ᑏ, ᐃᓅᓕᓴᐅᑎ ᐊᒻᒪ ᐅᖁᒻᒥᐊᒐᖅ: ᐃᓕᓐᓂᐊᕈᑎ ᐊᔪᕈᓐᓃᕐᓴᕈᑎᐅᔪᖅ ᐅᑭᐅᕐᑕᖅᑐᕐᒥ ᐱᕈᖅᑐᐃᑦ ᐊᑐᕈᑎᒋᔪᓐᓇᖅᑕᖏᓐᓂᒃ

ᐱᕈᖅᐸᓪᓕᐊᑎᓪᓗᒍ ᑭᐅᕈᓕᓐ ᐊᐃᐱᓕ ᖃᐅᔨᒪᓚᐅᕐᓯᒪᙱᑦᑐᖅ ᐊᑎᕆᔭᐅᔪᓕᒫᓂᒃ ᐊᑐᖅᑕᐅᔾᔪᓯᖏᓐᓂᒡᓗ ᐱᕈᖅᑐᐃᑦ ᐃᖃᓗᖕᓂ ᑕᑯᖃᑦᑕᖅᑕᖏᓐᓂᒃ ᑭᓯᐊᓂ ᐃᓚᐅᓕᕋᒥ ᐱᓱᔪᒃᑐᓂᒃ ᐱᕈᖅᑐᓂᒃ ᕿᒥᕐᕈᐊᖅᐸᓪᓕᐊᔪᓂᒃ ᑕᐃᒪᓐᓇᓗ ᖃᐅᔨᒪᓕᓚᐅᕐᓯᒪᔪᖅ.

ᒫᓐᓇᓕ ᑐᑭᒧᐊᖅᑎᑦᑎᔨᐅᓪᓗᓂ ᐃᑦᑕᕐᓂᓴᓕᕆᓂᕐᒧᑦ ᓄᓇᕗᒥᑦ ᒐᕙᒪᒃᑯᓐᓄᑦ, ᐊᐃᐱᓕ ᑐᓴᐅᒪᑎᑦᑎᓕᕐᒥᔪᖅ ᐅᑭᐅᕐᑕᖅᑐᕐᒥ ᐱᕈᖅᑐᓂᒃ ᖃᐅᔨᕙᓪᓕᐊᔭᖏᓐᓂᕐ ᐊᕐᕌᒍᒐᓴᐅᓕᕐᑐᓂᒃ ᐊᓯᖏᓐᓂᒃ.

ᐊᐃᐱᓕ ᑕᐃᒪᐃᓕᐅᓚᐅᕐᑐᖅ ᐋᒐᓯ 11-ᒥ ᐅᕙᓂ ᓯᐊᕕᐊ ᒍᕆᓄᓪ ᓄᓇᕗᒥᑦ ᒥᕐᖑᐃᖅᓯᕕᒃᒥᑦ ᐃᖃᓗᖕᓂ. ᐃᓕᓐᓂᐊᖅᑎᑦᑎᓂᖓ ᐃᓚᒋᔭᐅᓚᐅᕐᑐᖅ ᓄᓇᕗᒥᑦ ᒥᕐᖑᐃᖅᓯᕖᑦ ᐱᓇᓱᐊᕈᓯᕐᒥ “ᐊᔪᕈᓐᓃᕐᓴᕆᑦ ᐃᒪᓐᓇ…” ᖃᓄᐃᓕᐅᕈᑎᓄᑦ ᓄᓇᕗᒥᑦ ᒪᓂᒪᑎᑕᐅᔪᓂᒃ ᐊᐅᔭᐅᔪᖅ.

ᐊᐃᐱᓕ ᐅᖃᓚᐅᕐᑐᖅ ᐱᒻᒪᕆᐊᓘᓂᖓᓂᒃ ᖃᐅᔨᒪᔭᒥᓂᒃ ᑐᓴᐅᒪᑎᑦᑎᓗᓂ ᑕᐃᒪᓐᓇ ᓯᕗᓕᒃᓴᖏᑦ ᖃᐅᔨᒪᓂᐊᕐᒥᖕᒪᑕ.

“ᑭᒃᑯᓕᒫᕌᓗᐃᑦ ᖃᐅᔨᒪᔪᐃᓐᓇᐅᙱᒻᒪᑕ ᑕᒪᒃᑯᓂᖓ,” ᐅᖃᕐᑐᖅ.

