ᐃᓄᐃᑦ ᑕᑯᒃᓴᐅᓂᖃᒃᑲᓐᓂᕈᒪᕗᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐃᖅᑲᐅᒪᔾᔪᑎᒥᑦ

ᐃᓄᐃᑦ ᖁᕕᐊᓱᒍᑕᐅᔪᒥ ᐅᖃᐅᓯᖃᕐᓂᕐᒧᑦ ᓯᕗᓂᒃᓴᒥ ᐃᓂᒃᓴᕆᓂᐊᖅᑕᖓᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᑲᓇᑕᒥ ᐃᖅᑲᐅᒪᔾᔪᑎᒥᑦ ᐅᖃᖅᐳᑦ ᓇᓗᓇᐃᖅᓯᔪᒪᕗᑦ ᐅᓂᒃᑳᓕᐊᖏᑦ ᑕᑯᒃᓴᐅᑎᑕᐅᓂᖏᓐᓂ ᐃᖅᑲᐅᒪᔾᔪᑎᒥ ᓴᓇᔭᐅᒍᓂ.ᑲᓇᑕᒥ ᐃᖅᑲᐅᒪᔾᔪᑎ ᓴᓇᔭᐅᓂᐊᖅᐳᖅ ᐊᑐᖅᑕᐅᓯᒪᙱᑦᑐᓂ ᐃᓂᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓂᖓᓂ ᐋᑐᕚᒥ, ᐱᓇᖕᓇᕐᒥ ᐱᓇᖕᓇᖓᓂ ᐃᓚᖓᓂ ᐃᒡᓗᕐᔪᐊᒥ, ᐃᒡᓗᒋᔭᐅᓚᐅᑲᒃᑐᒥ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᒡᔪᐊᖓᓂ ᕿᑎᖅᐸᓯᐊᓂ ᐃᓚᖓᓐᓂ ᐊᖏᔪᒥ ᓄᑖᙳᕆᐊᖅᑎᑕᐅᓂᖓᓂ.

ᑮᓇᐅᔭᐃᑦ ᐊᑐᖅᑕᐅᔪᒃᓴᑦ $20 ᒥᓕᐊᓐ−ᖑᕗᑦ, ᑭᓯᓂᐊ ᐅᓂᒃᑳᕆᓂᐅᔪᓂ ᖃᖓ ᓴᓇᔭᐅᓛᕐᓂᖓᓂ ᐊᒻᒪ ᖃᓄᖅ ᑕᐅᑦᑐᖃᕐᓂᐊᕐᓂᖓᓂ ᓱᓕ ᑐᑭᓯᓇᙱᓚᑦ. ᓄᓇᑦᓯᐊᕐᒥ ᑐᓴᒐᒃᓴᓕᕆᔨᒃᑯᑦ ᐊᐱᕆᓚᐅᖅᐳᑦ ᐅᑯᓂᐊ ᐊᐱᖅᑯᑕᐅᔪᓂ ᐱᓕᕆᕝᕕᖕᒧᑦ ᑲᓇᑕᒥ ᐃᑦᑕᕐᓂᓴᓕᕆᔨᒃᑯᓐᓄᑦ ᑭᖑᓂᐊᒍᑦ ᔫᓂ 20−ᒥ ᖁᕕᐊᓱᒍᑕᐅᔪᒥ ᑭᓯᐊᓂ ᐱᓚᐅᙱᓚᑦ ᑭᐅᓂᐅᔪᒥ.

ᖃᔅᓯᒐᓚᐃᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᓱᓕ ᐆᒪᔪᓂᑦ, ᐃᓚᖏᑦ, ᑲᑎᒪᔩᑦ ᒥᓂᔅᑕᖏᑦ, ᑭᒡᒐᖅᑐᐃᔨᐅᔪᑦ ᐅᒃᐱᖅᑐᓂ ᑲᑎᙵᓂᐅᔪᓂ ᐊᒻᒪ ᐊᓯᖏᓐᓂ ᐅᐱᒋᔭᐅᓂᐅᔪᓂ ᐃᓚᐅᓚᐅᖅᐳᑦ ᖁᕕᐊᓱᒍᑕᐅᔪᒧᑦ, ᐃᓚᖃᖅᑐᒥ ᑭᖕ ᑭᒡᒐᖅᑐᖅᑎᖓᓂ ᑲᓇᑕᒥ ᒥᐊᕆ ᓴᐃᒪᓐ ᐊᒻᒪ ᑲᓇᑕᒥ ᐊᖓᔪᖅᑳᕐᔪᐊᖅ ᔭᔅᑎᓐ ᑐᕉᑑ.

