ᐊᕐᕌᒍᑦ 20 ᐃᓗᐊᓂᑦ ᓴᓇᐅᒐᓕᐅᕐᓂᖅ

For an English version of this story, see Twenty creative years

ᐊᐃᕆᓕ 1, 1999-ᒥᑦ, ᓯᕿᓂᖅ ᓴᖅᑭᓚᐅᕐᓯᒪᕗᖅ ᓯᕗᓕᖅᐹᒥᑦ ᓄᓇᕗᒥᑦ.

ᕿᓄᐊᔪᐊᒃ ᐋᓯᕙᒃ ᖁᕕᐊᓲᑎᖃᓚᐅᕐᓯᒪᕗᖅ ᓄᑖᒥ ᑎᐅᕆᑑᕆᒥ ᐆᒥᖓ “ᓯᓚᕗᑦ ᓄᓇᕗᑦ” ᐅᕝᕙᓘᓐᓃᑦ “Our Environment, Our Land”. ᐱᐅᔪᐊᓗᒃ ᐅᔭᕋᒃᒧᑦ ᓴᓇᐅᒐᖅ ᓴᕿᔮᖅᑎᑦᑎᓪᓗᓂ ᓄᓇᕐᔪᐊᕐᒥᒃ ᐅᑭᐅᕐᑕᖅᑑᑉ ᓂᕐᔪᑎᖏᓐᓂᒃ ᐊᒻᒪ ᑕᖅᑭᓂᒃ ᓂᐱᓕᕐᑐᓂᒃ ᐊᒻᒪ ᓯᕿᓂᕐᓂᒃ ᓄᐃᓕᖅᑐᓂᒃ, ᐋᓯᕙᐅᑉ ᑎᑎᕋᐅᔭᒐᖏᑦ ᐃᖅᑲᐃᔾᔪᑎᒋᕙᕗᑦ ᐃᒪᓐᓇ, ᓄᓇ ᐊᒻᒪᓗ ᐊᕙᑎᕗᑦ ᐊᓯᙳᕐᓯᒪᙱᓐᓂᖏᓐᓂᒃ, ᑭᓯᐊᓂᓕ ᖃᓄᖅ ᐊᐅᓚᑕᐅᓂᖏᑦᑎᒍᑦ: ᒫᓐᓇ ᐃᓄᖕᓄᑦ ᓯᕗᓕᐅᕐᑎᓄᑦ ᐃᓕᓴᕆᔭᐅᓯᒪᔪᓂᒃ ᒐᕙᒪᑐᖃᒃᑯᓐᓂ.

ᐊᕐᕌᒍᐃᑦ 20 ᑕᐃᒪᙵᑦ ᓄᓇᕗᑦ ᐱᒋᐊᓚᐅᕐᓯᒪᑎᓪᓗᒍ ᒪᑯᓄᖓ ᓴᓇᕈᓘᔭᕐᓇᓚᐅᕐᐳᖅ ᓴᓇᐅᒐᓕᐅᕐᑎᓄᑦ ᓴᓇᙳᐊᖅᑎᓄᓪᓗ ᓄᓇᕗᒥᑦ. ᐃᓐᓇᑐᖃᐃᑦ ᓴᓇᙳᐊᖅᑎᑦ ᐃᓕᓴᐱ ᐃᓱᓗᑕᖅ, ᔮᓇᑦ ᑭᒍᓯᐅᖅ ᐊᒻᒪ ᑲᓈᖏᓐᓇᖅ ᐳᑐᒍ ᐊᑐᓂ ᐃᓱᒪᕈᓘᔭᕐᓂᖏᑦᑎᒍ ᓴᓇᐅᒐᓕᐅᒐᖏᑦ ᖃᐅᔨᕙᓪᓕᐊᒍᑎᐅᓚᐅᕐᑐᖅ ᐊᒻᒪ ᓂᐱᓕᐅᕈᑎᐅᓪᓗᓂ ᐃᓕᖁᓯᑐᖃᓂᒃ ᒪᑯᑎᒎᓇᕐᓗ ᑎᑎᕋᐅᔭᒐᕐᓂ ᐅᕐᓱᓕᖕᓂᒃ ᐊᒥᐊᕆᓂᒃᑯᑦ, ᑲᒃᑭᐅᑎᒃᓴᓂᒃ ᑭᓱᙳᐊᓕᐊᓂᒃ ᐊᒻᒪ ᑎᑎᕋᐅᔭᒐᕐᓂᒃ. ᐊᑯᓂᐊᓗᒃ ᓴᓇᙳᐊᖅᑎᐅᓕᕐᑐᑦ ᐹᑦ ᕼᐋᓇ, ᐱᓕ ᑯᒃᓱᒃ, ᒫᑎ ᐅᕿᑐᖅ, ᓄᓇ ᐹ, ᔪᕋᐃᐊ ᐳᕿᓐᓇᒃ, ᓂᒃ ᓯᖁᐊᖅ ᐊᒻᒪ ᐊᒥᓱᒻᒪᕇᑦ ᐊᓯᖏᑦᑕ ᓴᓇᐅᒐᖏᑦ ᓇᓃᕈᓘᔭᕐᓯᒪᓕᕐᑐᑦ ᓄᓇᕗᑦ ᓯᓚᑖᓂᑦ.

