ᓄᑖᖅ ᑕᓗᕐᔪᐊᕐᒥ ᐃᓕᓐᓂᐊᕐᕕᐊᓗᒃ ᑭᒃᑯᓕᒫᓄᑦ ᐅᐸᒃᑕᐅᓯᒪᓪᓗᓂ ᒪᑐᐃᖅᑕᐅᔪᖅ

ᓴᕕᕋᔭᓕᕆᕝᕕᒃᒥᑦ ᐃᓕᓐᓂᐊᕐᑐᑦ ᑕᓗᕐᔪᐊᖅᒥ ᓄᑖᒥ $90 ᒥᓕᐊᓐᑐᖅᑐᒥ ᐸᖕᓂᖅ ᐃᓕᓐᓂᐊᕐᕕᐊᓗ ᖁᓪᓕᓕᐅᕐᕕᐅᓚᐅᕐᑐᖅ ᑖᓐᓇᓗ ᐊᑐᕐᑕᐅᓪᓗᓂ ᒪᑐᐃᕐᑕᐅᑎᓪᓗᒍ ᐅᒃᑑᐱᕆ 16-ᒥ.

ᐃᓕᓐᓂᐊᕐᕕᒃ ᓄᓇᓕᖕᓃᑦᑐᖅ ᖁᑦᑎᒃᓯᓯᒪᓂᑯᒥ ᓄᓇᒥ ᒥᑦᑕᕐᕕᐅᑉ ᖃᓂᒋᔭᖓᓂ.

ᖃᓄᐃᓕᖓᓂᖓ ᓄᓇ ᑕᐅᑐᒃᖢᒍ ᓲᕐᓗ ᐊᔾᔨᖃᖅᑰᔨᔪᖅ ᐊᑎᖓᓂ — ᐸᖕᓂᖅ, ᐃᓄᒃᑎᑐᑦ ᐊᖑᓴᓪᓗᒃ ᑐᒃᑐ ᐸᖕᓂᖅ. ᐃᓕᓐᓂᐊᕐᑐᑦ ᐃᑲᔪᓚᐅᕐᑐᑦ ᐊᑎᖓᓂ ᓂᕈᐊᖅᖢᑎᒃ ᐊᕐᕌᓂ ᓵᓚᒃᓴᕋᓱᒃᖢᑎᒃ ᐊᑎᒃᓴᖓᓂ.

“ᐃᓕᓐᓂᐊᕐᕕᒃ ᐱᐅᔪᐊᓗᒃ — ᓴᓇᓯᒪᑦᑎᐊᖅᖢᓂ,” ᐅᖃᕐᑐᖅ ᐃᓕᓴᐃᔨᓄᑦ ᐊᖓᔪᖅᑳᕆᔭᐅᓕᕐᑐᖅ ᕌᑦᓂ ᑐᕉᕗ ᐅᒃᑑᐱᕆ 14-ᒥ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᓪᓗᓂ.

ᐃᓕᓐᓂᐊᕐᕕᒃᒧᑦ 16 ᐃᖅᑲᓇᐃᔭᖅᑎᖏᑦ ᐊᒻᒪ 200 ᐃᓕᓐᓂᐊᕐᑎᑦ ᐱᒋᐊᕐᓯᒪᓪᓗᑎᒃ ᒍᕇᑦ 7-ᒥ 12-ᒧ ᐅᑭᐅᒃᓵᖅ ᐃᓕᓐᓂᐊᓕᕆᐊᓚᐅᕐᓯᒪᔪᑦ ᐊᖏᓂᖃᖅᑐᒥᓐ 3,300 ᑭᑉᐹᕆᒃᑎᓯᒪᔪᓂ ᒦᑕᓂ ᑕᐃᒪᙵᑦ ᓴᓇᔭᐅᓚᐅᕐᓯᒪᖕᒪᑦ, ᐊᒻᒪᓗ ᐱᐊᓂᒃᑕᐅᓪᓗᓂ ᐱᐊᓂᒃᑕᐅᕝᕕᒃᓴᖓᓂ ᐱᒋᐊᖅᑕᐅᓂᑰᓪᓗᓂ 2023-ᒥ.

