ᐋᓐᓂᐊᕕᒡᔪᐊᕐᓇᖅ ᓯᕗᓪᓕᐅᑎᑕᐅᕗᖅ ᐅᐱᕐᖔᖅ ᑲᑎᒪᓂᖅ ᐱᒋᐊᖅᑎᓪᓗᒍ

ᓄᓇᕗᒥᑦ 13 ᒪᓕᒐᓕᐅᖅᑎᓂᒃ 9 ᖃᕋᓴᐅᔭᒃᑯᑦ ᑲᑎᒪᖃᑕᐅᔪᑦ ᐃᖃᓗᖕᓂ ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ

ᓄᓇᕗᒥᑦ ᒪᓕᒐᓕᕆᔨᕐᔪᐊᒃᑯᑦ ᑲᑎᒪᔨᖏᑦᑕ ᐃᓚᖏᑦ ᐅᐱᕐᖔᖑᔪᖅ ᑲᑎᒪᖃᑕᐅᓂᐊᖅᑐᑦ ᖃᕋᓴᐅᔭᒃᑰᖓᓗᑎᒃ, ᑕᕝᕙᓂ ᐃᖃᓗᖕᓂ ᐋᓐᓂᐊᕕᒡᔪᐊᕐᓇᖅᑕᖃᑲᑕᖕᓂᖓᓂᒃ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᒥᓚᓂ ᐅᕆᑦᓵᑦ

For an English version of this story, see Pandemic at forefront as spring legislative session kicks off

ᐅᓄᕐᓂᖅᓴᐃᑦ ᓄᓇᕗᒥᑦ ᒐᕙᒪᒃᑯᓐᓄᑦ ᒪᓕᒐᓕᐅᖅᑎᐅᔪᑦ ᐅᐱᕐᖔᖅ ᑲᑎᒪᖃᑕᐅᔪᑦ ᖃᕋᓴᐅᔭᒃᑯᑦ ᐃᖃᓗᖕᓂ ᓄᕙᒡᔪᐊᕐᓇᖅ-19-ᒥᓐ ᐋᓐᓂᐊᖅᑖᖅᑐᖃᑲᑕᒃᑎᓪᓗᒍ. ᑕᐃᒪᓐᓇᓗ ᖃᖓᑕᑲᑕᖕᓂᖅ ᓄᖅᑲᖓᑎᑕᐅᓯᒪᓂᕐᓴᖕᒪᑦ ᓄᓇᓕᖕᓄᙵᐅᖃᑦᑕᖅᑐᓂᒃ.

ᐋᓐᓂᐊᖅᑖᕐᓇᖅᑐᖅ ᐅᖃᐅᓯᐅᓗᐊᑲᑕᓚᐅᖅᑐᖅ ᐅᑯᓇᙵᑦ 13-ᓂᒃ ᒪᓕᒐᓕᐅᖅᑎᓂᒃ, ᑖᒃᑯᓇᙵᓪᓗ 9 ᐊᖏᕐᕋᖅᓯᒪᔭᕆᐊᖃᖅᖢᑎᒃ ᑖᒃᑯᐊ ᓄᓇᕗᒧᑦ ᐊᖓᔪᖅᑳᖑᔪᑦ ᑲᑎᒪᓕᖅᑎᓪᓗᒋ ᒪᐃ 27-ᒥ.

ᔮᓐ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᖅᔪᐊᖅᒧᑦ, ᐊᐱᕐᓱᖅᓇᖅᒥᒃ ᐱᒋᐊᖅᑎᑦᑎᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓄᑦ ᖁᐊᓴ ᑯᓱᒐᖅᒧᑦ ᐊᐱᕆᑎᓪᓗᒍ ᑭᕙᓪᓕᖅᒥᑦ ᑐᐊᕕᕐᓇᖅᑐᓕᕆᓂᖅᒧᑦ ᐋᓐᓂᐊᕐᕕᓕᐊᕆᐊᖃᖅᑐᑦ ᒫᓂᑑᐸᐅᑉ ᐊᓯᐊᓄᑦ ᐊᐅᓪᓚᖅᑎᑕᐅᔪᓐᓇᙱᑦᑕᕆᐊᒃᓴᖏᓐᓂᒃ ᑕᕝᕙᓂ ᒫᓂᑑᐸᒥ ᖁᑦᑎᓛᕐᒦᓐᓂᖏᓐᓄᑦ ᐋᓐᓂᐊᖅᑖᖅᓯᒪᔪᓂᒃ ᐅᓄᕐᓂᖏᑦᑎᒎᖓᓂᒃᑯᑦ ᓄᐊᑦ ᐊᒥᐊᓕᑲᒥᓐ.