ᓴᓇᐅᒐᐃᑦ ᒪᕋᕐᒥ ᐅᑯᓇᙵᑦ ᐱᐊᕆ ᐊᐅᐱᓛᕐᔪᒃ ᐊᒻᒪ ᓕᐅ ᓇᐸᔪᖅ. (ᐊᔾᔨᙳᐊᖅ ᐅᑯᓇᙵᑦ ᑎᑎᕋᐅᔭᒐᖃᕐᕕᒃᒥᑦ ᐴᓕᖕᑕᓐᒥᑦ)

ᔨᒥ ᐃᖃᓗᒃ, ᔭᐃᒥᓯ ᐱᑦᓯᐅᓛᒃ ᐊᒻᒪ ᐅᕕᓗ ᑐᓂᓕ ᓴᓇᙳᐊᖅᑎᐅᕗᑦ ᐊᒃᓱᕈᓐᓇᖅᑐᕈᓗᖕᓂ ᐊᑐᖅᑕᕕᓂᖏᓐᓄᑦ ᐊᒃᑐᐃᓯᒪᔪᓂ ᐅᔭᕋᒃᑯᑦ ᓴᖅᑭᑎᑦᑎᕙᒃᖢᑎᒃ. ᖃᐅᔨᒪᔭᐅᑦᑎᐊᖅᖢᓂ ᐱᐅᔪᐊᓗᖕᓂ ᖃᕐᓴᐅᙳᐊᓄᑦ, ᓇᓗᓇᐃᔭᕐᓯᒪᑦᑎᐊᖅᑐᓂᒃ ᒨᑐᓴᐃᑯᙳᐊᓄᑦ ᐊᒻᒪᓗ ᐊᕐᓇᙳᐊᑦᑎᐊᕙᖕᓄᑦ, ᐃᖃᓗᒃ ᓴᓇᓯᒪᒋᕗᖅ ᐃᒃᐱᖕᓇᒻᒪᕆᒃᑐᒥᑦ ᓴᓇᙳᐊᒐᓂᒃ ᐃᔾᔪᐊᕐᓯᓯᒪᔪᓂᒃ ᕿᒧᒃᓯᐅᑎᑦ ᕿᒻᒦᑦ ᑐᖁᕋᖅᑕᐅᑎᓪᓗᒋᑦ ᐳᑭᖅᑕᓕᖕᓄᑦ (ᐸᓖᓯᓄᑦ); ᐱᑦᓯᐅᓛᒃ ᓴᓇᓯᒪᔪᖅ ᐃᓕᓐᓂᐊᕐᕕᒃᒥᑦ ᐱᑦᑎᐊᖅᑕᐅᕙᙱᓐᓂᕐᒥᒃ ᑭᙵᓂᑦ; ᐊᒻᒪᓗ ᑐᓂᓕ ᐃᖅᑲᐅᒪᔪᖅ ᖃᓄᐃᕐᓗᕈᓘᔭᖅᑐᕕᓂᕐᓂᒃ ᐳᕙᒡᓗᒃᖢᓂ ᐊᐅᓪᓚᖅᓯᒪᑎᓪᓗᒍ ᖃᓪᓗᓈᓄᑦ. ᐅᓄᕐᓯᕙᓪᓕᐊᓂᕐᓴᐅᓕᕐᑐᑦ ᓴᓇᙳᐊᖅᑏᑦ ᓴᓇᐅᒐᖏᓐᓂᒃ ᒪᒥᓴᕈᑎᖃᕐᓂᕐᓴᐅᓪᓗᑎᒃ ᐊᒻᒪᓗ ᖃᐅᔨᕚᓪᓕᕈᑎᒋᔭᐅᓪᓗᑎᒃ ᒪᑯᓂᖓ ᓈᒻᒪᙱᓕᐅᕈᑎᕈᓘᔭᕐᓂᒃ ᐃᓄᐃᑦ ᓵᙵᕙᒃᑕᖏᓐᓂᒃ.

