ᐊᖑᓇᓱᒃᑐᑦ ᐱᓇᓱᒃᑕᒥᖕᓂ ᐱᕗᑦ

ᐅᓪᓘᒃ ᒪᕐᕉᒃ ᓯᕗᓂᐊᓂᒃ ᖃᒪᓂᖅᑐᐊᕐᒥ ᐊᖑᓇᓱᒃᑎᐅᔪᑦ ᐊᕐᕙᖕᓂᐊᖅᑎᓪᓗᒋ 14 ᒦᑕᓂ ᑕᑭᓂᓕᖕᒥ, ᓴᐱᓕᕐᓯᒪᕈᔪᓚᐅᕐᑐᑦ.

ᓇᐅᔮᓂ ᐃᓐᓇᑐᖃᕐᓄᑦ ᐊᐅᓪᓚᖅᓯᒪᕝᕕᐊᓃᑎᓪᓗᒋ ᐱᓇᓱᐊᕈᓯᕐᓂ ᒪᕐᕉᖕᓂ ᐃᓚᓪᓗᒍ, ᑖᒃᑯᐊ ᐊᖑᓇᓱᒃᑎᒋᔭᐅᔪᑦ ᐃᓚᖏ ᐊᖏᕐᕋᐅᓕᓚᐅᕐᑐᑦ ᐊᖏᕐᕋᖏᓐᓂᒃ ᐱᓕᕆᐊᒃᓴᖏᓐᓄᑦ ᐊᒻᒪᓗ ᓇᒧᙵᐅᑲᑕᒍᓐᓇᙱᖢᑎᒃ ᒪᑯᑲᑕᒃᑐᒧᑦ – ᐊᒻᒪᓗ ᑲᑕᒃᓯᒪᖄᑎᒋᕈᔪᓕᖅᖢᑎᒃ.

“ᐊᖏᕐᕋᒧᑦ ᐸᕐᓇᖕᓂᐊᓕᖅᑎᓪᓗ ᑖᒃᑯᐊ ᐅᖃᓪᓚᖃᑎᒋᓪᓗᒋ ᐊᖑᓇᓱᒋᐊᖅᑐᑦ,” ᑳᑉᑕᓐᒋᔭᐅᔪᖅ ᕕᓕᑉ ᐳᑐᒥᕋᖅᑐᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐅᖃᖅᓕᖅᖢᓂ ᑖᒃᑯᓄᖓ: “ᐱᓇᓱᒃᑲᓐᓂᕈᓐᓇᖅᑐᒍᑦ. ᐱᓇᓱᒃᑲᓐᓂᕈᓐᓇᖅᑐᒍᑦ ᐊᖏᕐᕋᓚᐅᙱᓐᓂᑦᑎᓐᓂᒃ.”

ᖃᒪᓂᑦᑐᐊᖅ ᐊᐃᑉᐸᕆᔭᐅᓚᐅᕐᑐᖅ ᒪᕐᕉᖕᓂ ᓄᓇᓖᖕᓂ ᓂᕕᙵᑕᖅᑖᖅᑎᑕᐅᔪᓐᓇᖅᑐᓂᒃ ᐊᐅᔭᒧᑦ, ᐊᒻᒪ ᐊᕐᕙᒐᓱᒋᐊᓕᓚᐅᖅᓯᒪᓪᓗᑎᒃ ᔪᓚᐃ 27-ᐅᑎᓪᓗᒍ ᐊᒻᒪᓗ ᑕᕿᐅᑉ ᐃᓗᐊᓂ ᐱᔪᓐᓇᖅᑎᑕᐅᓪᓗᑎᒃ. ᓴᓪᓕᖅ ᐊᐃᑉᐸᕆᔭᐅᓚᐅᕐᑐᖅ ᐊᕐᕙᒍᓐᓇᖅᑐᓂ ᑖᒃᑯᐊᓗ ᐊᕐᕙᓚᐅᖅᓯᒪᓪᓗᑎᒃ ᔪᓚᐃ 10-ᖑᑎᓪᓗᒍ.