ᓴᓇᓂᕐᒥ ᑲᓇᑕᒥ ᐃᖅᑲᐅᒪᔾᔪᑎᒥᑦ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ ᖃᐃᖁᔨᓂᖓᓂ ᖃᓄᐃᓕᐅᕐᓂᕐᒧᑦ ᓈᓴᐅᑖ 81.

ᓇᕙᓕᒃ ᑐᓗᒐᓐᓇᖅ, ᐃᖃᓗᒃᑑᑦᑎᐊᕐᒥᐅᑕᖅ ᐊᒻᒪ ᐊᕐᕌᒍᑦ 11−ᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ, ᐅᖃᓚᐅᖅᐳᖅ ᐱᒻᒪᕆᐅᕗᖅ ᐃᕐᙳᑕᖏᑕ ᐱᐅᓯᖃᑎᒋᔭᖏᓐᓂ ᖃᐅᔨᒪᓂᕐᒧᑦ ᐅᓂᒃᑳᓕᐊᖑᔪᓂ ᐃᒻᒥᓂᒃ ᐊᒻᒪ ᐊᓯᖏᓐᓂ ᐃᓕᓐᓂᐊᖅᑎᐅᔪᓂ ᐊᑐᓚᐅᖅᓯᒪᖏᓐᓂᑦ.

“ᐅᕙᓐᓂ ᐃᑲᔪᕐᓂᖃᖅᐳᖅ ᒪᒥᓴᕐᓂᕐᒧᑦ ᐊᒻᒪ ᓅᓐᓂᕐᒧᑦ,” ᑐᓗᒐᓐᓇᖅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᑐᓗᒐᓐᓇᖅ ᑲᑐᔾᔨᖃᑎᒌᒃᐳᖅ ᑐᑭᒧᐊᒃᑎᑦᑎᔨᑦ ᑲᑎᒪᔨᕋᓛᖑᔪᓂ ᑐᕌᖅᑎᑕᐅᔪᒥ ᓱᓕ ᐆᒪᔪᓄᑦ, ᐃᓱᒪᓕᐅᕆᔪᓂ ᑕᒪᒃᑭᓂ ᐃᓱᒪᒋᔭᐅᓂᐅᔪᓂ ᐃᖅᑲᐅᒪᓂᐅᔪᒥ ᓴᓇᔭᐅᓂᖓᓄᑦ. ᐅᖃᓚᐅᖅᐳᖅ ᐱᓕᕆᓂᐅᔪᖅ ᐃᒻᒥᓂᒃ ᐃᑲᔪᓲᖑᕗᖅ ᐃᖅᑲᐅᒪᓂᕐᒥ ᐃᓕᓐᓂᐊᕐᕕᐊᕈᓯᐅᖃᑎᒋᓚᐅᖅᑕᖏᓐᓂ ᐊᒻᒪ ᐊᓯᖏᓐᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ.

“ᓇᓗᓇᐃᖅᓯᓚᐅᖅᐳᖓ ᐃᓄᖕᓂ ᐅᖃᐅᓯᒃᓴᖏᓐᓂ ᐃᓚᓕᐅᔾᔨᓂᖏᓐᓂ ᐊᒻᒪ ᐃᓄᖕᓂ ᐃᑲᔪᖅᑐᓂ ᓴᓇᓂᖓᓂ ᐆᒥᖓ ᐃᖅᑲᐅᒪᔾᔪᑎᒥᑦ ᐊᒻᒪ ᐃᓂᑦᑎᐊᕙᐅᓂᐊᕐᓂᖓᓂ ᐅᕙᑦᑎᓐᓄᑦ,” ᐅᖃᓚᐅᖅᐳᖅ.