2000 ᐱᒋᐊᓵᕐᓯᒪᓕᕐᑎᓪᓗᒍ, ᑭᙵᐃᑦ ᑐᙵᕕᓪᓚᕆᐅᓕᓚᐅᕐᓯᒪᕗᖅ ᑎᑎᕋᐅᔭᒐᕐᓄᑦ ᐋᓂ ᐳᑐᒍᒃ ᓄᓇᕐᔪᐊᒥ ᑎᑎᕋᐅᔭᒐᖏᑦ ᖃᐅᔨᔭᐅᓚᐅᖅᑎᓪᓗᒋᑦ. ᐳᑐᒍᒃ ᑎᑎᕋᐅᑎᓂᒃ ᑕᕐᓴᓕᕐᓂ ᐊᑐᖃᑦᑕᖅᖢᓂ ᑎᑎᕋᐅᔭᒐᖏᑦ, ᐅᓂᒃᑲᐅᓯᖃᓚᐅᕐᐳᖅ ᐃᓅᓯᖓᓂᒃ ᖃᓄᐃᒍᓯᕕᓂᖏᓐᓂᒃ ᐊᒻᒪ ᓄᓇᓕᖕᓂ, ᐃᓚᖏᑦ ᐃᒡᓚᕐᓇᖅᑐᑦ, ᐊᔾᔨᐅᙱᑦᑐᑦ, ᐃᓚᖏᑦ ᑕᑯᒥᓇᓗᐊᙱᑦᑐᑦ, ᓂᕆᐅᒃᓯᒪᔪᑦ ᐅᕝᕙᓘᓐᓃᑦ ᐆᒻᒪᑎᒧᑦ ᓱᕋᓚᐅᑲᖕᓇᖅᑐᑦ.

ᓴᓂᑦᑎᐊᖓᒍᓕ, ᓄᑖᖑᓕᕐᑐᑦ ᑎᑎᕋᐅᔭᖅᑏᑦ ᓂᙵᐅᒪᖂᔨᔪᐊᓗᖕᓂᑦ, ᐃᓛᓐᓂ ᐊᖏᔪᕈᓗᒃᑯᑦ, ᑎᑎᕋᐅᔭᒐᐅᓕᕐᑐᑦ. ᓲᕕᓇᐃ ᐊᓲᓇ ᑲᑉᐱᐊᓇᙳᐊᖅᑐᐊᓗᖏᑦ ᐊᒻᒪ ᒪᑭᑦᑕᐅᑎᙳᐊᑦ, ᑎᒻ ᐱᑦᓯᐅᓛᒃ ᐊᖓᒃᑯᙳᐊᓂᒃ ᐊᓯᙳᖅᐸᓪᓕᐊᔪᓂᒃ ᐊᒻᒪᓗ ᐊᖑᓇᓱᙳᐊᖅᑐᓂᒃ, ᐊᐃᑏ ᐳᑐᒍᒃ ᓄᓇᙳᐊᖏᑦ ᐊᒻᒪ ᐃᒡᓗᒥᐅᑕᐅᔭᑦ, ᓂᖏᐅᑯᓗ ᑏᕕ ᑐᓗᒐᙳᐊᖅ ᓴᓇᔭᖓ ᐊᒻᒪ ᓱᐴᖅᑐᙳᐊᖅᑐᑦ ᓯᐊᑦᓇᙳᐊᑦ, ᐊᒻᒪᓗ ᔫᑕᐃ ᑐᓅ ᐃᒻᒥᓂᙳᐊᓂᒃ ᑎᑎᕋᐅᔭᒐᖏ ᐊᒻᒪ ᑳᓐᓱᙳᐊᕌᓗᐃᑦ ᐃᓄᖕᓄᑦ ᓴᓇᐅᒐᐃᑦ ᐃᓄᖕᒧᑦ ᓴᓇᔭᐅᑐᐊᕈᑎᒃ.

