ᐅᓂᑳᑦ ᐊᒻᒪ ᒥᕐᓱᕐᓂᖅ: ᓴᐸᖓᓕᕆᓂᖅ ᓴᖅᑭᑎᑦᑎᓯᒪᕗᖅ ᖃᓄᐃᓕᐅᕈᑎᕕᓂᕐᓂᕐ ᐊᒻᒪ ᓄᓇᓕᖕᓂ
ᐅᓂᒃᑳᑦ ᖁᕕᐊᒋᕙᒃᑕᕗᑦ ᐅᓂᒃᑳᕆᓪᓗᒋᑦ: ᐃᓱᒪᒋᒃᑲᓐᓂᒐᒃᓴᑦ ᓴᐸᖓᓕᕆᓂᕐᒧᑦ ᖃᓄᐃᓕᐅᕈᑎᐅᔪᓐᓇᖅᑐᑦ ᐊᒻᒪ ᐅᓂᒃᑳᑲᑕᖕᓂᖅ ᐅᕙᓂ ‘Radical Stitch’ ᓴᖅᑭᔮᒐᕆᔭᐅᔪᒥ
ᑕᕐᕋᓕᒃ ᐹᑐᕆᔾ, ᑰᔾᔪᐊᖅᒥᐅᑕᕕᓂᖅ, ᓇᖏᕐᑐᖅ ᓴᓂᑦᑎᐊᖓᓂ ᐱᓕᕆᐊᕆᓯᒪᔭᖏᓐᓂ ᐆᒧᖓ Radical Stitch ᓴᖅᑭᔮᒐᕆᔭᐅᔪᒥ ᐅᕙᓂ ᑲᓇᑕᒥ ᑕᑯᔭᒐᖃᕐᕕᒃᒥ ᐋᑐᕚᒥ (National Gallery of Canada). (ᐊᔾᔨᓕᐅᕆᔨ ᑭᐅᔅᑎᓐ ᕗᐃᓕᐊᒻᔅ)
For the English version of this story, please see From stories to stitches, beadwork reflects history and community.
ᓴᐸᖓᓕᕆᓂᖅ ᓴᓇᐅᒐᑐᐃᓐᓇᐅᙱᒻᒪᑦ, ᐅᓇ ᐅᓂᒃᑳᕈᓯᖅ ᐱᒻᒪᕆᐅᓂᑯᓂ ᐅᓂᒃᑳᓂ ᐊᑐᕐᓂᑯᓂᒃ, ᒫᓐᓇᓕᓴᕐᓂ ᐊᒻᒪ ᓯᕗᓂᕆᓂᐊᖅᑕᑦᑎᓐᓂ ᐅᖃᐅᓯᖃᑐᐃᓐᓇᙱᑦᑐᖅ ᑭᓯᐊᓂᓕ ᖃᐅᔨᒪᑎᑦᑎᔪᖅ ᓇᑭᙶᕐᓂᑦᑎᓐᓂ.
ᒪᐃᖑᑎᓪᓗᒍ ᑲᓇᑕᒥ ᑕᑯᔭᒐᖃᕐᕕᒃᒧᐊᓚᐅᕐᓯᒪᒐᒪ ᐋᑐᕚᒥ ᒪᑐᐃᕐᓯᓚᐅᖅᑎᓐᓇᒋᑦ ᓇᒧᙵᐅᑲᑕᒍᑎᐅᔪᒥ ᑕᑯᔭᒐᕆᔭᐅᔪᒥ Radical Stitch, ᓴᖅᑭᔮᖅᑎᑦᑎᓯᒪᓪᓗᓂ 100 ᐅᖓᑖᓂ ᓴᓇᔭᐅᓯᒪᔪᓂᒃ 44-ᓄ ᐃᓄᖕᓄᑦ, ᓄᓇᖃᖅᑳᖅᑐᓄᑦ ᐊᒻᒪ ᐊᓪᓚᖓᔪᓄᑦ ᑲᓇᑕᒥᐅᑕᕐᓂ ᐊᒻᒪ ᐊᒥᐊᓕᑲᒥᐅᑕᕐᓂ.