ᐅᓇ ᑕᓪᓕᒪᒋᔭᐅᔪᖅ ᐃᓕᓐᓂᐊᕐᕕᖕᓂ ᓴᓇᔭᐅᔪᓂ ᐃᖃᓗᖕᓂ ᐱᓕᕆᕝᕕᐅᕙᒃᑐᒥ ᐅᑯᓇᙵᑦ ᐱᓕᑕᒃ ᐊᓐᑐᐳᕋᐃᔅ ᓕᒥᑎᑦᑯᓐᓂ, ᐅᐃᓂᐱᒡᒥ ᐱᓕᕆᐊᓕᖕᓂ ᐋᑭᐅᑕᒃᑯᓐᓂᑦ (Accutech Engineering Inc.), ᐊᒻᒪ ᐹᑭᓐ ᐃᒡᓗᒃᓴᓂ ᑎᑎᕋᐅᔭᖅᑎᓂᒃ ᑖᒃᑯᐊᓗ ᑎᑎᕋᕐᕕᖃᖅᖢᑎᒃ ᐋᓐᑎᐅᕆᐅᒥ ᐊᒻᒪ ᐳᕆᑎᔅ ᑲᓚᒻᐱᐊᒥ.

ᐅᓇ ᐃᓕᓐᓂᐊᕐᕕᒃ ᐃᓕᖅᑯᓯᒃᑰᖓᔪᓂ ᐃᓕᓐᓂᐊᕐᓇᖅᑐᑦ ᒪᑯᓂᖓ ᐱᓕᕆᔾᔪᑎᓕᕆᔨᓂᒃ ᒪᑯᓂᖓ ᐃᓚᖃᖅᖢᑎᒃ ᕿᔪᓕᐅᕈᑎᓂ, ᑐᓴᕐᓴᐅᔾᔪᑎᒧᑦ ᐱᓕᕆᔾᔪᑎᓂ ᐊᒻᒪ ᑕᕐᕆᔭᕈᓐᓇᐅᑎᖃᖅᖢᑎᒃ ᑕᒪᕐᒥ ᐃᓕᓐᓂᐊᕕᐅᔪᑦ, ᑐᕉᕗ ᐅᖃᕐᑐᖅ.

“ᑭᓱᖃᑦᑎᐊᐸᓗᒃᑐᖅ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᖃᐅᔨᓴᖅᑐᓕᕆᕝᕕᒃ “ᓯᓚᑦᑐᖅᓴᕐᕕᐊᓗᒃᒥ ᐃᓕᓐᓂᐊᕕᐅᓇᔭᕐᒥᔪᖅ.”

ᓂᕿᓕᐅᕐᕕᒥ ᐊᔪᕈᓐᓃᕐᓴᕐᕕᖃᖅᖢᓂ ᐊᒻᒪ ᖃᓄᐃᓕᐅᕐᕕᖃᖅᖢᓂ ᒪᑯᐊ ᐃᓐᓇᑐᖃᐃᑦ ᐃᓕᓐᓂᐊᖅᑎᔾᔪᑎᒋᔪᓐᓇᖅᑕᖏᓐᓂ ᓲᕐᓗ ᐋᒃᑐᐃᓂᕐᒥ ᐊᒻᒪ ᐃᓄᐃᑦ ᓂᕿᓕᕆᕝᕕᖓᓂ ᐱᑕᖃᖅᖢᓂ.

ᐃᓕᓐᓂᐊᓕᓵᐸᓗᒃᑎᓪᓗᒋᑦ ᐃᓕᓐᓂᐊᕐᑏᑦ. ᐊᑐᓚᐅᕐᓯᒪᔪᑦ ᓄᑖᓂ ᐃᒐᓂ ᐅᒥᖕᒪᓕᐅᖅᖢᑎᒃ. ᐅᒃᑑᐱᕆ 14-ᒥ ᓇᑦᑎᓕᐅᑲᑕᓚᐅᕆᓪᓗᑎᒃ ᑖᓐᓇ ᐃᓕᓐᓂᐊᕐᕕᒃ ᒪᑐᐃᖅᑕᐅᒻᒪᕆᒃᐸᑦ ᓂᕆᔭᐅᓂᐊᕐᑐᓂ.

