ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᖅ ᖃᓄᐃᓕᖓᓪᓚᕆᖕᓂᖓ

ᐊᓯᑦᑎᑐᓐ ᐊᖓᔪᖅᑳᖑᔪᓂ, ᕿᑐᕐᖓᒃᑲ ᐋᓐᓂᐊᖃᖅᑕᐃᓕᓂᖓ ᐱᒻᒪᕆᐊᓗᒋᒐᒃᑯ. ᐅᓇ ᑎᑎᖅᑲᖅ ᐊᑐᓚᐅᕐᑕᓐᓂ ᐅᖃᐅᓯᖃᖅᑐᖅ ᐊᖓᔪᖅᑳᖑᓪᓗᖓ ᐱᓇᓱᒃᓯᒪᓪᓗᖓᓗ ᐅᑯᓇᙵᑦ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI), ᐱᓕᕆᐊᒃᓴᖅ ᐱᓕᕆᐊᖑᑎᑕᐅᔪᖅ ᐅᑯᓄᖓ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᒃᑯᓐᓂᑦ ᑲᓇᑕᒥ.

ᐅᑯᑎᒎᓇᕐᓕ ᑲᓇᑕᐅᑉ ᒐᕙᒪᑎᒍᑦ, ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ “ᑕᒪᒃᑯᓂᖓ ᐃᓄᐃᑦ ᕿᑐᕐᖓᖏᓐᓂᒃ ᐱᔪᓐᓇᕐᓂᖃᖅᑎᑦᑎᔪᑦ ᐊᑐᕆᐊᖃᖅᑕᖏᓐᓄᑦ ᒐᕙᒪᒃᑯᓐᓂᒃ ᐃᑲᔫᑎᖃᖅᑐᓂᒃ ᐋᓐᓂᐊᖃᖅᑕᐃᓕᓂᕐᒧᑦ, ᐃᓅᖃᑎᒌᖕᓂᕐᒧᑦ ᐊᒻᒪ ᐃᓕᓐᓂᐊᕈᑎᒃᓴᓄᑦ ᐱᖁᑎᒃᓴᓂᒃ, ᐱᔨᑦᑎᕋᐅᑎᓂᒃ ᐊᒻᒪ ᐃᑲᔫᑎᒃᓴᓂᒃ ᐊᑐᕆᐊᖃᖅᑕᖏᓐᓂᒃ, ᐊᑐᕆᐊᖃᓕᕌᖓᑕ.”

ᑭᓯᐊᓂᓕ, ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᓴᖅᑭᑎᑦᑎᓯᒪᔪᑦ ᑲᓇᑕᐅᑉ ᒐᕙᒪᖓ ᑐᑭᓯᓯᒪᙱᓐᓂᖏᓐᓂᒃ ᓄᓇᕗᒻᒥᐅᓂᒃ. ᓄᓇᕗᒥᐅᑕᑦ ᐱᓇᓱᒃᓯᒪᔪᑦ ᐅᓄᙱᑦᑐᑯᓗᐃᑦ, ᐱᔾᔪᑎᖃᓗᐊᕐᖢᓂ ᐃᓚᖏ ᐅᑯᐊ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᑕᑕᑎᕆᐊᓕᖏᑦ ᐊᓯᐊᒎᖅᑎᑕᒃᓴᐅᙱᒻᒪᑕ, ᐃᓅᓯᕐᒥ ᖃᐅᔨᓇᓱᓗᐊᕈᑎᖃᖅᖢᑎᒃ ᐊᒻᒪᓗ ᓈᒻᒪᙱᓗᐊᖅᖢᑎᒃ ᓄᓇᕗᒥᑦ ᐃᓅᓯᕐᒧᑦ.

ᕿᑎᐊᒍ ᒪᐃ 2019 ᐊᒻᒪ ᕕᕗᐊᕆ 2020-ᓗᑦ, ᑐᓂᓯᓯᒪᕗᖓ 7-ᓂ ᐱᑖᕋᓲᑎᓂᒃ ᐅᑯᓄᖓ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᕿᑐᕐᖓᒃᑲ ᐋᓐᓂᐊᖃᕐᓂᕋᖅᑕᐅᓯᒪᓂᖏᓐᓄᑦ ᐱᔭᕆᐊᖃᖅᑕᖏᓐᓄᑦ. ᑎᓴᒪᑦ ᐊᓂᒍᑦᑎᐊᕐᓯᒪᔪᑦ, ᐊᑕᐅᓯᖅ ᐊᖏᖅᑕᐅᓯᒪᙱᖢᓂ, ᐊᒻᒪᓗ ᒪᕐᕉᒃ ᕿᒥᕐᕈᐊᖅᑕᐅᓪᓗᑎᒃ.

