ᐃᒻᒥᒃᑰᖓᔪᑦ ᐋᓐᓂᐊᖅᑐᓕᕆᕝᕕᐅᔪᑦ’ ᐱᓕᕆᓂᕐᓴᐅᓕᕋᓗᐊᖅᐸᑕ ᐋᓐᑎᐅᕆᐅᒥ ᐊᒃᑐᐃᓂᖃᔾᔮᙱᑦᑐᖅ ᓄᓇᕗᒥᑦ: ᒪᐃᓐ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᐅᖃᕐᑐᖅ ᓄᓇᕗᒥᑦ ᒐᕙᒪᒃᑯᑦ ᑲᔪᓯᓂᐊᕐᓂᕋᖅᖢᓂᒋᑦ ᐱᔨᑦᑎᕋᐅᑎᒋᔭᖏᓐᓂᒃ ᐊᖏᕈᑎᑎᒍ ᖃᓪᓗᓈᓂ ᐱᓕᕆᖃᑎᒋᔭᖏᓐᓂᒃ

ᐋᓐᑎᐅᕆᐅᒥ ᐋᖅᑭᒃᑕᐅᔪᒪᔪᖅ ᐃᑲᔫᑎᑖᖅᑎᑦᑎᔪᒪᓂᖏᓐᓂᒃ ᐃᒻᒥᒃᑰᖓᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐱᔨᑦᑎᕋᐅᑎᖃᖅᑐᓂᒃ ᑭᒃᑯᓕᒫᓄᑦ ᐊᒃᑐᐃᓂᖃᓪᓗᐊᙱᑦᑐᖅ ᑲᒪᒋᔭᐅᕙᒃᑐᓂᒃ ᐋᓐᑎᐅᕆᐅᒥ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᒪᓂᒪᓯᒪᔭᖓᓂᒃ ᓄᓇᕗᒻᒥᐅᓄᑦ, ᐅᖃᕐᑐᖅ ᓄᓇᕗᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔭᓐ ᒪᐃᓐ ᐅᕙᓂ ᐊᔾᔨᖃᕐᑐᖅ ᐅᖃᓚᐅᕐᑐᖅ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᑕᐃᕕᑦ ᓛᕼᐄᑦ

ᐋᓐᑎᐅᕆᐅᒥ ᐋᖅᑭᒃᓯᔪᒪᓂᖏᑦ ᐃᒻᒥᒃᑰᕐᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᓕᕆᔨᓂ ᐊᒃᑐᐃᓂᖃᓪᓗᐊᙱᑦᑐᖅ ᓄᓇᕗᒻᒥᐅᑦ ᑲᒪᒋᔭᐅᖃᑦᑕᕆᐊᖃᕐᓂᖏᓐᓂᒃ ᑕᕝᕙᓂ ᐋᓐᑎᐅᕆᐅᒥ, ᐅᖃᓚᐅᕐᑐᖅ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ.

ᐋᓐᑎᐅᕆᐅᒥ ᒐᕙᒪᒃᑯᑦ ᑐᓴᖅᑎᑦᑎᓚᐅᕐᑐᑦ ᔭᓄᐊᕆ 16-ᒥ ᐊᖏᒡᓕᒋᐊᖅᑎᑦᑎᓂᐊᕐᓂᕋᐃᓪᓗᑎᒃ ᐊᒻᒪ ᐃᑲᔫᑎᖃᖅᑎᑦᑎᓗᑎᒃ ᐃᓚᖏᓐᓂᒃ ᐱᔨᑦᑎᕋᐅᑎᓂᒃ ᐃᒻᒥᒃᑰᖓᔪᓂᒃ ᐋᓐᓂᐊᖃᕐᓇᙱᑦᑐᓕᕆᕝᕕᖕᓂ ᒪᑯᐊ ᐋᓐᓂᐊᕕᐊᓗᖕᓂ ᐱᓚᒃᑕᐅᔭᕆᐊᖃᖅᑐᑦ ᑭᖑᕙᓯᙱᓐᓂᕐᓴᐅᑎᓐᓇᓱᒡᓗᒋᑦ ᐋᓐᑎᐅᕆᐅᒥ.