ᑖᓐᓇ ᐱᓕᕆᕝᕕᐅᔪᖅ ᑲᒪᒋᔭᐅᓪᓗᓂ ᐃᓕᓴᐃᔨ ᐱᐊᓪ ᐊᑰᓕᒥ, ᕿᔪᓕᕆᔾᔪᑎᖃᕐᑐᖅ, ᐅᐊᔭᓕᕆᕝᕕᒃᒥᓪᓗ, ᐊᐅᖅᑭᔾᔪᑎᓕᕆᓂᕐᒥᓪᓗ ᐊᒻᒪ ᐊᓯᖏᓐᓂ ᓴᓇᔾᔪᑎᐅᕙᒃᑐᓂ.

ᐅᓇ ᐃᓕᓐᓂᐊᕐᕕᒃ ᐋᖅᑭᒃᑕᐅᓯᒪᔪᖅ 400 ᐅᖓᑖᓂ ᐃᓕᓐᓂᐊᕐᕕᐅᔪᓐᓇᖅᖢᓂ.

ᐅᒃᑑᐱᕆ 16-ᒥ ᖃᓄᐃᓕᐅᕈᑎᐅᓚᐅᕐᑐᖅ ᒪᕐᕈᐃᓂ ᑎᑕᒃᑎᖃᐅᖅᖢᓂ, ᐃᙱᐅᑎᖃᖅᖢᑎᒃ, ᑲᑕᔾᔭᑲᑕᒃᖢᑎᒃ ᐊᒻᒪ ᕿᓚᐅᔾᔭᑲᑕᒃᖢᑎᒃ.

ᐃᖃᐃᓕᓴᕐᕕᒃ ᑕᓗᕐᔪᐊᒥ ᓄᑖᒥ ᐸᖕᓂᖅ ᐃᓕᓐᓂᐊᕐᕕᐊᓗᒃᒥ ᐋᖅᑭᒃᓱᖅᑕᐅᓯᒪᔪᖅ ᒪᑐᐃᖅᑕᐅᕝᕕᒃᓴᖓᓂ ᐱᓇᓱᐊᕈᓯᐅᓚᐅᕐᑐᒥ, ᐅᓇᓂ ᓯᕗᓕᐅᖅᑎ ᔮᓐ ᒪᐃᓐ ᐅᐸᒍᑎᓚᐅᖅᖢᓂ. (ᐊᔾᔨᙳᐊᖅ ᐅᕙᙵᑦ ᕌᑦᓂ ᑐᕉᕗ)

ᖃᐃᖁᔭᐅᓯᒪᔪᑦ ᐃᓚᖃᓚᐅᕐᑐᑦ ᓯᕗᓕᐅᕐᑎ ᔮᓐ ᒪᐃᓐᒥ ᐊᒻᒪ ᐊᓯᖏᓐᓂ ᒪᓕᒐᓕᐅᖅᑎᓂ ᑖᒃᑯᐊᓗ ᑐᙵᓱᒃᑎᑕᐅᓪᓗᑎ ᓯᓚᒥ ᖃᐅᒪᓪᓗᓂ ᒪᕐᕉᖕᓂ ᐊᖏᔫᖕᓂ ᐃᒐᓛᒃᑯᑦ, ᐱᖃᑖ ᐅᐊᖕᓇᕐᒧᑦ ᓵᙵᓪᓗᓂ ᐊᒻᒪ ᐱᖃᑎᖓ ᑲᓇᖕᓇᖅᐸᓯᖕᒧᑦ.

ᖃᐃᖁᔭᐅᓯᒪᔪᑦ ᕿᒥᕐᕈᐊᖅᑎᑕᐅᓚᐅᕐᑐᑦ ᒪᑐᐃᖅᑕᐅᓚᐅᖅᑎᓐᓇᓄ ᐃᓄᖕᓄᑦ ᖃᐃᔪᓄᑦ. ᓂᕆᕕᒡᔪᐊᖅᖢᑎ ᑭᖑᓂᐊᒐᑦ.

“ᐅᓇ ᐃᓕᓐᓂᐊᕐᕕᒃ ᓄᓇᓕᖕᓄᑦ ᑐᓂᓯᔾᔪᓯᐊᑦᑎᐊᕚᓗᑦ ᐅᑯᓄᖓᓕ ᐱᒻᒪᕆᐅᓂᕐᓴᐅᓪᓗᓂ ᐃᓕᓐᓂᐊᕐᑐᓄᑦ,” ᑐᕉᕗ ᐅᖃᕐᑐᖅ.