ᑯᓱᒐᖅ ᐅᖃᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑕᐃᒪᐃᑐᐃᓐᓇᕆᐊᖃᕐᓂᕋᖅᖢᓂᒋᑦ, ᑭᓯᐊᓂᓕ ᖃᐅᔨᓚᐅᙱᓐᓂᕋᖅᑐᖅ ᐋᓐᓂᐊᕐᕕᓕᐊᕆᐊᓕᖕᓂᒃ ᐊᓯᐊᓄᙵᖅᑎᑕᐅᔪᕕᓂᕐᓂᒃ ᑕᒪᑐᒧᖓ.

ᐃᖃᓗᐃᑦ-ᓂᐊᖁᙴᒧᑦ ᒪᓕᒐᓕᐅᖅᑎ ᐹᑦ ᐊᕐᓇᑲᒃ ᐊᐱᕆᓚᐅᖅᑐᖅ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐊᑐᓕᖅᑎᑦᑎᓇᔭᕆᐊᒃᓴᖏᓐᓂᒃ ᐋᓐᓂᐊᕐᓂᖅᒧᑦ ᐊᑭᓕᖅᓱᖅᑕᐅᓕᕐᓗᑎᒃ ᐊᓯᖏᑦᑎᑐ ᑲᓇᑕᒥ ᑕᐃᒪᐃᓯᒪᓕᕐᓂᖏᓐᓄᑦ, ᑖᓐᓇᓗ ᓄᓇᕗᑦ ᑐᙵᕕᒃᑯᑦ ᐅᖃᐅᓯᕆᓚᐅᖅᓯᒪᒋᓪᓗᓂᐅᒃ.

ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᓚᐅᖅᓯᒪᔪᖅ ᓄᑖᓂᒃ ᒪᓕᒐᒃᓴᓂᖅ ᐋᖅᑭᒃᓱᐃᔪᒪᙱᓐᓂᕋᖅᖢᓂ ᐊᑐᓕᑕᐃᓐᓇᕋᔭᖅᑐᓂᒃ ᐊᑐᖅᑕᐅᔭᕆᐊᖃᕈᓐᓃᖅᑎᓪᓗᒋᑦ.

“ᑕᒪᓐᓇ ᐊᑐᐃᓐᓇᐅᓕᕋᔭᙱᒻᒪᑦ ᑭᓯᐊᓂ ᓯᑎᐱᕆᐅᓕᕈᓂ, ᑕᐃᒪᓐᓇᓗ ᐃᓱᓕᓕᑕᐃᓐᓇᕐᕕᒋᓇᔭᖅᑕᒃᓴᕆᓪᓗᓂᐅᒃ,” ᐅᖃᖅᑐᖅ.

ᐊᕐᓇᑲᒃ ᐅᖃᒃᑲᓐᓂᓚᐅᖅᑐᖅ, “ᑕᐃᒪᑐᖅ ᐋᓐᓂᐊᕕᒡᔪᐊᕐᓇᖅᑕᖃᒃᑲᓐᓂᖅᑕᐃᓕᓕ ᑕᒪᓐᓇ ᐅᖃᐅᓯᐅᒃᑲᓐᓂᕆᐊᖃᓛᕐᒥᖕᒪᑦ.”