ᐱᓕᕆᐊᖑᕙᓕᐊᓂᐊᕐᓗᓂ ᐸᕐᓇᐅᑎ ᐋᖅᑭᒃᓯᒪᔪᖅ ᐃᒻᒥᒃᑰᖓᔪᑦ ᐋᓐᓂᐊᖃᕐᓇᙱᑦᑐᓕᕆᔨᐅᔪᑦ ᐃᔨᖏᑦᑎᒍᑦ ᐱᓚᒃᑕᐅᔭᕆᐊᓕᖕᓂ ᐱᓕᕆᐊᖃᕐᓂᕐᓴᐅᓕᕋᔭᕐᑐᑦ, ᐊᔾᔨᓕᐅᕆᓂᕐᓴᐅᓗᑎᒃ ᐊᒻᒪᓗ ᓰᖅᑯᕐᓂ ᐊᓯᔾᔨᕈᓐᓇᕐᓕᕐᓗᑎᒃ ᐊᒻᒪ ᐅᒃᐸᑎᐅᑉ ᓴᓂᕋᖏᓐᓂᒃ ᓴᐅᓂᕐᓂ. ᒐᕙᒪᒃᑯᑦ ᐃᒪᐃᓕᐅᕈᒪᖕᒪᑕ ᑕᒪᒃᑯᐊ ᑕᒪᕐᒥᒃ ᐱᔨᑦᑎᕋᐅᑎᒋᔭᐅᔪᑦ ᐃᒻᒥᒃᑰᖓᔪᓄᑦ ᐋᓐᓂᐊᖅᑐᓕᕆᔨᓄᑦ ᐱᓕᕆᐊᖑᓕᕐᓗᑎᒃ 2024ᒥ, ᐊᒻᒪᓗ ᐋᓐᓂᐊᕕᖕᓂ ᐱᓚᒃᑕᐅᔭᕆᐊᖃᕐᑐᑦ ᐅᑕᕿᔪᑦ ᑕᐃᒪᙵᑦ ᓄᕙᒡᔪᐊᕐᓇᖅ-19 ᓯᕗᓂᐊᓂ ᐊᑐᓚᐅᕐᑐᑎᑑᖓᓕᕐᓗᓂ ᒫᓐᓇᒥ.

ᐱᔨᑦᑎᕋᐅᑏᑦ ᐊᖏᒡᓕᒋᐊᖅᑎᑕᐅᓂᐊᖅᑐᑦ ᐅᑯᑎᒎᓇᖅ ᐃᒻᒥᒃᑯᑦ ᐋᓐᓂᐊᖅᑐᓕᕆᕝᕕᖕᓄᑦ ᐊᑭᓕᕐᓱᖅᑕᐅᓇᔭᕐᑐᑦ ᐅᑯᓇᙵᑦ ᐋᓐᓂᑎᐅᕆᐅᒥ ᐋᓐᓂᐊᖃᖅᑕᐃᓕᓂᕐᒧᑦ ᓇᐅᑦᑎᐅᒃᑯᒫᑎᒍᑦ, ᐅᖃᓚᐅᕐᑐᖅ ᕼᐋᓇ ᔨᐊᓐᓴᓐ, ᐅᖃᖅᑎᒋᔭᐅᔪᖅ ᐋᓐᑎᐅᕆᐅᒥᒃ ᐋᓐᓂᐊᖃᖅᑕᐃᓕᓂᕐᒧᑦ ᒥᓂᔅᑕᒧᑦ ᓯᐊᕕᐊ ᔫᓐᔅᒧᑦ.

ᐋᓐᑎᐅᕆᐅᒥ ᐸᕐᓇᐅᑎᖓ ᓴᖅᑭᓚᐅᕐᑐᖅ ᑲᓇᑕᒥ ᓯᕗᓕᐅᖅᑎᐅᔪᑦ, ᐃᓚᐅᓪᓗᓂ ᓄᓇᕗᒧᑦ ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ, ᑲᑎᓚᐅᕐᓯᒪᑎᓪᓗᒋ ᕕᕝᕗᐊᕆ 7 ᑲᓇᑕᒧ ᐊᖓᔪᖅᑳᖅ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ ᐃᓚᐅᓪᓗᓂ ᐅᖃᐅᓯᖃᖅᖢᑎᒃ ᒐᕙᒪᑐᖃᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᓕᕆᔾᔪᑎᖏᓐᓂᒃ ᐋᓐᑎᐅᕆᐅᒥ.

