ᐱᓇᓱᐊᕈᓯᑦ 8 ᐊᓂᒍᖅᑎᓪᓗᒋᑦ: ᓯᑏᕝ ᒪᑉᓴᓛᖅ ᐃᖅᑲᐅᒪᕗᖅ ᐱᑦᑎᐊᙱᑦᑎᒋᓚᐅᕐᓯᒪᔭᖓᓂᒃ

ᑕᕆᐅᕐᒥ ᐃᑳᕐᓯᐊᓪᓚᓚᐅᖅᖢᓂ ᐃᒃᓯᕋᕐᔪᐊᕐᒥ ᑕᑯᔭᖅᑐᖅᖢᓂ ᐱᑦᑎᐊᙱᑦᑎᒋᓚᐅᕐᓯᒪᔭᖓᓂᒃ, ᓯᑏᕝ ᒪᑉᓴᓛᖅ ᑐᓴᒐᒃᓴᖃᖅᑐᖅ ᐊᓯᖏᓐᓄᑦ ᐃᓄᖕᓄᑦ ᑕᐃᒪᓐᓇᑦᑕᐃᓐᓇᖅ ᐊᑐᕐᓯᒪᔪᕕᓂᕐᓂᖅ: ᐅᖃᕐᐸᒡᓗᓯ.

“ᖃᐅᔨᒪᓪᓗᓂ ᐱᑦᑎᐊᖅᑕᐅᕙᙱᑦᑐᕕᓂᕐᓂᒃ ᓂᓪᓕᐅᑎᖃᓚᐅᕐᓯᒪᙱᑦᑐᓂᒃ — ᑕᐃᒪᑐᖅ ᐅᖃᕈᓐᓇᕐᓯᓚᐅᕐᓕᑦ … ᑲᙳᓱᙱᓪᓗᑎᒃ ᑐᓴᖅᑎᑦᑎᓂᕐᒥᒃ ᐊᒻᒪ ᐅᖃᐅᓯᖃᕈᓐᓇᕐᓗᑎᒃ ᖃᓄᐃᑕᐅᓂᕕᓂᕐᒥᓂᒃ,” ᐅᖃᕐᑐᖅ.

ᒪᑉᓴᓛᖅ ᕗᕌᓐᔅᒧᙵᐅᓚᐅᕐᓯᒪᖕᒪᑦ ᓯᑎᐱᕆᒥ ᐃᓚᒋᔭᐅᓪᓗᓂ ᓄᓇᕗᑦ ᑐᙵᕕᒃᑯᑦ ᑕᐅᕗᙵᐅᑎᑕᖏᓐᓂᒃ ᐅᓇ ᐃᒃᓯᕋᕐᔪᐊᖅ ᔪᐊᓇᔅ ᕆᕗᐊ ᑕᒫᓂ ᐸᓯᔭᒃᓴᐅᔾᔪᑎᖏᓐᓂᒃ ᐱᓕᕆᐊᖑᓂᐊᕐᒪᓐ.

ᕆᕗᐊ ᐊᕐᕕᐊᓂ ᐊᒻᒪ ᓇᐅᔮᓂ ᐃᒃᓯᕋᕐᔪᐊᖑᓚᐅᕐᓯᒪᔪᖅ ᕉᒪᓐ ᑳᑐᓕᒃ ᑐᒃᓯᐊᕐᕕᖕᒧᑦ 1960-ᓗ 19992-ᓗ ᐊᑯᓐᓂᖓᓂᒃ. ᐸᓯᔭᒃᓴᙳᖅᑎᑕᐅᓚᐅᕐᓯᒪᖕᒪᑦ ᖁᓄᔪᕐᓂᐊᖃᑦᑕᕐᓂᖓᓂᒃ ᓱᕈᓯᕐᓂ ᑖᒃᑯᐊ ᐊᕐᕌᒍᐃᑦ ᐊᑯᓐᓂᖓᓂ. ᑲᓇᑕᒦᑦᑐᓐᓃᓚᐅᕐᓯᒪᔪᖅ 1993-ᒥ ᕗᕌᓐᔅᒥ ᓄᓇᖃᕆᐊᖅᑐᖅᖢᓂ.

ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᓯᒪᔪᖅ ᕆᕗᐊᒥ ᕕᕝᕗᐊᕆᐅᑎᓪᓗᒍ ᐊᕐᕌᒍᑦ ᑕᓪᓕᒪᑦ ᐊᓂᒍᖅᑎᓪᓗᒋ ᖁᓄᔪᕐᓂᐊᕐᓂᕐᒧᑦ 1998-ᒥᙶᖅᑐᓂᒃ ᓄᖅᑲᖅᑎᑕᐅᓚᐅᖅᑎᓪᓗᒋᑦ. ᒪᑉᓴᓛᖅ ᐸᓯᔭᒃᓴᐅᔾᔪᑎᖏᑦ, ᐃᓚᖃᖅᖢᓂ ᐱᖓᓱᓂ ᐊᓯᖏᓐᓂᒃ, ᑕᒪᑐᒥᖓ ᐸᓯᔭᒃᓴᐅᔾᔪᑎᖃᓕᓚᐅᕐᑐᖅ.

ᓇᐅᔮᓄᑦ ᐅᑎᕐᑎᓪᓗᒍ ᐊᖏᕐᕋᖓᓄᑦ ᓯᑎᐱᕆ 18-ᒥ, ᒪᑉᓴᓛᖅ ᐅᖃᓪᓚᓚᐅᕐᓯᒪᔪᖅ ᓈᓚᐅᑎᒃᑯᑦ, ᐃᓚᒥᓂ ᐳᓛᕐᓯᒪᓪᓗᓂ ᐊᒻᒪᓗ ᐃᓅᓯᓕᕆᔨᒥ ᐅᖃᖃᑎᖃᖅᖢᓂ.

“ᐊᒃᓱᐊᓗᒃ ᐃᓱᐊᖅᓯᕚᓪᓕᖅᑐᖓ — ᐃᓗᒃᑯᑦ ᖃᓱᑦᑎᐊᒻᒪᕆᒃᖢᖓ — ᐃᑲᔪᖅᑕᐅᓂᕐᒧᑦ, ᐊᒻᒪᓗ, ᐃᓅᓯᓕᕆᔭᐅᓂᕐᒧᑦ,” ᐅᖃᓚᐅᕐᑐᖅ ᐊᐱᕐᓱᖅᑕᐅᓪᓗᓂ.

“ᑭᓯᐊᓂᓕ ᐊᓂᒍᐊᓂᓚᐅᙱᑦᑐᖅ.”

ᔪᓚᐃᒥ, ᒐᕙᒪᑐᖃᒃᑯᑦ ᒪᓕᒐᓕᕆᔨᒃᑯᖏᑦ ᐅᖃᓚᐅᕐᓯᒪᔪᑦ ᕗᕌᓐᔅᒥ ᐊᐱᕆᓚᐅᕐᓯᒪᓂᖏᓐᓂᒃ ᕆᕗᐊ ᑲᓇᑕᒧᑦ ᐅᑎᖅᑎᑕᐅᖁᔭᐅᓪᓗᓂ ᐸᓯᔭᒃᓴᕆᔭᐅᔪᓄᑦ ᐱᓕᕆᐊᖑᓂᐊᕐᒪᓐ. ᐅᓇᓕ ᐊᖏᖅᑕᐅᓚᐅᕐᓯᒪᙱᑦᑐᖅ.

ᒪᑉᓴᓛᕐᒧᓪᓕ, ᕗᕌᓐᔅᒥᖔᖅᑎᓪᓗᒍ ᑐᙵᓱᓚᐅᕐᓯᒪᔪᖅ ᐊᖏᕐᕋᒥ. ᐅᖃᓚᐅᕐᑐᖅ ᑖᓐᓇ ᓄᑲᖓᓗ, ᑖᓐᓇᑦᑕᐅᖅ ᖁᓄᔪᕐᓂᐊᖅᑕᐅᖃᑦᑕᕐᓂᑯ ᕆᕗᐊᒧᑦ ᐅᖃᖃᑎᖃᕈᓐᓇᓚᐅᕐᒪᑎᑦ ᕆᕗᐊᒧᑦ ᑕᐅᑐᒃᖢᒍ.

ᕆᕗᐊ ᑕᒪᒃᑯᓂᖓ ᐸᓯᔭᒃᓴᐅᔾᔪᑎᓂ ᑕᐃᒪᐃᙱᓐᓂᕋᐃᓚᐅᕐᑐᖅ ᐅᖃᓚᐅᕐᑐᖅ ᒪᑉᓴᓛᖅ.

“ᑭᐅᔾᔪᑎᒋᓚᐅᕐᑕᖓ ᓈᒻᒪᙱᓗᐊᓚᐅᕐᑐᖅ ᐅᕙᓐᓄᑦ,” ᐅᖃᕐᑐᖅ. “ᑕᐃᒪᓕ ᑭᐅᑐᐊᕐᒪᓐ, ᐃᒡᓗᕈᓯᒦᑦᑐᓃᓚᐅᕋᒪ.”