ᐃᓚᖏᑦ ᐱᒻᒪᕆᐅᓛᖑᓯᒪᔪᑦ ᓴᓇᔭᐅᔪᑦ ᓄᓇᕗᒥᑦ ᑕᐃᒪᙵᑦ 1999-ᖑᓚᐅᕐᑎᓪᓗᒍ ᓴᓇᔭᐅᓯᒪᕗᑦ ᓴᓇᖁᔭᐅᓯᒪᓂᒃᑯᑦ. 2001-ᒥ “ᐊᑕᓈᕐᔪᐊᑦ: ᐅᓪᓚᒃᑎ”, ᑕᕐᕆᔭᒐᒃᓴᓕᐊᖑᓯᒪᔪᖅ ᑎᑎᕋᖅᑕᐅᓯᒪᓪᓗᓂ, ᐊᐅᓚᑕᐅᓪᓗᓂ ᐊᒻᒪ ᐱᙳᐊᖅᑕᐅᓪᓗᓂ ᐃᓄᖕᓂ ᓴᕿᑕᐅᓚᐅᕐᓯᒪᔪᖅ ᐃᓱᒪ ᑕᕐᕆᔭᒐᒃᓴᓕᐅᕐᑎᓂᒃ. ᑐᑭᒧᐊᖅᑕᐅᓪᓗᓂ ᓴᖃᓕᐊᓯ ᑯᓄᒃᒧᑦ, ᑕᕐᕆᔭᒐᒃᓴᖅ, ᐅᓂᒃᑲᐅᓯᖃᐅᔭᖅᑐᑦ ᐃᒻᒪᑲᓪᓚᓂᓴᕐᒥ ᐅᓂᒃᑳᒥᑦ, ᓂᕈᐊᕆᔭᐅᓚᐅᕐᓯᒪᔪᖅ ᐆᒧᖓ Caméra d’Orᐅᕙᓂ ᑳᓐᔅᒥᑦ ᑕᕐᕆᔭᒐᓕᐊᓄᑦ ᖁᕕᐊᓱᖕᓇᒥᑦ 2001-ᖑᑎᓪᓗᒍ. ᑭᖑᓂᖏᓐᓂᒡᓕ ᐊᕐᕌᒍᓂᒃ ᑖᔅᓱᒪ, ᐃᓱᒪ ᑲᔪᓯᓯᒪᕗᖅ ᓄᓇᖃᖅᑳᖅᑐᓂᒃ ᑕᕐᕆᔭᒐᒃᓴᓕᐅᖅᐸᒃᖢᑎᒃ ᐃᒪᓐᓇ ᓱᓕᓯᒪᔪᓂᒃ, ᐃᓱᒪᕈᓘᔭᕐᓇᖅᑐᓂᒃ ᒪᑯᓂᖓ ᐃᓄᐃᑦ ᐃᓕᖁᓯᖏᓐᓂᒃ, ᐅᖃᐅᓯᖏᓐᓂᒡᓗ ᐊᒻᒪ ᒪᓂᑐᐃᓐᓇᐅᙱᓐᓂᖏᓐᓂᒃ ᓴᕿᔮᖅᑎᑦᑎᓯᒪᓪᓗᑎᒃ.