ᐋᒐᓯ 15-ᒥᑦ – ᓈᑦᑏᖑᔭᐅᑉ ᐅᓐᓄᖓᓂᒃ – ᓇᐅᔮᕐᒥᐅᑕᒥ ᑕᑯᔪᖃᖅᖢᓂ 8 ᑭᓚᒦᑕᓂᒃ ᐅᖓᓯᖕᓂᓕᖕᒥ ᕿᑭᖅᑕᐃᑦ ᓇᐅᔮᑦ ᐃᒪᖓᓃᑦᑐᓂᒃ.

ᐳᑐᒥᕋᖅᑐᖅ ᖃᐅᔨᑎᑕᐅᓪᓗᓂ ᑕᑯᔭᐅᔪᒥᒃ ᐊᒻᒪᓗ ᑖᓐᓇ ᐃᓐᓇᕆᔭᐅᔪᒧᑦ ᔮᓐ ᐊᕚᓚᒧᑦ ᖃᐅᔨᒋᐊᖅᖢᓂ ᓲᖃᐃᒻᒪ ᓈᑦᑏᖑᔭᐅᖕᒪᑦ, ᓄᖅᑲᖓᓐᓇᖅᖢᓂ. ᐊᕚᓚ ᐊᖏᓚᐅᕐᓯᒪᔪᖅ ᑖᒃᑯᓂᖓ.

“ᐊᓱᐃᓛᒃ ᐊᐅᓪᓚᖅᖢᑕ,” ᐳᑐᒥᕋᖅᑐᖅ ᐅᖃᖅᑐᖅ.

ᐊᖑᓇᓱᒃᑎᐅᖃᑕᐅᔪᖅ ᐅᒃᑯ ᑕᓄᔭ ᓇᐅᓕᒃᓯᖅᑳᖅᖢᓂ ᑖᔅᓱᒥᖓ ᐊᕐᕕᒃᒥᓐ ᐊᒻᒪᓗ ᐊᓯᐅᔨᔭᐅᑲᓴᒃᖢᓂ ᖁᑭᖅᑕᐅᒃᑲᓐᓂᓚᐅᙱᑎᓪᓗᒍ, ᐳᑐᒥᕆᐊᖅ ᐅᖃᖅᑐᖅ.

“ᐊᒃᖢᓈᖅ ᐊᑐᖅᑕᕗᑦ ᐅᓈᕐᒧᑦ ᓴᙱᓂᖓ ᓈᒻᒪᓚᐅᖅᑑᒐᓗᐊᖅ ᑭᓯᐊᓂᓕ ᑖᔅᓱᒪ ᐊᕐᕕᐅ ᕿᒃᑐᕋᖅᑎᑦᑐᓐᓇᓚᐅᖅᑕᖏ,” ᐅᖃᖅᑐᖅ. “ᐊᓯᐅᔨᓚᐅᑲᓚᐅᖅᑕᕗᑦ. ᑭᓯᐊᓂᓕ ᓇᐅᓕᒃᑕᐅᓯᒪᒃᑲᓐᓂᕐᓂᖓᓄ ᓴᖅᑭᒃᑲᓐᓂᕈᓐᓇᓚᐅᖅᑐᖅ.”

ᑖᓐᓇ ᓄᖃᕈᓐᓇᓕᑕᐃᓐᓇᖅᖢᓂ ᐱᖓᓱᒃᑲᓐᓂᕐᓄᑦ ᓇᐅᓕᒃᑕᐅᒃᑲᓐᓂᖅᖢᓂ ᑭᓯᐊᓂ.

