ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᑦ ᐃᖃᖅᑐᖅᑕᐅᖁᔨᕗᑦ ᑲᑎᓯᒪᕈᓘᔭᖅᑎᓪᓗᒋᑦ ᑲᓇᑕᐅᑉ ᐅᓪᓗᖓᓂ

100 ᖃᓂᒋᔭᖓᓃᑦᑐᑦ ᑲᑎᓚᐅᕐᑐᑦ ᐃᖃᓗᖕᓂ ᑲᓇᑕᐅᑉ ᐅᓪᓗᖓᓂ ᐃᓱᒪᒋᓪᓗᒋᑦ ᓱᕈᓰᑦ ᑎᒥᑯᓗᖏᑦ ᓇᓂᔭᐅᓯᒪᓕᕐᑐᑦ ᓇᓗᓇᐃᒃᑯᑎᖃᙱᑦᑐᓂᒃ ᐃᓗᕕᕐᓂᒃ ᐃᓕᓐᓂᐊᕆᐊᖅᕕᕕᓂᕐᓂ ᑲᓇᑕᒥ.

ᐅᓄᕈᓘᔭᒻᒪᕆᒃᑐᑦᓂᒃ ᓇᓗᓇᐃᒃᑯᑎᖃᙱᑦᑐᑦ ᐃᓗᕕᕐᓂ ᓇᓂᓯᓯᒪᓕᖅᑐᑦ ᑕᖅᑭᐅᓕᖅᑑᖕᓂ ᒪᕐᕉᖕᓂ ᑕᐃᒪᙵ ᓇᓂᓯᔪᖃᓚᐅᖅᓯᒪᑎᓪᓗᒍ ᐃᓕᓐᓂᐊᕆᐊᖅᕕᐅᕙᓚᐅᖅᓯᒪᔪᓂᒃ, ᐊᒻᒪᓗ ᓄᓇᖃᖅᑳᖅᑐᑦ ᐊᓪᓚᐃᑦ ᓇᖕᒥᓂᖅ ᕿᓂᖅᑎᑦᑎᑲᑕᓕᕆᓪᓗᑎᒃ ᐊᓯᖏᓐᓂᒃ ᐃᓗᕕᐅᓇᔭᖅᑐᓂᒃ.

ᐅᓇ ᑲᑎᖃᑎᒌᖕᓂᖅ ᐆᒧᖓ ᓱᕈᓯᓕᒫᑦ ᐱᒻᒪᕆᐅᓂᖏᓐᓄᑦ ᐃᓱᒪᒋᔭᖃᕐᓂᖅᒥᒃ ᑲᑎᖃᑎᒌᖕᓂᖅ ᐱᒋᐊᓕᓚᐅᖅᓯᒪᔪᖅ 1-ᒥᑦ ᐅᓪᓗᒃᑯᑦ ᐊᒻᒪᓗ ᐃᓄᐃᑦ ᑎᑎᕋᖅᓯᒪᔪᓂᒃ ᑎᒍᒥᐊᖅᑳᑎᒋᓪᓗᑎᒃ ᐃᒪᐃᓕᖓᐅᖅᑐᓂᒃ “ᑲᓇᑕᐅᑉ ᐅᓪᓗᖓ’ X-ᓕᖅᑕᐅᓯᒪᓪᓗᓂ, ᐊᒻᒪ “ᐃᖃᖅᑐᖅᑕᐅᓕ” ᐊᒻᒪ “ᑕᒪᐃᓐᓂ ᓱᕈᓰᑦ ᐱᒻᒪᕆᐅᔪᑦ.”

ᒥᐊᓕ-ᓖ ᐊᓕᔭᒃ, ᐋᖅᑭᒃᓱᐃᓚᐅᖅᑐᖅ ᖃᓄᐃᓕᐅᖅᓇᒥᒃ, ᑲᑎᑎᑦᑎᕈᓘᔭᓚᐅᕐᑐᖅ ᐊᒻᒪᓗ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᓂᒃ ᐅᖃᓪᓚᒃᑎᑦᑎᑲᑕᒃᖢᓂ ᖃᓄᐃᓕᐅᖅᑕᐅᕙᓚᐅᕐᓂᖏᓐᓂᒃ.

ᐊᓕᔭᒃ “ᑳᒻᓘᑉᔅ,”-ᓚᖕᒪᑦ ᑐᓴᖅᓴᐅᔾᔪᑎᑎᒍᑦ ᑖᒃᑯᐊ ᐃᓄᒋᐊᑦ ᑐᖅᖢᓚᓚᐅᕐᒥᔪᑦ ᐊᑕᐅᑦᑎᒃᑯᑦ, “2-1-5.”

