ᐃᓅᓱᒃᑐᑦ ᓄᓇᕗᒥᑦ ᑭᒡᒐᖅᑐᐃᔪᑦ ᐃᑲᔪᖅᑐᐃᕗᑦ ᐃᓚᒌᑦ ᓄᓇᕗᑦᒥ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥᒃ

For English version, see Youth ambassadors cheer on Team Nunavut at Canada Summer Games

ᐱᙳᐊᖅᑎᑦ ᐱᓕᕆᖃᑎᒌᒃᑐᑦ ᐱᙳᐊᕐᓂᕐᒧᑐᐊᖅ ᐱᓕᕆᐊᖃᙱᑦᑐᑦ

ᐱᙳᐊᖅᑏᑦ ᑕᒪᑐᒥᖓ ᑲᔪᓯᑎᑦᑎᓯᒪᔪᑦ ᑭᓯᐊᓂᓕ ᐃᑲᔪᖅᑎᐅᕙᒃᑐᑦ ᐅᖃᐅᔾᔨᖃᑦᑕᕆᐊᓖᑦ ᐊᒻᒪᓗ ᓯᕗᓕᐅᖅᑎᐅᕙᒡᓗᑎᒃ, ᓘᒃᑖᓪᓗ ᐃᑲᔪᖅᐸᒃᖢᑎᒃ ᖃᓄᐃᑎᑦᑎᑦᑕᐃᓕᓂᒃᑯᑦ, ᐊᒻᒪᓗ ᐃᑲᔪᖅᑐᐃᔩᑦ ᑖᒃᑯᓂᐊ ᐱᓕᕆᐊᖃᖅᑎᑦᑎᑦᑎᐊᕋᓱᒃᑐᑦ.

ᐅᑯᓄᖓᓕ ᐃᓚᒌᑦ ᓄᓇᕗᒥᑦ ᐅᕙᓂ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥᒃ, ᑖᒃᑯᓄᖓ ᐃᓚᒋᔭᐅᒻᒪᕆᒃᑐᑦ ᐅᑯᐊ ᓄᓇᕗᒥᑦ ᐃᓅᓱᒃᑐᑦ ᑭᒡᒐᖅᑐᐃᔨᐅᔪᑦ.

ᑭᒡᒐᖅᑐᐃᔩᑦ ᒪᕐᕉᖕᓂ ᓯᕗᓕᐅᖅᑎᖃᖅᑐᑦ ᐊᒻᒪᓗ ᖁᓕᓂᒃ ᐃᓅᓱᒃᑐᓂᒃ ᐃᑲᔪᖅᑎᐅᕙᒃᑐᑦ ᖃᓄᐃᓕᐅᕐᓇᐅᑎᓪᓗᒍ ᐊᒻᒪᓗ ᑭᒡᒐᖅᑐᐃᔨᐅᓪᓗᑎᒃ ᓄᓇᕗᒥᑦ ᑖᒃᑯᓇᓂ ᐱᙳᐊᕕᒡᔪᐊᕐᓇᓂᒃ.

ᐃᑲᔪᖃᑦᑕᖅᑐᑦ ᐱᙳᐊᖅᑎᓂᒃ ᐃᓂᒋᓂᐊᖅᑕᖏᓐᓂᒃ ᖃᐅᔨᒪᔨᐅᓪᓗᑎᒃ, ᐃᓯᕈᓐᓇᐅᑎᖏᓐᓂᒃ, ᐅᓪᓚᑲᑕᖕᓂᐊᖅᐸᑕ ᐅᓪᓚᒡᕕᒃᓴᖏᓐᓂᒃ ᐋᖅᑭᒃᓱᐃᔨᐅᓪᓗᑎᒃ, ᑐᙵᓱᒃᑎᑦᑎᔨᐅᓪᓗᑎᒃ ᖃᓄᐃᓕᐅᕈᑎᓂᒃ ᐊᒻᒪᓗ ᓲᖃᐃᒻᒪ ᐃᑲᔪᖅᑎᒻᒪᕆᐅᓪᓗᑎᒃ ᐱᙳᐊᖅᑎᓂᒃ ᐱᙳᐊᑲᑕᓕᕌᖓᑕ, ᑖᓐᓇᓗ ᐱᓕᕆᐊᕆᔭᐅᓪᓗᓂ ᓇᐃᐊᒍᕋ ᒥᒃᓵᓂᑦ ᐋᓐᑎᐅᕆᐅᒥ ᐋᒐᓯ 6-ᒥ 22-ᒧ.