ᑐᓗᒐᓐᓇᖅ ᐅᖃᓚᐅᕆᕗᖅ ᓄᓇᓕᐅᔪᑦ ᐅᑭᐅᖅᑕᖅᑐᓕᒫᒥ ᐱᖃᓪᓗᐊᕆᕗᑦ ᓇᖕᒥᓂᖅ ᐃᓕᓯᒪᐃᓐᓇᕐᓂᐊᖅᑐᒥ ᐃᖅᑲᐅᒪᔾᔪᑕᐅᔪᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐱᖄᓂᙱᑉᐸᑕ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᑖᓐ ᐆᐱᑦ ᑕᐃᒪᓐᓇᑦᑕᐅᖅ ᑐᓗᒐᓐᓇᖅ ᐅᖃᓚᐅᖅᑕᖓᓂ ᐅᖃᓚᐅᖅᐳᖅ.

ᓇᓗᓇᐃᖅᓯᓚᐅᖅᐳᖅ ᐃᖅᑲᐅᒪᓂᐅᔫᑉ ᐃᓂᖓ ᓴᓂᓕᑦᑎᐊᖓᓂ ᑲᑎᒪᔨᕐᔪᐊᖑᔪᑦ ᐊᒻᒪ ᐳᓚᕋᖅᑎᐅᔪᓂ ᐱᓱᒃᐸᖕᓂᖏᓐᓂ ᐊᔭᐅᕆᕙᒃᐳᖅ ᐃᓄᖕᓂ ᐃᓕᑦᑎᓂᖏᓐᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂᑦ.

“ᑕᐃᒫᒃ ᐱᒻᒪᕆᐅᕗᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᑕᐃᒃᑯᓄᖓ ᐃᓄᖕᓄᑦ ᐃᓚᒋᔭᐅᓚᐅᖅᑐᓂ ᐱᓕᕆᓂᐅᔪᒥ ᓇᓗᓇᐃᖅᓯᓂᖏᓐᓂ ᐊᓯᐅᙱᓐᓂᖓᓂ; ᐃᓄᐃᑦ ᐅᓂᒃᑳᓕᐊᖏᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐊᒻᒪ ᐱᒻᒪᕆᐅᓂᖓᓂ ᐅᕙᑦᑎᓐᓂ ᐱᓕᕆᖃᑎᒋᔭᐅᓪᓗᑕ ᐅᕙᓂᓕᒫᖅ ᐱᓕᕆᓂᐅᔪᒥ ᑲᔪᓯᓂᐊᕐᓂᖓᓂ ᐃᓚᐅᖃᑕᐅᓗᓂ ᐃᓚᒋᔭᐅᓂᖓᓂ ᑕᒪᒃᑭᓗᒃᑖᓂ ᐆᒥᖓ ᐱᓕᕆᓂᐅᔪᒥ ᐱᓕᕆᓂᖓᓂ,” ᐆᐱᑦ ᐅᖃᓚᐅᖅᐳᖅ.

ᓇᕙᓕᒃ ᑐᓗᒐᓐᓇᖅ, ᓴᐅᒥᖕᒥ, ᑐᙵᓱᒃᑎᑦᑎᕗᖅ ᑭᖕ ᑭᒡᒐᖅᑐᖅᑎᖓᓂ ᑲᓇᑕᒥ ᒥᐊᕆ ᓴᐃᒪᓐᒥ ᑎᑭᑎᓪᓗᒍ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓂᖓᓂ. (ᔨᐊᕝ ᐱᓚᑦᑎᐊᐃ ᐊᔾᔨᓕᐅᖅᑕᖓ)

ᓴᐃᒪᓐ ᑐᓂᓯᓚᐅᖅᐳᖅ ᓇᐃᑦᑐᒥ ᐅᖃᓪᓚᖕᓂᐅᔪᒥ ᑕᐃᑲᓂ ᖁᕕᐊᓱᒍᑕᐅᔪᒥ, ᐱᓗᐊᖅᑐᒥ ᐃᓄᒃᑎᑐᑦ. ᐃᓚᐅᖃᑕᐅᓚᐅᖅᓯᒪᕗᖅ ᒐᕙᒪᑐᖃᒃᑯᓐᓂ ᐅᓪᓗᕐᒥ ᐃᓕᓐᓂᐊᕐᓂᐅᔪᒥ ᑰᔾᔪᐊᕐᒥ ᐊᒻᒪ ᐅᖃᓪᓚᖃᑎᖃᖅᓯᒪᕗᖅ ᐱᖃᓐᓇᕆᔭᖃᕐᓂᖓᓂ ᓱᓕ ᐆᒪᔪᓂᑦ.