ᐱᓕᕆᖃᑎᖃᕐᓂᒃᑯᑦ ᑎᑎᕋᐅᔭᒐᑦ ᐊᑐᖅᑕᐅᓯᒪᕗᑦ ᓇᓗᓇᐃᕐᓯᒍᑎᐅᓪᓗᑎᒃ ᐱᒻᒪᕆᖕᓂ ᐊᑐᖅᑕᐅᔪᓂᒃ ᓄᓇᕗᒥᑦ ᐊᒻᒪ ᑲᓇᑕᐅᑉ ᓂᒋᐊᓂᒃ. 2013-ᒥᑦ, ᐊᖏᔪᐊᓗᒃ ᓴᓇᙳᐊᒐᖅ ᑲᒪᒋᔭᐅᓪᓗᓂ ᓄᓇᕗᑦ ᑐᙵᕕᒃᑯᓐᓄᑦ ᒪᑐᐃᖅᑕᐅᓚᐅᕐᓯᒪᔪᖅ ᐃᖃᓗᖕᓂ ᖁᕕᐊᓲᑎᖃᖅᖢᑎᒃ ᐊᕐᕌᒍ 20-ᓂ ᓇᓪᓕᐅᕐᓂᕐᓯᐅᖅᖢᑎᒃ ᓄᓇᕗᑦᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ. ᓴᓇᔭᐅᓪᓗᓂ ᐃᓄᒃ ᓵᓕ, ᐹᓪ ᒪᓕᑭ ᐊᒻᒪ ᓘᑎ ᐱᔭᒥᓂ, ᐊᖏᓂᖃᖅᑐᑦ 14 ᕖᑦᓂᒃ ᐃᖃᓗᖕᓂ ᐊᔾᔨᒌᙱᑦᑐᓂᒃ ᐃᓄᐃᑦ ᐃᓕᖁᓯᖏᓐᓄᑦ ᓇᓗᓇᐃᒃᑯᑎᓂᒃ ᐊᒻᒪ ᐊᓯᐅᑐᐃᓐᓇᙱᓐᓂᕐᒥᒃ. ᐅᓇ ᓴᓇᙳᐊᒐᖅ ᐃᓄᖕᓄ, ᐃᓄᖕᓂ.

2010-ᒥᑦ, ᑲᑕᐃᓯ ᑲᒃᑭ, ᐅᓛᓯ ᐋᑯᓗᒃᔪᒃ, ᐊᓇ ᐃᑐᐊᖓᑦ, ᓖᓯ ᑲᒃᑭ ᐊᒻᒪ ᑳᑎ ᐹᑎ ᐸᖕᓂᖅᑑᒥᐅᑕᑦ ᓴᓇᓚᐅᕐᓯᓚᔪᑦ ᓄᕕᕐᓵᒃᓴᒥᑦ ᓴᓇᓯᒪᔪᒥᑦ ᑎᑎᕋᐅᔭᖅᑕᐅᓯᒪᔪᒥᑦ ᐋᓐᑐᕉ ᖄᐱᒃᒧᑦ, ᐃᓚᖃᕆᓪᓗᑎᒃ ᓴᓇᐅᒐᓕᐅᕐᑎᓂᒃ ᐊᓯᖏᓐᓃᑦᑐᓂᒃ ᐃᓄᐃᑦ ᓄᓇᖓᓂᒃ. ᑲᒪᒋᔭᐅᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᕚᓐᑰᕙᒥ ᐅᓕᒻᐱᒃᓄᑦ, ᐃᓱᒪᒋᔭᒥᑦ ᐊᑐᓕᖅᑎᑦᑎᓂᖅ 10 ᕖᑦᓂᒃ ᓴᓂᒨᖓᕗᖅ, 6 ᕖᑦᒥᑦ ᑕᑭᓂᓕᒃ ᓴᕿᔮᖅᑎᑦᑎᓪᓗᓂ ᐃᓄᐃᑦ ᐱᙳᐊᕈᓯᑐᖃᖏᓐᓂᒃ ᐊᒻᒪ ᒫᓐᓇᓕᓴᕐᓂᒃ ᐱᙳᐊᒐᕐᓂᒃ ᑲᑕᐅᔭᑎᑐᑦ ᑕᕐᓴᖃᑦᑎᐊᖅᖢᑎᒃ.

