ᓴᕕᕋᔭᒃᓴᒥ ᐅᔭᕋᒃᓴᖅᓯᐅᕐᕕᖃᑐᐃᓐᓇᕆᐊᖃᕐᓂᖓ ᐊᐅᐸᓘ ᖃᓂᒋᔭᖓᓂ ᐅᖃᐅᓯᖃᑲᑕᒍᑎᐅᕗᖅ

For English version, see Prospect of iron mine near Aupaluk spurs discussion

ᐄᕙ ᒍᕇ ᐊᐅᐸᓗᒃᒦᓯᒪᕗᖅ ᑕᐃᒪᙵᓂ 1970-ᖏᓐᓂᒃ, ᑖᓐᓇ ᓄᓇ ᓄᓇᓕᐅᔪᖅ 200-ᓂ ᐃᓄᖃᖅᖢᓂ ᐊᑐᕐᑕᐅᕙᓚᐅᕐᓯᒪᔪᖅ ᐊᐅᓪᓛᕐᕕᐅᔭᖅᑐᖅᐸᒃᖢᓂ ᐊᒻᒪ ᐊᖑᓇᓱᒡᕕᐅᕙᒃᖢᓂ.

ᐄᕙ ᒍᕇ ᓇᖏᕐᑐᖅ ᓄᓇᙳᐊᑉ ᓴᓂᑦᑎᐊᖓᓂ ᐊᐅᐸᓗᒃ ᒦᒃᓵᓂ ᓴᖅᑭᔮᖅᑎᑦᑎᓯᒪᔪᒥᒃ. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

“ᓄᓇᓕᓪᓚᑦᑖᙳᕐᓯᒪᓕᕐᑐᖅ,” ᒍᕇ ᐅᖃᕐᑐᖅ ᐅᖃᐅᓯᖃᖅᖢᓂ ᐋᓐᓂᐊᕕᒃᓴᒥ ᓴᓇᔭᐅᔪᒥᒃ ᐊᒻᒪᓗ ᓄᑖᒥ ᐃᒥᕐᑕᕐᕕᒃᓴᒥᑦ.

“ᐊᖏᒡᓕᓕᕐᒪᑦ.”

ᒍᕇ ᐱᓕᕆᐊᖃᕐᓯᒪᔪᖅ ᐊᔾᔨᒌᙱᑦᑑᑎᓂ ᐊᐅᐸᓗᒃᒥ ᐊᖓᔪᖅᑳᖑᓪᓗᓂ ᓄᓇᓕᖕᓄᑦ, ᐱᖏᖕᓇᖅᑐᓕᕆᔨᓄᑦ ᑐᑭᒧᐊᖅᑎᑦᑎᔨᐅᓪᓗᓂ ᐊᒻᒪᓗ ᐃᓕᓐᓂᐊᖅᑎᑦᑎᔨᐅᓪᓗᓂ.

ᐊᐅᐸᓗᒃ ᐱᕈᕐᐸᓪᓕᐊᓂᖓ ᐊᒃᑐᐃᓂᖃᕐᓯᒪᔪᖅ ᐃᖃᓗᖕᓂ ᐊᒻᒪ ᐊᓯᖏᓐᓂ ᓂᕐᔪᑎᓂ ᐊᕙᑎᐊᓃᑦᑐᓂᒃ ᑖᒃᑯᐊᓗ ᓄᓇᓕᖕᓄᐊᖅᑕᐃᓕᕙᒃᖢᑎᒃ, ᐅᖃᕐᑐᖅ ᒍᕇ.

ᑭᓯᐊᓂᓕ, ᒫᓐᓇ ᐱᕙᓪᓕᐊᓂᕐᑕᖃᑐᐃᓐᓇᕆᐊᖃᓕᕐᒪᑦ ᑖᓐᓇᓗ ᐊᒃᑐᐃᓂᖃᒃᑲᓐᓂᕐᓂᐊᖅᖢᓂ: ᐅᔭᕋᒃᓯᐅᕐᕕᒃ.