“ᐅᓇ ᖃᐅᔨᕙᓪᓕᐊᓂᒃᑰᖓᔪᖅ ᑕᒻᒪᕈᑎᓄᓪᓗ ᖃᓄᖅ ᐋᖅᑭᒃᓯᒪᔪᓐᓇᕐᒪᖔᑦ ᐊᒻᒪ ᓇᓕᐊᒃ ᓂᕆᔪᓐᓇᕐᒪᖔᑦ. ᑕᒪᓐᓇ ᓄᓇᒥᒃ ᑭᓯᐊᓂ ᐱᔪᓐᓇᓚᐅᕐᑐᖅ.

ᐃᓚᒋᔭᐅᔪᑦ ᐃᓕᓐᓂᐊᖅᑎᑕᐅᓚᐅᕐᑐᑦ ᖃᓄᐃᑦᑐᓂᒃ ᐱᕈᖅᑐᓂᒃ ᑕᑯᔪᓐᓇᕐᒪᖔᑕ ᒥᕐᖑᐃᖅᓯᕕᒃᒥᑦ ᐊᒻᒪᓗ ᖃᓄᖅ ᐊᑐᖅᑕᐅᔪᓐᓇᕐᒪᖔᑕ ᑭᖑᓂᐊᒍᓪᓗ ᐱᓱᔪᓚᐅᑲᓚᐅᖅᖢᑎᒃ ᐅᔭᕋᒐᔭᒃᑯᑦ.

ᐃᖃᓗᖕᓂ ᐱᕈᖅᑐᖃᐅᕐᒪᑦ ᓂᕆᔭᒃᓴᓂᒃ ᐸᐅᕐᖓᓂᒃ, ᐊᒻᒪᓗ ᖃᖓᒃᑯᑦ ᐱᐅᓛᖑᖕᒪᖔᑕ ᐊᕝᕗᓂᐊᕐᓗᒋ, ᐊᐃᐱᓕ ᐅᖃᕐᑐᖅ. ᒪᑯᐊ ᐸᐅᕐᖓᐃᑦ cloudberries ᐊᒻᒪ crowberries ᐱᕈᐊᓂᒃᓯᒪᑦᑎᐊᖅᑐᑦ ᑕᕐᓴᖏᑦᑎᒍᑦ ᐊᒻᒪᓗ ᑭᒍᑕᖏᕐᓇᐃᑦ ᐱᐅᓛᖑᓪᓗᑎᒃ ᓯᑎᐱᕆ ᐱᒋᐊᕐᓂᐊᓕᖅᑎᓪᓗᒍ.

ᒪᒪᕋᓗᐊᕋᒃᒥ, ᑖᒃᑯᐊ ᐸᐅᕐᖓᐃᑦ ᐋᓐᓂᐊᖅᑕᐃᓕᓂᒃᑯᑦ ᐃᑲᔪᕈᑎᖃᕐᒥᔪᑦ ᐊᒻᒪᓗ ᐊᕿᐊᕈᕐᒧᑦ ᐃᑲᔪᕈᑎᐅᓪᓗᑎᒃ ᐅᑯᑎᑐᓇᖅ ᐊᐅᐸᖅᑐ ᐸᐅᕐᖓᑎᑐᑦ (red bearberry).

ᐃᓚᖏᑦ ᐱᕈᖅᑐᑦ ᐊᐃᐱᓕᐅᑉ ᑕᑯᑎᑕᖏᑦ ᐅᐸᒍᑎᓯᒪᔪᓄᑦ ᐱᓱᒃᑐᓂᒃ ᐅᑯᓂᖓ ᐃᓚᖃᓚᐅᕐᑐᑦ:

ᑏᒃᓴᖅ (Labrador tea), ᖃᑯᖅᑕᓂ ᐱᕈᖅᑐᖃᖅᖢᑎᒃ ᓄᓇᐃᓐᓇᒥᒃ, ᐊᒻᒪᓗ ᖀᕐᓱᖃᑦᑕᖅᑐᓄᑦ). ᑕᐃᒪᓐᓇᑐᐃᓐᓇᖅ ᓂᕆᔭᐅᔪᓐᓇᖅᑐᑦ ᐸᓂᖅᑎᓯᒪᓗᑎᒡᓘᓐᓃᑦ ᐊᒻᒪᓗ ᕿᒃᑐᕆᐊᓄᑦ ᑲᒪᒋᔭᐅᓐᓇᙱᓐᓂᕐᓴᐅᓪᓗᓂ.