ᐃᑲᕐᕋᒐᓴᒻᒪᕆᖕᓂ ᐸᕐᓇᒃᑕᐅᕙᓪᓕᐊᓪᓗᓂ, ᑲᑎᑦᑎᑲᑕᒃᖢᑎᒃ ᐊᑐᖅᑕᐅᔭᕆᐊᓕᖕᓂ ᓈᒻᒪᒃᑐᓂ ᖃᓪᓗᓈᖅᑕᕐᓂᒃ ᐊᒻᒪ ᑕᕐᓴᒃᓴᓂ, ᓴᐸᖓᓕᕐᓂᖅ ᓴᓇᓕᕐᓇᖅᖢᓂ ᐱᐅᔪᓂ ᓴᖅᑭᑎᑦᑎᓯᒪᓂᕐᓴᓂ ᓴᓇᔪᒥᒃ, ᐅᓂᒃᑳᓕᐅᕐᓯᒪᓪᓗᑎᒃ ᐃᓚᖏᓐᓂ ᐊᒻᒪᓗ ᓄᓇᖏᑦ ᖃᓄᐃᓕᖓᓂᖏᓐᓂᒃ.
ᓴᐸᖓᓕᕆᔭᒃᖢᖓ, ᐅᓇ ᐃᓱᒪᒋᒻᒪᕆᓚᐅᕐᓯᒪᔭᕋ ᑕᑯᔭᖅᑐᓛᕈᒪᓪᓗᒍ ᐊᖏᓂᖅᐹᖅ ᓴᐸᖓᓕᕆᓂᕐᒥ ᓴᖅᑭᔮᒐᕆᔭᐅᔪᖅ ᐊᒻᒪᓗ ᐅᖃᖃᑎᖃᑲᑕᒡᓗᖓ ᐊᔾᔨᒌᙱᑦᑑᑎᓂᒃ ᓴᓇᕙᒃᑐᓂᒃ ᐊᒻᒪ ᑲᒪᔨᒋᔭᐅᔪᒥᒃ ᑕᕐᕋᓕᒃ ᐹᑐᕆᔾ ᐱᓕᕆᐊᖓᓂ ᓴᖅᑭᔮᒐᕆᔭᐅᔪᒥ.
ᐹᑐᕆᔾ, ᑰᔾᔪᐊᖅᒥᐅᑕᕕᓂᖅ, ᐱᒋᐊᖅᑎᑦᑎᓚᐅᕐᓯᒪᔪᖅ ᐊᐱᕐᓴᐃᑦ 2020-ᖑᑎᓪᓗᒍ, ᐊᔾᔨᒌᙱᑦᑑᑎᓂᒃ ᐊᓕᒍᕐᓂ ᓴᓇᓯᒪᐅᕐᑐᓂ ᓴᐸᖓᓕᐊᖏᓐᓂ ᓴᖅᑭᑎᑦᑎᓯᒪᔪᓂᒃ ᒪᑯᓂᖓ ᐅᑭᐅᕐᑕᖅᑐᕐᒥ ᓂᕐᔪᑎᓂᒃ ᒪᑯᑎᑐᓇᖅ ᑐᒃᑐᓂᒃ, ᐊᐃᕕᕐᓂᒃ ᐊᒻᒪ ᑎᕆᒐᓂᐊᕐᔪᖕᓂᓪᓗ.
ᓴᓂᑦᑎᐊᖓᓂ ᓇᕿᖅᖢᓂ, ᐊᐱᕆᓚᐅᕐᑕᕋ ᐱᓕᕆᓕᕈᒪᔾᔪᑎᒋᓚᐅᕐᑕᖓᓂ ᐃᑲᔫᑎᒋᔭᖓᓂ ᐊᒻᒪ ᖃᓄᖅ ᐅᓂᒃᑳᖃᕐᒪᖔᑕ.
ᐹᑐᕆᔾ ᐅᖃᐅᓯᖃᓚᐅᕐᑐᖅ ᓴᐸᖓᓕᐊᖏ ᐅᖃᐅᓯᖃᕐᓂᖓᓂ ᐊᑖᑕᖓᑕ ᐅᓂᒃᑳᕆᓚᐅᕐᓯᒪᔭᖓᓂ ᑖᔅᓱᒧᖓ, ᑕᐃᔅᓱᒪᓂ ᐃᓄᐃᑦ ᑳᒃᑐᐊᓘᑎᓪᓗᒋᑦ, ᐅᖃᓚᐅᕐᓯᒪᖕᒪᑦ ᐊᐃᕕᕐᒥ ᐊᓂᕐᓂᖃᕋᓱᒋᓪᓗᓂ.
ᑳᒃᑐᐊᓘᑎᓪᓗᒋᑦ, ᑐᓂᔭᐅᓚᐅᕐᓯᒪᖕᒪᑦ ᐊᐃᕕᐅᑉ ᓂᕿᖓᓂ ᑖᔅᓱᒧᖓᓗ ᐊᓐᓇᐅᒥᓪᓗᓂ.