ᐅᔭᕋᒃᓯᐅᕐᓂᖅ “ᐊᕕᒃᓯᒪᔾᔪᑎᐅᔭᒻᒪ” ᐅᖃᐅᓯᐅᑎᓪᓗᒍ ᐊᐅᐸᓗᒃᒥ ᑕᒪᓐᓇᓗ ᐱᑦᑎᐊᖃᑦᑕᐅᑎᐅᔪᓐᓃᖅᖢᓂ ᓄᓇᖃᖅᑐᓂᒃ, ᒍᕇ ᐅᖃᕐᑐᖅ.

“ᐅᓇ ᑐᓴᕐᓇᕈᓘᔭᑲᑕᖕᓂᐊᖅᑐᖅ, ᖁᕕᐊᒋᔾᔮᙱᑕᕗᑦ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐃᓱᒫᓘᑎᖃᕐᓂᖓᓂ ᖃᓄᖅ ᐊᒃᑐᐃᓂᖃᖅᑎᒋᓂᐊᕆᐊᒃᓴᖓᓂ ᐃᓄᐃᑦ ᐃᖃᓗᒐᓱᖃᑦᑕᕐᓂᖏᓐᓄᑦ ᐊᒻᒪ ᐊᐅᓪᓛᕐᕕᒋᕙᒃᑕᖏᓐᓄᑦ.

“ᐅᖃᐅᓯᕆᕙᒃᑕᕗᑦ ᑕᒪᓐᓇ, ᑕᐃᒪᐃᓐᓂᐊᖅᖢᓂᓗ. ᓱᕈᓰᑦ ᕿᐊᓚᐅᕐᐸᒃᑐᑦ ᓲᖃᐃᒻᒪ ᐃᖃᓗᒐᓱᒍᒪᖃᑦᑕᕐᒪᑕ ᑰᖕᒥ ᐱᕈᖅᐸᓪᓕᐊᑎᓪᓗᒋᑦ.”

ᐊᐅᐸᓗᒃ ᐅᔭᕋᒃᓯᐅᕐᕕᖕᓄᑦ ᖃᓄᐃᓕᐅᕐᓂᕐᒥ ᑕᑯᓯᒪᒻᒪᑕ 1950-ᖏᓐᓂ ᐊᒻᒪ 1960-ᖏᓐᓂ.

ᐆᓯᐊᓂᒃ ᓴᕕᕋᔭᒃᓴᒥ ᑯᐊᐳᕇᓴᓐ ᑐᓂᓯᓚᐅᕐᓯᒪᒻᒪᑕ ᐆᒥᖓ ᕼᐆᑉᔅ ᐊᑦᕚᓐᔅ ᐱᓕᕆᐊᖓᓂ ᒐᕙᒪᑐᖃᒃᑯᑦ ᕿᒥᕐᕈᐊᕐᓂᐊᖅᑕᖓᓂ 2012-ᒥ, ᐃᓱᒪᓚᐅᕐᒪᑕ ᐅᔭᕋᒃᓯᐅᕐᕕᓕᐅᕈᒪᓪᓗᑎᒃ ᐊᐅᐸᓘᒃ ᐱᖓᖕᓇᖅᐸᓯᐊᓂ ᐅᕙᓂ ᕼᐆᑉᔅ ᐊᑦᕚᓐᔅ ᐸᐃᒥ.

ᐅᓄᕐᓱᐃᙱᖢᑎᒃ ᐃᓄᖕᓂ ᑐᓴᖅᑎᑦᑎᓯᒪᓪᓗᑎᒃ ᐅᔭᕋᒃᓯᐅᕐᕕᐅᔪᒪᔪᖅ ᖃᓄᐃᓕᖓᓕᕐᓂᖓᓂ ᐊᕐᕌᒎᓵᖅᑐᓂᒃ, ᐅᑯᐊ ᑲᒻᐸᓂ ᑐᓴᒐᒃᓴᓕᐅᓚᐅᕐᓯᒪᒻᒪᑕ ᐋᒐᓯ 26-ᒥ ᐅᖃᖅᖢᑎ ᑲᔪᓯᓂᐊᕐᓂᕋᖅᖢᑎᒃ ᐱᓕᕆᐊᕆᔪᒪᔭᖏᓐᓂᒃ.