ᖃᒪᓂᑦᑐᐊᖅᒧᑦ ᒪᓕᒐᓕᐅᖅᑎ ᒍᕆᒡ ᓯᒪᐃᓚᒃ ᐊᐱᕆᓚᐅᖅᑐᖅ ᐱᕙᓪᓕᐊᔪᓕᕆᔨᒃᑯᑦ ᒥᓂᔅᑕᖓᓄᑦ ᑕᐃᕕᑦ ᐊᕿᐊᕈᖅᒧᑦ ᖃᑯᒍ ᐊᒡᓂᑯ ᐄᑯᓪ ᐅᔭᕋᒃᓯᐅᖅᕕᐅᑉ ᓄᓇᕗᒥᑦ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔮᖏᓐᓄᑦ ᐅᑎᕈᓐᓇᖅᓯᓛᕆᐊᒃᓴᖏᓐᓂᒃ ᐅᕗᖓ ᒥᓕᐊᑏᓐ ᒎᓗᒧᑦ ᐅᔭᕋᒃᓯᐅᖅᕕᒃᒧᑦ.

ᐄᐳᕈᓪ ᐃᓱᓕᓕᖅᑎᓪᓗᒍ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᓚᐅᖅᓯᒪᖕᒪᑦ ᐃᓱᒪᓂᕋᖅᖢᓂ ᐅᑯᓂᖓ ᐸᕐᓇᐅᑎᓂᒃ ᑐᓂᔭᐅᓂᑯᓂᒃ ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃᒥᑦ ᐊᒻᒪ ᐊᒡᓂᑯ ᐄᑯᓪᑯᓐᓂ ᑕᒪᓐᓇ ᑕᐃᒪᐃᓕᖅᑎᑕᐅᔪᓐᓇᖅᓯᖁᓪᓗᒍ. ᑕᐃᔅᓱᒪᓂᓕ, ᐹᑐᓴᓐ ᐅᖃᓚᐅᖅᓯᒪᔪᖅ ᑎᑎᕋᖅᕕᖓ ᐱᓕᕆᖃᑎᖃᕐᓂᕋᖅᖢᓂᒋᑦ ᐅᔭᕋᒃᓯᐅᖅᕕᖕᓂᒃ ᐸᕐᓇᐅᓯᐅᕐᓂᒃᑯᑦ ᐊᒻᒪ ᐋᖅᑭᒃᓱᐃᕙᓪᓕᐊᓂᖅᒧᑦ, ᑭᓯᐊᓂᓕ ᖃᖓᒻᒪᕆᒃ ᐃᖅᑲᓇᐃᔮᖏᓐᓄᑦ ᐅᑎᕐᓂᐊᕆᐊᒃᓴᖏᓐᓂᒃ ᐅᖃᕈᓐᓇᓚᐅᙱᑦᑐᖅ.

ᑭᓯᐊᓂᓕ ᖃᑯᒍᒻᒪᕆᒃ ᓇᓗᓇᐃᖅᑕᐅᔪᓐᓇᙱᑦᑐᖅ, ᐊᕿᐊᕈᖅ ᐅᖃᖅᑐᖅ, ᐅᖃᖅᖢᓂ ᐅᓄᕈᓘᔭᖅᑐᓄᑦ ᒪᑯᑎᑐᓇᖅ ᐋᓐᓂᐊᖅᑖᖅᐸᓪᓕᐊᔪᓄᑦ ᐊᒻᒪᓗ ᑲᐱᔭᐅᕙᓪᓕᐊᓂᖅᒧᑦ ᐊᒃᑐᖅᑕᐅᔭᕆᐊᓕᖕᓄᑦ ᑕᒪᑐᒥᖓ ᓇᓗᓇᕈᑎᐅᓂᕋᖅᖢᒍ ᖃᑯᒍ ᓄᓇᕗᒥᐅᑕᑦ ᐃᖅᑲᓇᐃᔭᕆᐊᕈᓐᓇᖅᓯᓛᕐᓂᖏᓐᓂᒃ.