ᐅᑯᐊ 7 ᐱᓇᓱᒍᑎᒋᔭᒃᑲ (ᐃᓚᖃᖅᖢᑎᒃ ᐋᖅᑭᒋᐊᕈᑎᓂᒃ) ᐊᑐᕈᑎᒋᔭᕆᐊᖃᓚᐅᕐᑕᒃᑲ 25,084 ᐅᖃᐅᓯᕐᓂᒃ, 50 ᐅᖓᑖᓂ ᑕᑯᔭᐅᕝᕕᒃᓴᓕᐅᕐᑕᐅᓪᓗᖓ ᐱᔪᓐᓇᐅᑎᖃᖅᑐᓂᒃ ᐱᓕᕆᔨᒻᒪᕆᖕᓂᒃ, ᐊᒻᒪᓗ 40-ᓂ ᑎᑎᖃᓂᒃ ᐃᑲᔫᑎᓂᒃ ᐋᓐᓂᐊᓯᐅᕐᑎᓂᒃ, ᓱᕈᓯᓕᕆᔨᓂᒃ, ᐃᓱᒪᓕᕆᔨᓂᒃ, ᐃᓄᓕᕆᔨᒃᑯᓐᓂᒃ, ᐃᓕᓐᓂᐊᕐᕕᐅᑉ ᐊᖓᔪᖅᑳᖏᓐᓂᒃ, ᐃᓕᓴᐃᔨᓂᒃ, ᐃᓕᓐᓂᐊᖅᑐᓂᒃ ᐃᑲᔪᖅᑎᓂᒃ, ᓄᓇᕗᑦ ᒐᕙᒪᒃᑯᑦ ᐱᓕᕆᔨᒻᒪᕆᖏᓐᓂᒃ, ᓄᓇᕗᒥᑦ ᓄᓇᓕᖕᓂ ᑲᑐᔾᔨᖃᑎᒌᓂᒃ ᐊᒻᒪᓗ ᑭᒡᒐᖅᑐᐃᔨᓂᒃ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ.

ᐊᑐᕐᓯᒪᔭᐃᓐᓇᕆᓕᕋᒃᑭᑦ ᐃᖅᑲᓇᐃᔭᕐᕕᖕᓂᑦ ᕿᑲᕈᓐᓇᐅᑎᒋᔭᒃᑲ ᐊᒻᒪ ᐃᑲᕐᕋᓕᐅᕈᑎᕕᓂᒃᑲ ᑳᖏᐅᑎᔾᔪᑏᑦ, ᐊᒻᒪᓗ ᐊᕐᕌᒍᒥ ᕿᑲᕈᓐᓇᐅᑎᒃᓴᒪ ᐃᓚᖓ ᑕᒪᒃᑯᐊ ᐱᔭᐅᔪᒪᔪᐊᓗᖕᓄᑦ ᐱᓇᓱᒍᑎᓂᒃ ᐅᑯᓄᖓ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᐱᓕᕆᕙᓪᓕᐊᒍᑎᓂᒃ (ᐊᒻᒪᓗ ᕿᑐᕐᖓᒪ ᐋᓐᓂᐊᖃᖅᑕᐃᓕᓂᒃᑯᑦ ᐱᔭᕆᐊᖃᖅᑕᖏᓐᓂᒃ ᑐᒃᓯᕋᐅᑎᑎᒎᖓᔪᓂᒃ). ᐅᓪᓗᕐᒥ ᐃᖅᑲᓇᐃᔭᙱᑉᐸᓵᓚᐅᕋᒪ ᐊᓂᕐᓵᕆᐊᖃᕐᓂᕐᒧᑦ.

