ᐃᖃᓗᖕᓂ ᒐᕙᒪᑐᖃᒃᑯᑦ ᐊᖅᑯᑎᖓ ᐊᓯᐊᓂ ᐊᑦᑎᖅᑕᐅᔪᖅ ᓯᕗᒧᒋᐊᖅ ᐊᖅᑯᑎ

ᐃᖃᓗᖕᓂ ᓄᓇᓕᐸᐅᔭᒥ ᑲᑎᒪᔨᐅᔪᑦ ᐊᓯᔾᔩᕗᑦ ᐊᑎᖓᓂ ᒐᕙᒪᑐᖃᒃᑯᑦ ᐊᖅᑯᑎᖓᓂ ᓯᕗᒧᒋᐊᖅ ᐊᖅᑯᑎᒧᑦ, to ᐃᖅᑲᐅᒪᓂᕐᒥ ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᓱᓕ ᐆᒪᓯᒪᔪᓄᑦ.

ᓯᕗᒧᒋᐊᖅ ᑐᑭᖃᖅᐳᖅ “ᓯᕗᒻᒧᑦ ᐃᖏᕐᕋᓂᕐᒥ” ᐃᓄᒃᑎᑐᑦ.

ᑲᑎᒪᔨ ᐹᓪ ᖁᐊᓴ ᑐᓂᓯᓚᐅᖅᐳᖅ ᐱᖁᔨᕗᖔᓕᐅᕈᑎᒥᒃ ᐊᓯᔾᔨᖅᓯᖁᔨᓂᕐᒥ ᔫᓂ 28−ᒥ ᑭᐅᓂᕐᒧᑦ ᑎᑎᖅᑲᒥ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓᓂ ᐊᓗᑭ ᑰᑦᑎᕐᒥ ᑎᑎᕋᓚᐅᖅᑕᖓᓂ ᒪᐃᔭ ᑲᓂ ᐱᐅᓪᒧᑦ ᒪᐃᒥ.

ᐃᓗᐊᓂ, ᑐᒃᓯᕋᓚᐅᖅᐳᖅ ᐃᓱᒪᓂᐅᔪᒥ ᐊᓯᔾᔩᓂᖓᓂ ᐊᑎᖓᓂ ᐊᖅᑯᒻᒥ ᓄᓇᓕᐸᐅᔭᒥ ᐅᐱᒍᓱᖕᓂᕐᒥ ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᓱᓕ ᐆᒪᓯᒪᔪᓄᑦ.

ᑰᑦᑎᖅ ᑎᑎᕋᓚᐅᖅᐳᖅ ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᐊᒃᑐᐃᓯᒪᓂᖏᓐᓂ ᐃᓄᖕᓂ ᐊᕐᕌᒍᒐᓵᓗᖕᓄᑦ, ᐊᒻᒪ ᓈᒻᒪᒃᑲᔭᖅᐳᖅ ᑕᐃᔅᓱᒥᖓ ᐊᑐᖅᑕᐅᓂᑯᓂ ᓇᓗᓇᐃᖅᑕᐅᓂᖓᓂ ᓯᕗᓂᐊᓂ ᐃᒃᓯᕋᕐᔪᐊᕌᐱᑦ ᕗᕌᓐᓯᔅ ᐳᓚᕋᕐᓂᖓᓂ.

ᐃᒃᓯᕋᕐᔪᐊᕌᐱᑦ ᑎᑭᑦᑐᒃᓴᐅᑕᐅᕗᖅ ᐃᖃᓗᖕᓄᑦ ᔪᓚᐃ 29−ᒥ, ᐃᓚᒋᔭᐅᓗᓂ ᐅᓪᓗᓂ-ᑎᓴᒪᓂ ᐊᐅᔾᓛᕐᓂᐅᔪᒥ ᐃᓚᖃᖅᑐᒥ ᐃᐊᑦᒪᓐᑕᓐ ᐊᒻᒪ ᑯᐸᐃᒃ ᓄᓇᓕᐸᐅᔭᖓᓐᓄᑦ.

