ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐅᖃᖅᐳᖅ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᖓ ᐱᓕᕆᓂᑭᓗᐊᖅᐳᖅ ᓴᐳᔾᔨᓯᒪᓂᕐᒥ ᑐᒃᑐᓂᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᑭᒡᒐᖅᑐᐃᔨᐅᔪᑦ ᐅᖃᖅᐳᑦ ᐅᒃᐱᕈᓱᙱᓚᑦ ᑐᒃᓯᕋᖅᑕᐅᔪᒥ ᐸᕐᓇᐅᑎᒥᒃ ᐊᐅᓚᑦᑎᓂᕐᒧᑦ ᓄᓇᕗᒻᒥ ᓄᓇᖏᓐᓂ ᐱᓕᕆᓂᑭᓗᐊᕐᓂᖓᓂ ᓴᐳᔾᔨᓯᒪᓂᕐᒧᑦ ᑐᒃᑐᓂ.

ᐅᖃᐅᓯᖃᓚᐅᖅᐳᑦ ᐃᓱᒫᓘᑎᖏᓐᓂ ᑐᓵᑎᑦᑎᓂᐅᔪᒥ ᐸᕐᓇᐅᑎᒥᒃ ᐱᓇᓱᐊᕈᓯᐅᓚᐅᖅᑐᒥ ᐅᓇᑕᖅᑐᒃᓴᙳᐊᓄᑦ ᐃᒡᓗᖁᑎᖓᓐᓂ ᐃᖃᓗᖕᓂ.

“ᐃᒃᐱᒍᓱᒃᐳᒍᑦ ᐱᓕᕆᓂᖃᙱᓗᐊᖅᐳᑦ ᑐᒃᑐᐃᑦ ᓇᔪᒐᖏᓐᓂ ᑐᒃᓯᕋᖅᑕᐅᔪᒥ ᓴᐳᔾᔭᐅᓯᒪᓂᖏᓐᓄᑦ,” ᐅᖃᓚᐅᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᑎᑎᕋᖅᑎ-ᑮᓇᐅᔭᓕᕆᔨ ᓕᕙᐃ ᐹᓇᐸᔅ ᓄᕕᐱᕆ 16−ᒥ.

ᓄᓇᕗᒻᒥ ᐸᕐᓇᐃᔩᑦ ᑲᒪᒋᔭᖃᖅᐳᑦ ᐱᕙᓪᓕᐊᑎᑦᑎᓂᕐᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥ ᓄᓇᕗᒻᒧᑦ. ᑐᒃᓯᕋᖅᐳᖅ ᐃᑲᔪᕈᑎᒃᓴᓂ ᐲᖅᓯᓂᐅᔪᓂ ᐊᒻᒪ ᐱᕙᓪᓕᐊᑎᑦᑎᓂᕐᒥ ᐱᓕᕆᐊᖑᔪᓐᓇᖅᑐᓂ ᐊᒻᒪ ᓇᓕᐊᑦ ᐃᓂᐅᔪᑦ ᓴᐳᔾᔭᐅᓯᒪᓂᐊᕐᓂᖏᓐᓂ.

ᐸᕐᓇᐃᔩᑦ ᐳᓚᕋᖅᓯᒪᕗᑦ ᓄᓇᕗᒻᒥ ᑐᓵᑎᑦᑎᓂᖃᕐᓂᕐᒧᑦ ᑐᒃᓯᕋᖅᑕᐅᔪᒥ ᐸᕐᓇᐅᑎᒥᒃ. ᑲᒪᒋᔭᖃᓚᐅᖅᐳᖅ ᑐᓵᑎᑦᑎᓂᐅᔪᓂ ᑕᒪᑐᒪᓂ ᐅᑭᐊᒃᓵᖑᔪᒥ ᐃᖃᓗᒃᑑᑦᑎᐊᕐᒥ, ᑲᖏᖅᖠᓂᖅ ᐊᒻᒪ ᒥᑦᑎᒪᑕᓕᖕᒥ. ᑐᓵᑎᑦᑎᓂᐅᔪᒥ ᐱᓕᕆᐊᖑᔪᖃᓚᐅᕆᕗᖅ ᑖᒻᓴᓐ, ᒫᓂᑑᐸᒥ.