ᐃᓚᖓᓪᓗ ᑐᒃᓯᕋᐅᑎᒋᓇᓱᒃᑕᕋ ᐊᓂᒍᑦᑎᐊᕐᓂᐊᕐᒪᓐ (ᐅᑯᑎᒎᓇᕐᓕ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᐱᔭᒃᓴᖏᑦᑎᒍᑦ), ᐱᕝᕕᐅᔪᒪᓚᐅᕐᒥᔪᖓ 11-ᓂ ᑎᑎᕋᖅᑕᐅᔪᓂᒃ/ᖃᕋᓴᐅᔭᒃᑯᓪᓗ:  ᒪᕐᕉᖕᓂᒃ ᑎᑎᖃᓂ ᐅᕙᙵᑦ ᕿᑭᖅᑕᓂ ᐋᓐᓂᐊᕕᐊᓗᖕᒥᑦ (QGH) ᓘᒃᑖᒥᓐ, ᐱᖓᓱᓂᒃ ᐋᓐᓂᐊᓯᐅᕐᑎᒋᔭᑦᑎᓐᓂᒃ, ᐊᒻᒪ ᐊᑕᐅᓯᖅ ᕿᑭᖅᑕᓂ ᐋᓐᓂᐊᕕᐊᓗᖕᒥ ᓱᕈᓯᓕᕆᔨᒥᑦ, ᐊᒻᒪᓗ ᒪᕐᕉᖕᓂ ᐃᓕᓐᓂᐊᕐᕕᖕᒥ ᐃᓕᓴᐃᔨᓂᒃ, ᖃᕋᓴᐅᔭᒃᑰᖅᑐᒥᓐ ᐃᓕᓐᓂᐊᕐᕕᖕᒧᑦ ᑲᑎᒪᔨᐅᖃᑕᐅᔪᒥᓐ, ᐊᒻᒪ ᒪᕐᕉᖕᓂ ᖃᕋᓴᐅᔭᒃᑯᑦ ᑎᑎᖃᓂᒃ ᐸᐃᑉᐹᖅᑖᕐᓯᒪᔪᓂᒃ ᐃᓱᒪᓕᕆᔨᓂᒃ.

ᓘᒃᑖᓂ ᑎᑎᕋᕐᓂᐊᕐᑐᓂᒃ ᐊᔪᕐᓇᐸᓗᖕᒪᓐ ᐃᖃᓗᖕᓂ, ᑕᕝᕙᓂ ᕿᑭᖅᑖᓗᖕᒧᑦ ᐋᓐᓂᐊᕕᐊᓗᖃᕋᓗᐊᖅᖢᓂ. ᕿᑐᕐᖓᒃᑲ ᑕᑯᔭᐅᕝᕕᒃᓴᓕᐅᖅᖢᒋ ᐅᑕᕿᑎᑕᐅᓐᓇᕐᖢᓂ ᐱᓇᓱᐊᕈᓯᕐᓂ ᑎᓴᒪᓂᒃ ᐊᕐᕕᓂᓕᖕᓄᑦ.

ᖃᓄᕐᓕ ᐃᓄᐃᑦ ᐊᖓᔪᖅᑳᕆᔭᐅᔪᑦ ᒪᓕᒐᓕᕆᓂᒃᑰᕈᓘᔭᕆᐊᖃᕐᐸ?