ᐊᖑᓇᓱᒃᑏᑦ ᐊᖑᓵᖅᑕᖓᑦᑕ ᖄᖓᓃᑦᑐᑦ ᓇᐅᔮᑦ ᖃᓂᒋᔭᖓᓂᒃ ᐋᒐᓯ 17-ᖑᑎᓪᓗᒍ. (ᐊᔾᔨᓕᐅᕆᔨ ᑐᕇᓇ ᔮᖕᒃ)

ᐳᑐᒥᕋᖅᑐᖅ ᖁᑭᖅᖢᓂᐅᒃ, ᐊᒻᒪᓗ ᐊᖑᓇᓱᖕᓂᖅ ᓄᖅᑲᖅᑎᑕᐅᓪᓗᓂ ᐊᓄᕌᓕᖅᐸᓪᓕᐊᓂᖓᓄᑦ ᐊᒻᒪ ᐅᓐᓄᙳᓕᖅᖢᓂ. ᑖᓐᓇᓗ ᕿᒪᒃᑕᐅᓪᓗᓂ ᓇᒐᔾᔭᐅᒥ ᐅᑎᕐᕕᐅᓂᐊᖅᖢᓂ.

“ᑐᖁᓂᐊᓕᖅᑐᖅ ᖃᐅᔨᒪᓚᐅᕋᑦᑎᒍᑦ ᑕᐃᒪᓕ ᖃᐅᒃᐸᙳᕐᒪᓐ ᕿᓂᕆᐊᕋᑦᑎᒍᑦ ᓇᓂᓚᐅᖅᑕᕗᑦ ᕿᒪᒡᕕᒋᓚᐅᖅᑕᑦᑕ ᖃᓂᒋᔭᖓᓂᒃ,” ᐅᖃᖅᑐᖅ.

ᑖᒃᑯᐊ ᐊᕐᕕᒃᑕᒥᖕᓂ ᓄᓇᒧᐊᖅᓯᓕᓚᐅᕐᓯᒪᔪᑦ ᐊᐃᑉᐹᓂᒃ ᐊᒻᒪᓗ ᐱᓚᒃᑐᖅᑕᐅᕙᓪᓕᐊᓕᖅᖢᓂ ᒪᒃᑕᖓ. ᑐᓂᓯᓚᐅᕐᒥᔪᑦ ᐃᓚᖓᓂᒃ ᓇᐅᔮᓃᑦᑐᓂᒃ, ᐊᒻᒪᓗ ᐃᑲᔪᖅᑕᐅᓪᓗᑎᒃ ᑖᒃᑯᓇᙵᑦ ᐊᒻᒪ ᐴᖅᑲᐃᓪᓗᑎᒃ ᒪᒃᑕᒃᓂ ᓄᓇᓕᖕᓄᐊᖅᑕᐅᑲᑕᖕᓂᐊᖅᑐᓂᒃ.

“ᓄᓇᖃᖅᑐᓕᒫᑦ ᓂᐅᕝᕕᐅᕆᐊᓚᐅᕐᑐᑦ ᐊᒻᒪ ᖁᕕᐊᓲᑎᖃᒻᒪᕆᒃᖢᑎᒃ,” ᐅᖃᖅᑐᖅ. “ᑐᖅᖢᓛᑲᑕᒃᑐᓪᓗ ᐊᒻᒪ ᖁᕕᐊᓲᑎᖃᖅᑐᑦ ᐊᒻᒪᓗ ᐃᙱᖅᖢᑎᒃ.”

ᐅᓇ ᐊᕐᕕᒃ ᐃᓚᒋᔭᐅᔪᖅ ᒪᑯᓇᙶᑦ ᐃᓚᒋᔭᐅᓪᓗᓂ ᑕᐃᔭᐅᔪᓂᒃ humback, sperm ᐊᒻᒪ gray ᐊᕐᕕᒃᓂᑦ. ᐅᓇ ᐊᕐᕕᖕᓂ ᐊᕐᕌᒍᓕᒫᖅ ᐅᑭᐅᕐᑕᖅᑐᖅᒦᖏᓐᓇᐅᔭᖅᑐᑐᐊᖅ.