ᐊᓯᒃᑲᓐᓂᐊᒍᓪᓕ, ᓴᓇᐅᒐᓕᐅᕐᑎᑦ ᓴᓇᖃᑦᑕᖅᑐᑦ ᐅᕙᓂ ᐃᒡᓗᕋᓛᒥᑦ ᓴᓇᙳᐊᕐᕕᒃᒥᑦ (Matchbox Gallery) ᑲᖏᖅᖠᓂᕐᒥᑦ ᓴᓇᓯᒪᓕᕐᐳᑦ ᐱᐅᔪᐊᓗᖕᓂᑦ, ᐊᔾᔨᒌᙱᑦᑑᑎᓂᒃ ᒪᕋᕐᒥ ᓴᓇᓯᒪᔪᓂᒃ. ᖃᑦᑕᐅᔭᕐᔪᐊᓃᖢᑎᒃ ᕿᓪᓗᖅᑕᐅᔪᕕᓂᕐᓄᑦ ᕿᔪᖕᓄᑦ ᐃᑯᒪᑎᑕᐅᔪᓂᒃ ᓴᓇᕝᕕᖓᑕ ᓯᓚᑖᓂ, ᑖᒃᑯᐊ ᓴᓇᔭᐅᕙᒃᑐᑦ ᑎᑎᕋᐅᔭᖅᑎᓄᑦ ᕌᔾᔪ ᐊᒃᓴᒃᔪᐊᖅ, ᐱᐊᕆ ᐊᐅᐱᓛᕐᔪᒃ, ᔮᓐ ᑯᕋᒃ ᐊᒻᒪ ᓕᐅ ᓇᐸᔪᖅ, ᑖᒃᑯᐊᓗ ᐱᐊᓂᒃᑕᖏᓐᓂᒃ ᕿᒥᕐᕈᐊᖅᑎᑦᑎᓪᓗᑎᒃ ᐃᓚᒋᐊᖃᕐᒪᖔᑦ, ᐊᓯᙳᕆᐊᖃᕐᒪᖔᑦ ᐊᒻᒪ ᐊᓯᐊᒎᕈᓐᓇᕐᒪᖔᑦ.

ᐊᔾᔨᒌᙱᑦᑐᓂᒃ ᑎᑎᕋᐅᔭᒐᓕᐅᕐᓂᖅ ᓄᑖᙳᙱᑦᑐᖅ ᓄᓇᓕᖕᓂᑦ ᓄᓇᕗᒥᑦ. ᑕᒪᓐᓇ ᐊᑐᖅᑕᐅᔭᕆᐊᖃᖅᐸᓚᐅᕐᑐᖅ ᐅᓄᖅᑐᓕᐅᕆᓂᕐᒧᑦ ᐱᓕᕆᐊᓂᒃ ᖃᒪᓂᑦᑐᐊᕐᒥᑦ, ᑭᙵᓂᑦ, ᐸᖕᓂᕐᑑᒥᑦ ᐊᒻᒪ ᐅᖓᑖᓄᑦ ᑕᐃᒪᙵᑦ ᑎᑎᕋᐅᔭᒐᓕᐅᕐᐸᓕᕐᒪᑕ ᐊᕐᕌᓂᐅᓚᐅᕐᓯᒪᔪᖅ 60 ᑭᖑᓂᑦᑎᓐᓂ. ᐃᒻᒪᖄᓪᓘᓐᓃᑦ, ᕿᓄᐊᔪᐊᒃ ᐋᓯᕙᒃ ᐃᓄᑑᙱᑦᑐᖅ ᓴᓇᓂᕐᒥᒃ ᐆᒥᖓ “ᓯᓚᕗᑦ ᓄᓇᕗᑦ”. ᐱᑦᓯᐅᓛᒃ ᓂᕕᐊᕐᓯ, ᑎᑎᕋᐅᔭᒐᖅᑎᒻᒪᕆᒃ, ᓴᕿᑎᑦᑎᒃᑲᓐᓂᓚᐅᕐᑐᖅ ᐅᔭᕋᒃᒧᑦ ᑎᑎᕋᐅᔭᒐᖅᑕᕕᓂᖓ ᐋᓯᕙᐅᑉ. ᑎᑎᕋᐅᔭᒐᖓ ᐃᔾᔪᐊᖅᐸᓪᓕᐊᓪᓗᓂᐅᕐ, ᐋᕿᒃᓱᐃᓚᐅᕐᓯᒪᕗᖅ ᐅᔭᕋᖕᒥ ᐊᒥᐊᕐᕕᐅᓂᐊᖅᑐᒥᑦ ᐊᒻᒪ ᓂᕈᐊᖅᖢᓂ ᖃᓄᖅ ᑕᕐᓴᖃᕐᓂᐊᕆᐊᒃᓴᖏᓐᓂᑦ ᐅᑯᐊᓘᓐᓃᑦ ᐋᓯᕙᐅᑉ ᓯᕿᓂᙳᐊᖏ ᖁᕐᓱᕐᓂᖏᓐᓄᑦ.

