ᑭᒃᑯᓕᒫᑦ ᐃᖃᓗᖕᓂ ᐃᖅᑲᐃᑎᑕᐅᓇᓱᒃᑐᑦ ᓄᑖᙳᕆᐊᖅᑎᑦᑎᖁᔭᐅᓪᓗᑎᒃ ᑐᕌᕈᑎᖏᓐᓂ

For the English version of this story, please see People in Iqaluit reminded to update their address with Service Canada.

ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ (Service Canada) ᐃᖅᑲᐃᑎᑦᑎᓇᓱᒃᑐᑦ ᐃᖃᓗᖕᓂ ᓄᓇᖃᕐᑐᑦ ᑎᑎᖃᒃᑯᕕᒃᑯᑦ ᑐᕌᕈᑎᖏᓐᓂ ᓄᑖᙳᕆᐊᖅᑎᑦᑎᖁᔭᐅᓪᓗᑎᒃ ᓲᖃᐃᒻᒪ ᑲᓇᑕᒥ ᑎᑎᖃᒃᑯᕕᓕᕆᔨᒃᑯᑦ ᑕᒻᒪᕐᓯᒪᔪᓂ ᐋᖅᑭᒋᐊᕐᓯᖃᑦᑕᔾᔮᔪᓐᓃᕐᒪᑕ ᐅᒃᑑᐱᕆ 31 ᐊᓂᒍᓚᐅᕐᑎᓪᓗᒍ.

ᒐᕙᒪᑐᖃᒃᑯᓐᓄᑦ ᐱᓕᕆᔨᐅᔪᑦ ᑐᓴᒐᒃᓴᓕᐅᒪᐅᕐᒪᑕ ᐅᒃᑑᐱᕆ 8-ᒥ ᑕᒪᑐᒥᖓ ᐃᖅᑲᐃᑎᑦᑎᓇᓱᒃᖢᑎᒃ.

ᓄᓇᓕᐸᐅᔭᐃᑦ ᓄᑖᒥ ᑐᕌᕈᑎᓕᕆᔾᔪᓯᕐᒥ ᐊᑐᓕᓚᐅᕐᓯᒪᖕᒪᑕ ᐅᒃᑑᐱᕆ 2023-ᒥ ᓄᑖᖅ ᑎᑎᖃᒃᑯᕕᒃ ᒪᑐᐃᕐᑎᓪᓗᒍ. ᐊᑐᕈᓐᓃᖅᖢᑎᒃ ᑎᑎᖃᒃᑯᕕᖕᒥ ᐃᓕᔾᔨᕕᐅᕙᒃᑐᓂ ᓄᓇᖃᖅᑐᑦ ᐊᖏᕐᕋᖏᑦᑕ ᑐᕌᕈᑎᖏᓐᓂ ᐊᑐᖔᓕᕐᒪᑕ.

ᐅᓇᑦᑕᐅᖅ ᐊᓯᔾᔨᕐᓯᔾᔪᑎᐅᓚᐅᕐᑎ ᑎᑎᖃᒃᑯᕕᒃᑯᑦ ᓇᓗᓇᐃᒃᑯᑎᐅᕙᒃᑐᓂᒃ. ᐅᓇ ᓇᓗᓇᐃᒃᑯᑎ X0A 0H0 ᐊᒻᒪ X0A 1H0 ᐊᑐᕐᑕᐅᔪᓐᓃᕐᑐᑦ. ᒪᕐᕉᖕᓂ ᓄᑖᖕᓂ ᑎᑎᖃᒃᑯᕕᒃᑯᑦ ᓇᓗᓇᐃᒃᑯᑏᑦ X0A 2H0 ᐊᒻᒪ X0A 3H0 ᐃᓚᔭᐅᓚᐅᕐᒪᑎᑦ.

ᑎᑎᖃᑦ ᒫᓐᓇᓚᐅᑲ ᓄᑖᓄᑦ ᑐᕌᕈᑎᓄᑦ ᐋᖅᑭᒋᐊᖅᑕᐅᖃᑦᑕᖅᑐᑦ ᑲᓇᑕᒥ ᑎᑎᖃᒃᑯᕕᓕᕆᔨᓄᑦ, ᑭᓯᐊᓂᓕ ᑕᒪᓐᓇ ᐊᓯᐊᓂ ᐊᑐᕋᓱᓕᓵᕐᓂᖅ ᒪᓃᑦᑐᕐᓯᐅᕐᓇᓚᐅᕐᑐᖅ. ᐃᓄᐃᑦ ᕿᐱᓘᑎᖃᖃᑦᑕᓚᐅᕐᒪᑕ ᐊᔪᕐᓴᕈᑎᖃᕐᓂᕋᖅᖢᑎᒃ ᐊᖏᕐᕋᖏᑦᑕ ᑐᕌᕈᑎᖏᓐᓂ ᐱᓇᓱᒃᖢᑎᒃ, ᐊᑯᓂᕈᓗᒡᓗ ᑎᑎᖃᓂ ᓂᕆᐅᒃᐸᒃᖢᑎᒃ, ᐊᒻᒪᓗ ᓄᓇᕗᒧᑦ ᑐᓴᐅᒪᒐᒃᓴᓂ ᐊᒻᒪ ᐃᒻᒥᒃᑰᖓᔪᓂ ᑲᒥᓯᓇ ᐅᖃᕐᓯᒪᓪᓗᓂ ᓱᕋᐃᔾᔪᑎᐅᑐᐃᓐᓇᕆᐊᖃᕐᓂᖓᓂᒃ ᑕᒪᐅᖓᒥᐊᕆᐊᖃᙱᓐᓂᕐᒥ.

ᐅᓄᕐᑐᑦ ᐃᖃᓗᖕᓂ ᓄᓇᖃᕐᑐᑦ ᐱᔨᑦᑎᕋᐅᑎᓕᕆᔨᒃᑯᓐᓂ ᑲᓇᑕᒥ ᓂᕆᐊᖃᑦᑕᕐᒪᑕ ᐃᑲᔫᑎᒃᓴᓂ ᐊᒻᒪ ᐱᔨᑦᑎᕋᐅᑎᓂ ᒪᑯᑎᑐᓇᖅ ᑲᓇᑕᒥ ᐃᑦᑐᕐᓯᐅᑎᓂᒃ, ᑲᓇᑕᒥ ᐊᔪᕈᑎᖃᕐᓂᕐᒧᑦ ᐃᑲᔫᑎᓂᒃ ᐊᒻᒪ ᐃᖅᑲᓇᐃᔭᙱᑦᑐᖅᓯᐅᑎᓄᑦ.

ᑐᕌᕈᑎᑦ ᓄᑖᙳᕆᐊᖅᑕᐅᓂᖏᓐᓄᑦ ᐃᖃᓗᖕᓂ ᓄᓇᖃᕐᑐᑦ ᐅᖄᓚᔪᓐᓇᕐᑐᑦ ᐅᕗᖓ 1-877-631-2657; ᐅᐸᒍᑎᓗᑎᒡᓘᓐᓃᑦ ᐃᖃᓗᖕᓂ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᐅᕙᓂ 100-933 ᒥᕝᕕᒃ ᐊᑐᕆᐊᕐᒥ; ᐅᕝᕙᓘᓐᓃᑦ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᖃᕋᓴᐅᔭᒃᑯᑦ ᓴᖅᑭᔮᒐᖓ ᑕᑯᒋᐊᕐᓗᒍ.