ᕿᑭᖅᑕᕐᔪᐊᖅ ‘ᐱᓕᕆᕝᕕᑦᑎᐊᕙᐅᕗᖅ’ ᑕᕆᐅᕐᒥ ᐆᒪᔪᓕᕆᔨᓄᑦ

For the English version of this story, please see Qikiqtarjuaq becomes ‘hot spot’ for marine biologists.

ᐊᕐᕌᒍᑦ 6−ᓂ ᖄᖏᖅᓯᒪᓕᖅᑐᓂ ᑕᕆᐅᕐᒥ ᐆᒪᔪᓕᕆᔨ ᒐᐃᐳᕆᐅᓪ ᑎᓛᖕᓵᒻᑉ ᐃᒪᕐᒥ ᖃᐅᔨᓴᕐᓂᖃᓚᐅᖅᐳᖅ ᕿᑭᖅᑕᕐᔪᐊᕐᒥ, ᓱᕈᔾᔭᐃᒃᑯᓯᖅᓯᔭᕆᐊᖃᓚᐅᖅᐳᖅ ᐃᒪᕐᒥ ᐃᒃᓯᕚᖅᖢᓂ ᐃᓄᖃᕐᕕᖕᒥ ᐃᒡᓕᕐᒥ ᐊᒻᒪ ᐅᓪᓛᕈᒻᒥᑕᕐᕕᖕᒥ ᑐᔪᕐᒥᕕᒋᔭᖓᓂ.

ᐊᓯᐊᓂ ᐃᒡᓘᑉ ᐃᓗᐊᓂ ᐱᓕᕆᔪᓐᓇᕐᓂᖓᓂ ᐱᓕᕆᐊᒃᓴᒥᓂᑦ.

“ᐊᔾᔨᒋᙱᕐᔪᐊᖅᖢᓂᐅᒃ ᐊᑐᕐᓂᐅᓚᐅᖅᐳᖅ 2019−ᒥ ᐱᓕᕆᓇᓱᒃᖢᓂ ᖃᐅᔨᓴᕐᓂᕐᒥ ᐅᑭᐅᖅᑕᖅᑐᒥ,” ᐅᖃᓚᐅᖅᐳᖅ ᑎᓛᖕᓵᒻᑉ, ᒫᓐᓇ ᖃᐅᔨᓴᕐᓂᕐᒧᑦ ᐱᓕᕆᔨᐅᔪᖅ ᓄᑖᖑᔪᒥ ᕿᑭᖅᑕᕐᔪᐊᕐᒥ ᖃᐅᔨᓴᕐᕕᖓᓂ ᒪᑐᐃᓚᐅᖅᑐᒥ ᕕᕗᐊᕆᐅᓚᐅᖅᑐᒥ.

ᖃᐅᔨᓴᕐᕕᖓ ᓴᖕᒥᓂᖃᑎᒋᔭᐅᕗᖅ ᐊᒻᒪ ᐊᐅᓚᑕᐅᓪᓗᓂ ᓚᕚᓪ ᓯᓚᑦᑐᖅᓴᕐᕕᒡᔪᐊᖓᓂ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ. ᐊᖏᕈᑕᐅᔪᒥ ᑎᑭᐅᑎᔭᐅᓚᐅᖅᑐᒥ 2021−ᒥ, ᐊᕐᕌᒍᓂ 15 ᐊᓂᒍᕈᓂ ᑕᒪᒃᑭᖅᑐᒥ ᓇᖕᒥᓂᖃᕐᓂᐅᔪᒥ ᑲᑐᔾᔨᖃᑎᒌᒃᑯᓐᓄᐊᕐᓂᐊᖅᐳᖅ, ᐱᓕᕆᐊᒃᓴᖃᖅᑐᓂ ᑭᒡᒐᖅᑐᐃᓂᕐᒥ ᐱᔪᓐᓇᕐᓂᕆᔭᐅᔪᓂ ᕿᑭᖅᑕᓂ ᐃᓄᖕᓄᑦ.

ᖃᐅᔨᓴᕐᕕᒃ ᒪᑐᐃᖓᕗᖅ ᖃᐅᔨᓴᖅᑎᐅᔪᓄᑦ ᐊᑐᕐᓂᕐᒧᑦ; ᐃᒡᓖᑦ ᐊᑭᖓ $250 ᐅᓐᓄᐊᑕᒫᒥ.

