ᐃᓄᒃᑎᑐᑦ ᐃᙱᐅᑎᑦ ᐃᓕᖅᑯᓯᕐᒥᒃ ᓯᐊᕐᒥᑎᑦᑎᔪᖅ ‘ᐅᖓᓯᒃᑐᓄᑦ ᐊᒻᒪ ᐊᕗᙶᓗ’ ᐅᖃᕐᑐᖅ ᐃᖃᓗᖕᓂ ᐃᓕᓴᐃᔨ

For the English version, see Inuktitut songbook spreads culture ‘far and wide,’ says Iqaluit teacher

ᑎᑕᐅᓯᓕᕆᓂᕐᒧᑦ ᐃᓕᓴᐃᔨ ᒥᐊᓕ ᐱᐅᓯ-ᓗᐃᔅ ᓄᓇᕗᒻᒧᐊᖅᑎᓪᓗᒍ 2001-ᒥ, ᑲᒪᓗᐊᓚᐅᕐᓯᒪᔪᖅ ᑎᑕᐅᓯᓕᕆᓂᕐᒧᑦ ᐃᓕᓐᓂᐊᕈᑎᓂᒃ ᐊᔪᕈᓐᓃᖅᓴᕈᑎᒃᓴᖅᑕᖃᙱᓐᓂᖓᓂᒃ.

“ᑎᑕᐅᓯᓕᕆᓂᕐᒧᑦ ᐃᑲᔪᕈᑎᑕᖃᓚᐅᙱᑦᑎᐊᖅᑐᖅ ᐃᓄᖕᓄᑦ,” ᐅᖃᓚᐅᕐᑐᖅ, ᐃᓱᒪᓪᓗᓂ ᑎᑕᐅᓯᓕᕆᓂᕐᒥᒃ ᐃᓕᓐᓂᐊᖃᑦᑕᓚᐅᕐᓯᒪᔭᖏᓐᓂᒃ ᐊᕐᕕᐊᓂ.

“ᑎᑕᐅᓯᓕᕆᓂᕐᒥ ᐱᓕᕆᐊᖃᑲᑕᖃᑦᑕᓚᐅᕐᓯᒪᔪᑦ ᓄᓇᓖᑦ, ᑭᓯᐊᓂᓕ ᐃᑲᔪᕈᑎᒃᓴᖅᑕᖃᙱᖢᓂ ᐊᑐᖅᑕᐅᔪᓐᓇᖅᑐᓂᒃ ᐃᓕᓐᓂᐊᕐᕕᖕᒥ, ᐱᓗᐊᖅᑐᒥᓐ ᐃᓕᓐᓂᐊᕐᕕᐊᓗᖕᒥᑦ.”

ᐱᐅᓯ-ᓗᐃᑦ — ᑖᓐᓇ 2021-ᒥ ᐃᓕᓴᕆᔭᐅᔾᔪᑎᑖᓚᐅᕐᓯᒪᔪᖅ ᑎᑕᐅᓯᓕᕆᓂᕐᒧᑦ (Juno Awards’ MusiCounts Music) ᐃᓕᓴᐃᔨᑦᑎᐊᕙᐅᓛᖑᓂᕐᒧᑦ — ᖃᐅᔨᒪᓚᐅᕐᒪᓐ ᑎᑕᐅᓯᕆᓂᖅ ᐊᑐᖅᑕᐅᔪᓐᓇᒻᒪᕆᖕᓂᖓᓂᒃ ᐃᓄᐃᑦ ᐃᓕᖅᑯᓯᖓᓂᒃ ᐊᒻᒪᓗ ᐃᑲᔪᕐᓗᓂ ᐃᓕᓐᓂᐊᖅᑎᓂᒃ ᑭᒃᑰᓂᖏᓐᓂᒃ ᐃᓅᓪᓗᑎᒃ.

ᑕᐃᒪᓕ, ᐃᓕᓐᓂᐊᕈᑎᒃᓴᖅᑕᖃᒋᖢᓂ ᐊᑐᕈᓐᓇᖅᑕᖏᓐᓂᒃ ᐱᓕᕆᐊᖃᓕᓚᐅᕐᓯᒪᔪᖅ ᓇᖕᒥᓂᖅ ᑎᑕᐅᓯᕆᓂᕐᒧᑦ ᐃᑲᔪᕈᑎᒃᓴᐅᓂᐊᖅᑐᓂᒃ ᐃᓕᓐᓂᐊᖅᑐᓄᑦ.