“ᐃᓱᒪᔪᖓ ᐊᓂᕐᓂᖓᑕ ᐊᔾᔨᙳᐊᕆᔭᕆᐊᒃᓴᖓᓂ, ᐅᕝᕙᓘᓐᓃᑦ ᐊᔾᔨᒌᙱᑦᑑᑎᑦ ᖃᐃᖃᑦᑕᕐᓂᖏᓐᓂ ᐊᒻᒪ ᐃᑲᔪᖅᐸᒃᖢᑎ ᐃᑲᔪᖅᑕᐅᔭᕆᐊᖃᓕᕌᖓᕕᑦ,” ᐹᑐᕆᔾ ᐅᕙᓐᓄ ᐅᖃᕐᑐᖅ.
ᐅᖃᐅᓯᖃᑲᑕᒃᑎᓪᓗᓄ ᓴᐸᖓᓕᕆᖃᑦᑕᕐᓂᕐᒥᒃ ᖃᓄᐃᓕᐅᕈᓯᖏᓐᓂᒡᓗ, ᐹᑐᕆᔾ ᐅᖃᓚᐅᕐᑐᖅ ᓄᐊᕗᐃᒦᓐᓂᖓᓂ, ᓂᕆᕝᕕᐅᑉ ᑭᐳᖓᓂ ᓴᓇᖃᑦᑕᕐᓂᕋᖅᑐᖅ — ᑕᐃᒪᓐᓇᓗ ᓇᓂᑐᐃᓐᓇᖅ ᑕᑯᓕᒪᓇᖅᖢᓂ ᓴᐸᖓᓕᕆᔪᓂᒃ.
ᐊᓕᒍᕐᓂ ᓴᐸᖓᕐᓂ ᐊᑐᖃᑦᑕᖅᑐᖅ, ᒥᒃᓱᒐᖏᑦᑕ ᐊᒥᐊᒃᑯᖏᓐᓂᒃ, ᑯᒃᑭᖐᔭᐅᑎᒥ ᐃᕙᓘᔭᕐᒥ, ᐊᓪᓚᕈᑎᒥ ᓂᕐᕆᓯᓄᑦ ᐊᒻᒪᓗ ᐊᐅᒃᑕᔫᖅ ᐴᕆᔭᐅᓂᑯ ᐊᕿᒡᒋᕐᔪᐊᒧᑦ ᐊᕕᒃᑐᖅᓯᒪᐅᕐᑐᓄᑦ.
ᐃᓱᒪᓚᐅᕐᓯᒪᑎᓐᓇᖓ ᓱᓕ ᐊᑐᕆᐊᒃᓴᖅ ᐊᐅᔭᑦᑐᒥ ᐊᕿᒡᒋᕐᔪᐊᕐᒧᑦ ᐊᕕᒃᑐᖅᓯᒪᐅᖅᑐᒧᑦ, ᐅᖃᐅᑎᓚᐅᕐᑕᕋ ᐹᑐᕆᔾ ᐊᑐᖃᑦᑕᕐᓂᓐᓂ ᐳᕆᙳᔅ (ᐸᑏᑎᑦ) ᒪᑐᖏᓐᓂ ᐋᖅᑭᒃᓯᒋᐊᕈᑎᒋᕙᒃᖢᒋᑦ ᖃᐃᕋᓕᖅᑎᓐᓇᓱᒃᖢᒋᑦ ᓴᐸᖓᓕᐊᒃᑲ.
“ᐅᓇ ᖃᓄᐃᓕᐅᕈᓯᕐᒦᖢᓂ ᐃᓱᒪᔪᖓ ᐊᑐᖃᑦᑕᕐᓂᑦᑎᓐᓂ ᐱᖁᑎᑦᑎᓐᓂ ᒪᑯᓂᖓᑐᐊᖑᙱᑦᑐᖅ ᓄᓇᒧᑦ ᐱᐅᓇᔭᖅᑐᓂᒃ,” ᐅᖃᕐᑐᖅ. “ᐅᕝᕙᓘᓐᓃᑦ ᐊᑐᖅᐸᒃᖢᑕ ᐱᓯᒪᕙᒌᖅᑕᑦᑎᓐᓂ ᐊᒻᒪ ᓱᕈᕐᓴᐃᓐᓇᖅᖢᓂ.”
ᓱᒃᑲᐃᖢᖓ ᕿᒥᕐᕈᐊᒻᒪᕆᒃᖢᖓ ᐆᒥᖓ Radical Stitch ᑕᑯᔭᒐᕆᔭᐅᔪᒥᒃ, ᑕᒪᐃᓐᓂᓕᒫᖅ ᐱᐅᓂᖓ ᑕᑯᓇᓱᓚᐅᕐᑕᕋ ᑲᒪᑲᑕᒃᖢᖓ ᐊᔾᔨᒌᙱᑦᑑᑎᑦ ᓴᓇᐅᒐᐃᑦ ᐋᖅᑭᒋᐊᕐᓯᒪᓪᓗᑎ ᓴᐸᖓᕐᓄᑦ ᓴᓇᔭᕐᓂᕋᓱᒋᓪᓗᒋᑦ.