ᒪᒃᑕᖅ, ᐅᕝᕙᓘᓐᓃ ᐊᕐᕕᐅᑉ ᐊᒥᖓ ᐊᒻᒪ ᐅᕐᓱᖓ, ᓂᕆᔭᐅᓛᖑᕙᒃᑐᖅ ᑕᒪᒃᑯᓇᙵᑦ ᐊᕐᕕᒃᓂᒃ. ᐅᓇ ᕙᐃᑕᒥᓐ C ᐊᒻᒪ D-ᖃᑎᐊᖅᑐᑦ.

ᔭᐃᒥ ᑲᑕᓗᒃ ᐃᓚᒋᔭᐅᓚᐅᖅᑐᖅ ᐊᖑᓇᓱᒃᑐᓂᒃ, ᑭᓯᐊᓂᓕ ᑲᖏᖅᖠᓂᕐᒧᐊᕆᐊᖃᓚᐅᕐᒪ ᐃᒻᒥᓅᖓᔪᒧᑦ. ᐅᖃᐅᓯᖃᖅᖢᓂ ᖃᓄᐃᓕᐅᕐᓂᕆᓚᐅᕐᑕᖏᓐᓂᒃ ᑲᒪᓯᒪᒻᒪᕆᓚᐅᕐᑐᖅ.

“ᐃᓄᐃᑦ ᐃᓅᓯᖓ – ᐃᓄᐃᑦ ᑲᑎᑦᑐᑦ ᐊᑕᐅᓯᕐᒥ ᐱᓇᓱᒃᖢᑎᒃ. ᑕᒫᓂᓗ ᑕᐃᒪᐃᑎᓪᓗᒍ ᑕᐅᑐᒃᖢᒍ – ᐊᔪᕐᓇᒻᒪᕆᒃᑐᖅ ᖃᓄᖅ ᐅᖃᐅᓯᕆᓂᐊᕆᐊᒃᓴᖓᓂᒃ.” ᐅᖃᖅᑐᖅ.

“ᑕᒪᓐᓇ ᐃᓄᒃᑎᒍᑦ ᐃᓕᖅᑯᓯᕇᓐᓇᐅᔭᕋᑦᑎᒍᑦ – ᐊᖑᔭᑦᑎᓐᓂ ᐊᓯᑦᑎᓐᓄᑦ ᑐᓂᐅᖃᐃᕙᒃᑕᕗᑦ ᓄᖑᑉᐸᑕ ᑭᓯᐊᓂ.”

ᖃᒪᓂᑦᑐᐊᕐᒥ ᐊᖑᓇᓱᒃᑏᑦ ᐊᒻᒪ ᓇᐅᔮᓂᒃ ᓄᓇᓖᑦ ᐊᕐᕕᒃᒥ ᐱᓚᑦᑐᐃᓚᐅᕐᑐᖅ ᐋᒐᓯ 17-ᒥᑦ. (ᐊᔾᔨᓕᐅᕆᔨ ᑲᑕᕆ ᐃᔾᔭᖏᐊᖅ)

ᖃᒪᓂᑦᑐᐊᕐᒧᑦ ᐅᑎᕐᒪᑕ ᖁᕕᐊᓱᑦᑎᐊᕐᓂᕋᓚᐅᕐᑐᖅ. ᑎᑭᑎᓪᓗᒋᑦ, ᓄᓇᓖᑦ ᑖᒃᑯᓂᖓ ᑐᙵᓱᒃᑎᑦᑎᑦᑎᐊᓚᐅᕐᑐᑦ.

ᖃᒪᓂᑦᑐᐊᕐᒥᓪᓗ, ᒥᐊᓕᐊᓐ ᐅᖃᔪᐃᑦᑐᖅ ᐃᓚᖏᓐᓂ ᖃᐅᔨᒪᔪᓐᓇᓚᐅᕐᑐᖅ ᐅᖓᓯᒃᑐᒦᑎᓪᓗᒋᑦ, ᑕᒻᒪᕇᒃᑯᑎᒥ GPS ᐊᑐᖅᖢᓂ ᐊᒻᒪᓗ ᖃᐅᔨᒪᑎᑦᑎᑲᑕᒃᖢᓂ ᑖᒃᑯᐊ ᓇᓃᓕᕐᓂᖏᓐᓂᒃ ᕙᐃᔅᐳᒃᑯᑦ.