ᐃᓚᖏ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᐅᔪᑦ ᐆᑐᓇᖅ ᓘᒃᑖᖅ ᓈᓐᓯ ᕗᐃᑦᒧᐊ, ᐊᑎᓕᐅᖅᑎᑦᑎᔨ ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨ ᓯᓚᑦᑐᖅᓴᕐᕕᐊᓗᒃᒥ ᐋᓐᓂᐊᑐᓕᕆᓂᕐᒧᑦ ᐊᒻᒪ ᐱᓚᒃᑐᐃᓂᕐᒧᑦ ᐋᓐᑎᐅᕆᐅᒥ, ᓈᒻᒪᒃᓴᓚᐅᙱᑦᑐᑦ ᐋᓐᑎᐅᕆᐅ ᒐᕙᒪᖏᓐᓂᒃ ᐊᑐᕋᓱᖕᓂᖏᓐᓂᒃ ᐃᒻᒥᒃᑰᖅᑐᓂᒃ ᐋᓐᓂᐊᖅᑐᓕᕆᔨᓂᒃ.

ᕗᐃᑦᒧᐊ ᐅᖃᓚᐅᕐᑐᖅ ᐱᓕᕆᖃᑎᖏᑦ ᐃᓱᒪᖕᒪᑕ ᐅᓇ ᓈᒻᒪᙱᓕᐅᕈᑎᐅᓕᕐᓂᐊᕆᐊᒃᓴᖓᓂᒃ ᐃᖅᑲᓇᐃᔭᖅᑎᖃᕈᓐᓃᕐᓂᐊᕐᓂᕐᒥᒃ ᑭᒃᑯᓕᒫᓄᑦ ᐋᓐᓂᐊᖅᑐᓕᕆᔨᒃᑯᓐᓂᒃ ᐃᓚᐅᓕᕋᔭᕐᑐᓂᒃ ᐃᒻᒥᒃᑰᖅᑐᓄᑦ ᐋᓐᓂᐊᖅᑐᓕᕆᔨᓂᒃ.

ᐊᐱᕐᓱᖅᑕᐅᓪᓗᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᒪᐃᓐ ᐅᖃᓚᐅᕐᑐᖅ ᖃᓄᐃᒃᑲᓗᐊᖅᐸᑕ ᒪᑯᓂᖓ ᐃᒻᒥᒃᑰᖅᑐᓂᒃ ᐊᑐᕋᓱᒡᓗᑎᒃ ᐋᓐᑎᐅᕆᐅᒥ, ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᑲᔪᓰᓐᓇᕐᓂᐊᖅᑐᑦ ᓇᐅᑦᑎᐅᒃᑯᒫᑎᒍᑦ ᐱᔨᑦᑎᕋᐅᑎᓂᒃ ᒫᓐᓇ ᐊᑐᖅᑕᐅᕙᒃᑐᓂᒃ ᓄᓇᕗᒻᒥᐅᒧᑦ ᐋᓐᓂᐊᕐᕕᓕᐊᖅᑐᓂᒃ ᐋᓐᑎᐅᕆᐅᒥ.

“ᑕᒪᓐᓇ ᖃᓄᐃᓪᓗᐊᙱᑦᑐᖅ ᐋᓐᓂᐊᖅᑐᓕᕆᕝᕕᒃ ᑭᒃᑯᓕᒫᓅᖓᒐᓗᐊᖅᐸᑦ ᐃᒻᒥᒃᑰᖓᒃᐸᓪᓘᓐᓃᑦ,” ᐅᖃᕐᑐᖅ.

ᒪᐃᓐ ᐅᖃᓚᐅᕐᑐᖅ ᐃᖅᑲᓇᐃᔮᒃᓴᓕᕆᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᒡᒍᓴᐅᑎᒍᑎᒻᒪᕆᐅᖕᒪᓐ ᑲᓇᑕᒥ ᐊᒻᒪᓗ ᓄᓇᕗᑦ ᖃᐅᔨᓇᓱᑲᑕᒃᑐᑦ ᖃᓄᖅ ᓄᓇᕗᑦ ᑖᒃᑯᓄᖓ ᐱᓕᕆᔨᒻᒪᕆᖕᓄᑦ ᐱᓕᕆᕝᕕᐅᓕᕈᒪᓇᔭᕐᒪᖔᑦ.