ᐅᓇᑦᑕᐅᖅ Arctic fireweed (ᐊᐅᓐᓇᐃᑦ), ᓄᓇᕋᖅ ᐊᐅᐸᔮᖅᑐᒥᒃ (ᐴᐳᓂ) ᑕᕐᓴᓖ ᐱᕈᖅᑐᐃᑦ ᓄᓇᐃᓐᓇᕐᒥ ᐊᒻᒪ ᐊᑐᖅᑕᐅᔪᓐᓇᖅᑐᑦ ᐊᐅᒍᓐᓃᖅᑎᑦᑎᓂᕐᒧᑦ ᕿᖓᒃᑯᑦ. ᐱᐅᓂᖅᐹᖅ ᐅᒃᑑᐱᕆᒥ ᐊᕝᕗᖅᑕᐅᒍᑎᒃ ᐅᖃᐅᔭᖏ ᑐᖁᓕᓕᖅᑎᓪᓗᒋ ᐊᒻᒪ ᖃᓛᖅᑎᓪᓗᒋᑦ ᐃᒪᕐᒧ 5 ᒥᓂᑦᓗᐊᕐᒥ ᑏᙳᕐᓂᐊᕐᒪ ᐊᒻᒪ ᐃᓚᖏ ᐸᓚᐅᒑᓄᑦ ᒥᖑᐊᒃᓴᓕᐊᕆᔭᐅᕙᒃᖢᑎᒃ.

ᑎᖏᖑᔭᐃᑦ ᑕᐃᔭᐅᔪᑦ Witch’s hair ᐃᒪᕐᒥ ᕿᕐᓂᖅᓯᓕᖅᑎᑦᑎᔭᑦᑐᑦ ᖃᓛᖅᑎᖢᒋᑦ. ᑏᕐᑐᕐᓂᖅ ᐃᑲᔪᕈᑎᐅᔪᖅ ᐃᓄᖕᓂ ᑎᒥᖏᓐᓂᒃ ᐱᐅᓯᕚᓪᓕᖅᑎᑦᑎᓂᕐᒥᒃ ᐊᒻᒪ “ᐋᓐᓂᐊᕐᒥ ᐊᐅᒪᔮᕐᓂᒃᑯᑦ ᐲᔭᐃᔾᔪᑎᐅᓪᓗᓂ” ᒪᑯᓂᖓ ᐆᓇᕐᓂᐅᔪᓂᒃ ᐊᒻᒪ ᐃᒡᒋᐊᕐᓗᒃᑐᓂᒃ.

ᒪᑯᐊᓕ ᖃᑯᖅᑕᐃ (willow cotton) ᖁᓪᓗᕐᓄᑦ ᐃᑯᒪᔾᔪᑎᐅᕙᓚᐅᕐᓯᒪᔪᑦ. ᐋᒐᓯᒥ ᐊᕝᕗᖅᑕᐅᒍᑎᒃ ᐱᐅᓂᖅᐹᖑᓪᓗᓂ ᐊᒻᒪ ᐸᐸᑕᐅᑯᑖᒍᓐᓇᖅᖢᑎᒃ.

ᐃᔾᔪᖅ ᑕᒧᐊᔭᐅᔪᓐᓇᖅᑐᖅ ᐊᒻᒪ ᐄᔭᐅᔪᓐᓇᖅᖢᑎᒃ ᒪᑯᓄᖓ ᓰᕐᓂᕐᒧᑦ (heartburn) ᐊᒻᒪᓗ ᐃᓛᓐᓂ ᐃᓄᐃᑦ ᓈᖏᓐᓄᑦ ᐊᓪᓚᕈᔾᔭᒐᐅᓪᓗᑎᒃ ᐋᓐᓂᕐᓇᙱᓐᓂᕐᓴᐅᓕᕐᓂᐊᕐᒪᑕ ᐃᕐᓂᓱᒃᖢᓂ.

ᒪᑯᐊ puffball mushroom (ᐳᔪᐃᑦ) ᐊᑐᖅᑕᐅᔪᓐᓇᖅᑐᑦ ᒪᑦᑐᑎᒋᔭᐅᓗᑎᒃ ᒪᒥᑎᑦᑎᓇᓱᖕᓂᕐᒥᒃ ᐅᕕᓂᒃᒥᒃ ᐊᒻᒪᓗ ᐃᓗᐊᓃᑦᑐᑦ ᑲᔪᕈᔪᐃᑦ ᐳᔪᐃᑦ ᐱᐅᓴᐅᑎᑎᑐᑦ ᑮᓇᐅᒧᑦ ᐊᑐᖅᑕᐅᔪᓐᓇᖅᖢᓂ.

ᒪᑯᐊ ᓂᕈᒥᒃᑐᑦ Arctic heather “ᖃᐅᔨᓕᕈᓐᓇᙱᑦᑐᖅ” ᐊᒻᒪᓗ ᐊᓪᓕᖅᐹᓄᑦ ᐴᕆᔭᐅᔪᓐᓇᖅᖢᑎᒃ.

