ᐅᑎᖅᑎᑕᐅᓂᐅᔪᒥ ᕿᓯᖕᓂ ᓂᐅᕈᕆᐊᓂᑦ ᓇᒃᓴᖅᐳᖅ ᐃᖅᑲᐅᒪᓂᐅᔪᓂ

ᐃᐅᓪᕙ ᕇᑕ ᐱᒐᓚᒃ ᑎᒍᒥᐊᖅᐳᖅ ᓴᓇᓵᖅᑕᒥᓂᑦ ᑲᒥᖕᓂ ᖁᕐᓗᖅᑐᕐᒥ, ᑕᐃᔅᓱᒪᓂ ᑕᐃᔭᐅᔪᒥ Coppermine−ᒥ, 1986−ᒥ. (ᐸᑕ ᐃᓯᒐᐅᔭᕐᓄᑦ ᑐᑯᓐᓇᒐᖃᕐᕕᖓᓂ ᐊᔾᔨᖁᑎᖓ, ᑐᕌᓐᑐ, ᐋᓐᑎᐊᕆᐅ ᑲᓇᑕ © 2025)

For English version, see Repatriation of Kugluktuk sealskin boots brings back warm memories

ᕇᑕ ᐱᒐᓚᒃ ᐃᓯᕋᒥ ᑐᖅᑯᖅᑕᐅᕝᕕᖕᒥ ᐃᓂᖓᓂ ᐸᑕ ᐃᓯᒐᐅᔭᕐᓄᑦ ᑐᑯᓐᓇᒐᖃᕐᕕᖓᓂ ᑐᕌᓐᑐᒥ ᐊᖓᔪᖓᓂ ᐅᐃᓪᒪᒥ, ᑕᒪᒃᑭᑦ ᕿᐊᓱᙳᔭᕇᓚᐅᖅᐳᑦ.

ᐊᕙᓗᔭᐅᓯᒪᓪᓗᑎᒃ ᐄᔾᔭᑉᒥᐅᑕᑐᖃᓂ ᑲᒥᓪᓛᕈᑎᓂ, ᑯᐃᓐ ᕕᒃᑐᐊᕆᐊ ᑲᒥᓪᓛᕈᑎᖏᓐᓂ, ᐃᐅᓪᕕᔅ ᐳᕋᔅᓕᐅᑉ ᐃᓯᒐᐅᔭᖏᓐᓂ ᐊᒻᒪ ᔮᓐ ᓚᓂᓐ ᑲᒫᓗᖏᓐᓂ, ᐃᒃᐱᒍᓱᓚᐅᖅᐳᑦ ᐊᑐᖅᑕᐅᓂᑯᓂ.

ᑭᓯᐊᓂ ᑕᑯᓕᒑᓚᐅᖅᐳᑦ ᐱᖁᑎᒥᒃ ᐱᓪᓚᕆᐅᓗᐊᖅᑐᒥ ᐃᒻᒥᖕᓄᑦ, ᐱᒐᓚᐅᓪᓗᑎᒃ.

ᐃᓚᒋᔭᐅᓪᓗᑎᒃ ᕙᔅᑎᓐ ᕗᑦᔅᒥ, ᐸᕼᐅᑉ ᐸᖅᑭᔨᖓ ᓄᓇᖃᖅᑳᖅᓯᒪᔪᓄᑦ ᑲᑎᙵᓂᐅᔪᓂ, ᐊᖓᔪᒌᒃ ᐱᕕᖃᓚᐅᖅᐳᑦ ᑕᑯᓂᕐᒥ ᒥᑭᑦᑐᑯᓗᖕᓂ ᖃᐅᓪᓗᖅᑕᓂ ᐊᒻᒪ ᐊᐅᐸᖅᑐᓂ ᑲᒥᖕᓂᑦ. ᕿᓯᖕᓂ ᓂᐅᕈᕆᐊᑦ ᑕᖅᓯᖅᓱᖅᓯᒪᓚᐅᖅᐳᑦ ᑐᖑᑦᑐᕐᒥ ᓄᓇᕋᙳᐊᓂ ᐊᒻᒪ ᐊᐅᐸᖅᑐᒥ ᓴᖑᐱᓗᒃᓯᒪᓂᐅᔪᒥ ᖁᓛᖏᑕ ᖃᓂᒋᔭᖓᓂ. ᑲᒥᖕᓂ ᐊᔾᔨᙳᐊᖃᓚᐅᖅᐳᖅ ᒥᖅᓱᖅᑎᐅᔪᒥ ᐊᐅᐸᖅᑐᒥ ᐅᕕᓂᕈᖅᓯᒪᔪᒥ ᐊᒻᒪ ᐊᖏᔪᓂ ᖃᐅᓪᓗᖅᑐᓂ ᐃᒡᒐᒃᓯᒪᓪᓗᓂ.