“ᐅᓇ ᕼᐆᑉᔅ ᐊᑦᕚᓐᔅ ᐱᓕᕆᐊᒃᓴᖅ ᖃᐅᔨᒪᔭᐅᒻᒪᕆᒃᑐᖅ ᓄᓇᕐᔪᐊᒥ ᓴᕕᕋᔭᒃᓴᓂ ᐱᓕᕆᐊᖃᖅᐸᖕᓂᖏᓐᓂᒃ, ᖁᓕᕇᓕᕐᓯᒪᔪᓂᒃ ᐅᔭᕋᒃᓯᐅᕐᕕᓕᕆᓂᒃᑯᑦ ᓇᓕᒧᒋᔭᖃᕐᑐᖅ ᐊᓯᖏᓐᓂ ᐃᓕᓴᕆᔭᐅᓯᒪᑦᑎᐊᖅᑐᓂᒃ ᓄᓇᕐᔪᐊᕐᒥ ᐅᔭᕋᒃᓯᐅᕐᕕᖕᓂ,” ᐅᖃᕐᑐᖅ ᓯᑏᕙᓐ ᑏᓐ, ᑲᒻᐸᓂᒧᑦ ᐃᒃᓯᕙᐅᑕᕆᔭᐅᔪᖅ ᑐᓴᒐᒃᓴᓕᐅᖅᑎᓪᓗᒋᑦ.

“ᐅᐱᒋᔭᖃᖅᑐᒍ 100 ᐳᓴᓐᑎᒥ ᓇᖕᒥᓂᖃᖅᑎᐅᓂᑦᑎᓐᓂ ᐱᖁᑎᒥ ᐊᖏᔪᐊᓗᖕᒥᓪᓗ ᐅᔭᕋᐅᔭᓕᕆᕙᒃᖢᑎᒃ, ᐊᒻᒪᓗ ᑕᒪᐅᖔᖓᔪᓂᒃ ᐱᓕᕆᐊᖃᕐᐸᓪᓕᐊᓂᒥ ᑭᖑᕚᕇᖕᓄᑦ ᐱᓕᕆᐊᕆᔭᐅᔪᓐᓇᕐᓂᐊᖅᖢᓂ, ᐊᒻᒪ ᑕᐃᒪᐃᑎᓪᓗᒋ ᑮᓇᐅᔭᓕᐊᕋᓱᖕᓂᕐᒧᑦ ᐃᑲᔪᕈᓐᓇᖅᖢᑎᒃ ᑯᐸᐃᒃ ᐅᐊᖕᓇᖓᓂ ᕿᓚᒥᒃᑯᑦ ᐊᒻᒪ ᐊᑯᓂᕈᓗᒃᑯᑦ ᖃᓄᐃᓕᐅᖃᑎᒌᖕᓂᒃᑯᑦ.”

ᑭᒡᒐᖅᑐᐃᔨᒋᔭᐅᔪᖅ ᐆᓯᐊᓂᒃᑯᓐᓄᑦ ᐊᑐᐃᓐᓇᐅᓚᐅᙱᒻᒪᑦ ᐊᐱᕐᓱᖅᑕᐅᒃᑲᓐᓂᕈᒪᑎᓪᓗᒍ.

ᐅᓇ ᓄᓇᙳᐊᖅ ᓇᓗᓇᐃᕐᓯᓯᒪᔪᖅ ᐆᓯᐊᓂᒃ ᓴᕕᕋᔭᒃᓴᒥ ᑯᐊᐳᕇᓴᓐᑯᑦ ᖃᓄᐃᓕᐅᕈᑎᒋᔪᒪᔭᖏᓐᓂ ᓇᓂ, ᐃᓚᖃᖅᖢᓂ ᕼᐆᑉᔅ ᐊᕚᓐᔅ, ᐊᐅᐸᓘᑉ ᐱᖓᖕᓇᕐᐸᓯᐊᓃᑦᑐᖅ. (ᐊᔾᔨᙳᐊᖅ ᐅᑯᓇᙵᑦ ᐆᓯᐊᓂᒃ ᓴᕕᕋᒃᓴᒥ ᑯᐊᐳᕇᓴᓐᑯᓐᓂ)