ᑰᑦᑎᖅ ᐅᖃᓚᐅᖅᐳᖅ ᒐᕙᒪᑐᖃᒃᑯᑦ ᐊᖅᑯᑎᖓ ᓂᕈᐊᒐᒃᓴᑦᑎᐊᕙᐅᓇᔭᖅᐳᖅ ᐊᑦᓯᐊᓂ ᐊᑦᑎᖅᑕᐅᓂᖓᓂ, ᐊᖅᑯᑎᐅᖕᒪᑦ ᑐᕌᓚᐅᖅᑐᒥ ᐅᑭᕕᒃ ᑐᔪᕐᒥᕕᖓᓂ, ᐃᓄᐃᑦ ᐃᓕᓐᓂᐊᖅᑏᑦ ᐃᓕᓐᓂᐊᕆᐊᖅᑎᓪᓗᒋᑦ ᒍᐊᑕᓐ ᕌᐳᑦᓴᓐ ᐃᓕᓐᓂᐊᕐᕕᖓᓂ ᐃᖃᓗᖕᓂ ᑐᔪᕐᒥᕕᒋᓚᐅᖅᑕᖓᓂ.

ᑎᑎᕋᓚᐅᕆᕗᖅ ᐅᒃᐱᕈᓱᖕᓂᖓᓂ ᐃᓄᒃᑐᑦ ᐊᑎᖓᓂ ᑕᑯᒃᓴᐅᑎᑦᑎᓇᔭᕐᓂᖓᓂ ᐱᒻᒪᕆᐅᓂᖓᓂ ᐊᒻᒪ ᑲᑉᐱᐊᑦᑕᐃᑦᑑᓂᖓᓂ ᐃᓄᐃᑦ ᑕᑯᒃᓴᐅᑎᑦᑎᓯᒪᓂᖏᓐᓂ “ᓴᐳᔾᔨᓯᒪᓂᕐᒥ ᐅᖃᐅᓯᑦᑎᓐᓂ ᐊᒻᒪ ᐃᓕᖅᑯᓯᑦᑎᓐᓂ, ᐃᓱᒪᒋᓇᒍ ᖄᖏᒐᒃᓴᐅᖅᑰᔨᙱᑦᑐᓂ ᐊᒡᕕᐊᕈᑕᐅᔪᓂ ᐊᒻᒪ ᓂᐱᖃᙱᑎᑕᐅᓇᓱᐊᕐᓂᖏᓐᓂ.”

ᑰᑦᑎᖅ ᐊᑐᐃᓐᓇᖃᖅᑎᑦᑎᓚᐅᕆᕗᖅ ᑕᐃᔅᓱᒥᖓᑦᑕᐃᓐᓇᖅ ᖃᐃᖁᒡᓂᐅᔪᒥ ᐊᓯᖏᓐᓄᑦ ᓄᓇᕗᒻᒥ ᓄᓇᓕᐅᔪᓄᑦᑕᐅᖅ.

ᑲᑎᒪᔨᑦ, ᐋᖅᑭᒃᓱᖅᓯᒪᔪᒥ ᒪᐃᔭ ᑲᓂ ᐱᐅᓪᒥ, ᖃᕋᓴᐅᔭᑎᒍᑦ ᑲᑎᒪᖃᑕᐅᓪᓗᓂ, ᐊᒻᒪ ᑲᑎᒪᔩᑦ ᐹᓪ ᖁᐊᓴ, ᑲᐃᔪᓪ ᓴᐳᑦ ᐊᒻᒪ ᕉᒪᐃᓐ ᓯᑏᕙᓐᓴᓐ, ᓂᕈᐊᓚᐅᖅᐳᑦ ᐅᓄᕐᓂᖅᓴᐃᑦ ᐊᖏᖃᑎᒌᒃᖢᑎᒃ ᐱᐅᖅᓴᕐᓂᖓᓂ ᐊᓯᔾᔨᕐᓂᐅᔪᒥ.