ᓇᕙᓕᒃ ᑐᓗᒐᓐᓇᖅ, ᓴᐅᒥᖕᒥ, ᑐᙵᓱᒃᑎᑦᑎᕗᖅ ᑭᖕ ᑭᒡᒐᖅᑐᖅᑎᖓᓂ ᑲᓇᑕᒥ ᒥᐊᕆ ᓴᐃᒪᓐᒥ ᑎᑭᑎᓪᓗᒍ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓂᖓᓂ. (ᔨᐊᕝ ᐱᓚᑦᑎᐊᐃ ᐊᔾᔨᓕᐅᖅᑕᖓ)“ᓂᕆᐅᖕᓂᖅᑕᖃᖅᐳᖅ ᐅᕙᓂ ᐃᖅᑲᐅᒪᔾᔪᑎᒥᑦ, ᑕᐃᒪᓐᓇᑦᑕᐅᖅ ᐃᖅᑲᐅᒪᓂᑕᖃᖅᐳᖅ, ᓄᒫᓱᖕᓂᕐᒥ, ᐃᖏᕐᕋᓂᐅᔪᒥ, ᓴᙱᓂᐅᔪᒥ ᐊᒻᒪ ᐱᓇᔪᐃᓐᓇᕋᓱᖕᓂᐅᔪᒥ,” ᓴᐃᒪᓐ ᐅᖃᓚᐅᖅᐳᖅ.

“ᓇᖏᕐᓂᐊᖅᐳᖅ ᐃᖅᑲᐃᔾᔪᑎᐅᓗᓂ ᓄᓇᖃᖅᑳᖅᓯᒪᔪᓂ ᓂᐱᐅᔪᑦ ᓴᙱᓂᖏᓐᓂ, ᐊᒻᒪ ᓇᖏᖅᐳᖅ ᐊᓯᐊᒍᑦ ᐱᓱᖕᓂᐅᔪᒥ ᑲᓇᑕ ᐱᓕᕆᓂᖓᓂ ᓴᐃᒻᒪᖃᑎᒌᖕᓂᐅᔪᒧᑦ.”

ᑕᐃᕕᑦ ᓯᖅᑯᐊᖅ ᐊᕐᕕᐊᕐᒥᐊᑕᖅ ᕿᓚᐅᔾᔭᓚᐅᖅᐳᖅ ᐊᒻᒪ ᒧᒥᖅᖢᓂ ᖁᙱᐊᖅᑐᓄᑦ ᐃᓚᒋᔭᐅᓪᓗᓂ ᐊᐃᑉᐹᓂ ᖁᕕᐊᓱᒍᑕᐅᔪᒧᑦ.

ᐅᖃᐅᓯᖃᓚᐅᖅᐳᖅ ᓂᕆᐅᖕᓂᖓᓂ ᒪᒃᑯᖕᓂᖅᓴᐅᔪᑦ ᐃᓄᐃᑦ ᓄᓇᕗᒻᒥ ᐳᓚᕋᕈᓐᓇᓛᕐᓂᖏᓐᓂ ᐃᖅᑲᐅᒪᔾᔪᑎᒥᑦ ᐊᒻᒪ ᐃᓕᑦᑎᓗᑎᒃ ᓯᕗᓕᖏᓐᓂ.

“ᐱᒻᒪᕆᕐᔪᐊᖑᕗᖅ ᒪᒃᑯᖕᓂᖅᓴᐅᔪᓂ ᐱᐅᓯᖃᑎᒌᖑᔪᓂ ᑕᑯᓂᕐᒥ ᐊᒻᒪ ᑐᓵᓗᑎᒃ ᐊᑐᖅᑕᐅᕙᓚᐅᖅᑐᓂ ᐊᒻᒪ ᑕᒪᒃᑭᓕᒫᓂᑦ,” ᓯᖅᑯᐊᖅ ᐅᖃᓚᐅᖅᐳᖅ.

“ᐃᖅᑲᐅᒪᔾᔪᑎᒥᑦ: ᓄᓇᕐᔪᐊᒧᑦ ᑕᑯᒃᔭᒃᓴᐅᑕᐅᕗᖅ, ᓄᓇᕐᔪᐊᒥ ᑐᓵᓂᕐᒥ ᐅᓂᒃᑳᓕᐊᖑᔪᓂ.”