ᓴᓪᓗᐃᑦ ᖃᑦᑎᕆᔨᒃᑯᑦ ᐃᒡᓗᖁᑎᖓ ᓄᑖᙳᕆᐊᖅᑕᐅᕙᓪᓕᐊᓂᖓ ᐱᐊᓂᒃᑕᐅᕙᓪᓕᐊᓯᔪᖅ

ᓄᑖᙳᕆᐊᖅᑕᐅᕙᓪᓕᐊᓂᖓ ᖃᑦᑎᕆᔨᒃᑯᑦ ᐃᒡᓗᖁᑎᖓ ᐱᐊᓂᒃᑕᐅᓂᐊᕋᓱᒋᔭᐅᔪᑦ ᐱᓇᓱᐊᕈᓯᕐᓂ ᐊᒡᒋᖅᑐᓂᒃ, ᑲᑎᕕᒃ ᓄᓇᓕᓕᒫᓄᑦ ᒐᕙᓚᒃᑯᑦ ᑲᑎᒪᔨᖏ ᑕᐃᒪᓐᓇ ᑐᓴᖅᑎᑕᐅᓚᐅᕐᑐᑦ.

ᒍᕆᒡ ᓕᓐᒑᑦ, ᓴᐳᓐᓂᐊᖅᑎᓄᑦ ᑐᑭᒧᐊᖅᑎᑦᑎᔨ ᐅᑯᓄᖓ ᑲᑎᕕᒃ ᓄᓇᓕᓕᒫᑦ ᒐᕙᒪᖓᓄᑦ, ᐅᖃᐅᓯᖃᓚᐅᕐᑐᖅ ᖃᓄᐃᑉᐸᓪᓕᐊᓂᖏᓐᓂᒃ ᓄᑖᙳᕆᐊᖅᑎᑦᑎᔪᑦ ᐅᕝᕙᓘᓐᓃᑦ ᖃᓄᐃᓕᐅᕐᑕᐅᔪᒪᔪᓂ ᐃᖅᑲᖅᑐᐃᕕᒃᑯᑦ ᐱᔨᑦᑎᕋᐅᑎᖏᒍᑦ ᓄᓇᕕᒃᒥ ᓄᕕᐱᕆ 24-ᖑᑎᓪᓗᒍ ᑲᑎᒪᔩᑦ ᑲᑎᒪᑎᓪᓗᒋᑦ.

7 ᓄᓇᕕᒃᒥ ᓄᓇᓖᑦ ᑰᔾᔪᐊᖅ, ᑕᓯᐅᔭᖅ, ᐊᐅᐸᓗᒃ, ᑲᖏᕐᓱᒃ, ᑲᖏᖅᓱᔾᔪᐊᖅ, ᖁᐊᕐᑕᖅ ᐊᒻᒪ ᐊᑯᓕᕕᒃ  ᓄᑖᓂ ᖃᑎᕆᔾᔪᑎᑖᓚᐅᕐᑐᑦ ᓄᓇᓯᐅᑎᓂ ᐅᒥᐊᕐᔪᐊᒃᑯᑦ. ᓴᓪᓗᐃᑦ ᓄᓇᓯᐅᑎᖏᑦ ᒫᓐᓇᒨᓕᖓᓂᖏᓐᓄᑦ ᒪᓕᒐᖅᑎᒍᑦ ᐱᑖᕆᐊᖃᙱᖢᑎᒃ, ᓕᓐᒑᑦ ᐊᐱᕐᓱᖅᑕᐅᑎᓪᓗᒍ ᐅᖃᓚᐅᕐᑐᖅ ᓄᕕᐱᕆ 26-ᒥ.

ᐊᓯᖏᑦ ᓄᓇᓖᑦ ᓄᑖᓂ ᖃᑦᑎᕈᑎᑖᙱᑦᑐᑦ ᖃᑦᑎᕆᕝᕕᖃᕆᐊᖃᕐᓂᖏᓐᓄᑦ ᓈᒻᒪᓕᕐᑎᕐᓯᒪᔪᓂᒃ ᑕᐃᒪᐃᑦᑐᓄᑦ. ᐃᕗᔨᕕᒃ ᐊᒻᒪ ᐅᒥᐊᔭᖅ ᐃᓱᒪᒋᔭᐅᓛᖑᔪᑦ ᒫᓐᓇ, ᓕᓐᒑᑦ ᑲᑎᒪᔨᓄᑦ ᐅᖃᓚᐅᕐᑐᖅ.

