ᐸᖕᓂᖅᑑᒥ ᓄᓇᕗᑦ ᐅᓪᓗᖓᓂ ᖁᕕᐊᓲᑎᖃᕐᓂᖅ ‘ᐊᓃᑲᑕᖕᓇᖅᐳᖅ ᐊᒻᒪᓗ ᐋᓃᕐᓇᖅᖢᓂ’

ᓄᓇᖃᖅᑐᑦ ᖁᕕᐊᓱᒍᑎᖃᖅᑐᑦ ᑕᑯᖃᑦᑕᐅᑎᔪᓐᓇᖅᓯᓂᖏᓐᓂᒃ ᓄᕙᒡᔪᐊᕐᓇᖅ-19ᒧ ᐃᓄᑑᓐᓇᖅᑐᒦᒋᐊᖃᕐᓇᓚᐅᖅᑎᓪᓗᒍ

ᓇᓅ ᐊᒥᐊᓂᒃ ᖃᕐᓕᒃᓯᒪᓪᓗᓂ ᐊᒻᒪᓗ ᑎᕆᒐᓂᐊᖅᔪᒃᒥᑦ ᖁᓕᑦᑕᐅᔭᖃᖅᖢᓂ, ᐊᕐᕌᒍᓕᒃ ᐊᑕᐅᓯᕐᒥᒃ ᒪᐃᑯᓪ ᐱᓱᖃᑎᖃᖅᐳᖅ ᐊᓈᓇᖓᓂᒃ ᓗᐊᓇ ᐊᑕᒍᔪᒥᒃ ᓄᓇᕗᑦ ᐅᓪᓗᖓᓂᒃ ᐊᓐᓄᕌᓂᒃ ᐊᑐᖅᑕᐅᔪᓂᒃ ᑕᑯᓐᓇᑲᑕᒃᑎᓪᓗᒋᑦ. (ᐊᔾᔨᙳᐊᖁᑎᒋᔭᐅᔪᖅ ᒥᓚᓂ ᐅᕆᑦᓵᑦ)

By ᒥᓚᓂ ᐅᕆᑦᓵᑦ

For an English version of this story, see Pangnirtung’s Nunavut Day celebration a chance to ‘come out and be outside’

ᐸᖕᓂᕐᑑ — ᓄᕗᔭᑲᑕᒃᑲᓗᐊᖅᑎᓪᓗᒍ ᐊᒻᒪᓗ ᐊᓄᕌᑲᑕᒃᖢᓂ, ᐸᖕᓂᕐᑑᒥᐅᑕᑦ ᑲᑎᓚᐅᕐᐳᑦ ᖁᕕᐊᓲᑎᖃᖅᖢᑎᒃ ᓄᓇᕗᑦ ᐅᓪᓗᖓᓂ.

ᓄᓇᕗᑦ ᓴᐃᒪᑎᙳᐊᖏᓐᓂᒃ, ᓂᐱᑦᑕᖅᑐᕐᓂᒃ ᐊᒻᒪᓗ ᓇᓴᕐᓂ ᐱᑲᑖᓪᓚᓚᐅᖅᖢᑎᒃ ᕼᐋᒻᒪᓚᒃᑯᑦ ᑎᑎᕋᕐᕕᖓᓂᒃ, ᓱᕈᓰ ᓴᓂᓕᕇᒃᖠᓚᐅᖅᑐᑦ ᐊᖅᑯᑎᐅᑉ ᓴᓂᑦᑎᐊᖓᓂᒃ ᐱᓱᖕᓂᐊᕐᒪᑕ ᐊᒻᒪᓗ ᐸᕐᓚᑎᑕᐅᓂᐊᕐᒪᑕ — ᐃᓚᖓ ᓄᓇᓯᐅᑎ ᓵᓚᒃᓴᐅᓯᐊᖅᖢᓂ ᐱᐅᓴᖅᓯᒪᑦᑎᐊᓛᖑᓂᖓᓄᑦ.

“ᑲᑎᑉᐸᓪᓕᐊᓯᔪᑦ, ᑕᑯᑲᑕᒃᖢᑕ ᐃᓄᖕᓂ ᑕᑯᐃᓐᓇᖃᑦᑕᙱᑕᑦᑎᓐᓂᒃ, ᑖᓐᓇ ᖁᕕᐊᒋᓛᕆᕙᒃᑕᕋ,” ᐅᖃᖅᑐᖅ ᓄᓇᖃᕐᒥᔪᖅ ᑖᒥ ᑰᓂᓘᓯ.