ᐃᓚᖃᖅᐳᖅ ᑎᓴᒪᓂ ᐃᒡᓗᕈᓯᕐᓂ ᖁᓕᕇᒃᑐᓂ ᐃᒡᓕᓕᖕᓂ ᐃᓄᖃᕈᓐᓇᖅᖢᓂ ᑎᑭᐅᑎᔪᒧᑦ 16−ᓄᑦ ᖃᐅᔨᓴᖅᑎᓂᑦ; ᒪᕐᕉᖕᓂ ᖃᐅᔨᓴᕐᕕᓂᑦ ᐆᒪᔪᓕᕆᔨᓄᑦ, ᐃᓚᐅᕈᑎᒃᓴᓕᕆᔨᓄᑦ ᐊᒻᒪ ᓯᓚᒥ ᖃᐅᔨᓴᖅᑎᐅᔪᓂ; ᐊᒻᒪ ᐃᓄᖃᕐᕕᑐᐃᓐᓇᐅᔪᓂ. ᓯᕐᓗᐊᖃᕆᕗᖅ ᐊᖅᑲᐅᒪᔨᖕᓄᑦ ᐱᖁᑎᖏᓐᓄᑦ ᐱᓕᕆᕙᒃᑐᓂ ᐊᕐᕌᒍᓕᒫᒥ ᐃᒪᐅᑉ ᐊᑖᓂ ᖃᐅᔨᓴᕐᓂᐅᔪᒥ ᐃᓂᐅᔪᒥᑦ.

ᑎᓛᖕᓵᒻᑉ ᐊᐱᖅᓱᖅᑕᐅᓚᐅᖅᑎᓪᓗᒍ ᐆᒧᖓ ᐅᓂᒃᑳᓕᐊᖑᔪᒧᑦ ᓄᕕᐱᕆ ᐱᒋᐊᕐᓂᐸᓗᐊᓂ, ᖃᐅᔨᓴᕐᕕᒃ ᐃᓗᓕᖃᓚᐅᙱᓚᖅ ᑭᓯᐊᓂ ᖃᐅᔨᓴᖅᑎᐅᔪᓂ SmartICE−ᑯᓐᓂ — ᑲᑎᙵᓂᐅᔪᑦ ᓇᐅᑦᑎᖅᓱᖅᑐᒥ ᓯᑰᑉ ᐃᔾᔪᓂᖓᓂ ᐅᑭᐅᖅᑕᖅᑐᒥ — ᓄᓇᓕᖕᓄᐊᕈᓐᓇᓚᐅᙱᒻᒪᑕ ᐱᔾᔪᑎᖃᖅᑐᒥ ᓯᓚᑦᑎᐊᕙᐅᙱᓐᓂᖓᓄᑦ.

10−ᓂ ᖃᐅᔨᓴᖅᑎᖃᒐᔪᒃᐳᖅ ᑕᐃᑲᓂ ᑲᑐᔾᔨᖃᑎᒌᖑᔪᓂ ᐅᕝᕙᓘᓐᓃᑦ ᒐ>ᒪᒃᑯᓐᓄᑦ ᐱᒡᒍᔾᔨᔨᓂᑦ ᓲᕐᓗ ᒐᕙᒪᑐᖃᒃᑯᑦ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥ, ᓚᕚᓪ ᐱᓕᕆᕝᕕᖓ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒥ, ᐅᕝᕙᓘᓐᓃᑦ ᖃᐅᔨᓴᖅᑎᓂ ᑕᑯᕕᒃ ᓄᓇᕐᔪᐊᒥ ᖃᐅᔨᓴᕐᓂᕐᒥ ᖃᐅᔨᓴᕐᕕᖓᓂ, ᐱᓕᕆᓲᖑᔪᒥ ᐅᕘᓇ ᓚᕚᓪ ᓯᓚᑦᑐᖅᓴᕐᕕᒡᔪᐊᖓᑎᒍᑦ.

“ᐃᓱᒪᓂᐅᔪᖅ ᐊᑐᐃᓐᓇᖃᖅᑎᑦᑎᓂᕐᒥ ᐱᓕᕆᕝᕕᐅᔪᒥ ᑕᒪᒃᑭᓄᑦ ᖃᐅᔨᓴᖅᑎᓂᑦ ᐱᓕᕆᓂᕐᒧᑦ, ᑕᑯᔪᒥᓇᖅᑐᓂ ᐱᓕᕆᓂᖅᑕᖃᕐᒪᑦ ᐊᕕᒃᑐᖅᓯᒪᓂᐅᔪᒥ,” ᑎᓛᖕᓵᒻᑉ ᐅᖃᓚᐅᖅᐳᖅ.

ᐱᔾᔪᑎᖃᖅᑐᒥ ᐃᑎᔪᒥ ᑕᕆᐅᕐᒥ ᐃᒪᖓᓂ ᑕᐅᕙᓂ ᕿᑭᖅᑕᕐᔪᐊᕐᒥ ᐊᒻᒪ ᐃᒪᐅᑉ ᐊᑖᓂ ᐃᖏᕐᕋᓂᐅᔪᓂᑦ, ᐱᐅᓪᓗᓂ “ᐱᓕᕆᕕᑦᑎᐊᕙᐅᕗᖅ” ᐆᒪᔪᓕᕆᔨᓂᑦ ᖃᐅᔨᓴᕐᓂᖏᓐᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐊᒻᒪ ᐅᑭᐅᖅᑕᖅᑐᒥ ᑕᕆᐅᕐᒥ ᐆᒪᔪᐃᑦ ᓄᖅᑭᐅᕐᕕᖓᓄᑦ, ᐅᖃᓚᐅᖅᐳᖅ.