ᖃᓪᓗᓈᖑᓪᓗᖓ ᐊᖓᔪᖅᑳᖑᓪᓗᖓᓗ ᐃᓄᖕᓂ ᓄᑕᕋᕐᓂ, ᐊᔪᕈᓐᓃᕐᓯᒪᓪᓚᕆᒃᑐᓂᒃ ᓘᒃᑖᓂᒃ ᐋᓐᓂᐊᖃᕐᓂᕋᖅᑕᐅᔪᓂᒃ ᐊᔾᔨᐅᙱᑦᑐᓂᒃ ᐊᒻᒪᓗ ᑲᒪᒋᔭᐅᔭᕆᐊᖃᖅᖢᑎᒃ, ᐅᔾᔨᕈᓱᑦᑎᐊᕐᐳᖓ ᖃᓪᓗᓈᖑᓪᓗᖓ ᐊᔪᙱᔾᔪᑎᒋᔭᓐᓂᒃ. ᖃᓪᓗᓈᑐᑦ-ᐅᐃᕖᑐᑦ ᐅᖃᕈᓐᓇᖅᖢᖓ ᐊᕐᕌᒍᓂᒡᓗ 12-ᓂᒃ ᐃᓕᓐᓂᐊᒃᑲᓐᓂᕐᓯᒪᓪᓗᖓ, ᐅᐊᑲᓪᓚᒍᓱᓗᐊᓕᕋᒪ ᐊᔪᙱᓪᓗᓂ ᑭᓯᐊᓂ ᐅᑯᐊ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᐱᓇᓱᒍᑎᒋᔾᔪᑎᖏᑦ ᐱᓕᕆᐊᖑᔭᕆᐊᖃᕐᓂᖏᓐᓂᒃ. ᐊᔪᙱᓐᓂᖃᕆᐊᖃᕐᓇᕐᖢᓂ ᖃᐅᔨᓴᕐᓂᕐᒥᓐ, ᑎᑎᕋᕈᓐᓇᕐᓂᕐᒥᓐ, ᐃᓱᒪᒃᓴᕐᓯᐅᕈᓐᓇᕐᓂᕐᒥᓐ, ᖃᓄᖅᑑᑲᑕᒍᓐᓇᕐᓂᕐᒥᓐ ᐊᒻᒪᓗ ᐊᐅᓚᔾᔪᑎᓕᕆᓂᕐᒥᒃ ᑕᒪᒃᑯᐊᓗ ᐃᓚᐃᓐᓇᑯᓗᒋᓪᓗᓂᒋᑦ.

ᐊᒥᓲᙱᑦᑐᑦ ᐊᖓᔪᖅᑳᑦ ᓇᓗᓇᐃᕐᓯᔪᓐᓇᖅᑐᓐ ᐊᑯᑦᑐᑎᒋᓂᐅᔪᓂᒃ ᒪᐅᓇ ᕿᑐᕐᖓᖏᑦᑕ “ᐊᔾᔨᐅᙱᑦᑐᒃᑯᑦ ᐊᒻᒪ ᑲᒪᒋᔭᐅᔭᕆᐊᖃᕐᓂᐅᔪᓂᒃ,” ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᐊᐱᕆᔭᐅᓚᐅᕐᒥᒐᒪ ᓇᓗᓇᐃᓯᖁᔭᐅᓪᓗᖓ ᐊᑯᑦᑐᑎᒋᓂᐅᔪᑦ ᐃᒪᓐᓇ “ᐊᖏᑎᒋᓂᖓᒍᑦ” ᐊᑯᑦᑐᓂᐅᔪᑦ ᐊᒥᒪ “ᒥᑭᑦᑐᓪᓛᓗᒃᑯᑦ” ᐊᑯᑦᑐᓂᐅᔪᓂᒃ. ᖃᓄᕐᓕ ᐊᖓᔪᖅᑳᖑᔪᑦ ᑕᒪᑐᒥᖓ ᖃᐅᔨᓴᕐᓯᒪᔪᓐᓇᕋᓱᒋᔭᐅᕙᓐ?

ᐊᒻᒪᒃᑲᓐᓂᖅ, ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᐱᑕᖃᖅᑎᑦᑎᙱᑦᑐᑦ ᑕᑕᑎᕆᐊᓕᖕᓂᒃ ᐅᕝᕙᓘᓐᓃᑦ ᑎᑎᕋᕐᕕᒃᓴᐅᔪᓂᒃ ᐃᑲᔫᑎᐅᔪᓐᓇᖅᑐᓂᒃ ᐊᖓᔪᖅᑳᓄᑦ (ᐱᓕᕆᔪᓐᓇᕐᓯᓯᒪᔪᓄᓪᓘᓐᓃᑦ ᑎᑎᕋᖁᔭᐅᓯᒪᔪᓄᑦ). ᑕᐃᒪᓕ, ᓇᖕᒥᓂᖅ ᐋᖅᑭᒃᓯᓚᐅᕐᐳᖓ ᑕᑕᑎᕆᐊᓕᒃᓴᒥᑦ, ᓇᐃᓴᐅᓯᕆᔾᔪᑎᒃᓴᓂᒃ, ᐊᑭᓕᒐᒃᓴᓕᐅᕈᑎᒃᓴᓂᒃ ᐊᒻᒪ ᑎᑎᖃᓄᑦ ᐋᖅᑭᒃᓱᐃᕝᕕᒃᓴᓂᒃ—ᕿᒥᕐᕈᐊᖃᑎᒋᓯᒪᓪᓗᒋ ᐱᓕᕆᔪᓐᓇᕐᓯᓯᒪᔪᓄᑦ ᐅᖃᐅᓯᓪᓗᐊᑕᐃᑦ ᐅᑯᐊ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᓇᓗᓇᐃᕐᓯᒪᔭᖏ ᐱᓯᒪᔭᕆᐊᖃᕐᓂᖏᓐᓂᒃ. ᐅᓇᒃᑲᓐᓂᕐᑕᐅᖅ, ᐊᖓᔪᖅᑳᖑᔪᑦ ᓇᖕᒥᓂᖅ ᓇᓂᓯᔭᕆᐊᖃᖅᑐᑦ ᐱᔨᑦᑎᕋᖅᑎᐅᔪᓂᒃ ᕿᑐᕐᖓᖏᑦᑕ ᐋᓐᓂᐊᖃᖅᑕᐃᓕᓂᒃᑯᑦ ᐱᔭᕆᐊᖃᖅᑕᖏᓐᓄᑦ!