7-ᓂ ᐊᕐᕌᒍᓕᒃ ᐊᓕᒃᓯᔅ ᐋᑯᓗᒃᔪᒃ ᑎᒍᓯᕗᖅ ᓄᓇᕗᑦ ᓴᐃᒻᒪᑎᙳᐊᖓᓂᒃ ᐅᐸᒃᐸᓪᓕᐊᓕᖅᑎᓪᓗᒍ ᐸᖕᓂᖅᑑᒥ ᓄᓇᕗᑦ ᐅᓪᓗᖓᓄᑦ ᖁᕕᐊᓲᑎᖃᖅᑐᓄᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

ᐸᓖᓯᒃᑯᑦ ᐊᑭᖃᙱᑦᑐᒥ ᐃᒐᓯᒪᔪᒥ ᓂᕿᓕᐅᑲᑕᓚᐅᖅᑐᑦ ᐊᒻᒪᓗ ᐅᓐᓄᓴᒧᑦ ᖃᓄᐃᓕᐅᕈᑎᒃᓴᐅᓂᐊᖅᑐᓂᒃ.

ᓂᕆᐊᓂᒃᑎᓪᓗᒋᑦ, ᐊᓐᓄᕌᖅᓯᒪᔪᓂᒃ ᖁᙱᐊᖅᑎᑕᐅᓚᐅᕐᒥᔪᑦ ᓄᓇᖃᖅᑐᑦ ᐊᓐᓄᕌᕆᔭᐅᕙᒃᑐᓂᒃ ᐃᓄᖕᓄᑦ ᐊᑐᖅᖢᑎᒃ ᐊᒻᒪᓗ ᓴᓇᐅᒐᕈᓘᔭᖏᓐᓂᒃ.

ᐃᓚᖏᑦ ᕿᓯᖕᓂ ᖁᓕᑦᑕᐅᔭᖅᓯᒪᓪᓗᑎᒃ ᐊᓯᖏᓪᓗ ᐊᒪᐅᑎᕐᓯᒪᓪᓗᑎᒃ ᐊᒃᑐᑰᓯᕝᕕᖕᓂ ᓴᓇᓯᒪᔪᓂᒃ ᓵᓚᒃᓴᕋᓲᑎᖏᓐᓂᒃ.

ᐅᓛᓯ ᒫᒃᒧ ᐊᒃᑕᑰᓯᕝᕕᒃᒥ ᐸᓂᖓᑕ ᐃᑲᔪᖅᖢᓂᐅᒃ ᐊᒪᐅᑎᓕᐅᓚᐅᕐᒥᔪᖅ.

ᑭᖑᓂᐊᒍᓪᓕ ᐊᖕᒪᓗᖅᓯᓪᓗᑎᒃ ᐱᙳᐊᑲᑕᓚᐅᖅᖢᑎᒃ ᐊᒻᒪᓗ ᑲᐃᒃᒥ ᐱᐅᓴᖅᓯᒪᑦᑎᐊᓛᖑᓂᕐᒧᑦ ᓵᓚᒃᓴᐅᓯᐊᖅᑖᕋᓱᒃᖢᑎᒃ ᐱᙳᐊᖅᕕᖕᒥᑦ.

ᐅᓪᓗᓕᒫᕐᓗ ᓈᓚᐅᑎ ᑐᓴᖅᓴᐅᑎᑕᐅᓪᓗᓂ ᑕᒪᒃᑯᐊ ᐃᓐᓇᑐᖃᐃᑦ ᐅᖄᓚᑎᑕᐅᑲᑕᒃᖢᑎᒃ ᐅᓂᒃᑳᑲᑕᒃᖢᑎᒃ ᐊᒻᒪᓗ ᓈᓚᐅᑎᓕᕆᔨᐅᔪᑦ ᓇᓚᐅᑦᑖᖅᑎᑦᑎᑲᑕᖢᑎᒃ.

ᐊᓇᐅᓕᒑᕐᓂᐊᓚᐅᕐᒥᔪᑦ ᓯᓚ ᖃᓄᐃᑦᑐᓐᓃᖅᐹᓪᓕᖅᐸ.