ᒪᕐᕉᒃ ᐊᖓᔪᒌᒃ ᕿᐊᑦᑕᐃᓕᒪᔪᓐᓇᐃᓪᓕᓚᐅᖅᐳᑦ. ᐊᕐᓇᖅ ᐊᔾᔨᙳᐊᒥᒃ ᐊᓈᓇᒋᓚᐅᖅᐸᖓ, ᐃᐅᓪᕙ ᕇᑕ ᐱᒐᓚᒃ, ᐊᒻᒪ ᑲᒦᑦ ᓴᓇᐅᒐᕆᓚᐅᖅᐸᖏᑦ, 1986−ᒥ.

“ᑲᒪᓇᕐᔪᐊᖅᖢᓂ ᐃᒃᐱᖕᓂᐊᓂᐅᓚᐅᖅᐳᖅ. ᓱᓕ ᐃᖅᑲᐅᒪᕗᖓ ᐊᖏᕐᕋᓐᓄᑦ ᐅᑎᖅᖢᖓ ᖁᕕᐊᓱᒡᕕᖕᒧᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᔭᓗᓇᐃᕝᒥ ᐊᒻᒪ ᑕᑯᓪᓗᒍ ᓴᓇᑎᓪᓗᓂᒋᑦ,” ᕇᑕ ᐱᒐᓚᒃ ᐅᖃᓚᐅᖅᐳᖅ ᐅᖃᓗᖕᓂᐅᔪᒥ ᖁᕐᓗᖅᑐᕐᒥ, ᑕᖅᑭᐸᓗᖕᒥ ᑭᖑᓂᐊᒍᑦ ᐸᑕ ᐃᓯᒐᐅᔭᕐᓄᑦ ᑐᑯᓐᓇᒐᖃᕐᕕᖓᑦ ᖃᐃᖁᔨᓂᖃᓚᐅᖅᑎᓪᓗᒋᑦ ᑐᕌᓐᑐᒧᑦ ᐊᒻᒪ ᐅᑎᖅᑎᓪᓗᒋᑦ ᑲᒥᖕᓂ, ᑐᑯᓐᓇᒐᖃᕐᕕᖕᒦᓚᐅᖅᑐᓂ ᑲᑎᙵᓂᐅᔪᓂ ᖄᖏᖅᓯᒪᔪᕗᑦ ᐊᕐᕌᒍᓄᑦ 37−ᓄᑦ.

ᐅᑎᖅᑎᕆᓂᐅᔪᒥ ᐱᓕᕆᓂᐅᔪᒥ ᑕᐃᒪᐃᒐᔪᙱᑦᑐᒥ ᓱᒃᑲᓚᐅᖅᐳᖅ.

ᑕᖅᑭᓂ ᒪᕐᕈᐃᓐᓇᕐᓂ ᑭᖑᓂᐊᒍᑦ ᐃᒪᓕ ᐊᖑᓚᓕᒃ, ᐃᓱᒻᒥᖅᑐᐃᔨ ᕿᑎᕐᒥᐅᓂ ᐃᑦᑕᕐᓂᓴᓕᕆᕝᕕᖓᓂ, ᐳᓚᕋᓚᐅᖅᑎᓪᓗᒍ ᐸᑕ ᐃᓯᒐᐅᔭᕐᓄᑦ ᑐᑯᓐᓇᒐᖃᕐᕕᖓᓂ ᒪᐃᒥ ᐊᒻᒪ ᑲᑎᖃᑎᖃᖅᖢᓂ ᑕᑯᓐᓇᖓᕋᕐᕕᖕᒥ ᐱᒐᓚᒃ ᐃᓚᖏᓐᓂ, ᕗᑦᔅ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᐊᓯᐊᓂ ᒫᓐᓇᓕᓴᐅᔪᒥ ᐅᑎᖅᑎᕆᓂᐅᔪᒥ ᐱᓕᕆᓂᐅᔪᒥ ᐊᖑᓚᓕᒃ ᐃᓚᐅᖃᑕᐅᓚᐅᕐᓂᖓᓂ ᐊᑯᓂᐅᑎᒋᓚᐅᖅᐳᖅ ᐊᕐᕌᒍᓄᑦ 9−ᓄᑦ ᐊᕐᕌᒍᓄᑦ 100−ᓂᑦ ᖃᖅᓴᐅᒥ ᒧᒥᕐᓂᕐᒧᑦ ᓇᓴᕐᒥᒃ, ᐅᑎᖅᑎᑕᐅᓪᓗᓂ ᐃᖃᓗᒃᑑᑦᑎᐊᕐᒧᑦ ᑕᒪᑐᒪᓂ ᐊᐅᔭᐅᔪᒥ.