ᒪᑯᐊᓕ Mountain sorrel ᓰᕐᓇᖅᖢᑎᒃ ᕙᐃᑕᒥᓐ C-ᖃᑦᑎᐊᖅᖢᑎ, ᓇᐸᐅᔭᖏ ᓂᕆᔭᒃᓴᐅᔪᑦ ᐊᕿᓕᑎᐊᓪᓚᓚᐅᕐᓗᒋᑦ. ᐊᐃᐱᓕ ᐅᖃᓚᐅᕐᑐᖅ ᐊᓈᓇᖓ ᐃᓅᓱᒃᑑᑎᓪᓗᒍ ᑕᒪᒃᑯᐊ ᐴᖅᑲᖅᖢᓂᒋᑦ ᐊᒻᒪ ᑕᒧᐊᑲᑕᒃᐸᒃᖢᓂᒋᑦ ᓰᕐᓇᕐᓂᖏᓐᓂᒃ.

ᒪᑯᐊᓕ Seaside bluebells, ᓂᐊᖁᙴᑉ ᖃᓂᒋᔭᖓᓂ ᐱᕈᖅᑐᐃᑦ ᓂᕿᓕᐊᕆᔭᒃᓴᐅᖕᒥᑦ ᓵᓚᑦᒧ ᐃᓚᒋᔭᐅᓗᓂ.

ᓄᓇᒥ ᐱᓇᓱᒪᒍᕕᑦ ᒪᑯᐊ (ᐊᐃᕋᐃᖃᐃ?) alpine bistort plant, ᐊᐅᐸᕈᔪᒃᑐᓂ ᐅᖃᐅᔭᓖᑦ, ᐊᐃᕋᖏᑦ ᓂᕆᔭᒃᓴᐅᖕᒪᑕ. “ᖄᖓᒍ ᐱᕈᖅᑐᖅ ᐊᖏᓂᕐᓴᐅᒃᐸᑦ ᑕᐃᒪᓕ ᐊᐃᕋᖓ ᑭᓱᖃᕐᓂᕐᓴᐅᓂᐊᖅᑐᖅ,” ᐊᐃᐱᓕ ᐅᖃᕐᑐᖅ.

ᑕᐃᒪᓗ ᐊᐃᐱᓕᐅᑉ ᐱᐅᒋᓛᕆᕚ ᐱᕈᖅᑐᓂᒃ ᐃᖃᓗᖕᓂ?

“Arctic cotton (ᓱᐳᑎᒃᓴᖅ), ᓲᖃᐃᒻᒪ ᐊᓇᙱᓄᑦ ᐱᐅᒋᔭᐅᙱᒻᒪᑕ,” ᐃᒡᓚᖅᖢᓂ.

ᑕᒪᒃᑯᐊ ᖃᐅᓪᓗᖅᑕᐃᑦ ᓂᕈᒥᒃᑐᑦ ᕿᑦᑐᕆᐊᖅᓯᐅᑎᐅᔪᓐᓇᕐᒪᑕ ᐊᒻᒪᓗ ᐊᑯᓂᐊᓗᒃ ᐱᔭᐅᓯᒪᔪᓐᓇᖅᖢᑎᒃ, ᐊᒻᒪᓗ ᐊᑐᖅᑕᐅᔪᓐᓇᕆᓪᓗᑎᒃ ᐊᓕᕐᓯᖕᓄᑦ ᐃᓗᐹᕈᑎᐅᓗᑎᒃ, ᓴᓗᒻᒪᕐᓴᐅᑎᐅᔪᓐᓇᖅᖢᓂ ᐊᒻᒪᓗ ᐊᓪᓕᖅᐹᓄᑦ ᐃᓗᓕᕆᔭᐅᔪᓐᓇᖅᖢᑎᒃ, ᐅᖃᕐᑐᖅ.

ᐊᐃᐱᓕ ᑭᒃᑯᑐᐃᓐᓇᕐᓂ ᖃᐅᔨᒃᑲᓐᓂᕈᒪᔪᓂᒃ ᐱᕈᖅᑐᐃ ᖃᓄᖅ ᐊᑐᖅᑕᐅᔪᓐᓇᕐᓂᖏᓐᓂᒃ ᑕᐃᒪᓕ ᓇᖕᒥᓂᖅ ᐊᕝᕗᕈᓐᓇᖅᑐᑦ ᑕᒪᒃᑯᓂᖓ.

“ᒫᓐᓇ ᐱᕈᐊᓂᖕᓂᖏᓐᓄᑦ ᐱᐅᓛᖑᔪᖅ ᖃᓄᖅ ᐊᑐᖅᑕᐅᕙᖕᓂᖏᓐᓂᒃ ᖃᐅᔨᓇᓱᒡᓗᓂ.”