ᕆᕗᐊ ᓗᐊᐃᔭᖓ, ᑎᐅᕆ ᑐᒨᓕᓐ, ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓚᐅᕐᑐᖅ ᕆᕗᐊ ᐸᓯᔭᒃᓴᐅᔾᔪᑎᐅᔪᑦ ᑖᔅᓱᒧᖓ ᑕᐃᒪᐃᙱᓐᓂᕋᐃᓪᓗᓂ.

“ᐅᑯᐊ ᐸᓯᔭᒃᓴᐅᔾᔪᑎᐅᓇᓱᒃᑐᑦ ᑕᐃᒪᐃᙱᑦᑎᐊᖅᑐᑦ. ᑕᐃᒪᐃᙱᓐᓂᕋᕐᓯᒪᔭᖏᑦ,” ᑐᒨᓕᓐ ᐅᖃᓚᐅᕐᑐᖅ ᐅᐃᕖᑐᑦ ᐊᐱᕐᓱᖅᑕᐅᑎᓪᓗᒍ ᐅᒃᑑᐱᕆ ᓄᖑᓕᕐᑎᓪᓗᒍ.

ᕆᕗᐊ ᒫᓐᓇ ᐃᒃᓯᕋᕐᔪᐊᓂᒃ ᐲᕐᑎᑕᐅᕙᓪᓕᐊᓯᔪᖅ. ᑖᓐᓇᓕ ᖃᓄᐃᓕᐅᕈᑎ ᓱᓕ ᐱᐊᓂᒃᓯᒪᙱᑦᑐᖅ, ᐅᖃᕐᑐᖅ ᑐᒨᓕᓐ, ᐊᒻᒪᓗ ᕆᕗᐊ ᓄᒃᑎᖁᔭᐅᓂᖓ ᑕᐃᒪᐃᖁᙱᖢᓂᐅᒃ.

“ᖃᓄᐃᓕᐅᕐᓯᒪᙱᒻᒪᑦ ᑕᐃᒪᓐᓇ … ᐃᒃᓯᕋᕐᔪᐊᓂᒃ ᓄᖃᖅᑎᑕᐅᓗᓂ ᐃᓅᓯᓕᒫᖓᓂᒃ ᐱᓕᕆᐊᕆᑦᑎᐊᖅᖢᓂᐅᒃ,” ᑐᒨᓕᓐ ᐅᖃᓚᐅᕐᑐᖅ, ᐅᖃᒃᑲᓐᓂᖅᖢᓂ, ᑕᐃᒪᐃᑦᑕᕆᐊᖃᕐᐸᑦ ᑭᒡᒐᖅᑐᐃᓂᐊᕐᓂᕋᖅᖢᓂ ᕆᕗᐊᒥ ᕉᒻᒥ ᐱᓕᕆᐊᖑᓗᓂ.

ᒪᑉᓴᓛᖅ ᐅᖃᓚᐅᕐᑐᖅ ᕆᕗᐊ ᑲᓇᑕᒥ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᖁᓪᓗᓂᐅᒃ, ᐊᒻᒪᓗ ᐅᖃᖃᑎᖃᑲᑕᒃᖢᓂ ᐅᐃᕖ ᓗᐊᔭᒥᒃ, ᓈᑎᐊ ᑎᐸᓯᒥ, ᑖᓐᓇᓗ ᐅᐃᕖᒥᐅᑕᓂᒃ ᐸᓯᔭᒃᓴᙳᖅᑎᑦᑎᖁᔨᓪᓗᓂ ᐃᒃᓯᕋᕐᔪᐊᓂᒃ ᓴᐳᔾᔨᓯᒪᓂᖏᓐᓂᒃ ᕆᕗᐊᒥ.

ᐅᖃᒃᑲᓐᓂᓚᐅᕐᑐᖅ ᐸᓯᔭᒃᓴᐅᔾᔪᑎᐅᓇᓱᒃᑐᖅ ᑖᔅᓱᒧᖓ ᐊᓯᖏᓐᓄᓪᓗ ᐃᓄᖕᓄ ᐅᒃᐱᕐᓂᕐᒨᖓᙱᓐᓂᖓᓂᒃ. ᐃᓄᖕᒨᖓᔪᖅ.

“ᑕᐃᒪᓐᓇ ᐃᓱᒪᔪᖓ … ᓲᖃᐃᒻᒪ ᑳᑐᓕᒃᖑᒐᒪ.”

— ᑎᑎᖃᖁᑎᒋᔭᐅᔪᓂᒃ ᐃᓚᖏᓐᓂᒃ ᐅᕙᙵᑦ ᐃᐊᒪ ᑐᕌᓐᑐ