ᓈᒻᒪᙱᓕᐅᕈᑎᖏᓐᓂᒃ ᓴᖅᑭᔮᖅᑎᑦᑎᔪᑦ, ᖁᕕᐊᓲᑎᖃᖅᑐᓪᓗ ᑐᙵᓱᒃᑎᑦᑎᓚᐅᕐᑐᑦ ᐃᒃᓯᕋᕐᔪᐊᕌᓗᒃ ᕗᕌᓐᓯᔅᒥ ᐃᖃᓗᖕᓂ ᖁᙱᐊᖅᑕᐅᕝᕕᒋᔭᖓᓂᒃ

ᐃᒃᓯᕋᕐᔪᐊᕌᓗᒃ ᕗᕌᓐᓯᔅ ᒪᒥᐊᑦᑐᖅ ᖃᓄᐃᓕᐅᕈᑎᒋᓚᐅᕐᑕᖏᓐᓂᒃ ‘ᐅᓄᙱᑦᑐᑯᓘᖏᑦᑐᓄᑦ ᑳᑐᓕᒃᓄ’ ᐃᓕᓐᓂᐊᕆᐊᕐᕕᐅᖃᑦᑕᓚᐅᕐᑐᓂᒃ

ᕿᓚᐅᔾᔭᖅᑎ ᓄᐊ ᑲᓪᓚᒃ ᐅᑯᓇᓂ ᖁᙱᐊᖅᑕᐅᖃᑎᒋᕙᒃᑕᖏᓐᓂᒃ ‘ᕼᐅᖅᑯᓕᓛᖃᑎᒌᑦ ᒧᒥᕐᑎᓂᒃ ᐃᒃᓯᕋᕐᔪᐊᕌᓘᑉ ᖃᓂᒋᔭᖓᓂ ᔪᓚᐃ 29-ᒥ ᓇᑲᓱᒃ ᐃᓕᓐᓂᐊᕐᕕᐅᑉ ᓵᖓᓂᒃ ᐃᖃᓗᖕᓂ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For English version, see Protest, cheers greet Pope Francis on stage in Iqaluit

ᒫᓂ 1,000ᖏᓐᓃᑦᑐᑦ ᐃᓄᐃ ᑲᑎᒪᐅᕐᑐᑦ ᓇᑲᓱᒃ ᐃᓕᓐᓂᐊᕐᕕᐅᑉ ᓯᓚᑖᓂ ᔪᓚᐃ 29-ᖑᑎᓪᓗᒍ ᑐᓵᔭᖅᑐᖅᑐᓂᒃ ᐃᒃᓯᕋᕐᔪᐊᕌᓗᒃ ᕗᕌᓐᓯᔅ ᒪᒥᐊᓐᓂᖓᓂᒃ ᐱᑦᑎᐊᕈᑎᐅᕙᓚᐅᙱᑦᑐᓂᒃ ᐃᓚᖏᓐᓄᑦ ᑳᑐᓕᒃᓄ ᐃᓕᓐᓂᐊᕆᐊᕐᕕᐅᕙᓚᐅᕐᑐᓂᒃ.

ᕗᕌᓐᓯᔅ ᐃᖏᓚᐅᕐᑐᖅ ᕿᓯᖕᒥ ᖄᖃᖅᑐᓂᒃ ᖃᑯᖅᑕᕐᓂ ᐃᒃᓯᕙᐅᑕᓂᖏ ᐃᓄᒋᐊᓄᑦ ᑐᙵᓱᒃᑎᑕᐅᑲᑕᒃᖢᓂ ᒫᓂ ᐅᓐᓄᓴᒃᑯᑦ 5:40ᒥ ᐊᒻᒪᓗ ᐅᖃᓪᓚᓚᐅᕐᓯᒪᔪᖅ ᐃᑲᕐᕋᐅᑉ ᓇᑉᐸᖓ ᐊᓂᒍᖅᑎᓪᓗᒍ ᖁᙱᐊᕌᓪᓚᓚᐅᖅᑎᓪᓗᒍ ᐃᓄᐃᑦ ᐃᓕᖅᑯᓯᖏᑦᑎᒍᑦ ᖃᓄᐃᓕᐅᑲᑕᒃᑐᓂᒃ.