ᖁᓕᓂ ᐊᖅᑯᒻᒥ ᓇᓗᓇᐃᒃᑯᑕᐅᔪᓂ ᓴᓇᓂᐊᖅᐳᑦ, ᐅᖃᐅᓯᐅᓪᓗᓂ ᐃᖃᓗᖕᓂ ᐊᐅᓚᑦᑎᔨᒻᒪᕆᖓ ᐊᐃᒥ ᐃᐅᓪᒍᔅᒪ.

ᓇᓗᓇᐃᒃᑯᑕᑦ ᐊᐅᐸᔮᖓᔫᓂᐊᖅᐳᑦ, ᓇᓗᓇᐃᖅᓯᓂᕐᒥ ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᓱᓕ ᐆᒪᓯᒪᔪᓄᑦ. ᑖᓐᓇ ᐃᓚᒋᐊᕈᑕᐅᔪᖅ ᐅᖃᐅᓯᐅᓚᐅᖅᐳᖅ ᐱᐅᓪᒧᑦᒪ ᐅᖃᓚᐅᖅᑐᒥ ᐃᖃᓗᐃᑦ−ᓯᓈ ᒪᓕᒐᓕᐅᖅᑎᖓ ᔮᓂᑦ ᐱᑦᓯᐅᓛᖅ ᐳᕉᔅᑐᕐ ᑐᓂᓯᓚᐅᕐᓂᖓᓂ ᐃᓱᒪᓂᐅᔪᒥ.

ᐊᓯᖏᑦ ᐱᖓᓱᑦ ᓂᕈᐊᒐᒃᓴᐅᔪᑦ ᐊᖅᑯᑎᒧᑦ ᐊᑎᒃᓴᐅᔪᓂ ᐃᓚᖃᓚᐅᖅᐳᖅ ᐃᓕᓐᓂᐊᕆᐊᖅᐸᓚᐅᖅᑐᑦ, ᑐᑭᖃᖅᑐᒥ “ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᓱᓕ ᐆᒪᓯᒪᔪᓄᑦ,” ᒪᑭᓪᓗᑕ, ᑐᑭᖃᖅᑐᒥ “ᓇᖏᓚᐅᖅᑕ,” ᐊᒻᒪ ᒪᒥᐊᓇᖅ ᑐᑭᖃᖅᑐᒥ “ᒪᒥᐊᓇᖅ.”

ᓴᐳᑦ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᓄᓇᓕᐸᐅᔭᖅ ᓂᕆᐅᖕᓂᖃᖅᐳᑦ ᓇᓗᓇᐃᒃᑯᑕᐅᔪᓂ ᐃᓇᖏᖅᑕᐅᔪᓐᓇᑐᐃᓐᓇᕆᐊᖃᕐᓂᖏᓐᓂ ᓯᕗᓂᐊᓂ ᐃᒃᓯᕋᕐᔪᐊᕌᐱᐅᑉ ᐳᓚᕋᕐᓂᖓᓂ.

ᓄᓇᓕᐸᐅᔭᖅ ᐱᓕᕆᑦᑎᐊᖅᓯᒪᑎᓪᓗᒋᑦ ᐱᓂᕐᒥ ᓱᓇᒃᑯᑖᓂ ᐱᔭᕆᐊᖃᕐᓂᖏᓐᓂ ᑕᐃᔅᓱᒪᓂᒃᑲᓐᓂᖅ, ᐱᔪᓐᓇᕐᓂᕐᒥ ᑕᐃᒪᐃᑦᑕᕆᐊᒃᓴᖅ ᒫᓐᓇᐅᔪᒥ ᓄᓇᕐᔪᐊᒥ ᑐᓂᓯᔨᐅᔪᓄᑦ ᐊᑲᐅᙱᓕᐅᕈᑕᐅᔪᓄᑦ ᓱᓕ ᐅᑕᖅᑭᔭᕆᐊᖃᕐᓇᖅᐳᖅ ᑕᑯᔭᐅᓂᖓᓂ, ᐃᓚᒋᐊᖅᓯᓚᐅᖅᐳᖅ.