ᑐᓴᒐᒃᓴᓕᐊᕆᔭᐅᔪᖅ ᖃᓄᐃᓕᐅᕐᓂᐅᓂᐊᕐᑐᓂ ᐅᖃᐅᓯᖃᕈᑎᐅᓚᐅᕐᑐᖅ ᐆᑐᓇᖅ ᐊᕐᕌᒍᓂ 28-ᓂ ᐅᔭᕋᒃᓯᐅᕐᕕᐅᔪᓐᓇᕐᓂᖓᓂᒃ ᐊᒻᒪᓗ ᓴᓇᓂᐊᕐᓂᖏᓐᓂᒃ ᓇᖕᒥᓂᕆᔭᐅᓂᐊᖅᑐᒥ ᑐᓚᒃᑕᕐᕕᒃᓴᒥ ᐅᒥᐊᕐᔪᐊᓄᑦ ᐱᖁᑎᓄᑦ.

“ᑭᖑᓪᓕᑦ ᖃᓄᐃᓕᐅᕈᑎᒃᓴᑦ” ᑎᑎᕋᕐᑕᐅᓯᒪᔪᑦ ᐃᓚᖃᓚᐅᕐᑐᑦ ᖃᓄ ᐊᑯᓂᐅᑎᒋᖃᑦᑕᕐᓂᐊᕐᓂᖏᓐᓂᒃ, ᐱᔪᓐᓇᐅᑎᑖᕋᓱᖕᓂᖏᓐᓂᒃ, ᐱᓕᕆᔾᔪᑎᓕᕆᓂᕐᒥᒃ ᐊᒻᒪᓗ “ᓄᓇᕕᒃᒥ ᐃᓄᖕᓂ ᑭᒡᒐᖅᑐᐃᔨᓂᒃ ᐃᓚᐅᑎᑦᑎᖃᑦᑕᕐᓂᐊᕐᓂᕋᖅᖢᓂᑎᒃ.”

ᐅᔭᕋᒃᓯᐅᕐᕕᓕᕆᔩᑦ ᐱᓕᕆᐊᖃᕈᒪᓂᖏᑦ ᐊᐅᐸᓗ ᖃᓂᒋᔭᖓᓂ ᐃᑲᔪᕈᑎᐅᓚᐅᕐᑐᖅ ᓄᓇᒥ ᓂᕈᐊᕋᓱᖕᓂᒥ ᐋᖅᑭᒃᓱᐃᕙᓪᓕᐊᑎᓪᓗᒋᑦ ᔭᐃᒻᔅ ᐸᐃ ᐊᒻᒪ ᑯᐸᐃᒃ ᐅᐊᖕᓇᖓᓄᑦ ᐊᖏᕈᑎᓂᒃ, ᑖᓐᓇᓗ ᐊᑎᓕᐅᕐᑕᐅᓚᐅᕐᓯᒪᓪᓗᓂ 1975-ᒥ, ᐅᖃᕐᑐᖅ ᐲᑕ ᐋᑕᒥ, ᒪᑭᕝᕕᒃ ᑯᐊᐳᕇᓴᓐᑯᑦ ᐊᖓᔪᖅᑳᖓ.

ᐊᐅᐸᓗᒃ: ᐊᐅᐸᕐᑐᖅ ᓄᓇ, ᒪᑭᕝᕕᒃᑯᓐᓄᑦ ᐋᖅᑭᒃᑕᐅᓯᒪᔪᑦ ᐅᓂᒃᑳᑕᐅᓯᒪᔪᖅ, ᓴᖅᑭᑎᑦᑎᓯᒪᔪᖅ ᖃᓄᖅ ᐅᔭᕋᒃᓯᐅᕕᒃᒥ ᐱᓇᓱᖕᓂᖅ ᓄᓇᓕᖕᓂ ᐊᓯᐊᓄᑦ ᓄᒃᑎᕈᑎᐅᓚᐅᕐᓯᒪᓂᖓᓂ 1970-ᖏᓐᓂᒃ, ᐊᒻᒪᓗ ᖃᓄᖅ ᓄᓇᖃᕐᑐᑦ ᐃᓱᒪᖕᒪᖔᑕ ᓯᕗᓂᒃᓴᖏ ᖃᓄᐃᓕᖓᓂᐊᕆᐊᒃᓴᖓᓂᒃ.