ᓯᕿᓂᖅ ᓴᕿᓕᖅᑎᓪᓗᒍ ᓄᓇᕗᒥᑦ, ᐊᕐᕌᒎᓕᖅᐳᑦ 20 ᑕᐃᒪᙵᓂᑦ ᐃᓕᓴᕆᔭᐅᓚᐅᖅᑎᓪᓗᒍ ᑎᐅᕆᑑᕆᒥ, ᓴᕿᓕᖅᐳᖅ ᓄᑖᓄᑦ ᓴᓇᐅᒐᓕᐅᖅᑎᐅᓂᐊᖅᑐᓂᑦ ᐊᖏᕐᕋᖏᑦᑕ ᐅᖓᑖᓅᖓᔪᓂᒃ. ᑎᑎᕋᐅᔭᒐᖅᑏᑦ ᐅᑯᑎᑐᓇᖅ ᐊᓕᑎᐊ ᐊᕐᓇᖁᖅ-ᐳᕆᐅᓪ, ᐊᑏᓇ ᑕᕐᕋᓕᒃ ᑕᕕ, ᓂᐅᕆ ᐃᖃᓗᒃᔪᐊᖅ, ᑎᒥᐊᓐ ᐃᖁᐊᓚᖅ, ᕉᐸᓐ ᖁᒪᖔᕕᒃ, ᒦᒐᓐ ᖃᔮᖅ-ᒫᓐᑏᑦ, ᔭᓯ ᑐᖏᓕᒃ, ᐸᑦᓗ ᓴᐃᒪᔪᐊᓕ ᐊᒻᒪ ᐊᒥᓱᑦ ᐊᓯᖏᑦ ᐃᑲᔪᖅᑕᐅᓗᑎᒃ ᐊᑐᖅᑕᐅᓯᒪᓂᑰᓂᖏᓐᓂᒃ ᑎᑎᕋᐅᔭᒐᖅᑏᑦ ᓴᕿᑎᖃᑦᑕᕐᓂᑯᖏᓐᓂᒃ ᓱᓕ ᖁᕕᐊᓇᖃᑦᑕᕐᓂᐊᕆᕗᑦ ᐃᓕᓐᓂᐊᕈᑎᐅᓗᑎᒡᓗ ᓯᕗᓂᒃᓴᑲᓪᓚᑦᑎᓐᓂᑦ.

ᔮᓐ ᔪᕼᐃᒐᓐ ᐋᕿᒃᓱᐃᔨᐅᔪᖅ ᐊᖏᔪᒃᖠᖅ ᐃᓄᐃᑦ ᓴᓇᐅᒐᖏᑦ ᐅᖃᓕᒫᒐᒃᓴᒥᑦ. ᑎᑎᕋᖅᑎᐅᓪᓗᓂ ᐊᒻᒪ ᖃᐅᔨᓴᖅᑎᐅᕙᒃᖢᓂ ᒪᑯᓂᖓ ᓴᓇᐅᒐᓂᒃ ᑲᓇᑕᒥ ᓴᓇᔭᐅᔭᒃᑐᓂᒃ, ᑐᕌᓐᑐᒥᐅᑕᐅᔪᖅ.