ᑖᔅᓱᒥᖓᓕ, ᐊᔾᔨᒋᓚᐅᙱᓚᖓ, ᖁᔭᓐᓇᒦᒃ ᑎᑎᕋᖅᑕᐅᑦᑎᐊᖃᑦᑕᕐᓂᑯᓂ ᖃᐅᔨᓴᖅᑎᐅᔪᓂ ᔨᐅᓪ ᐆᒃᔅ ᐊᒻᒪ ᕆᒃ ᕆᐅ, ᓂᐅᕕᓚᐅᖅᑐᓂ ᑲᒥᖕᓂ 1986−ᒥ ᐸᑕ ᐃᓯᒐᐅᔭᕐᓄᑦ ᑐᑯᓐᓇᒐᖃᕐᕕᖓᓄᑦ.

ᑎᑎᕋᖅᑕᐅᓯᒪᓂᐅᔪᑦ ᐃᓚᖃᑐᐃᓐᓇᓚᐅᙱᓚᑦ ᐃᐅᓪᕙᐅᑉ ᐊᑎᖓᓂ ᐊᒻᒪ ᓇᒥᑦ ᓄᓇᖃᓪᓚᕆᖃᕐᓂᖓᓂ, ᐊᒻᒪᓗᑦᑕᐅᖅ ᐆᒃᑐᕋᖅᓯᒪᓂᐅᔪᓂ ᑲᒥᖕᓂ, ᑭᓯᐊᓂ ᐊᑭᖓ ᓂᐅᕕᖅᑕᐅᓚᐅᕐᓂᖏᓐᓂ — $80 — ᐊᖏᔫᓪᓗᓂ ᐊᑭᐅᓚᐅᖅᑐᒥ ᑕᐃᔅᓱᒪᓂ, ᕇᑕ ᐅᖃᓚᐅᖅᐳᖅ.

“ᐊᒃᓱᐊᓗᒃ ᖁᕕᐊᓱᒃᐳᖓ ᑎᑎᕋᖅᑕᐅᓂᖓᓂ ᑭᒃᑯᓕᒫᑦ ᐊᑎᖏᓐᓂ ᐊᒻᒪ ᑕᒪᒃᑭᓂ ᐅᓂᒃᑳᕆᓯᒪᓂᐅᔪᓂ, ᑲᑎᖃᑎᖃᕈᓐᓇᖅᐳᒍᑦ ᑲᒥᖕᓂ ᑕᐃᑯᖓ ᐅᑭᐅᖅᑕᖅᑐᒧᑦ,” ᐅᖃᓚᐅᖅᐳᖅ ᐆᒃᔅ, ᐃᓕᓴᐃᔨᒻᒪᕆᒃ ᑎᒍᒥᐊᖅᑎᐅᓚᐅᖅᑐᒥ ᓯᓚᑦᑐᖅᓴᕐᕕᒡᔪᐊᖓᓂ ᒫᓂᑑᐸᒥ, ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

ᐆᒃᔅ ᐊᒻᒪ ᐃᐅᓪᕙ ᐹᖃᑦᑕᐅᑎᓪᓗᐊᓚᐅᖅᐳᑦ ᖁᕐᓗᖅᑐᕐᒥ 1980−ᖏᓐᓂ (ᕼᐋᒻᓚᖓ ᑕᐃᔅᓱᒪᓂ ᑕᐃᔭᐅᓚᐅᖅᐳᖅ Coppermine−ᒥ). ᐃᐅᓪᕙ, ᐃᓅᓯᓕᒫᖓᓂ ᒥᖅᓱᖅᑎᐅᔪᖅ, ᐃᓕᓐᓂᐊᖅᑎᑦᑎᓚᐅᖅᐳᖅ ᐳᓛᖅᑎᖓᓂ ᓴᓇᓂᕐᒥ ᕿᓯᖕᓂ ᓂᐅᕈᕆᐊᓂᑦ.