ᐊᑐᕐᓯᒪᔭᒃᑯᓪᓕ, ᖃᕋᓴᐅᔭᒥ ᐊᑐᐃᓐᓇᖃᕆᐊᖃᖅᖢᑎᒃ, ᑎᑎᕋᕈᓐᓇᐅᑎᓂᒃ, ᐊᔾᔨᓕᐅᕈᑎᓂ ᑎᑎᖃᓂᒃ, ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓂᒃ, ᐅᖓᓯᒃᑐᒧᑦ ᐅᖃᓗᒍᓐᓇᕐᓗᑎ, ᑮᓇᐅᔭᒃᑯᕕᖃᕐᓗᑎᑦ ᐊᒻᒪᓗ ᐊᐅᒃᑕᔫᖃᕐᓗᑎᑦ ᐊᑭᓕᒃᓴᖃᐅᑎᒥᓐ. ᓇᖕᒥᓂᖅ ᓄᓇᓯᐅᑎᖃᖅᖢᓂ ᐊᑲᐅᒻᒪᕆᒃᑐᖅ ᐅᕐᓱᖃᕈᓐᓇᕐᓗᓂ.

ᑕᐃᒪᐃᒃᑲᓗᐊᕐᑎᓪᓗᒍ, ᒐᕙᒪᑐᖃᒃᑯᑦ ᖃᓄᐃᓕᐅᕐᐸᓪᓕᐊᒍᓯᖓ ᐅᐊᑲᓪᓚᓗᐊᕌᓘᖕᒪᑦ, ᑮᓇᐅᔭᖅᑕᓕᒃ. ᓯᕗᓪᓕᖅᐹᒥᑦ ᐅᑯᐊ ᐃᓄᐃᑦ ᓄᑕᕋᖏᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ (CFI) ᐅᖄᓚᕝᕕᒋᓪᓗᒋᑦ ᒪᐃ 2019-ᒥᑦ, ᑭᒡᒐᖅᑐᐃᔨᐅᔪᖅ ᐅᕙᓐᓄᑦ ᐅᖃᓚᐅᕐᓯᒪᔪᖅ ᑲᑎᖢᑎᒃ $220 ᒥᓕᐊᓐ ᑖᓚᐃᑦ ᑐᕌᖓᑎᑕᐅᓂᖏᓐᓂᒃ ᐱᓕᕆᐊᓄᑦ ᐃᓄᐃᑦ ᕿᑐᕐᖓᖏᓐᓄᑦ ᐅᑭᐅᖃᖅᑐᓄᑦ 18 ᑐᖔᓂᒃ, ᓇᓂ ᓄᓇᖃᕋᓗᐊᕈᑎᒃ ᑲᓇᑕᒥ.

