‘ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᖃᔾᔮᙱᓚᖅ ᐱᖃᙱᓪᓗᑎᒃ ᐃᓄᖕᓄᑦ ᓴᐳᔾᔨᓯᒪᓂᖃᑦᑎᐊᖅᑐᒥ’: ᑑᕐᙶᓗᒃ

For English version, see No Arctic sovereignty without Inuit security,’ Tunraluk says

ᓄᓇᕗᒻᒥ ᑐᙵᕕᒃᑯᑦ. ᐊᖓᔪᖅᑳᖓ ᔨᐊᕋᒥ ᑑᕐᙶᓗᖕᒧᑦ, ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᐊᒻᒪ ᓴᐳᔾᔨᓯᒪᓂᖃᑦᑎᐊᖅᑐᒥ ᐱᔪᓐᓇᕋᔭᖅᐳᖅ ᑭᓯᐅᓂ ᓄᓇᕗᒻᒥ ᓄᓇᓕᐅᔪᑦ ᐃᑲᔪᖅᓯᖅᑕᐅᓗᑎᒃ ᐊᒻᒪ ᐃᓄᐃᑦ ᐃᓕᖅᑯᓯᖓ ᐱᕈᑦᑎᐊᕐᓂᖃᕈᓂ.

“ᐅᖃᐅᓯᒃᓴᕗᑦ ᑐᑭᓯᓇᑦᑎᐊᖅᐳᖅ: ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᐱᔪᓐᓇᔾᔮᙱᓚᖅ ᐱᖃᕐᓇᓂ ᐃᓄᖕᓂ ᓴᐳᔾᔨᓯᒪᓂᖃᑦᑎᐊᖅᑐᒥ,” ᑑᕐᙶᓗᒃ ᐅᖃᓚᐅᖅᐳᖅ ᔫᓂ 26−ᒥ ᐱᒋᐊᕐᓂᖓᓂ ᒪᑐᐃᕈᑕᐅᔪᒥ ᐅᖃᓪᓚᖕᓂᖓᓂ ᒪᑐᐃᕐᓂᐅᔪᒥ ᐅᓪᓗᓂ−ᐱᖓᓱᓂ ᓄᓇᕗᒻᒥ ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᐊᒻᒪ ᓴᐳᔾᔨᓯᒪᓂᖃᑦᑎᐊᖅᑐᒥ ᑲᑎᒪᕕᒡᔪᐊᕐᓂᐅᔪᒥ ᐃᖃᓗᖕᓂ.

ᑲᑎᒪᓂᐅᔪᖅ, ᐱᓕᕆᐊᖑᔪᒥ ᐊᖅᓴᕐᓃᑦ ᑐᔪᕐᒥᕕᖓᓂ, ᐅᐸᒃᑎᑦᑎᓚᐅᖅᐳᖅ ᕼᐊᓐᓇᓚᖏᓐᓂ ᒐᕙᒪᒃᑯᓐᓂ, ᐅᓇᑕᖅᑐᒃᓴᓂ ᐊᒻᒪ ᓇᖕᒥᓂᖃᖅᑎᐅᔪᓂ ᓯᕗᓕᐅᖅᑎᐅᔪᓂ ᑲᑎᙵᓂᐅᔪᓂ ᐅᖃᓪᓚᖕᓂᐅᔪᓂ ᐱᓕᕆᔪᓂ ᓴᐳᔾᔨᓯᒪᓂᖃᑦᑎᐊᖅᑐᒥ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪ ᐃᓄᖕᓂ ᓯᕗᓕᐅᖅᑎᐅᓂᕐᓂ.

ᑑᕐᙶᓗᒃ ᑲᑎᑎᕆᓚᐅᖅᐳᖅ ᓴᐳᔾᔨᓯᒪᓂᖃᑦᑎᐊᖅᑐᒥ ᐊᒻᒪ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᖃᓄᐃᙱᑦᑎᐊᕐᓂᐅᔪᒥ ᐃᓄᖕᓄᑦ ᓄᓇᓕᐅᔪᓄᑦ.

“ᓄᓇᓕᕗᑦ ᐊᖅᑯᑎᖃᙱᓗᐊᕈᑎᒃ, ᒥᕝᕕᖕᓂ, ᓴᓗᒪᔪᒥ ᐃᒪᕐᒥ ᐅᕝᕙᓘᓐᓃᑦ ᐊᑐᕈᓐᓇᑦᑎᐊᖅᑐᓂ ᐋᔩᖃᑎᒌᖕᓂᐅᔪᓂ, ᓴᐳᔾᔨᓯᒪᓂᖃᑦᑎᐊᙱᓚᑦ,” ᐅᖃᓚᐅᖅᐳᖅ.