ᐅᐃᖓ, ᔫ ᐅᖃᔪᐅᑦᑐᖅ ᐊᒻᒪ ᐊᓂᖓ ᑲᐃᓯ ᑐᓗᕆᐊᓕᒃ ᐃᓚᐅᓚᐅᕐᒪᑎᒃ ᐊᖑᓇᓱᒃᑐᓂᒃ.

ᐅᖃᓚᐅᕐᑐᖅ ᐊᑖᑕᑦᑎᐊᖓ ᑳᑉᑕᓐᖑᖃᑦᑕᓚᐅᕐᓯᒪᓂᖓᓂᒃ ᐊᕐᕙᒐᓱᒃᑐᓂᒃ, ᐊᕐᕕᒃᓯᐅᖅᐸᒃᖢᑎᒃ ᐊᒻᒪ ᐊᓯᖏᓐᓂᒃ ᐃᒪᕐᒥᐅᑕᓂᒃ.

“ᑕᐅᑐᒃᑐᖅ ᐊᒻᒪᓗ ᐃᓕᖕᓂ ᐱᒃᑯᒋᔭᓕᒃ,” ᐅᖃᔪᐅᑦᑐᖅ ᐊᓂᒥᓄᑦ ᑎᑎᕋᖅᖢᓂ ᕙᐃᔅᐳᒃᑯᑦ ᐊᐅᓪᓚᖅᓯᒪᓕᖅᑎᓪᓗᒋᑦ.

ᐅᖃᓚᐅᕐᑐᖅ ᖃᒪᓂᑦᑐᐊᕐᒥᐅᑕᑦ ᖁᕕᐊᓱᒃᑎᐊᓚᐅᕐᓂᖏᓐᓂᒃ ᐊᖑᓇᓱᒃᑏᑦ ᐅᑎᕐᓂᖏᓐᓂᒃ ᐱᓗᐊᖅᑐᒥᓪᓕ ᑖᔅᓱᒧᖓ ᐅᐃᖓ ᐅᑎᕐᒪᓐ.

“ᖁᕕᐊᓱᑐᐃᓐᓇᕐᓂᐊᖅᑐᖓ ᐊᑐᖃᑦᑕᖅᑕᒥᓄᑦ ᐅᑎᑐᐃᓐᓇᖅᐸᑦ ᐊᒻᒪ ᐃᑲᔪᑲᑕᒡᓗᓂ ᐃᕐᖑᑕᑦᑎᓐᓂᒃ, ᐃᒡᓗᒥ ᐊᒻᒪ ᐊᓯᖏᓐᓄᑦ,” ᐃᒡᓚᖅᖢᓂ ᐅᖃᖅᑐᖅ.

ᐃᑭᐊᕿᕕᒃᑯᓪᓕ ᐅᖃᐅᓯᖃᓚᐅᕐᑐᑦ ᒧᒥᕐᓂᐊᕐᓂᕋᖅᑕᐅᓪᓗᑎᒃ ᐅᑎᖅᐸᑕ ᑕᐃᒪᓐᓇᓗ ᑲᑕᓗ ᐃᓕᖅᑯᓯᖃᕐᓂᕋᐃᓪᓗᓂ. ᑭᓯᐊᓂᓕ ᐅᖃᔪᐃᑦᑐᖅ ᐅᖃᓚᐅᕐᑐᖅ ᑐᓴᓚᐅᙱᓐᓂᖓᓂᒃ ᖃᓄᖅ ᖁᕕᐊᓲᑎᓕᐅᕐᓯᒪᖕᒪᖔᑕ.