ᑐᒃᑐᐃᑦ ᐅᖃᐅᓯᐅᓪᓗᐊᑕᓚᐅᖅᐳᑦ, ᐃᓚᖃᖅᑐᒥ ᐱᔭᕆᐊᖃᕐᓂᖓᓂ ᓴᐳᔾᔨᓯᒪᓂᕐᒥ ᐊᖏᓂᖅᓴᐅᔪᒥ ᓇᔪᒐᖏᓐᓂ ᕿᑭᖅᑖᓗᖕᒥ ᐊᕕᒃᑐᖅᓯᒪᓂᐅᔪᒥ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᖁᕕᐊᓱᒃᑎᓪᓗᒋᑦ ᑐᒃᓯᕋᖅᑕᐅᔪᒥ ᐸᕐᓇᐅᑎ ᑭᒡᓕᖃᖅᑎᑦᑎᓂᖓᓐᓂ ᐱᕙᓪᓕᐊᑎᑦᑎᓂᐅᔪᒥ ᑐᒃᑐᓄᑦ ᐃᓚᑰᓕᖓᓂᖏᓐᓂ ᓄᓇᖓᓐᓂ, ᑲᑐᔾᔨᖃᑎᒌᖑᔪᑦ ᐅᒃᐱᕈᓱᙱᓚᑦ ᐅᑯᐊ ᑭᒡᓕᐅᔪᑦ ᐅᖓᓯᙱᓗᐊᖅᑐᒨᖅᓯᒪᕗᑦ, ᐅᖃᓚᐅᖅᐳᖅ ᓵᓚᒪᓐ ᐊᕙ, ᑲᑐᔾᔨᖃᑎᒌᖑᔪᑦ ᑐᑭᒧᐊᒃᑎᑦᑎᔨᖓ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᒻᒪ ᐃᓚᐅᑎᑦᑎᓂᕐᒧᑦ.

ᐊᕙ ᑎᒃᑯᐊᕆᓚᐅᖅᐳᖅ ᕿᑭᖅᑖᓘᑉ ᐅᐊᖕᓇᖓᓄᑦ ᐊᒻᒪ ᐃᕐᕋᕐᔭᕕᐅᑉ ᓄᓈᓂ ᐱᓗᐊᖅᑐᒥ ᐃᓂᐅᔪᓂ ᑐᒃᑐᐃᑦ ᐅᑎᖅᑕᖃᑦᑕᖅᑐᓂ ᐃᓂᐅᔪᓂ ᓈᒻᒪᒃᑐᒥ ᓴᐳᔾᔭᐅᓯᒪᓂᖃᙱᓐᓂᖏᓐᓂ.

ᑎᑎᕋᖅᑕᐅᒋᐊᕐᙵᕈᒻᒥ ᐸᕐᓇᐅᑎ ᓴᐳᔾᔨᓯᒪᙱᓚᑦ ᐃᒪᑦᑎᐊᕙᖕᒥ ᐃᑳᕐᕕᐅᔪᓂ ᑐᒃᑐᓄᑦ ᐊᒻᒪ ᓴᐳᔾᔨᓯᒪᓂᖃᙱᓗᐊᖅᐳᖅ ᑕᕆᐅᕐᒥ−ᓯᑯᒥ ᐃᑳᕐᕕᐅᔪᓂ, ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑲᑐᔾᔨᖃᑎᒌᖓ ᐸᕐᓇᒃᐳᑦ ᑐᓂᓯᓂᐊᕐᓂᖏᓐᓂ ᐅᓂᒃᑳᓕᐊᖑᔪᒥ ᐅᓂᒃᑳᕆᔪᒥ ᓇᓕᐊᑦ ᐃᓂᐅᔪᑦ ᑐᒃᑐᓂ ᓴᐳᔾᔨᓯᒪᒃᑲᓐᓂᕆᐊᖃᕐᓂᖏᓐᓂ.