ᐋᓐᑎᐅᕆᐅᒥ ᒐᕙᒪᒃᑯᑦ ᒪᐃᓐᒧ ᐅᖃᖃᑎᖃᓚᐅᙱᑦᑐᑦ ᐋᓐᑎᐅᕆᐅᒧᑦ ᓄᑖᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᓄᑦ ᐸᕐᓇᐅᑎᖏᓐᓂᒃ, ᐅᖃᕐᑐᖅ.

ᑭᓯᐊᓂᓕ ᓄᓇᕗᑦ ᐋᓐᑎᐅᕆᐅᒥ ᐱᔨᑦᑎᕋᐅᑎᓂᒃ ᐊᑐᖃᑦᑕᒻᒪᕆᒃᑎᓪᓗᒋᑦ, ᒪᐃᓐ ᐅᖃᓚᐅᕐᑐᖅ ᒐᕙᒪᖓ ᐅᖃᖃᑎᖃᕐᓂᐊᕐᓂᕋᖅᖢᓂᒋ ᐋᓐᑎᐅᕆᐅᒥ ᑕᐃᒪᐃᑦᑕᕆᐊᖃᕐᐸᑕ.

“ᑕᐃᒪᓕ ᐅᖃᖃᑎᒋᔭᕆᐊᖃᕈᑦᑎᒍᑦ ᑖᒃᑯᓄᖓ ᐅᖃᖃᑎᖃᕋᔭᒻᒪᕆᒃᑐᒍᑦ ᐃᓱᒫᓘᑎᒋᔭᑦᑎᓐᓂᒃ,” ᐅᖃᕐᑐᖅ.

ᒪᐃᓐ ᐅᖃᕋᓗᐊᖅᑎᓪᓗᒍ ᒐᕙᒪᖓᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐱᔨᑦᑎᕋᐅᑎᓂᒃ ᖁᔭᒋᔭᖃᒻᒪᕆᒃᑎᓪᓗᒋ ᖃᓪᓗᓈᓃᑦᑐᓄᑦ, ᓄᓇᕗᑦ ᐱᓕᕆᐊᖃᕋᓱᒃᑐᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᖃᒃᑲᓐᓂᕋᓱᒃᖢᑎᒃ ᓄᓇᕗᒥᑦ.

“ᕿᓂᕋᓱᒃᑲᑦᑕ ᖃᓄᖅ ᐱᓕᕆᐊᖃᒃᑲᓐᓂᕈᓐᓇᕐᒪᖔᑦᑕ,” ᐅᖃᕐᑐᖅ.

ᐅᖃᕐᑎᒋᔭᐅᔪᖅ ᑐᙵᓱᕝᕕᖓᑦ ᐃᓄᐃᑦᑯᓐᓄᑦ, ᑲᑐᔾᔨᖃᑎᒌᑦ ᑮᓇᐅᔭᓕᐅᕋᓱᒐᑎᒃ ᓄᓇᓕᕐᔪᐊᓂᒃ ᐱᔨᑦᑎᕋᐅᑎᓕᕆᔩ ᐃᓄᖕᓄᑦ ᐋᓐᑎᐅᕆᐅᒥ, ᐅᖃᕈᒪᓚᐅᙱᑦᑐᖅ ᐊᒃᑐᐃᔾᔪᑎᐅᓇᔭᖅᑐᓂᒃ ᐋᓐᑎᐅᕆᐅᒥ ᐃᓄᖕᓂ ᓄᓇᖃᖅᑐᓄᑦ ᑕᕝᕙᓂ.

ᓛᒐ ᐹᕕᓐ, ᑐᔪᕐᒥᕕᒃ ᐃᓄᖕᓄᑦ ᐋᓐᓂᐊᕕᓕᐊᖅᑐᓄᑦ ᐋᑐᕚᒥ ᕿᑭᖅᑖᓗᖕᒥᙶᖅᑐᓂᒃ, ᐅᖃᕐᕕᐅᓇᓱᓚᐅᕋᓗᐊᕐᒪᑕ ᑭᓯᐊᓂᓕ ᐅᖃᕈᓐᓇᖅᑐᒥ ᐊᑐᐃᓐᓇᖅᑕᖃᓚᐅᙱᒻᒪᑦ.

Share This Story

(0) Comments