ᓄᓇᕗᒧᑦ ᐃᓄᑑᓐᓇᖅᑐᒃᑯᕕᐅᔪᑦ ᐅᖃᐅᓯᐅᖃᑕᐅᓕᓚᐅᕐᒥᔪᑦ ᐊᐱᖅᓱᖅᓇᐅᑎᓪᓗᒍ, ᐅᓇ ᐅᖅᓱᖅᑑᖅᒧᑦ ᒪᓕᒐᓕᐅᖅᑎ ᑑᓂ ᐊᑯᐊᒃ ᐊᐱᕆᑎᓪᓗᒍ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓄᑦ ᑕᒪᒃᑯᐊ ᐃᓄᐃᑦ ᐊᑐᕆᐊᖃᖅᑕᖏᓐᓂᒃ ᓱᕋᐃᔭᕌᖓᑕ ᐊᑕᐅᓰᙱᓪᓗᑎᒃ ᐱᒋᐊᒃᑲᓐᓂᕆᐊᖃᕆᐊᒃᓴᖏᓐᓂᒃ ᐅᓪᓗᓂᒃ 14-ᓂᒃ ᐃᓅᑐᒋᐊᖃᕐᓂᖅᒥᒃ ᓇᖕᒥᓂᖅ ᐊᑭᓕᖅᓱᐃᓗᑎᒃ.

“ᐃᓄᖕᓂ ᐊᑭᓕᖅᓱᐃᖁᔨᙱᓐᓇᑦᑕ ᐃᓅᑑᔭᕆᐊᖃᕐᓂᖏᓐᓄᑦ,” ᑯᓱᒐᖅ ᐅᖃᖅᑐᖅ.

“ᐅᓄᖅᑐᒻᒪᕆᐊᓗᐃᑦ ᐃᓄᐃᑦ ᐋᓐᓂᐊᖅᕕᓕᐊᖅᖢᑎᒃ ᐊᐅᓪᓚᖃᑦᑕᕐᒪᑕ ᑕᒪᓐᓇᓗ ᑮᓇᐅᔭᑎᒍᑦ ᐊᒃᓱᕈᕈᓘᔭᓕᕐᓇᖅᖢᓂ.”

ᐅᖃᓚᐅᖅᑐᖅ ᐃᓅᓯᓕᕆᔨᑕᖃᕐᓂᖓᓂᒃ ᐊᒻᒪ ᐃᖅᑲᓇᐃᔭᖅᑎᓂᒃ ᐃᓄᑑᕝᕕᒋᔭᐅᔪᓂᒃ ᐃᑲᔪᕋᓱᖃᑦᑕᖅᑐᓂᒃ ᐃᓄᑑᔭᕆᐊᖃᕐᓂᖏᓐᓂᒃ ᐊᓂᒍᐃᓇᓱᒃᑐᓂᒃ.

ᐅᓇᑦᑕᐅᖅ ᓄᓇᕗᒥᑦ ᓂᕈᐊᕐᓇᐅᓛᖅᑐᖅ ᐃᓱᒪᒋᔭᐅᖃᑕᐅᖕᒥᔪᖅ, ᐄᓕ ᐆᒧᖓ ᐅᖃᖅᑎᒧᑦ ᐹᓪ ᖁᐊᓴᒪᑦ.

ᒫᓐᓇ ᑖᓐᓇ ᐋᖅᑭᒃᑕᐅᓯᒪᔪᖅ ᐅᒃᑑᐱᕆ 25-ᒧᑦ, ᑭᓯᐊᓂᓕ ᖁᐊᓴ ᐅᖃᖅᑐᖅ ᑖᓐᓇ ᐋᖅᑭᒋᐊᖅᑕᐅᑐᐃᓐᓇᕆᐊᓕᒃ ᐋᓐᓂᐊᕕᒡᔪᐊᕐᓇᖅᒧᑦ ᐅᐸᒍᑎᔭᕆᐊᒃᓴᖅ ᐊᔪᕐᓇᕐᓂᐊᖅᐸᑦ, ᓲᕐᓗ ᓂᕈᐊᕆᐊᑐᕐᓂᐊᕐᓗᓂ ᓱᓕ ᐅᓗᕆᐊᓇᕋᔭᕆᐊᒃᓴᖓᓂᒃ.

ᐅᓇ ᐅᐱᕐᖔᒥᒃ ᑲᑎᒪᓂᖅ ᐃᓱᓕᓐᓂᐊᖅᑐᖅ ᔫᓂ 10-ᒥ.

Share This Story

(0) Comments

Join the Conversation

Your email address will not be published. Required fields are marked *

*