“ᐊᖏᕐᕋᐃᑦ ᐸᖕᒥᐅᓗᐊᖅᐸᑕ ᐊᒻᒪ ᓱᕋᒃᐸᓪᓕᐊᓗᑎᒃ, ᓂᕿᑦ ᖃᖓᑕᓲᒃᑰᖅᑎᑕᐅᔭᕆᐊᖃᕈᑎᒃ ᖃᓪᓗᓈᑦ ᓄᓇᖓᓐᓂ ᐊᖑᓇᓱᒃᑎᕗᑦ ᐊᔪᓕᖅᑎᑕᐅᓗᑎᒃ ᐊᑐᐊᒐᓄᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪ ᐅᓯᑲᑦᑕᕐᓂᕐᒧᑦ ᐊᒃᑐᐃᓂᐅᔪᓂ, ᐊᓱᐃᓛᒃ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᐅᖃᐅᓯᑐᐃᓐᓇᙳᖅᐳᖅ.”

ᑲᓇᑕ, ᐅᖃᓚᐅᖅᐳᖅ, ᑲᑎᖅᓱᖅᑕᐅᕙᓪᓕᐊᓗᑎᒃ ᑮᓇᐅᔭᓂ ᑐᖅᑯᖅᑕᐅᓯᒪᓗᑎᒃ ᐱᕈᖅᐸᓪᓕᐊᑎᑕᐅᔭᕆᐊᖃᖅᐳᑦ ᓄᓇᓕᖕᓂ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐃᓚᖃᖅᑐᒥ “ᑲᓇᑕᒥ-ᐱᕈᖅᐸᓪᓕᐊᑎᑦᑎᓂᕐᒥ” ᐱᓕᕆᐊᒃᓴᐅᔪᓂ ᐃᒻᒥᓂᒃ ᐊᒻᒪ ᓄᓇᕗᒻᒥ ᓯᕗᓕᖅᑎᐅᔪᑦ P.J. ᐊᕿᐊᕈᖅ ᑲᑎᖃᑎᒌᒃᓯᒪᓪᓗᑎᒃ ᖃᐃᖁᔨᓂᖃᕐᓂᕐᒧᑦ ᓴᓇᔭᐅᓂᖏᓐᓂ.

ᐱᓗᐊᖅᑐᒥ, ᑑᕐᙶᓗᒃ ᐅᖃᓚᐅᖅᐳᖅ ᖁᕐᓗᖅᑐᐊᕐᔪᒃ ᐊᖅᑯᑎᖓᓂ ᐊᒻᒪ ᑐᓚᒃᑕᕐᕕᒃᓴᖓᓂ — ᑐᒃᓯᕋᖅᑕᐅᔪᒥ 230-ᑭᓛᒥᑐᒥ ᐊᕐᕌᒍᓕᒫᒥ ᐊᖅᑯᒻᒥ ᐊᒻᒪ ᐃᑎᔪᒥ ᑐᓚᒃᑕᕐᕕᒃᓴᖓᓂ ᑲᓱᖃᑎᖃᕋᔭᖅᐳᖅ ᓄᓇᕗᒻᒥ ᖃᓪᓗᓈᑦ ᓄᓇᖓᓐᓄᑦ — ᐃᑲᔪᕋᔭᖅᐳᖅ ᑲᓇᑕᒥ ᐊᔭᐅᕆᓂᖓᓂ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓂ.

ᑭᓯᐊᓂ ᓇᓗᓇᐃᖅᓯᓚᐅᖅᐳᖅ ᐃᓄᖕᓂ ᐅᖃᖃᑎᖃᕐᓂᑐᐃᓐᓇᐅᔪᒥ “ᓈᒻᒪᙱᓚᖅ.”

“ᑐᕌᖅᑎᑦᑎᔭᕆᐊᖃᖅᐳᒍᑦ,”ᐅᖃᓚᐅᖅᐳᖅ.

ᑑᕐᙶᓗᒃ ᕿᒥᕐᕈᓚᐅᖅᐳᖅ ᑕᐃᔅᓱᒪᓂᑐᖃᕐᒥ, ᐱᓗᐊᖅᑐᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᓅᑎᑕᐅᓂᐅᔪᓂ 1950−ᖏᓐᓂ, ᐃᓄᐃᑦ ᐃᓚᓕᐅᔾᔭᐅᓚᐅᙱᑎᓪᓗᒋᑦ ᐊᖏᔪᓂ ᐃᓱᒪᓕᐊᖑᓂᐅᔪᓂ ᐱᔪᓐᓇᕐᓂᖃᕐᔪᐊᕐᓂᐅᔪᒥ.

ᑕᐃᒃᑯᐊ ᐅᓪᓘᔪᑦ ᐊᓂᒍᖅᐳᑦ, ᐅᖃᓚᐅᖅᐳᖅ.