ᐃᓱᒪᒋᔭᐅᔪᑦ ᐃᓚᒋᔭᐅᓪᓚᕆᖕᓂᖏᓐᓂᒃ ᐃᓚᒌᑦ ᓄᓇᕗᒧᑦ — ᐊᑐᓂ ᑭᒡᒐᖅᑐᐃᔨ ᐃᓚᒌᓄᑦ ᐊᓐᓄᕌᖃᖅᑎᑕᐅᖕᒥᔪᖅ.

“ᓇᒃᓴᖃᑦᑕᖅᑕᕗᑦ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᑕᒪᓐᓇ ᐃᓱᓕᑎᑦᑎᐊᕐᓂᐊᕋᑦᑎᒍᑦ ᐊᒻᒪᓗ ᖃᐅᔨᕚᓪᓕᕐᓗᑎᒃ ᐱᙳᐊᕕᒡᔪᐊᕐᓇᒥᑦ ᑕᒪᐃᑎᒍᑦ,” ᐅᖃᕐᑐᖅ ᑰᕆ ᓯᑭᓄ, ᐊᔪᖅᑳᕆᔭᐅᓚᐅᕐᑐᖅ ᓄᓇᕗᒥᑦ ᐃᓄᒃᓱᒃᑐᑦ ᑭᒡᒐᖅᑐᐃᔨᓄᑦ ᐱᓕᕆᐊᒥᒃ.

ᐃᓚᒌᑦ ᓄᓇᕗᒧᑦ ᐃᓅᓱᒃᑐᑦ ᑲᒪᔨᐅᔪᑦ ᐃᑲᔪᖅᑐᐅᕗᑦ ᐊᖑᑏᑦ ᐃᓚᒌᑦ ᕚᓕᐹᕐᑎᖏᓐᓂᒃ ᐅᕙᓂ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥᒃ ᐋᒐᓯ 17ᖑᑎᓪᓗᒍ ᓇᐃᐊᒍᕋᒥ. (ᐊᔾᔨᓕᐅᕆᔨ ᑕᓂᔅ ᑮᕼᐃᐅᓪ)

ᐃᒪᓐᓇ ᐃᓱᒪᒋᔭᐅᖕᒪᑦ ᐅᑯᐊ ᐃᓅᓱᒃᑐᑦ ᐊᔪᕈᓐᓃᕐᓴᕐᓗᑎᒃ ᐃᑲᔪᖅᑐᐃᔨᐅᓂᕐᒥᒃ ᐊᒻᒪ ᓯᕗᓕᐅᖅᑎᐅᔪᓐᓇᕐᓂᕐᒥᒃ ᐊᖏᕐᕋᖏᓐᓂᒃ ᐊᑐᓕᕈᓐᓇᖅᑕᖏᓐᓂᒃ, ᓯᑭᓄ ᐅᖃᕐᑐᖅ.