“ᐅᖃᐅᔾᔭᐅᓚᐅᕐᓯᒪᒻᒪᑕ ᑭᓱᓕᒫᑦ ᐱᒋᙱᑕᓯ, ᑕᒫᓂ ᓄᓇᖃᕋᓗᐊᖅᑎᓪᓗᒋᑦ,” ᐋᑕᒥ ᐅᖃᓚᐅᕐᑐᖅ ᑕᖅᑭᐅᓚᐅᕐᑐᒥ ᐊᐱᕐᓱᖅᑕᐅᑎᓪᓗᒍ.

“ᑕᒪᑐᒧᖓ ᐋᓐᓂᕐᓯᒪᒍᑎᐅᔪᑦ ᐃᓄᖕᓄᑦ ᐊᒃᓱᐊᓗ ᐃᒃᐱᖕᓇᖃᑦᑕᓚᐅᕐᑐᖅ ᐅᖃᐅᓯᖃᖅᑎᓪᓗᒋᑦ.”

ᐋᑕᒥ ᐅᖃᕐᑐᖅ “ᐅᔭᕋᒃᓯᐅᕐᓂᕐᒥ ᓈᒻᒪᒃᓴᙱᓐᓂᕋᕐᑐᖅ,” ᑭᓯᐊᓂᓕᑦᑕᐅᖅ “ᐱᕙᓪᓕᐊᓂᕐᒥ ᖃᓄᐃᒃᓴᙱᖢᓂ” ᓄᓇᕕᒃᒥ.

2011-ᒥ, ᒪᑭᕝᕕᒃ ᐊᖓᔪᖅᑳᕆᔭᐅᓪᓗᓂ ᐋᑕᒥ, ᐊᖏᖃᑎᖃᓚᐅᕐᓯᒪᒻᒪᑕ ᐆᓯᐊᓂᒃ ᐱᔪᒪᔭᖏᓐᓂ ᖃᓄᖅ ᐅᓇ ᕼᐆᑉᔅ ᐊᑦᕚᓐᓇᔅ ᖃᓄᖅ ᓴᓇᔭᐅᓂᐊᕐᓂᖓᓂᒃ.

ᐅᓪᓗᒥ, ᐋᑕᒥ ᐅᖃᕐᑐᖅ ᓯᕗᓂᒃᓴᒥ ᐱᕙᓪᓕᐅᓂᐅᓂᐊᕐᑐᖅ ᑲᔪᓯᓂᐊᖁᓪᓗᓂᒋᑦ “ᐱᓕᕆᖃᑎᖃᕐᓂᒃᑯᑦ” ᐃᓄᖕᓂ ᓄᓇᕕᒃᒥ.

“ᐃᒪᐃᖁᔨᒐᒪ ᐊᖏᕐᕋᕗᑦ ᓯᕗᓪᓕᐅᑎᑕᐅᓯᒪᓗᑎᒃ. ᓂᕿᑖᖃᑦᑕᐃᓐᓇᕋᑦᑕ ᓄᓇᐃᓐᓇᕐᒥᒃ,” ᐅᖃᕐᑐᖅ.

“ᖃᓄᐃᒃᓴᙱᑦᑐᖓ ᐱᕙᓪᓕᐊᓂᕐᒥ ᑭᓯᐊᓂᓕ ᐃᓄᐃᑦ ᑐᑭᓯᖁᔭᒃᑲ ᐊᕙᑎᒋᔭᕗᑦ ᑲᒪᒋᔭᕆᐊᖃᕐᓂᑦᑎᓐᓂ ᓯᕗᓪᓕᐅᑎᓪᓗᒍ.”