“ᐅᑭᐅᖅᑕᖅᑐᒥ ᐊᑐᐊᒐᖃᕈᓐᓇᙱᓚᖅ ᓄᓇᕗᒻᒥ ᐃᓄᖏᑦ ᕿᑎᐊᓃᙱᓪᓗᑎᒃ,” ᐅᖃᓚᐅᖅᐳᖅ.

“ᐅᓇ ᑲᑎᓐᓂᐅᓚᐅᕐᓕ ᖃᓄᐃᓕᐅᕐᓂᐅᔪᒥ, ᐅᖃᐅᓯᑐᐃᓐᓇᐅᙱᑦᑐᓄᑦ. ᐊᖏᓚᐅᖅᑕ ᓴᓇᓂᕐᒥ ᐊᖏᕐᕋᒃᓴᓂ, ᐊᖏᖅᓯᒪᓗᑕ ᓴᐳᔾᔨᓯᒪᓂᕐᒥ ᐅᖃᐅᓯᑦᑎᓐᓂ, ᐱᒪᑐᑦᑎᐊᕆᐊᕐᓂᕐᒥ ᐃᒪᑦᑎᓐᓂ, ᐊᒻᒪ ᑲᔪᖏᖅᓴᐃᓗᑕ ᒪᒃᑯᒃᑐᖁᑎᑦᑎᓐᓂ ᐃᓄᖕᓄᑦ ᐃᓄᖕᓂ, ᓄᓇᕗᒻᒥ ᖃᖓᓕᒫᑦᑎᐊᒧᑦ.”

ᑑᕐᙶᓗᒃ ᐃᓚᓕᐅᔾᔨᓚᐅᖅᐳᖅ ᐊᒥᓱᓂ ᐊᓯᖏᓐᓂ ᖃᐃᖁᔨᓂᐅᔪᓂ ᖃᓄᐃᓕᐅᕐᓂᕐᒧᑦ, ᐃᓚᖃᖅᑐᒥ ᐅᖃᐅᓯᕐᒥ ᐸᐸᑦᑏᓐᓇᕐᓂᐅᔪᒥ. ᑕᐃᓯᓚᐅᖅᐳᖅ ᐃᓄᒃᑐᒻᒥ ᐅᖃᐅᓯᑐᐃᓐᓇᐅᙱᑦᑐᒥ, ᑭᓯᐊᓂ ᓄᓇᕐᔪᐊᒥ-ᑕᑯᔭᐅᓂᐅᔪᒥ.

ᐅᖃᓪᓚᖕᓂᖓ ᑭᐅᔭᐅᓚᐅᖅᐳᖅ ᓇᖏᖅᑐᓂ ᐸᑦᑕᒃᑐᖅᑕᐅᓂᐅᔪᒥ ᐃᓚᐅᖃᑕᐅᔪᓂ ᐃᒡᓗᕈᓯᕐᒥ.

ᒪᓕᒃᑕᐅᓚᐅᕆᕗᖅ ᑲᑎᒪᔨᐅᔪᓂ ᐅᖃᓪᓚᖕᓂᐅᔪᒥ, ᐃᔾᔪᐊᖅᓯᓚᐅᖅᑐᒥ ᐊᒻᒪ ᐃᓚᒋᐊᖅᑕᐅᔪᒥ  ᐅᖃᐅᓯᕆᖅᑲᐅᔭᖓᓂ.

ᓕᐊᕆ ᐊᐅᓪᓚᓗᒃ ᐊᐅᔪᐃᑦᑐᕐᒥᐅᑕᖅ ᓅᑕᐅᓚᐅᖅᓯᒪᕗᖅ ᖁᑦᑎᒃᑐᒧᑦ ᐅᑭᐅᖅᑕᖅᑐᒧᑦ  1953−ᒥ ᐱᖓᓱᐸᓗᖕᓂ ᐅᑭᐅᖃᖅᑎᓪᓗᒍ. ᐅᖃᓪᓚᓚᐅᖅᐳᖅ ᐃᓚᖏᑦᑕ ᓅᑕᐅᓚᐅᖅᓯᒪᓂᖏᓐᓂ ᐃᓄᒃᔪᐸᕐᒥ, ᓄᓇᕕᖕᒥ, ᐊᒻᒪ ᖃᓄᖅ ᐅᓪᓗᒥ ᓄᓇᓕᖓ ᐊᒃᓱᕈᖅᐸᖕᓂᖏᓐᓂ ᐱᑕᖃᙱᓗᐊᕐᓂᖓᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓗᑎᒃ ᐱᕈᖅᐸᓪᓕᐊᑎᑕᐅᔭᓂ ᐊᒻᒪ ᐊᑭᑐᔪᓂ ᐱᖁᑎᓂᑦ.