ᐊᕐᕌᒍ ᐱᙳᐊᕕᒡᔪᐊᕐᓇᖅ ᐊᒡᒋᖅᐸᓪᓕᐊᓕᕐᑎᓪᓗᒍ ᑖᒃᑯᐊ ᐱᓕᕆᐊᒥ ᐃᓚᐅᔪᑦ, ᑕᒪᕐᒥᒃ 16-ᓗ 21-ᓗ ᐊᑯᓐᓂᖓᓂ ᐅᑭᐅᕐᖃᖅᖢᑎᒃ, ᐱᐊᓂᒃᓯᓚᐅᕐᓯᒪᖕᒪᑕ ᐃᓕᓐᓂᐊᕈᑎᓂᒃ ᐅᑭᐅᕐᑕᖅᑐᕐᒥ ᐱᙳᐊᖅᑐᓕᕆᓂᕐᒥᒃ ᐊᒻᒪᓗ ᐸᕐᓇᒃᖢᑎᒃ ᓄᓇᓕᖕᓂ ᖃᓄᐃᓕᐅᕈᑎᐅᓛᖅᑐᓂᒃ ᐊᖏᕐᕋᖏᓐᓂᒃ.

ᒌᐳᕆᐅᓪ ᓂᒪᖅᑕᖅᑐᖅ, 18, ᐱᓕᕆᐊᒃᓴᒥ ᖃᐅᔨᓚᐅᕐᑐᖅ ᐃᓕᓐᓂᐊᕐᕕᖓᓂᒃ. ᐋᖅᑭᒃᓱᐃᓕᓚᐅᕐᓯᒪᔪᖅ ᓄᓇᓕᖕᓂ ᐱᓕᕆᐊᖃᕐᓂᕐᒧᑦ ᖃᓄᐃᓕᐅᕈᑎᓂᒃ ᓄᓇᖓᓂᒃ ᐅᖅᓱᖅᑑᖅᒥ ᐃᓅᓱᒃᑐᓂ ᐃᓐᓇᕐᓂᒡᓗ ᑲᑎᑎᑦᑎᓪᓗᓂ ᐅᖃᓪᓚᖃᑎᒌᑲᑕᖕᓂᐊᕐᒪᑕ ᐃᓄᑑᖏᔾᔫᒥᓗᑎᒃ ᐅᓇ ᓄᕙᒡᔪᐊᕐᓇᖅ-19 ᐱᒋᐊᓕᓵᖅᓯᒪᐸᓗᒃᑎᓪᓗᒍ.

ᓄᓇᖓᓂ ᐊᐅᓪᓚᓚᐅᕐᓯᒪᒐᓗᐊᖅᖢᓂ ᓄᑕᕋᐅᓪᓗᓂ ᐋᓐᓂᐊᕕᓕᐊᖅᖢᓂ, ᐅᓇ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᖅᒧᑦ ᐋᓐᑎᐅᕆᐅ ᓇᐃᐋᒍᕋᐅᑉ ᒥᒃᓵᓂ ᓯᕗᓪᓕᖅᐹᖑᑕᑕᐅᔪᖅ ᓂᒥᖅᑕᖅᑐᖅ ᓄᓇᕗᒥᑦ ᕿᒪᐃᓂᖓ, ᐅᖃᕐᑐᖅ.

ᐅᑯᐊ ᑲᒪᔨᐅᔪᑦ ᑐᙵᓱᒃᑎᑦᑎᓚᐅᕐᑐᑦ ᐅᐸᒐᒃᑕᐅᕝᕕᖓᓂ ᓄᓇᕗᑦ ᒥᒃᓵᓅᖓᔪᓂᒃ ᐊᒻᒪᓗ ᖃᐅᔨᒪᓂᕐᒧᑦ ᐱᙳᐊᕈᓯᖃᖅᑎᑦᑎᔨᐅᓪᓗᑎᒃ ᐊᒻᒪᓗ ᐃᓄᐃᑦ ᐱᙳᐊᕈᓯᖏᓐᓂᒃ ᑕᐅᑐᒃᑎᑦᑎᓪᓗᑎᒃ.