“ᑐᙵᓇᕐᔪᐊᓚᐅᖅᐳᖅ ᐊᒻᒪ ᓇᒡᓕᒍᓱᑦᑎᐊᖅᖢᓂ ᐊᒻᒪ, ᐅᐊᑲᓪᓚᖔ, ᑕᐃᒃᑯᐊ ᐃᖅᑲᐅᒪᓂᐅᔪᑦ ᐊᑕᐅᓯᐅᓪᓗᓂ ᑐᓐᓂᖅᑯᓯᐊᖑᓂᐅᔪᒥ ᑎᒍᒥᐊᖏᓐᓇᐅᔭᕐᓂᐊᖅᑕᕐᓂ,” ᐆᒃᔅ ᐅᖃᓚᐅᖅᐳᖅ.

ᐃᐅᓪᕙ ᕇᑕ ᐱᒐᓚᐅᑉ ᕿᓯᖕᓂ ᓂᐅᕈᕆᐊᓂᑦ, ᑕᑯᒃᓴᐅᑎᑕᐅᔪᓂ ᐸᑕ ᐃᓯᒐᐅᔭᕐᓄᑦ ᑐᑯᓐᓇᒐᖃᕐᕕᖓᓂ ᑐᕌᓐᑐᒥ ᐊᐃᔭᐅᓚᐅᖅᑳᖅᑎᓐᓇᒋᑦ ᐃᓚᖏᓐᓂ ᐅᑎᖅᑎᑕᐅᓂᐊᖅᑎᓪᓗᒋᑦ ᖁᕐᓗᖅᑐᕐᒧᑦ. (ᕇᑕ ᐱᒐᓚᒃ ᐊᔾᔨᓕᐅᖅᑕᖓ)

ᑲᒦᑦ ᐅᑎᖅᓯᒪᓕᕐᒪᑕ ᖁᕐᓗᖅᑐᒥ, ᐱᒐᓚᒃ ᐃᓚᖏᑦ ᐃᓕᔪᒪᕙᖏᑦ ᓄᓇᓕᖕᓂ ᐃᑦᑕᕐᓂᓴᓕᕆᕝᕕᖕᒥ — ᐃᓚᒌᑦ ᐊᒥᓲᖕᒪᑕ, ᑕᐃᒫᒃ ᑐᓂᓯᔪᒪᕗᑦ ᓄᓇᖕᓕᓂ ᐱᕕᖃᕐᓂᖏᓐᓂ ᐱᐅᒋᔭᐅᓂᖏᓐᓂᑦᑕᐅᖅ, ᕇᑕ ᐅᖃᓚᐅᖅᐳᖅ.

“ᓯᓚᑖᓂᕐᒥᐅᑕᐅᓪᓗᖓ, ᑎᒍᒑᖓᒃᑭᑦ ᑐᓴᓲᖑᕗᖓ ᐃᐅᓪᕙᐅᑉ ᐅᕙᓐᓄᑦ ᐃᓕᓐᓂᐊᖅᑎᓚᐅᖅᑕᖓᓂ,” ᐆᒃᔅ ᐅᖃᓚᐅᖅᐳᖅ.

“ᑭᓯᐊᓂ ᓄᕗᑐᐃᓐᓇᕆᕙᐅᒃ ᐱᖃᓗᔭᕐᒥ ᑐᑭᖃᓪᓚᕆᖕᓂᖓᓂ ᐃᓚᖏᓐᓄᑦ. ᐃᓄᖕᓄᑦ, ᐅᑯᐊ ᑲᒦᑦ ᐊᒡᔭᕆᐊᖃᖅᐳᖅ ᐃᓗᐃᑦᑐᒥᒃ ᐅᖃᓕᒫᒐᖃᕐᕕᖕᒥ, ᐊᑕᐅᓯᑐᐊᖑᙱᑦᑐᒥ ᐅᓂᒃᑳᖅᑐᐊᒥ. ᐊᒻᒪᓗ ᐅᕙᓐᓄᑦ, ᖁᕕᐊᓇᕐᔪᐊᖅᐳᖅ.”