ᐹᑐᕆᔾ ᐱᓕᕆᐊᖓ ᐃᓚᒋᔭᐅᖕᒥᔪᖅ ᐊᓯᐊᓂ ᑕᑯᔭᒐᕆᔭᐅᔪᒧᑦ ᑲᓇᑕᒥ ᑕᑯᔭᒐᖃᕐᕕᒃᒥ ᑎᑭᓪᓗᒍ ᐊᐃᕆᓕ 2025, ᓵᓚᒃᓴᖃᑕᐅᓚᐅᕐᓯᒪᖕᒪᑦ 2024 ᓲᐱ ᓴᓇᐅᒐᓕᕆᓂᕐᒧᑦ ᐃᓕᓴᕆᔭᐅᔾᔪᑎᒥᒃ (Sobey Art Award), ᑲᓇᑕᒥ ᓵᓚᒃᓴᐅᓯᐊᒃᓴᖅ ᑎᑎᕋᐅᔭᒐᕐᓂᖅ ᐃᓕᓴᖅᓯᓯᒪᕙᒃᑐᓂᒃ.
ᑭᒡᒐᖅᑐᐃᓚᐅᕐᑐᖅ ᐅᑭᐅᕐᑕᖅᑐᕐᒥ, ᐅᑯᐊ ᐃᓚᐅᓪᓗᑎᒃ ᔫᑳᓐ, ᓄᓇᑦᓯᐊᖅ, ᓄᓇᕗᑦ, ᓄᓇᕕᒃ ᐊᒻᒪ ᓄᓇᑦᓯᐊᕗᑦ.
ᓃᑯ ᕗᐃᓕᐊᒻᔅ, ᐃᓚᒋᔭᐅᔪᖅ ᐋᒻᔨᕗᐊᖕ ᓄᓇᖃᖅᑳᖅᑐᓄᑦ (Aamjiwnaang First Nation), ᓴᓇᖃᑕᐅᓯᒪᔪᖅ ᓴᖅᑭᔮᖅᑐᒃᓴᓂ ᐅᕙᓂ Radical Stitch ᐊᒻᒪᓗ ᓵᓚᒃᓴᐅᓯᐊᖅᖢᓂ $100,000 ᐃᓕᓴᕆᔭᐅᔾᔪᑎᒧᑦ ᓄᕕᐱᕆᐅᑎᓪᓗᒍ.
ᖁᕕᐊᒋᓚᐅᕐᑕᕋ ᐹᑐᕆᔾ ᐱᓕᕆᐊᖏᓐᓂ ᐅᓂᒃᑳᓕᐅᖅᑎᑕᐅᒐᒪ ᐊᒻᒪᓗ ᑕᑯᔪᓐᓇᖅᖢᖓ ᐱᐅᓪᒻᒪᕆᒃᑐᐊᓗᒥ ᑕᑯᔭᒐᕆᔭᐅᔪᒥᒃ ᓴᐸᖓᓕᐊᓂᒃ ᐅᓂᒃᑳᓕᐅᕐᓯᒪᔪᓂᒃ ᓄᓇᖃᖅᑳᖅᑐᑦ ᓄᓇᖏᓐᓂ.
ᐊᔾᔨᒌᙱᑦᑑᑎᑦ ᐊᔪᙱᔾᔪᑎᒋᔭᐅᔪᑦ ᓴᓇᐅᒐᓕᐅᖅᑎᓄᑦ, ᐅᓂᒃᑳᖏᑦ, ᐊᒻᒪᓗ ᓄᓇᓕᖏᑦ ᓴᖅᑭᔮᖅᑎᑕᐅᓚᐅᕐᑐᑦ ᐱᓕᕆᐊᖏᓐᓂ ᐊᒻᒪ ᖃᐅᔨᕚᓪᓕᓚᐅᖅᖢᖓ ᖃᓄᐃᓕᐅᕈᓐᓇᕋᔭᕐᓂᓐᓂ ᓴᐸᖓᓕᕆᓂᒃᑯᑦ.
ᑕᐃᒪᐃᓐᓂᖓᓄᑦ ᐅᓇ Radical Stitch ᓴᖅᑭᔮᒐᕆᔭᐅᔪᖅ ᖁᕕᐊᒋᓂᖅᐹᕆᓚᐅᕐᑕᕋ ᐅᓂᒃᑳᕆᓪᓗᒍ 2024-ᒥ.
(0) Comments