ᐃᓄᐃᑦ ᓂᕿᖏᓐᓂᒃ ᐱᑕᖃᖅᑎᑦᑎᓚᐅᕐᒥᔪᑦ ᒥᒃᑯᓕᐊᕕᓂᕐᓂᒃ ᓂᕆᔭᐅᔪᓐᓇᖅᑐᓂᒃ ᐊᒻᒪᓗ ᐃᑲᔪᖅᐸᒃᖢᑎᒃ ᐃᓄᖕᓂ ᐊᑎᖏᓐᓂᒃ ᐃᓄᒃᑎᑐᑦ ᑎᑎᕋᖅᑕᐅᖁᔨᔪᓂᒃ.

“ᐅᓄᕐᓂᕐᓴᐃᑦ ᓱᕈᓰ ᑲᙳᓱᖃᑦᑕᖅᑕ ᑭᓯᐊᓂᓕ ᖃᓄᐃᓚᐅᙱᑦᑐᖅ,” ᓯᑭᓄ ᐅᖃᕐᑐᖅ.

“ᐱᓕᕆᖃᑎᖃᑦᑎᐊᑲᑕᓚᐅᕐᑐᑦ ᐃᓄᖕᓂ ᖁᕕᐊᓇᑦᑎᐊᖅᖢᓂᓗ ᑕᑯᓪᓗᒍ,” ᓯᑭᓄ ᐅᖃᕐᑐᖅ

“ᐃᓄᖕᓂ ᖃᓄᐃᓕᐅᖃᑎᖃᑲᑕᓚᐅᕐᑐᑦ ᐊᒻᒪᓗ ᑖᒃᑯᐊ ᓴᖅᑭᔮᒐᓕᖕᓂ ᐱᓕᕆᓛᖑᑲᑕᒃᖢᑎᒃ.”

ᓂᒥᖅᑕᖅᑐᖅ ᐅᖃᓚᐅᕐᑐᖅ ᖁᕕᐊᓇᕐᓂᖅᐹᖑᓂᕋᖅᖢᓂᐅᒃ ᑐᙵᓱᒃᑎᑦᑎᔨᐅᖃᑕᐅᓂᕐᒥᒃ ᐅᓇ ᑕᐅᑐᒃᖢᓂ “ᐃᓄᐃᑦ ᑮᓇᖏᑦ ᖃᓄᐃᓕᖓᓂᖏᓐᓂᒃ” ᑕᑯᔭᕌᖓᒥᒃ ᖃᓄᖅ ᓄᓇᕗᒥᑦ ᐃᓅᓯᖃᕐᓂᕐᒥᒃ.

ᖁᕕᐊᒋᔭᖃᓚᐅᕐᒥᔪᖅ ᑲᑎᕐᓱᐃᕙᓪᓕᐊᓪᓗᓂ ᖃᑭᖅᑯᐊᓂᒃ — ᓄᓇᕗᑦ ᖃᑭᖅᑯᐊᕆᔭᖓ ᐱᐅᒋᔭᐅᒻᒪᕆᓚᐅᕐᑐᖅ ᐱᙳᐊᕕᒡᔪᐊᖅᑐᓂᒃ — ᐊᒻᒪᓗ ᓂᕆᐅᖕᓂᕋᖅᖢᓂ ᐱᐊᓂᓕᖅᐸᑕ ᖃᓄᐃᓕᐅᕈᑎᐅᓛᖅᑐᓂᒃ ᐋᒐᓯ 21-ᖑᓕᕐᐸᑦ.

ᐅᕇᑦᓱᓪ ᑕᒎᓇ-ᑖᐸᑕᐃ, 20, ᐱᙳᐊᖃᑦᑕᕐᒥᔪᖅ ᐱᕈᕐᓴᓯᒪᓪᓗᓂ ᕼᐋᑭᖃᑦᑕᖅᖢᓂ, ᕚᓕᐹᓪ, ᐹᔅᑭᑦᐹᓪ ᐊᒻᒪ ᑭᐳᒥ ᑕᓂᔅ ᐊᖏᕐᕋᖓᓂ ᖃᒪᓂᑦᑐᐊᕐᒥ.