ᑐᒃᓯᕋᐅᑎᓂ ᐃᑲᔫᑎᒃᓴᒃᑲᓐᓂᕐᓄᑦ ᓂᐅᕕᕈᒪᓂᕐᒧᑦ ᖃᑦᑎᕈᑎᒃᓴᓂ ᓄᓇᓯᐅᑎᓂ ᐊᒻᒪ ᖃᑦᑎᕆᕝᕕᖕᓂ ᓄᑖᙳᕆᐊᖅᑎᑦᑎᔾᔪᑎᒃᓴᓂ ᐊᐅᓪᓚᖅᑎᑦᑎᓚᐅᕐᑐᑦ ᑯᐸᐃᒃᒥ ᓴᐳᓐᓂᐊᕐᓂᕐᒧᑦ ᑭᒃᑯᓕᒫᓂ ᒥᓂᔅᑕᖓᓄᑦ.

“ᐱᖃᕐᒪᑕ ᒥᑭᑦᑐᓂ, ᓱᒃᑲᔪᓂ ᑐᐊᕕᕐᓇᖅᑐᓕᕆᓂᕐᒧᑦ ᓄᓇᓯᐅᑎᓂ ᐱᑖᕆᔭᐅᓂᑯᓂ ᒫᓂ 1990-ᒥ, ᑭᓯᐊᓂᓕ ᐱᑖᕆᐊᖃᕐᒪᑕ ᐊᖏᓂᕐᓴᓂᒃ ᐊᒻᒪ ᓈᒻᒪᖕᓂᕐᓴᐅᔪᓂ ᓄᓇᓯᐅᑎᓂᒃ,” ᓕᓐᒑᑦ ᐅᖃᕐᑐᖅ ᐊᐱᕐᓱᖅᑕᐅᓪᓗᓂ.

ᓄᑖᙳᕆᐊᖅᑎᑦᑎᐊᓂᓚᐅᕐᑐᑦ ᐊᕐᕌᓂ ᐅᑯᓇᓂ ᖃᑦᑎᕆᔨᒃᑯᑦ ᐃᒡᓗᖏᓐᓂ ᐳᕕᕐᓂᕐᑐᖅ, ᐃᓄᒃᔪᐊᒃ, ᐊᐅᐸᓗᒃ, ᐊᑯᓕᕕᒃ, ᑲᖏᕐᓱᒃ, ᑕᓯᐅᔭᖅ, ᖁᐊᕐᑕᖅ ᐊᒻᒪ ᑲᖏᖅᓱᒡᔪᐊᖅᒥ.

ᑰᔾᔪᐊᒃᑯᑦ ᖃᑦᑎᕆᕝᕕᖓ ᓱᓕ ᓄᑖᙳᕆᐊᖅᑕᐅᔭᕆᐊᖃᕐᑐᖅ.

ᓄᓇᓖᑦ ᐊᑐᕐᑐᐊᕐᒪᑕ ᐃᒡᓗᕐᔪᐊᕐᒥ ᐱᖁᑎᒋᔭᐅᔪᒥ ᐃᖏᕐᕋᔾᔪᑎᓕᕆᔨᒃᑯᓐᓂ ᑲᓇᑕᒥ, ᐊᕐᕌᒍᐸᓘᓕᕐᑐᓂ 26-ᓂ ᖃᑦᑎᕆᔨᒃᑯᑦ ᐃᒡᓗᒋᓪᓗᓂᐅ ᐊᒻᒪ ᐊᓯᖏᓐᓄᑦ ᓄᓇᓖᑦ ᓄᓇᓯᐅᑎᖏᓐᓄᑦ.

ᑭᓯᐊᓂᓕ ᐃᒡᓗᕐᔪᐊᖅ ᐅᓗᕆᐊᓇᖅᑐᒦᒋᔭᐅᓕᕐᒪᑦ, ᓕᓐᒑᑦ ᐅᖃᓚᐅᕐᑐᖅ ᑲᑎᒪᔨᓄᑦ.