“ᐅᖃᐅᑎᔪᒪᔭᔅᓯ ᐊᒃᓱᐊᓗᒃ ᒪᒥᐊᓐᓂᓐᓂᒃ ᐊᒻᒪᓗ ᐃᓱᒫᓗᕝᕕᐅᔪᒪᔪᓐᓃᖅᖢᖓ ᐱᑦᑎᐊᙱᔾᔪᑎᕕᓂᐊᓗᖕᓄᑦ ᐅᑯᓄᖓᑐᐊᙳᙱᑦᑐᖅ ᑳᑐᓕᒃᓄᑦ ᐃᓕᓐᓂᐊᕆᐊᕐᕕᒋᕙᓚᐅᖅᑕᖏᓐᓂᒃ ᑖᒃᑯᐊ ᐃᓕᖅᑯᓯᕆᔭᐅᔪᓂᒃ ᐊᓯᐅᑎᑦᑎᓇᓱᓚᐅᕐᓯᒪᓂᖏᓐᓄᑦ,” ᐅᖃᖅᖢᓂ ᓯᐹᓂᔅ ᐅᖃᐅᓯᕐᒥ ᐊᑐᖅᖢᓂ.

ᐅᖃᐅᓯᖏᑦ ᖃᓪᓗᓈᑐᑦ ᐃᓄᒃᑎᑐᓪᓗ ᑐᑭᓕᐅᖅᑕᐅᑲᑕᓚᐅᕐᑐᑦ ᐅᐸᒃᓯᒪᔪᓄᑦ.

ᑕᐅᑐᒋᐊᕐᑐᕐᓯᒪᔪᑦ ᑲᑎᑉᐸᓪᓕᐊᓕᓚᐅᕐᑐᑦ ᐃᓕᓐᓂᐊᕐᕕᐅᑉ ᓄᓇᒃᑰᕈᑎᖃᕐᕕᐊᓂᒃ ᐊᒻᒪ ᐹᔅᑭᑉᐹᓪᕕᒃᒥ ᑖᓐᓇ ᐃᒃᓯᕋᕐᔪᐊᕌᓗᒃ ᐃᖃᓗᖕᓂ ᒥᓚᐅᙱᑎᓪᓗᒍ ᓱᓕ.

ᒫᓂ 600ᖏᓪᓃᑦᑐᑦ ᐃᓄᐃᑦ ᑲᑎᓯᒪᓕᓚᐅᕐᑐᑦ ᐅᓇ ᐅᖃᕐᑎᒋᔭᐅᓂᐊᕐᑐᖅ ᓖᓴ ᖁᐱᕐᕈᐊᓗᒃ ᐱᒋᐊᓚᐅᕐᑎᓐᓇᒍ ᖁᙱᐊᖅᑕᐅᓂᐊᖅᑐᓂᒃ ᐅᖃᐅᓯᖃᑲᑕᒃᖢᓂ 4ᒥ ᐅᓐᓄᓴᒃᑯᑦ ᐅᑯᓂᖓ: ᕼᖅᑯᓪᓛᖃᑎᒌᑦ, ᐃᙱᖅᐸᒃᑐᑦ ᐊᒻᒪ ᕿᓚᐅᔾᔭᖅᐸᒃᖢᑎ 7ᐅᓪᓗᑎ ᐃᖃᓗᒃᑑᑦᑎᐊᕐᒥᐅᑕᐃᑦ.

ᐊᕐᕕᐊᓂᒃ ᑲᑕᔾᔭᖅᐸᒃᑐᑦ ᒥᐊᓕ ᐊᓇᐅᑕᓕᒃ ᐊᒻᒪ ᓗᐃᔅ ᓱᓗᒃ-ᓛᒃ ᑭᖑᓂᐊᒍᑦ ᖁᙱᐊᖅᑕᐅᓚᐅᕐᑑᑦ ᐊᒻᒪᓗ ᐅᑯᐊ ᐳᕕᕐᓂᖅᑐᒥ ᑲᑕᔾᔭᖅᑎᓂᒃ ᐅᑯᓂᖓ ᐊᑭᓂᓯ ᓯᕗᐊᕌᐱᒃ ᐊᒻᒪ ᐊᒪᓕ ᓴᓪᓗᐊᓗᒃ.

ᓄᓇᑦᓯᐊᕗᑦ ᐃᙱᕐᑎ ᑎᐊᓐᑕ ᐃᐊᑦᒪᓐᔅ ᐃᙱᓚᐅᕐᒥᓚᖅ ᒪᕐᕈᐃᖅᖢᓂ ᓂᐱᓕᐅᕆᓯᒪᔭᖏᓐᓂᒃ ᓄᑖᓂᒃ.

