ᑕᕆᐅᒃᑯᑦ ᐊᐅᓪᓚᖅᓯᒪᑯᑖᖕᓂᖅ ᖃᐅᔨᑎᑦᑎᓚᐅᖅᐳᖅ ᓄᓇᕗᒻᒥ ᒪᒃᑯᒃᑐᒥᒃ ᑕᐅᑐᖅᑰᖅᑕᒥᓂᒃ

ᒍᕋᐃᓴᓐ ᒫᓯ ᑎᑭᕋᕐᔪᐊᕐᒥᐅᑕᖅ ᐃᓕᓐᓂᐊᖅᑐᖅ ᐅᑭᐅᖅᑕᖅᑐᒥ ᐊᐅᓚᑦᑎᓂᕐᒥᒃ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ, ᐃᒻᒥᓂᒡᓗ ᐊᐅᓪᓚᖅᓯᒪᓪᓗᓂ ᓅᒃᒥᑦ ᐃᖃᓗᖕᓄᑦ ᐊᐅᔭᖅ.

ᑖᓐᓇ 16-ᓂᒃ ᐅᑭᐅᓕᒃ ᑕᕆᐅᕐᔪᐊᖅ ᓅᕙᒦᓚᐅᖅᐳᖅ ᐅᐊᖕᓇᒥᑦ ᐅᑭᐅᖅᑕᖅᑐᒧᑦ ᓄᒃᑕᕐᓂᐅᔪᒧᑦ, ᑲᑎᑎᑦᑎᓪᓗᓂ 60-ᓂᒃ ᒪᒃᑯᒃᑐᓂᒃ ᑲᓇᑕᒥᙶᖅᑐᓂᒃ, ᑲᓛᖦᖡᑦ ᓄᓈᓐᓂᙶᖅᑐᓂᒃ, ᐊᓯᖏᓐᓂᒡᓗ ᐅᑭᐅᖅᑕᖅᑐᒥ ᓄᓇᒋᔭᐅᔪᓂᒃ ᐃᓕᑦᑎᔪᒪᓪᓗᑎᒃ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᕆᔭᐅᔪᓐᓇᖅᑐᓂᒃ ᐱᐅᖅᓱᐊᕐᓂᕐᒧᑦ ᖃᐅᔨᓴᖅᑐᓕᕆᓂᕐᒧᓪᓗ. ᑖᓐᓇ ᐊᐅᓪᓚᕐᓂᕆᓚᐅᖅᑕᖓ ᔪᓚᐃ 10-ᒥᑦ 22-ᒧᑦ ᐊᐅᓚᑕᐅᓚᐅᖅᑐᖅ ᐃᓕᓐᓂᐊᖅᑏᑦ ᓯᑯᒦᑦᑐᑦ ᑲᑐᔾᔨᖃᑎᒌᒃᑯᖏᓐᓄᑦ ᑲᑐᔾᔨᖃᑎᖃᖅᑐᑎᒃ ᐅᑭᐅᖅᑕᖅᑐᒥ ᑲᑎᒪᔨᕐᔪᐊᓂᒃ ᐊᒻᒪᓗ ᓄᐊᑎᐊᒃᑯᑦ ᑲᑎᒪᔨᖏᓐᓂᒃ ᒥᓂᔅᑕᐃᑦ.

“ᑕᒪᓐᓇ ᐱᓕᕆᐊᕆᓕᓚᐅᖅᑕᕋ ᑕᑯᓚᐅᕋᒃᑯ ᐱᕕᒃᓴᐅᓂᖓᓂᒃ ᖃᐅᔨᕚᓪᓕᕈᑎᒋᓪᓗᒍ ᐅᑭᐅᕐᑕᖅᑐᕐᒥ,” ᒫᓯ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᔪᓚᐃ 16-ᒥ, ᑐᕌᖅᐸᓪᓕᐊᓪᓗᓂ ᑑᕐᖓᑦ ᖃᖅᑲᖏᓐᓄᑦ ᐅᐊᖕᓇᖅᐸᓯᐊᓂ ᓛᐸᑐᐊᒥ.