ᐊᕙ ᐅᖃᓚᐅᖅᐳᖅ ᐅᓂᒃᑳᓕᐊᖅ ᐱᕙᓪᓕᐊᑎᑕᐅᓂᐊᖅᐳᖅ ᐱᓕᕆᖃᑎᖃᕐᓗᑎᒃ ᕿᑭᖅᑖᓗᒃ ᐆᒪᔪᓕᕆᔨᕐᔪᐊᒃᑯᓐᓂ.

ᑕᒪᒃᑭᐅᒪᔪᒥ ᑎᑎᕋᖅᓯᒪᓂᖃᔾᔮᙱᓚᖅ, ᑭᓯᐊᓂ ᓯᕗᓪᓕᐅᔾᔭᐅᖁᔭᐅᒧᓂ ᐃᓂᐅᔪᓂ ᑎᑎᕋᖅᓯᒪᓂᐊᖅᐳᑦ ᒪᕐᕉᒃ ᑲᑐᔾᔨᖃᑎᒌᖑᔪᓂ ᐅᒃᐱᕆᔭᖏᓐᓂ ᐱᒻᒪᕆᐅᓛᖑᓂᖏᓐᓂ.

“ᐃᓕᓴᖅᓯᕗᒍᑦ ᑕᒪᒃᑭᑦ ᐃᓂᐅᔪᑦ ᓴᐳᔾᔭᐅᓯᒪᔪᓐᓇᙱᓐᓂᖏᓐᓂ,” ᐊᕙ ᐅᖃᓚᐅᖅᐳᖅ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐱᓚᐅᖅᐳᑦ ᐃᓚᖏᓐᓂ ᐱᐅᙱᑦᑐᓂ ᐊᑭᕋᖅᑐᕐᓂᐅᔪᓂ ᐊᕕᒃᑐᖅᓯᒪᔪᓂ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ. ᐱᓗᐊᖅᑐᒥ ᐸᖕᓂᖅᑑᒥ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ ᐃᓚᒋᔭᐅᔪᒥ ᔮᓂ ᒪᐃᒃ ᐅᖃᓚᐅᖅᐳᖅ ᐅᓇ ᓯᕗᓪᓕᖅᐹᖑᔪᒥ ᑐᓴᕐᓂᖓᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐅᓂᒃᑳᓕᐊᒥ ᐃᓱᒫᓘᑕᐅᔪᓂ ᑐᒃᑐᓄᑦ ᐊᕕᒃᑐᖅᓯᒪᓂᖓᓐᓂ.

ᐃᓚᒋᐊᖅᓯᓚᐅᖅᐳᖅ ᑐᒃᑐᓕ ᕿᑭᖅᑖᓗᖕᒥ ᐅᐊᖕᓇᖓᓂ ᐊᒻᒪ ᕿᑭᖅᑖᓗᖕᒥ ᓂᒋᖓᓂ ᑕᑯᔭᐅᖁᔨᓂᖓᓂ ᐊᔾᔨᒌᙱᑦᑐᓂ ᐃᓛᑯᓕᖓᓂᖏᓐᓂ.

ᐱᐊᓐ ᖁᕕᖅ, ᐊᒪᕈᖅ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ ᐃᖃᓗᖕᓂ, ᑎᒃᑯᐊᕆᓚᐅᖅᐳᖅ ᐊᓯᖏᑦ ᐆᒪᔪᑦ ᓴᐳᔾᔭᐅᓯᒪᔭᕆᐊᖃᕐᓂᖏᓐᓂᑦᑕᐅᖅ, ᐱᓗᐊᖅᑐᒥ ᓇᑦᑎᑦ.

ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐊᐱᕆᔾᔪᑎᖃᓚᐅᕐᓂᖓᓂ ᓇᑦᑎᕐᓂ ᓴᐳᔾᔭᐅᓯᒪᓂᐅᔪᓂ ᓂᕿᒃᓴᕆᔭᐅᒐᔪᓛᖑᖕᒪᑕ ᐃᓄᖕᓄᑦ.