ᕗᕌᓐᓯᔅ ᖁᙱᐊᖅᑕᐅᕝᕕᖕᒧᐊᖅᑎᓪᓗᒍ ᑐᙵᓱᒃᑎᑕᐅᑲᑕᓚᐅᕐᑐᖅ ᖃᓄᐃᓕᐅᑲᑕᒃᑐᓂᒃ ᐱᒋᐊᓕᓵᕐᓂᕐᒧᑦ ᐊᒻᒪᓗ ᐅᕙᙵᑦ ᐲᑕ ᐃᕐᓂᖅᒥ.

ᐃᕐᓂᖅ, ᐃᓚᒋᔭᐅᓚᐅᕐᑐᖅ ᐅᓄᕈᓘᔭᖅᑐᓂᒃ ᐃᓕᓐᓂᐊᕆᐊᖅᐸᓚᐅᕐᑐᓂᒃ ᐃᓕᓐᓂᐊᕐᕕᐅᑉ ᐃᓗᐊᓃᑎᓪᓗᒋ ᐅᖃᖃᑎᖃᓚᐅᕐᑐᑦ ᐃᒃᓯᕋᕐᔪᐊᕌᓗᖕᒥ ᐅᖃᓪᓚᓕᓚᐅᕐᒥᔪᖅ ᐃᓄᒋᐊᓄᑦ ᑐᓂᓯᓂᐊᓵᖅᖢᓂ ᕿᓚᐅᑎᒥ ᐃᒃᓯᕋᕐᔪᐊᕌᓗᒃᒧ.

“ᐃᒻᒪᑲᓪᓚᒡᓕ ᒧᒥᖃᑦᑕᓚᐅᕐᓯᒪᒐᑦᑕ ᖁᕕᐊᓱᓕᕌᖓᑦᑕ … ᐅᓪᓗᒥᓕ ᖁᕕᐊᓱᒃᐳᒍ ᓲᖃᐃᒻᒪ ᐃᒃᓯᕋᕐᔪᐊᕌᓗ ᐅᕙᑦᑎᓐᓄ ᐳᓛᕈᓐᓇᕐᒪᑦ,” ᐃᕐᓂᖅ ᐅᖃᕐᑐᖅ. “ᑐᙵᓱᒋᑦ ᐃᓄᐃᑦ ᓄᓇᖓᓐᓄᑦ.”

ᐃᑲᕐᕋᐅᑉ ᐃᓗᐊᓂ ᕗᕌᓐᓯᔅ ᐅᖃᓪᓚᓚᐅᕐᑐᖅ ᐃᒃᐱᒋᔭᐅᑦᑎᐊᖅᑐᓂᒃ ᐃᓕᓐᓂᐊᕆᐊᖅᐸᓚᐅᕐᑐᓂᒃ ᐅᖃᐅᓯᖃᕆᓪᓗᓂ, ᐃᓅᓱᒃᑐᓂᒡᓗ ᐃᑲᔪᒃᑲᓐᓂᕈᑎᐅᔪᓐᓇᖅᑐᓂᒃ ᐊᒻᒪ ᐃᓄᐃᑦ ᐃᓕᖅᑯᓯᖓᓄᑦ.

ᖁᔭᓕᓚᐅᕐᑐᖅ ᐃᕐᓂᖅᒥ ᐊᒻᒪ ᐊᓯᖏᓐᓂᒃ ᓱᓕᐅᔪᓂᒃ ᐅᓂᒃᑳᓚᐅᕐᒥᔪᓂᒃ ᑖᔅᓱᒧᖓ ᐃᓄᑑᑎᓪᓗᒋᑦ.

“ᖁᔭᒋᕙᒋᑦ ᐅᓂᒃᑳᐅᑎᒋᔪᓐᓇᓚᐅᕋᔅᓯᐅᒃ ᐊᒻᒪ ᑐᓴᐅᒪᔭᐅᑎᖢᒋᑦ ᐋᓐᓂᕈᑎᕕᓂᐊᓗᒃᓂ. ᑕᐃᒪᓐᓈᓗ ᐋᓐᓂᐊᕐᓇᕐᓂᖓ ᐃᓱᒪᒋᔪᓐᓇᓚᐅᙱᓐᓇᒃᑯ,” ᐅᖃᕐᑐᖅ. “ᐅᓇᓕ ᓈᒻᒪᒃᓴᙱᔾᔪᑎᐊᓗᖕᓂᒃ ᐊᒻᒪ ᑲᖑᓲᑎᓐᓈᓗᖕᓂ ᓴᖅᑭᑎᑦᑎᒃᑲᓐᓂᕐᑐᖅ ᐃᒃᐱᒋᓯᒪᓕᕐᑕᓐᓂᒃ ᑕᖅᑭᒐᓴᐅᓕᕐᑐᓂᒃ.