ᐊᐅᔭᐅᓚᐅᕐᑐᖅ, ᐃᓅᓱᒃᑐᖅ ᐃᖅᑲᓇᐃᔭᓚᐅᕐᑐᖅ ᐱᐅᖅᓱᐊᕐᓂᕐᒧᑦ ᐃᓕᓐᓂᐊᖅᑎᐅᓪᓗᓂ, ᖃᐅᔨᓴᖅᐸᒃᖢᓂ ᓇᓄᕐᓂᒃ, ᖃᐅᔨᓴᖅᐸᒃᖢᓂ ᐆᒪᔪᓂᒃ ᐊᐅᓚᑦᑎᓂᕐᒥᒃ ᐊᔾᔨᒌᙱᑦᑐᓂ ᓄᓇᓕᖕᓂ, ᐊᒻᒪ ᖃᐅᔨᓴᖅᐸᒃᖢᓂ ᐅᔭᕋᖕᓂᐊᕐᕕᖕᓂ.

ᒫᓯᐅᑉ ᐊᖓᔪᖅᑳᖓ ᑐᒃᓯᕋᖁᔨᓚᐅᖅᐳᖅ ᐅᓪᓗᓄᑦ 12-ᓄᑦ ᓅᒃᒥᑦ ᐃᖃᓗᖕᓄᑦ, ᐊᐃᑉᐸᕆᓕᖅᑕᖓ ᐊᐅᔭᖅ ᐅᐊᖕᓇᒥᑦ ᐅᑭᐅᖅᑕᖅᑐᒧᑦ ᐃᖏᕐᕋᓂᐅᔪᒥᑦ.

ᐊᐅᓪᓚᕐᓂᐅᔪᒥ ᑐᕌᒐᕆᔭᐅᓚᐅᖅᐳᖅ ᑕᑯᑎᑦᑎᓂᕐᒥ ᒪᒃᑯᒃᑐᓂ ᐃᓚᐅᖃᑕᐅᔪᓂ— 60 ᐳᓴᓐᑎᖏᑦ ᓄᓇᖃᖅᑳᖅᓯᒪᓪᓗᑎᒃ — ᐊᔾᔨᒌᙱᑦᑑᑎᓂᒃ ᐃᓕᖅᑯᓯᖃᖅᖢᑎᒃ ᐊᒻᒪ ᐃᖅᑲᓇᐃᔮᕆᔪᒪᔭᖏᓐᓂᒃ, ᐅᖃᓚᐅᖅᐳᖅ ᑯᕋᐃᒡ ᒪᒃᑳᓕᓐ, ᓂᐅᕐᕈᑎᖃᕐᓂᕐᒧᑦ ᐊᒻᒪ ᑐᓴᐅᒪᔪᓕᕆᓂᕐᒧᑦ ᐱᓕᕆᖃᑎᒌᒃᑐᓄᑦ ᓯᕗᓕᖅᑎ ᐅᑯᓄᖓ, ᐃᓕᓐᓂᐊᖅᑏᑦ ᓯᑯᒦᑦᑐᑦ.

“ᐱᔪᒪᓂᖃᑦᑎᐊᖁᕙᕗᑦ ᐊᒻᒪ ᐱᔪᒃᓯᑦᑎᐊᕐᓗᑎᒃ ᑕᒪᒃᑯᓂᖓ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᕆᔪᒪᔭᖏᓐᓂᒃ ᐊᒻᒪ ᓯᕗᓂᒃᓴᑦᑎᓐᓂ,” ᐅᖃᓚᐅᖅᐳᖅ. “ᒪᒃᑯᒃᑐᓂᒃ ᕿᒪᐃᔪᓐᓇᕈᑦᑕ ᑕᒪᑐᒥᖓ ᐊᑐᖅᓯᒪᔭᒥᓂᒃ ᐃᓱᒪᓗᑎᒃ ᓄᑖᓂᒃ ᐱᕕᒃᓴᓂᒃ ᐊᒻᒪ ᐱᕕᒃᓴᐅᔪᓐᓇᖅᑐᓂᒃ, ᐃᓱᒪᔪᖓ ᐱᓕᕆᐊᒃᓴᑦᑎᓐᓂᒃ ᐱᓕᕆᑦᑎᐊᖅᓯᒪᓂᑦᑎᓐᓂᒃ.”