“ᖁᕕᐊᓱᒃᐳᖓ ᐆᒪᐃᓐᓇᕈᓐᓇᓚᐅᕋᑦᑕ, ᑭᓯᐊᓂ ᐊᑭᑐᔪᒻᒪᕆᐊᓘᓚᐅᖅᐳᖅ, ᐊᒻᒪ ᓄᓇᖃᕐᓂᕐᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ, ᓱᓕ ᐊᒃᓱᕈᖅᐳᒍᑦ ᖁᑦᑎᒃᑐᐊᓗᖕᒥ ᐊᑭᐅᔪᒥ ᐆᒪᓇᓱᐊᕐᓂᕐᒧᑦ,” ᐅᖃᓚᐅᖅᐳᖅ.

ᔭᓇᕗ ᕿᓚᕝᕙᖅ ᐃᖃᓗᖕᓂᕐᒥᐅᑕᖅ, ᐅᖃᓪᓚᓚᐅᖅᑐᒥ ᓴᓂᓕᐊᓂ ᐊᐅᓪᓚᓗᖕᒥ ᒪᒃᑯᒃᑑᓪᓗᓂ ᑲᑎᒪᔨᐅᖃᑕᐅᕗᖅ, ᐅᖃᐅᓯᖃᓚᐅᖅᐳᖅ ᐊᔾᔨᐸᓗᐊᓂ ᖃᐃᖁᔨᓂᐅᔪᒥ ᐱᐅᓂᖅᓴᐅᔪᒥ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓗᑎᒃ ᐱᕈᖅᐸᓪᓕᐊᑎᑕᐅᔭᓂ ᓄᓇᓕᖕᓂ.

“ᑲᓇᑕ ᖃᓄᐃᓕᐅᕈᓐᓇᖅᐸ ᐃᑲᔪᖅᓱᐃᓂᕐᒧᑦ ᐃᓄᖕᓄᑦ ᓴᐳᔾᔨᓯᒪᓂᖃᑦᑎᐊᖅᑐᒥ ᐊᒻᒪ ᐱᔪᓐᓇᕐᓂᖃᕐᔪᐊᕐᓂᐅᔪᒥ?” ᕿᓚᕝᕙᖅ ᐅᖃᓚᐅᖅᐳᖅ

“ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓗᑎᒃ ᐱᕈᖅᐸᓪᓕᐊᑎᑦᑎᔪᓐᓇᖅᐳᓯ ᐱᓪᓚᕆᐅᔪᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐃᒡᓗᖃᖅᑎᑦᑎᓂᕐᒥ, ᒥᑦᑕᕐᕕᓂᑦ, ᑐᓚᒃᑕᕐᕕᓂᑦ, ᓴᓗᒪᔪᒥ ᐆᒻᒪᖅᑯᑎᓂ, ᐱᔪᓐᓇᑦᑎᐊᖅᑐᓂ ᐋᔩᖃᑎᒌᖕᓂᐅᔪᓂ. ᑮᓇᐅᔭᖃᖅᑎᑦᑎᔪᓐᓇᖅᐳᓯ ᐃᓱᒪᑐᓂᐅᔪᓂ ᐱᓕᕆᐊᖑᔪᓂ, ᓄᓇᓕᖕᓂ ᑕᖕᒫᕐᕕᐅᔪᓂ, ᒪᒃᑯᒃᑐᓄᑦ ᐱᒋᐊᕈᑕᐅᔪᓂ, ᒥᐊᓂᖅᓯᓂᕐᒧᑦ, ᐅᖃᐅᓯᕐᒧᑦ ᐊᒻᒪ ᐃᓕᖅᑯᓯᒧᑦ, ᐊᒻᒪ ᒪᒥᓴᕐᓂᕐᒧᑦ. ᐃᓚᓕᐅᔾᔨᔪᓐᓇᖅᐳᓯ ᐃᓄᖕᓂ ᑕᒪᒃᑭᓂ ᐃᓱᒪᓕᐊᖑᓂᐅᔪᓄᑦ ᓯᓚᒧᑦ, ᐱᕙᓪᓕᐊᑎᑕᐅᓂᕐᒧᑦ ᐊᒻᒪ ᓴᐳᔾᔨᓯᒪᓂᕐᒧᑦ.”

ᐃᓱᓕᑦᑎᓚᐅᖅᐳᖅ, “ᑲᓇᑕ ᐱᔪᓐᓇᙱᓚᑦ ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᐅᔪᒥ ᑐᓵᙱᙳᐊᕐᓗᑎᒃ ᐱᔭᕆᐊᖃᕐᓂᐅᔪᓂ ᐃᓄᖕᓂ ᐅᕙᓂ.”