“ᐊᒃᓱᐊᓗᒃ ᐱᐅᙱᒻᒪᓐ ᐊᖓᔪᖅᑳᑦ ᓱᕈᓯᖏᓐᓂᒃ ᐊᕕᑎᑕᐅᓇᓱᒃᖢᑎᒃ, ᓱᕋᐃᓇᓱᒃᖢᑎᒃ ᖃᓂᒌᖕᓂᕐᒥᒃ, ᐋᓐᓂᕐᓯᕆᓇᓱᖕᓂᒃᑯ ᐊᒻᒪ ᐱᑦᑎᐊᖅᑕᐅᑎᑦᑎᙱᓗᐊᕐᓂᕐᒥ ᒥᑭᑦᑐᓂᒃ.”

ᐅᖃᓪᓚᓚᐅᕐᒥᔪᖅ ᐃᓄᐃᑦ ᐊᒃᑐᐊᓂᖃᓪᓚᕆᖕᓂᖏᓐᓂᒃ ᓄᓇᒥᓐ.

“ᐱᐅᔪᐊᓗᖕᒥ ᐊᒃᑐᐊᓂᖃᕈᑎᖃᕋᔅᓯ ᓄᓇᔅᓯᓐᓂ, ᓲᖃᐃᒻᒪ ᓴᙱᔪᐊᓗᒃ ᐊᒻᒪ ᓱᖁᓯᑲᐅᕐᑐᕈᓐᓇᙱᖢᓂ,” ᐅᖃᕐᑐᖅ.

ᐅᖃᓪᓚᒃᑎᓪᓗᒍ ᐅᓄᙱᑦᑐᑦ ᖁᙱᐊᕆᐊᖅᑐᖃᑕᐅᔪᑦ ᑎᑎᕋᕐᓯᒪᔪᓂᒃ ᓴᖅᑭᔮᖅᑎᑦᑎᓚᐅᕐᑐᑦ ᐃᓚᐃᓕᖓᔪᓂ, “ᐱᒋᐊᒃᑲᓐᓂᕈᒪᓂᖅ ᐊᔾᔨᖃᑐᐃᓐᓇᖅᑐᖅ ᓱᓕᓂᕐᒥᒃ ᐊᒻᒪ ᖃᓄᐃᓕᐅᖅᐸᓪᓕᐊᓂᕐᒥᒃ” ᐊᒻᒪᓗ “ᓄᖃᕐᑎᓪᓗᒋ ᓇᓂᓯᓯᒪᓂᕋᕈᑎᐅᔪ,” ᑖᓐᓇᓕ ᑐᑭᖃᖅᖢᓂ ᖃᓄᐃᓕᐅᕈᑎᕕᓂᕐᓂᒃ ᓄᓇᖅᑲᑎᒌᓕᖅᑎᑦᑎᓇᓱᖕᓂᕐᒧᑦ.

ᐊᑕᐅᓯᖅ ᖁᙱᐊᕆᐊᕐᑐᖅ ᓂᐱᖁᕐᑐᓪᓗᓂ ᐅᖃᓚᐅᕐᑐᖅ, “ᓱᕈᓯᓕᒫᑦ ᐱᒻᒪᕆᐅᔪᑦ.”

ᑭᓯᐊᓂᓕ ᕗᕌᓐᓯᔅ ᐱᐊᓂᒃᑲᒥ ᐃᓄᒋᐊᓄ ᐸᐃᓚᑲᑕᓚᐅᕐᑐᖅ – ᐃᓚᖏᑦ ᑐᕐᖢᓛᖅᐸᓕᑦᑎᓪᓗᑎᒃ, “ᓇᒡᓕᒋᕙᑦᑎᒋᑦ,” ᐃᓚᖏᑦ ᖁᕕᐊᓱᒍᑎᖃᖅᖢᑎᒃ ᐊᒻᒪ ᐅᓄᕐᑐᐃᑦ ᐸᐃᓚᒋᓪᓗᑎᒃ ᐊᒡᒐᖏᓐᓄ.

Share This Story

(0) Comments