“ᓄᓇᓕᐅᔪᑦ ᓲᕐᓗ ᑲᖏᖅᖢᒑᐱᒃ, ᕿᑭᖅᑕᕐᔪᐊᖅ, ᐊᑐᐃᓐᓇᖃᙱᓚᑦ [ᐊᔪᕐᓇᙱᑦᑐᒥ ᐊᑐᐃᓐᓇᖃᖅᑐᒥ] ᑐᒃᑐᓄᑦ,” ᐅᖃᓚᐅᖅᐳᖅ.

ᖁᕕᖅ ᐅᖃᓚᐅᕆᕗᖅ ᑐᓵᑎᑦᑎᓂᐅᔪᒥ ᑭᐅᔾᔪᑎᖃᕐᓂᕐᒥ ᐊᑲᐅᙱᓕᐅᕈᑕᐅᔪᓄᑦ ᓲᕐᓗ ᓇᑦᑎᕐᓂ ᓴᐳᔾᔨᓯᒪᓂᕐᒥ ᐱᒻᒪᕆᐅᕗᖅ, ᐃᓱᓕᕝᕕᒃᓴᖓ ᐅᖃᖃᑎᖃᕐᓂᐅᔪᒥ ᐊᖑᓇᓱᒃᑐᓕᕆᔨᒃᑯᓐᓄᑦ ᑲᑐᔾᔨᖃᑎᒌᖑᔪᓄᑦ ᔭᓄᐊᕆ 10−ᖑᖕᒪᑦ.

“ᑐᐊᕕᖅᑎᑕᐅᔪᐊᓘᕗᒍᑦ,”ᐅᖃᓚᐅᖅᐳᖅ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐱᓕᕆᖃᑎᖃᖅᐳᖅ ᐃᒪᐃᖁᔨᓂᐅᔪᓂ ᓇᑦᑎᕐᓄᑦ ᓴᐳᔾᔭᐅᓯᒪᓂᖏᓐᓂ ᓯᕗᓂᐊᓂ ᔭᓄᐊᕆ 10 ᐃᓱᓕᕝᕕᒃᓴᖓᓂ, ᐹᓇᐸᔅ ᐅᖃᓚᐅᖅᐳᖅ.

ᐊᓯᖏᓐᓂ ᐃᓱᒫᓅᑕᐅᔪᓂ ᓴᖅᑭᑕᐅᔪᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᐃᓚᖃᖅᐳᖅ ᑐᒃᓯᕋᖅᑕᐅᔪᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐸᕖᓵᕆᔪᓐᓇᕐᓂᖓᓂ ᑲᑐᔾᔨᖃᑎᒌᖑᔪᑦ ᐸᕐᓇᐅᑎᖏᓐᓂ ᓯᕗᓂᒃᓴᒧᑦ ᐸᐸᑦᑏᓐᓇᕋᓱᖕᓂᕐᒧᑦ, ᓲᕐᓗ ᐋᔩᖃᑎᒌᖕᓂᐅᔪᓂ ᑕᐅᕘᓇ ᐊᒡᒍᑦᑎᓐᓂ ᓄᓇᕗᒻᒥ ᒥᕐᙳᐃᖅᓯᕐᕕᖕᒥ ᑲᖏᖅᖢᒑᐱᐅᑉ ᖃᓂᒋᔭᖓᓂ, ᐊᒻᒪ ᐃᓚᓕᐅᔾᔨᙱᓗᐊᖅᐳᖅ ᑭᒡᓕᖃᖅᑎᑦᑎᓂᐅᔪᓂ ᑕᕆᐅᕐᒥ ᐅᒥᐊᕐᔪᐊᓄᑦ ᐃᖏᕐᕋᓂᐅᔪᓂ.

ᑐᓵᑎᑦᑎᓂᐅᔪᑦ ᐊᐅᓚᓚᐅᖅᐳᑦ ᑕᐃᑯ ᓄᕕᐱᕆ 19−ᒧᑦ.