ᕿᑐᕐᖓᐃᑦ ᐃᓱᒪᖓ-ᐃᓕᓐᓂᐊᕐᓂᒃᑯᑦ ᖃᐅᔨᓴᖅᑕᐅᔭᕆᐊᖃᕐᐹ? ᑐᓵᑦᑎᐊᕆᐊᒃᓴᖓᓂ ᖃᐅᔨᓴᕐᑕᐅᓗᓂ? ᓄᒃᑭᒃᓴᖅᑕᐅᓗᓂ ᐅᕝᕙᓘᓐᓃᑦ ᐃᓱᒪᓕᕆᔭᐅᔭᕆᐊᖃᕐᐹ? ᕿᑐᕐᖓᐃᑦ ᐱᔭᕆᐊᖃᖅᐸᑦ ᐅᐊᔭᓅᖅᑐᓂᒃ (ᑎᒍᒥᐊᒐᕐᓂᒃ ᓵᑦᑐᓂᒃ ᖃᕋᓴᐅᔭᕋᓛᓂᒃ ᒪᑯᓂᖓᓘᓐᓃ ᓵᒥᐅᑕᓂᒃ ᓴᕿᑦᑕᐅᑎᓕᖕᓃ) ᐅᕝᕙᓘᓐᓃᑦ ᐃᓕᓐᓂᐊᕈᑎᖏᓐᓄᑦ ᐃᑲᔪᖅᑕᐅᔭᕆᐊᖃᖅᐸ ᐃᓕᓐᓂᐊᕐᕕᖕᒥ ᐃᓕᓐᓂᐊᕈᓐᓇᖁᓪᓗᒍ? ᕿᑐᕐᖓᐃᑦ ᐃᑲᔪᖅᑕᐅᓇᔭᖅᐸ ᐋᖅᑭᒃᓱᖅᑕᐅᓯᒪᔪᓂᒃ ᐊᐅᔭᒃᑯᑦ ᖃᓄᐃᓕᐅᕈᑎᒃᓴᑎᒍᑦ ᐅᕝᕙᓘᓐᓃᑦ ᐃᓕᖁᓯᓕᕆᓂᒃᑯᑦ ᖃᓄᐃᓕᐅᕈᑎᓂᒃ ᐃᓱᒪᖓ ᐱᐅᓱᕚᓪᓕᖁᓗᒍ ᐊᒻᒪ ᐃᒻᒥᓂ ᑭᓲᓂᕐᓴᐅᔪᓐᓇᓕᖁᓪᓗᒍ?

ᑕᐃᒪᐃᓐᓇᓱᒋᓚᐅᕐᑕᕋ.

ᐃᑲᔪᖅᑐᐃᓕᕐᐳᖓ ᐊᖓᔪᖅᑳᓕᒫᓂᒃ ᐊᒻᒪ ᐸᖅᑭᔨᓂᒃ ᐃᓄᖕᓂ ᓄᑕᖅᑲᓂᒃ, ᓇᓂ ᓄᓇᖃᕋᓗᐊᖅᐸᑕ ᑲᓇᑕᒥ, ᐱᓇᓱᖁᓪᓗᒍ ᐅᑯᓇᖓᑦ ᓄᑕᕋᐃᑦ ᓯᕗᓪᓕᐅᔪᑦ ᐱᓕᕆᐊᖑᔪᒧᑦ. ᐱᓕᕆᖃᑎᒌᖕᓂᖅ—ᐱᓕᕆᖃᑎᒌᓚᐅᕐᑕ ᐱᓇᓱᐊᒐᒃᓴᒧᑦ.

ᓯᕗᓪᓕᕐᒥᓪᓕ, ᑲᓇᑕᐅᑉ ᒐᕙᒪᖓ ᐃᒪᐃᓕᐅᖁᕙᒃᑲ ᑕᒪᒃᑯᐊ ᑐᓚᒃᑕᕐᕕᐅᔪᑦ ᐲᕐᑕᐅᓗᑎ ᐱᓕᕆᐊᒃᓴᓄᑦ ᐃᓄᖕᓄᑦ ᓄᑕᕋᕐᓄᑦ ᐊᔪᕐᓇᕈᑎᐅᔪᑦ ᐊᒻᒪᓗ ᐊᖓᔪᖅᑳᖏᓐᓄᑦ ᐱᓇᓱᒃᑐᓄᑦ.

ᓘᕋ ᑖᒻᓴᓐ
ᐃᖃᓗᖕᓂᑦ ᐊᖓᔪᖅᑳᖑᔪᖅ