ᐱᐅᒋᓂᖅᐹᕆᓚᐅᕐᑕᖓ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᐅᓇ ᓄᓇᓕᖕᓂ ᓇᒧᙵᐅᑲᑕᕐᓂᖅ, ᑕᑯᑲᑕᒃᖢᓂ ᐱᙳᐊᕈᓯᕐᓂᒃ ᓄᓇᕗᒥᑦ ᑕᑯᔭᒃᓴᐅᓗᐊᙱᑦᑐᓂᒃ ᐊᒻᒪᓗ ᐱᖃᑎᖃᑲᑕᒃᖢᓂ ᐱᙳᐊᖅᑎᐅᖃᑕᐅᔪᓂᒃ ᐊᖑᑎᓂᒃ ᕚᓪᓕᐹᖅᑎᓂᒃ.

ᐊᖏᕐᕋᖓᓂᓕ, ᑕᒎᓇ-ᑖᐸᑕᐃ ᐋᖅᑭᒃᓱᐃᓚᐅᕐᑐᖅ ᐊᓐᓄᕌᓂᒃ ᑲᑎᕐᓱᐃᓇᓱᒃᖢᓂ ᐃᓅᓱᒃᑐᒃᑯᕕᒃᒥᑦ, ᑲᑎᕐᓱᐃᓪᓗᓂ ᐊᓐᓄᕌᓂᒃ ᐊᒻᒪ ᐃᒡᓗᒥᐅᑕᓂᒃ ᐃᓄᖕᓄᑦ ᐱᔭᐅᑲᑕᒍᓐᓇᖅᑐᓂᒃ.

“ᐃᑲᔪᖅᑎᐅᖃᑕᐅᓂᖅ ᐅᕙᓂ ᖃᐅᔨᔾᔪᑎᒋᒐᒃᑯ ᐊᓯᒥ ᐃᓱᒪᖃᖅᖢᓂ ᐱᐅᓂᖓᓂᒃ,” ᐅᖃᕐᑐᖅ.

ᓯᑭᓄ ᐅᖃᓚᐅᕐᑐᖅ ᖃᓄᖅ ᒪᑯᐊ ᐃᓅᓱᒃᑐᑦ ᑭᒡᒐᖅᑐᐃᔩᑦ ᐱᓕᕆᐊᕆᔭᖏᑦ ᑕᐅᑐᒃᖢᒋ ᐱᙳᐊᕕᒡᔪᐊᕐᓇᐅᑉ ᓯᕗᓂᐊᓂᒃ ᐊᒻᒪ ᐱᙳᐊᕕᒡᒧᐊᕐᓇᒥ ᖁᕕᐊᓇᒻᒪᕆᖕᓂᕋᖅᖢᓂᐅᒃ.

“ᐅᑯᐊ ᐊᒥᓱᑦ ᓱᕈᓰᑦ ᓄᓇᓕᖕᓂᙶᕐᒪᑕ ᐊᔾᔨᒋᔭᐅᙱᑦᑐᓂᒃ … ᑭᓯᐊᓂᓕ ᐱᖃᓐᓇᕆᔭᖃᖅᐸᓪᓕᐊᔪᑦ ᑕᒪᓐᓇᓗ ᐊᑯᓂᐊᓗᒃ ᑕᐃᒪᐃᓐᓇᔭᖅᖢᓂ,” ᓯᑭᓄ ᐅᖃᕐᑐᖅ.

“ᓲᕐᓗᓕ ᐊᑕᐅᓯᙳᕐᒪᑕ ᐱᓕᕆᖃᑎᒌᑦ.”

ᑖᒃᑯᑎᑐᓇᖅ ᐱᙳᐊᖅᑎᐅᔪᑎᑐᑦ.