ᐊᒻᒪᓗ 6-ᓂ ᓄᓇᓂ ᓇᓂᓯᕝᕕᐅᒃᑲᓐᓂᖅᑐᓂᒃ ᐅᖃᕌᖓᑦ, ᐊᒻᒪᓗ ᑖᒃᑯᐊ ᑲᑎᖢᑎᒃ 1,290-ᓂ ᓱᕈᓯᕐᓂ ᓇᓂᓯᕝᕕᐅᓪᓗᑎ ᐃᓕᓐᓂᐊᕆᐊᖅᕕᕕᓂᕐᓂ, ᑖᒃᑯᐊ ᐃᓄᐃᑦ ᑭᐅᖃᑦᑕᓚᐅᖅᑐᑦ ᐃᒪᓐᓇ.

“1-8-2.”
“1-0-4.”
“38.”
“7-5-1.”
“3-5.”
“1-8-0.”

ᓱᓕ ᐅᓄᒃᑲᓐᓂᖅᑐᐃᑦ, ᐅᖃᕆᓪᓗᓂ.

ᐅᐸᒍᑎᔪᑦ, ᑕᒪᐃᓐᓂᐸᓗᒡᓗ ᐊᑐᖅᖢᑎᒃ ᐊᐅᐸᔮᖅᑐᒥ (orange) ᐊᒻᒪᓗ ᑮᓇᑉᐸᒃᓯᒪᓪᓗᑎᒃ, ᑐᓵᑲᑕᓚᐅᖅᑐᑦ ᐃᓕᓐᓂᐊᕆᐊᖅᑎᑕᐅᓂᑯᓂᒃ ᐅᖃᓪᓚᑲᑕᒃᑎᓪᓗᒋᑦ ᐃᓄᖕᓄᑦ ᐅᖃᐅᓯᖃᖅᖢᑎᒃ ᒫᓐᓇᒧᑦ ᐃᓕᓐᓂᐊᖅᕕᓕᕆᓂᖅᒧᑦ ᖃᓄᐃᑕᐅᓂᑯᕕᓂᖏᓐᓄᑦ ᓱᓕ ᓈᒻᒪᙱᓕᐅᕈᑕᖃᖃᑦᑕᕐᓂᖏᓐᓂᒃ

“ᓴᐅᒥᐅᓚᐅᖅᓯᒪᒐᓗᐊᖅᑐᖓ,” ᐊᓕᔭᒃ ᐅᖃᖅᑐᖅ. “ᐊᒡᒐᒐ ᓴᐅᒥᐅᓂᖅᓴᖅ ᐋᓐᓂᖅᓱᖅᑕᐅᕙᓚᐅᖅᓯᒪᔪᖅ ᑭᓯᐊᓂ ᑕᓕᖅᐱᕋ ᐊᑯᖃᑦᑕᖔᓕᕋᒃᑯ.”

ᐊᓕᔭᒃ ᐃᕐᓂᕐᒥᓂ ᐊᒻᒪ ᐃᕐᖑᑕᖓᓂ ᐱᖃᑎᖃᓚᐅᖅᑐᖅ ᐊᒻᒪ ᐅᖃᐅᓯᖃᖅᖢᓂ ᑭᖑᕚᕇᖕᓂᒃᑯᑦ ᓈᒻᒪᙱᓕᐅᕈᑎᒻᒪᕆᐅᓯᒪᔪᓂᒃ.

“ᐃᓄᑦᑎᐊᕙᐅᓇᓱᒃᑲᓗᐊᖅᖢᑕ, ᐃᓛᓐᓂ ᓂᙵᐅᒪᓂᐊᓗᖃᔭᒃᑲᑦᑕ, ᐃᓛᓐᓂᓪᓘᓐᓃᑦ ᐊᒃᑐᖅᓯᑲᑕᓕᖅᐸᒃᖢᑕ. ᐊᒃᑐᖅᑕᐅᓯᒪᔪᑦ. ᓄᓇᕗᑦ ᐊᒃᑐᖅᑕᐅᓯᒪᔪᑦ.

“ᒐᕙᒪᒃᑯᑦ ᐅᕙᑦᑎᓐᓂ ᐊᖅᓵᖅᓯᓯᒪᒻᒪᕆᖕᒪᑕ ᐅᓄᕐᓂᖅᓴᓂᒃ, ᑭᓯᐊᓂᓕ ᓱᕈᓰᑦ ᒥᒃᓵᓅᖓᔪᓄᑦ ᑕᐃᒪᓕ ᑕᒪᓐᓇ ᓄᖅᑲᖅᑎᓐᓂᐊᕋᑦᑎᒍᑦ ᐊᒻᒪᓗ ᐃᖃᖅᑐᖅᑕᐅᖁᔨᓪᓗᑕ,” ᐅᖃᖅᑐᖅ.