“ᖁᐊᕐᓵᕐᓇᖅᑐᒦᖃᑦᑕᕐᓯᒪᒐᑦᑕ ᐊᒻᒪ ᐱᐅᔪᓐᓃᕈᑎᓄᑦ ᐊᒻᒪᓗ ᐱᑕᖃᕐᓂᖓᓄᑦ ᑳᓐᓱᑖᕈᑎᐅᔪᓐᓇᖅᑐᓂᒃ,” ᐅᖃᕐᑐᖅ.

“ᐃᒡᓗᕐᔪᐊᖅ ᐃᓄᖃᕈᓐᓃᖅᑎᑕᐅᓯᒪᔪᖅ, ᒪᓂᕋᖓ ᓱᕋᒃᑎᖅᑕᐅᓚᐅᖅᖢᓂ ᐋᖅᑭᒋᐊᖅᑕᐅᓯᒪᓪᓗᓂ ᐊᒻᒪᓗ ᐱᓕᕆᐊᖑᓯᒪᕈᓘᔭᖅᖢᓂ ᐅᓗᕆᐊᓇᕈᓐᓃᖅᑎᑕᐅᓇᓱᒃᖢᓂ.”

ᐊᕐᕌᒎᕋᑖᕐᑐᒥ, ᓄᓇᓖᑦ ᐊᒻᒪ ᓄᓇᓂ ᑲᒪᔨᐅᔪᑦ ᑯᐊᐳᕇᓴᓐᑯᑦ ᐊᖏᖃᑎᒌᓕᕈᓐᓇᓚᐅᙱᒻᒪᑕ ᖃᓄᐃᓕᐅᕈᑎᖃᕐᓂᐊᕐᒪᖔᑕ ᐃᒡᓗᕐᔪᐊᕐᒥ, ᑕᐃᒪᓐᓇᓗ ᑕᒪᓐᓇ ᑭᖑᕙᕆᐊᕈᑎᐅᓯᒪᒃᑲᓐᓂᖅᖢᓂ.

ᓕᓐᒑᑦ ᐅᖃᓚᐅᕐᑐᖅ ᑲᑎᒪᔨᓄᑦ ᐅᑯᓇ ᓄᓇᓂ ᑲᒪᔨᐅᔪᑦ ᑯᐊᐳᕇᓴᓐᑯᑦ ᑲᑎᒪᖃᑎᖃᓚᐅᕐᓯᒪᓂᕋᖅᖢᓂᒋᑦ ᑲᑎᕕᒃ ᓄᓇᓕᓕᒪᑦ ᑲᑎᒪᔨᓂ ᐅᒃᑑᐱᕆᐅᑎᓪᓗᒍ.

ᑲᑎᒪᒃᑲᓐᓂᓛᕈᒪᔪᑦ ᓄᓇᓖᑦ, ᓄᓇᓂ ᑲᒪᔨᐅᔪᑦ ᑯᐊᐳᕇᓴᓐᑯᑦ, ᑲᑎᕕᒃ ᓄᓇᓕᓕᒫᑦ ᑲᑎᒪᔨᖏᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᐊᕐᕌᒎᓂᐊᕐᑐᒥ ᓄᑖᖅ ᐱᒋᐊᕐᓯᒪᓕᕐᐸ ᖃᓄᐃᑕᐅᓂᐊᕐᓂᖓᓂ ᐃᒡᓗᕐᔪᐊᖅ.

“ᒫᓐᓇᐅᔪᕐᓕ ᑲᔪᓯᑐᐃᓐᓇᕐᓂᐊᕐᑐᒍᑦ ᐋᔩᖃᑎᒌᖕᓂᕐᒥ ᑭᒃᑯᓕᒫᓄᑦ ᓴᐳᓐᓂᐊᖅᑎ ᒥᓂᔅᑕᐅᑉ ᐱᓕᕆᕝᕕᐊᓂ ᐃᑲᔫᑎᒃᓴᖅᑖᒃᑲᓐᓂᕋᓱᒡᓗᑕ ᓄᑖᒥ ᐃᒡᓗᕐᔪᐊᖅᑖᕋᓲᑎᒃᓴᓂ ᐅᕝᕙᓘᓐᓃᑦ ᓄᑖᙳᕆᐊᖅᑕᐅᔾᔪᑎᒃᓴᓂᒃ,” ᓕᓐᒑᑦ ᐅᖃᕐᑐᖅ.