖃᓄᖅ ᐱᓕᕆᖃᑎᒌᖕᓂ ᐳᕌᕕᓐᓰ ᐃᑲᔪᕈᓐᓇᕐᓂᐊᕐᑐᑦ ᐅᑭᐅᕐᑕᖅᑐᕐᒥ ᓴᐳᔾᔨᓯᒪᓂᕐᒥᒃ. ᐅᖃᐅᓯᖃᖅᖢᓂ ᑭᕙᓪᓕᖅᒥ ᐃᒪᒃᑯᑦ ᐊᑦᑕᑕᕈᓐᓇᐅᑎᓕᕆᓂᖅ, ᑐᒃᓯᕋᐅᑎᐅᓯᒪᔪᖅ 1,200 ᑭᓛᒥᑕᓂᑕᑭᓂᓕᒃᓴᒥ, 150 ᒥᒐᕗᐊᑦ ᐊᑦᑕᑕᕈᓐᓇᐅᑎᒥ ᕙᐃᐳ ᐋᑉᑎᒃ ᑲᐃᐳᒥ, ᑖᓐᓇᓗ ᐊᑦᑕᑕᕈᑎᐅᓇᔭᕐᓗᓂ ᒫᓂᑑᐸᐅᑉ ᖃᓂᒋᔭᖏᓐᓃᑦᑐᓂᒃ ᓄᓇᓕᖕᓂ ᓄᓇᕗᒥᑦ ᑭᕙᓪᓕᖅᒦᑦᑐᓂᒃ.

ᐊᒻᒪᓗ ᐊᐱᕆᔭᐅᑎᓪᓗᒍ ᒫᓂᑑᐸᒧᑦ ᓯᕗᓕᐅᕐᑎᒧᑦ ᕗᐊᑉ ᑭᓅ ᐅᖃᐅᓯᕆᓚᐅᕐᑕᖏᓐᓂ ᐅᓇ ᑰᒡᔪᐊᕌᓗᒃ ᐅᑭᐅᕐᑕᖅᑐᕐᒥ ᑐᓚᒃᑕᕐᕕᐅᕙᖕᓂᐊᕐᓗᓂ ᓂᐅᕐᕈᑎᖃᕋᓱᖕᓂᕐᒧᑦ — ᐊᒻᒪᓗ ᓂᒋᕐᒥ ᓯᕗᓕᐅᕐᑎᑦ ᑕᒪᑐᒥᖓ ᑐᑭᓯᓯᒪᒐᓗᐊᕐᒪᖔᑕ ᐅᑭᐅᕐᑕᖅᑐᕐᒥ ᐱᓕᕆᐊᓂ — ᒪᐃᓐ ᐅᖃᓚᐅᕐᑐᖅ ᐱᑕᖃᕆᐊᖃᕐᓂᖓᓂ ᓂᒋᕐᒥᐅᓂ ᓴᓇᖃᑎᖃᕆᐊᖃᕐᓂᖏᓐᓂᒃ.

“ᐋᖅᑭᒃᓱᐃᑎᓪᓗᒍ ᑰᔾᔪᐊᕌᓗᒃᒥ ᑐᓚᒃᑕᕐᕕᒃᓴᒥ ᑕᒪᓐᓇ ᓄᓇᕗᒧᑦ ᐃᑲᔫᑎᐅᔪᓐᓇᖅᑐ ᐊᑦᑕᑕᐅᑎᓕᕆᓂᒃᑯᑦ,” ᐅᖃᕐᑐᖅ.