ᑲᓛᖦᖡᑦ ᓄᓈᓐᓂ, ᐃᓄᐃᑦ ᑕᑯᔭᖅᑐᓚᐅᖅᐳᑦ ᐊᐅᔪᐃᑦᑐᓂᒃ, ᓄᑕᐅᙱᑦᑐᐊᓗᖕᓂᒃ ᓱᕋᒃᓯᒪᔪᓂᒃ, ᐊᒻᒪ ᐆᓇᖅᑐᓂᒃ ᐃᒪᕐᓂᒃ ᐃᓕᓐᓂᐊᖅᐸᓪᓕᐊᓪᓗᑎᒃ ᓄᓇᓕᖕᓂ ᖃᓄᐃᓕᐅᖅᑕᐅᕙᓚᐅᖅᑐᓂᒃ ᐊᒻᒪ ᐃᓕᓐᓂᐊᖃᑕᐅᓪᓗᑎᒃ ᐊᐅᓚᑕᐅᔪᓂᒃ ᖃᐅᔨᓴᖅᑎᓄᑦ ᐊᒻᒪ ᐃᓕᓴᐃᔨᓄᑦ.

“ᐃᓚᖓᑦ ᐅᔾᔨᕆᓚᐅᖅᑕᕋ ᐊᔾᔨᐸᓗᒋᓪᓗᓂᐅᒃ ᓄᓇᕘᒥ ᐊᖑᓇᓱᒍᓯᖏᑦ,” ᐅᖃᓚᐅᖅᐳᖅ ᒫᓯ.

“ᐊᑐᖃᑦᑕᖅᑐᑦ ᐅᓄᖅᑐᓂᒃ ᓄᓇᓕᖕᓂ ᖃᐅᔨᒪᓂᕆᔭᐅᔪᓂᒃ ᐃᓐᓇᕐᓂᑦ, ᑕᐃᒪᐃᑉᐸᒃᑲᑦᑕ ᓄᓇᕗᒻᒥ.”

ᑕᒪᓐᓇ ᓇᒧᙵᐅᕙᓪᓕᐊᓂᕆᔭᖓ ᐃᑲᔪᖅᓯᒪᕗᖅ ᐋᖅᑭᒃᓱᐃᓂᕐᒥᒃ ᓯᕗᓂᒃᓴᒥᓂᒃ. ᐅᖃᓚᐅᕐᑐᖅ ᓅᒃ, ᐆᒃᑑᑎᒋᓗᒍ, “ᐃᓂᒋᓇᔭᖅᑕᕋᓗᐊᕋ,” ᐊᒻᒪ ᐱᐅᖅᓱᐊᕐᓂᖅ “ᐊᒃᓱᒻᒪᕆᐊᓗᒃ” ᐱᓕᕆᐊᕆᔪᒪᔭᖓ ᐃᓕᓐᓂᐊᕇᕈᓂ.

ᐅᓪᓗᒐᓴᖕᓂ ᑕᕆᐅᕐᒦᑲᑕᖕᓂᖅ, ᑭᓯᐊᓂ, ᓱᖏᐅᑎᓇᓱᒋᐊᖃᕐᓇᖅᐳᖅ.

“ᐃᓛᓐᓂᒃᑯᑦ ᐅᐃᔾᔭᙳᖃᑦᑕᓚᐅᖅᑐᖓ,” ᒫᓯ ᐅᖃᓚᐅᖅᐳᖅ ᐃᒡᓚᖅᖢᓂ. “ᖁᕕᐊᓇᒻᒪᕆᒃᑐᖅ ᐊᑐᖅᖢᒍ. ᓇᒡᓕᒋᔭᕋ. ᑕᐃᒪᐃᓕᐅᒃᑲᓐᓂᕋᔭᖅᑐᖓ ᑭᓯᐊᓂ ᐱᓇᓱᐊᕈᓰᒃ ᒪᕐᕉᒃ ᐅᖓᑖᓅᙱᑦᑐᖅ.”