ᓗᐃ ᒪᐃᑦ, ᐋᖅᑭᒃᓱᐃᔨᐅᖃᑕᐅᔪᖅ ᑖᓐᓇ ᓄᓇᓕᖕᓄᑦ ᑲᑎᖃᑎᒌᖕᓇᑦᑎᐊᓚᐅᖅᑐᑦ ᐃᓯᖅᓯᒪᑲᑕᒋᐊᖃᓚᐅᖅᑎᓪᓗᒋ ᓄᕙᒡᔪᐊᕐᓇᖅ-19ᒧᑦ.ᑯ

“ᐃᖅᑲᓇᐃᔭᕆᐊᖃᑦᑕᐃᓐᓇᕋᑦᑕ ᖃᐅᑕᒫᑦᑎᐊᖅ ᐊᒻᒪᓗ ᓄᕙᒡᔪᐊᕐᓇᒧᑦ ᒪᓕᖁᔭᐅᔪᓂᒃ ᒪᓕᑲᑕᐃᓐᓇᒻᒪᕆᒃᖢᑕ,” ᐅᖃᖅᑐᖅ.

“ᐅᓇ ᖁᕕᐊᓲᑎᖃᕐᓂᖅ ᑕᐃᒪᓐᓇ ᑲᑎᖃᑎᒌᒍᑎᖃᕐᓇᑦᑎᐊᖅᑐᑦ ᐊᒻᒪ ᐊᓃᑲᑕᖕᓇᓯᖢᓂ.”

ᕼᐋᒻᒪᓚᒃᑯᑦ ᒪᐃᔭᖓ, ᐃᐅᕆᒃ ᓛᓗ, ᐅᖃᓚᐅᖅᑐᖅ ᑲᑎᖃᑎᒌᒍᓐᓇᙱᓐᓂᖅ ᐊᒻᒪ ᐃᓅᖃᑎᒌᑲᑕᖕᓂᖅ ᐊᒃᔪᕈᓐᓇᓛᖑᓂᕋᓚᐅᖅᑕᖏᓐ ᐋᓐᓂᐊᕕᒡᔪᐊᕐᓇᒧᑦ.

ᓯᕗᓂᐊᓂᓕ ᐊᕐᕌᒍᓂ ᓄᓇᓖᑦ ᓂᕆᔭᖅᑐᖅᐸᓚᐅᖅᓯᒪᔪᑦ ᓯᓚᒥ ᐊᒻᒪ ᐊᑕᐅᓯᕐᒥᒃ ᑲᑎᓯᒪᓪᓗᑎᒃ ᐊᕕᒃᑐᖅᓯᒪᐅᙱᖢᑎᒃ ᐊᒻᒪᓗ ᑎᑕᒃᑐᖃᑲᑕᒃᐸᒃᖢᓂ, ᓛᓗ ᐅᖃᕐᒥᔪᖅ.

ᓄᕙᒡᔪᐊᕐᓇᖅ-19-ᒧᑦ ᓱᓕ ᖃᓄᐃᑦᑕᐃᓕᔭᕆᐊᖃᓇᖅᑐᖃᕋᓗᐊᖅᖢᓂ ᐊᒻᒪᓗ ᓯᓚ ᓂᒡᓚᓱᕈᓘᔭᓕᕋᓗᐊᖅᑎᓪᓗᒍ ᑖᒃᑯᐊ ᐋᖅᑭᒃᓱᐃᔨᐅᔪᑦ ᐊᓂᒍᐃᑎᑦᑎᔪᓐᓇᑦᑎᐊᓚᐅᖅᑐᑦ ᓄᓇᕗᑦ ᐅᓪᓗᖓᓂᒃ.

ᓄᓇᕗᑦ ᐅᓪᓗᖓ ᓇᓪᓕᐅᑎᕝᕕᐅᖃᑦᑕᖅᑐᖅ ᓄᓇᕗᒥᑦ ᓄᓇᑖᕈᑎᓄᑦ ᐊᖏᕈᑎᒧᑦ ᒪᓕᒐᖅ ᐊᓂᒍᖅᑎᑕᐅᓚᐅᖅᓯᒪᓂᖓᓂᒃ ᒪᓕᒐᓕᕆᕕᒡᔪᐊᒥᒃ ᐋᑐᕚᒥ 1993-ᖑᑎᓪᓗᒍ. ᓄᓇᕗᑦ ᐱᓪᓚᕆᐅᑎᑕᐅᓕᓚᐅᖅᓯᒪᔪᖅ ᑭᖑᓂᐊᒍᑦ ᐄᐳᕈᓪ 1, 1999-ᒥ.

Share This Story

(0) Comments