ᑲᑎᖃᑎᒌᖕᓂ ᐱᐊᓂᓚᐅᕐᑐᖅ 2:30-ᒥᑦ ᑖᒃᑯᐊ ᐃᓄᐃᑦ ᕿᓚᐅᔾᔭᑲᑕᒃᖢᑎᒃ ᐊᒻᒪᓗ ᐃᓄᐃᑦ ᓇᑉᐸᖅᑕᓂᒃ ᐃᓕᓯᑲᑕᒃᖢᑎᒃ ᐊᒻᒪ ᐃᓯᒐᐅᔭᓂ ᐅᔭᖅᑲᓄᑦ ᒪᓕᒐᓕᕆᕕᒡᔪᐊᑉ ᓵᑦᑎᐊᖓᓄᑦ.

ᑕᐃᒪᐃᑎᓪᓗᒋᓪᓕ, ᐅᖃᓯᐊᕐᔪᒃᑐᒥᓐ, ᐃᓄᐃᑦ ᑲᑎᓚᐅᕐᒥᔪᖅ ᑐᑭᓯᒋᐊᖅᕕᐅᑉ ᒥᒃᓵᓂ ᐅᕙᓂ ᐃᖃᓗᐃᑦ ᓯᑯᐃᐊᒥ ᐊᒻᒪᓗ ᐃᓐᓇᑐᖃᑦ ᖃᕐᒪᖓᑕ ᐅᖓᑎᑦᑎᐊᖓᓂᒃ, ᐋᖅᑭᒃᑕᐅᓯᒪᖃᑕᐅᓪᓗᓂ ᖃᓄᐃᓕᐅᕈᑎᐅᓂᐊᖅᑐᓂᒃ ᓄᓇᓕᐸᐅᔭᓂᒃ ᑕᕝᕙᓂ ᐅᓪᓗᕐᒥᓐ.

ᐊᔾᔨᐸᓗᒋᓪᓗᓂᐅᒃ ᑲᓇᑕᒥ ᓄᓇᖃᖅᑳᖅᑐᑦ ᐅᓪᓗᖓᓂᒃ, ᐅᐸᒐᒃᓴᖅᑕᖃᐅᓚᐅᖅᑐᖅ ᓂᕆᔭᒃᓴᖃᖅᑐᓂᒃ ᐊᒻᒪᓗ ᐃᒥᒐᒃᓴᓂᒃ ᑲᒪᒋᔭᖃᖅᑐᓂᒃ ᐊᒻᒪᓗ ᐅᓇ ᐊᕐᓇᐃᑦᑐᖅ ᐊᓐᓂᑭᑦᑐᖅᕕᒃ, ᐅᑭᐅᕐᑕᖅᑐᕐᒥ ᐱᙳᐊᕕᒡᔪᐊᕐᓇᒧᑦ ᐊᓐᓂᑭᑦᑐᖅᕕᒃ ᐊᒻᒪ ᐳᐃᔾᔪᕋᖅᕕᒃ ᐊᑭᖃᙱᑦᑐᒥᑦ ᐊᓐᓂᑭᑦᑐᕐᓇᓚᐅᖅᑐᑦ ᐊᒻᒪ ᐃᒪᕐᓯᑲᑕᖕᓂᖅᖢᑎᒃ ᐊᒻᒪ ᐱᐅᔾᔪᕋᑲᑕᒃᖢᑎᒃ.

ᒪᐃᔭ ᑭᐊᓂ ᐱᐊᓪ ᑐᓴᒐᒃᓴᓕᐅᓚᐅᕐᒥᔪᖅ ᑕᕝᕙᓂ ᐅᓪᓗᒥᒃ ᐅᖃᐅᔾᔨᓪᓗᓂ ᐃᖃᓗᒻᒥᐅᓂᒃ ᓄᓇᖃᖅᑳᖅᑐᓂᒃ ᐃᑲᔪᖅᑐᐃᖁᔨᓪᓗᓂ ᑲᓇᑕᒥᐅᑕᓂᒃ.

“ᒫᓐᓇ ᖁᕕᐊᓱᖕᓂᐅᓐᓇᙱᒻᒪᑦ,” ᐅᖃᖅᑐᖅ. “ᓯᕗᒧᑦ ᐱᓕᕆᖃᑎᒌᒡᓗᑕ ᓴᖅᑭᓂᖅᓴᒥᒃ ᓄᓇᖃᕋᓴᓚᐅᕐᑕ ᐅᑯᐊ ᓄᓇᖃᖅᑳᖅᑐᑦ ᓯᕗᓪᓕᐅᑎᑕᐅᓯᒪᓗᑎᒃ,” ᐱᐊᓪ ᐅᖃᖅᑐᖅ.