ᖃᐅᔨᓴᕐᕕᒃ ᒪᑐᐃᖅᓯᓚᐅᖅᐳᑦ ᐹᖏᓐᓂ ᕕᕗᐊᕆᒥ ᐊᕐᕌᒍᐸᓗᖕᒥ ᓇᑉᐸᖅᑎᕆᓂᐅᔪᒥ.

“ᐊᒥᓱᓂ ᖃᐅᔨᓴᖅᑎᓂ ᐱᓕᕆᐊᓂᒃᐳᑦ ᐅᕙᓂ ᐃᓂᐅᔪᒥ, ᑕᐃᒫᒃ ᐃᓚᒋᔭᐅᓚᐅᖅᐳᖅ ᐃᓱᒪᓂᐅᔪᒥ ᑎᑭᓐᓂᕐᒧᑦ ᓴᓇᓂᕐᒥ ᓄᑖᖑᔪᒥ ᖃᐅᔨᓴᕐᕕᒃᓴᒥᒃ,” ᑎᓛᖕᓵᒻᑉ ᐅᖃᓚᐅᖅᐳᖅ.

ᐊᑭᓪᓚᕆᖓᓂ ᓇᓗᓇᐃᒃᑯᑕᖃᓚᐅᙱᓚᖅ, ᑭᓯᐊᓂ ᐸᕐᓇᐅᑎᓂᑦ ᖃᐅᔨᓴᕐᕕᖕᒧᑦ ᐅᖃᐅᓯᐅᑎᓪᓗᒋᑦ 2021−ᒥ ᐃᓚᖃᖅᖢᓂ ᓱᓕ ᓴᓇᔭᐅᓯᒪᙱᑦᑐᒥ ᒥᑦᑎᒪᑕᓕᖕᒥ ᖃᐅᔨᓴᕐᕕᒃᓴᒥ, ᒪᕐᕉᒃ ᐃᒡᓗᕐᔪᐊᑦ ᐱᓚᐅᖅᐳᑦ $17.5-ᒥᓕᐊᓐᓂ ᑐᓂᕐᕈᑎᒥᒃ ᑯᐸᐃᖕᒥ ᒐᕙᒪᖏᓐᓂ ᐊᒻᒪ ᑲᓇᑕᒥ ᑐᙵᕕᐅᔪᒥ ᐃᓱᒪᑐᓂᕐᒧᑦ, ᓴᖅᑭᑎᑕᐅᓚᐅᖅᑐᒥ ᒐᕙᒪᑐᖃᒃᑯᓐᓂ.

ᐃᓚᖃᖅᖢᓂ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᕐᒧᑦ, ᖃᐅᔨᓴᕐᕕᐅᑉ ᐱᓕᕆᓂᖓ ᐋᖅᑭᒃᓯᒪᕗᖅ ᐃᑲᔪᖅᓱᐃᓂᕐᒥ ᓇᑉᐸᖅᑎᕆᓂᐅᔪᒥ ᐊᑯᓂᐅᔪᒥ-ᐅᑕᖅᑭᔭᐅᔪᒥ ᕿᑭᖅᑕᕐᔪᐊᕐᒥ ᑐᓚᒃᑕᕐᕕᖓᓂ ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᑐᙵᕕᒃᑯᑦ ᐃᓚᓕᐅᔾᔨᔭᖓᓂ ᑎᑎᕋᖅᓯᒪᓂᐅᔪᒥ “ᑲᓇᑕᒥ-ᐱᕈᖅᓴᐃᓂᐅᔪᒥ” ᐱᓕᕆᐊᒃᓴᐅᔪᓂ.

“ᖃᐅᔨᓴᖅᑎᓂ ᐅᕙᓐᓂ ᖃᐅᔨᒋᐊᖅᓯᒪᔪᖄᓂᒃᐳᖅ ᑖᔅᓱᒧᖓ,” ᑎᓛᖕᓵᒻᑉ ᐅᖃᓚᐅᖅᐳᖅ.

“ᑕᐃᒫᒃ ᐄ, ᖃᐅᔨᓴᕐᓂᕐᒧᑦ ᐱᓕᕆᐊᒃᓴᖅᑕᖃᕐᓂᐊᕆᕗᖅ ᑕᐃᔅᓱᒧᖓ.”