ᐃᑲᔪᕈᑎᒃᓴᐅᓪᓕ ᐃᓚ ᑎᑕᐅᓯᓕᕆᓂᕐᒧᑦ ᐅᖃᓕᒫᒐᑦ ᐃᓄᐃᑦ ᐃᙱᐅᓯᖏᑦ: ᑲᑎᕐᓱᒐᐃᑦ ᐃᓄᐃᑦ ᑎᑕᐅᓯᖏᓐᓂᒃ II, ᐃᙱᖅᖢᓂ ᖃᓄᐃᓕᐅᕆᖓᖃᕐᓇᖅ ᒪᐅᓇ ᐊᑕᐅᑦᑎᒃᑰᖅᑕᖅᖢᑎᒃ ᐃᙱᐸᒃᖢᑎᒃ ᐃᓄᒃᑎᑐᑦ ᐃᓕᓐᓂᐊᕕᖕᒥ.

ᐱᐅᓯ-ᓗᐃᔅ, ᕗᐊᑦᓱᓐ, ᓂᐅᕙᐅᓐᓛᓐᒥᐅᑕᖅ, ᐊᒻᒪᓗ ᐃᓕᓐᓂᐊᕌᓂᒃᓯᒪᓪᓗᓂ ᑎᑕᐅᓯᓕᕆᓂᕐᒥᒃ ᐃᓕᖅᑯᓯᑐᖃᕐᓂᒃ ᐊᒻᒪᓗ ᒫᓐᓇ ᐃᓕᓴᐃᔨᐅᓪᓗᓂ ᐃᓄᒃᓱᒃ ᐃᓕᓐᓂᐊᕐᕕᐊᓗᒃᒥ ᐃᖃᓗᖕᓂ. ᑲᑎᕐᓱᐃᓚᐅᕐᒪᓐ ᐃᙱᐅᑎᓂᒃ ᐊᕐᕌᒍᓂᒃ ᐊᕙᑎᓂᒃ (20) ᐃᓄᒃᑎᑐᑦ ᐃᙱᐅᓯᕐᓂ ᐊᔪᕈᓐᓃᕐᓵᓪᓚᓚᐅᖅᓗᓂ ᓄᓇᕗᒥᙶᖅᑐᓂᒃ ᐊᒻᒪᓗ ᑎᑎᕋᖅᐸᓪᓕᐊᓪᓗᓂᒋᑦ ᑎᑕᐅᑎᓄᑦ ᑎᑎᕋᐅᓯᐊᕙᒃᑐᒥ.

“ᐸᐃᑉᐹᑎᒍᑦ ᑎᑎᕋᕐᓯᒪᔪᖃᕆᐊᓕᒃ ᐅᓄᕐᑐᑦ ᐃᓄᐃᑦ ᐊᔪᕈᓐᓃᕐᓴᕈᓐᓇᕐᓂᐊᕐᒪᑕ ᑎᑕᒐᓱᒃᑕᖏᓐᓂᒃ,” ᐅᖃᕐᑐᖅ.

ᐋᖅᑭᒃᓱᖅᑕᐅᓪᓗᓂ ᐃᖃᓗᖕᓂ ᐃᓐᕼᐊᐱᑦ ᑐᓴᕋᒃᓴᓕᕆᔨᓄᑦ, ᐅᓇ ᐅᖃᓕᒫᒐᖅ ᐊᐃᑉᐸᕆᔭᐅᔪᖅ ᑭᖑᓕᕇᒃᑐᓂᒃ ᓴᓇᔭᐅᓯᒪᔪᓂᒃ ᓯᕗᓂᐊᒍᑦ ᑲᑎᕐᓱᒐᕕᓂᕐᓂᒃ 2016-ᒥ. ᐅᑯᐊ ᓄᑖᖅ ᐃᙱᐅᑎᑦ ᐊᔾᔨᒌᙱᑦᑑᑎᐅᔪᖅ ᐊᒻᒪᓗ ᑲᑕᔾᔭᖅᑐᓂ ᐃᓚᖃᓕᕐᓯᒪᓪᓗᑎᒃ ᐃᓚᖏ ᐃᙱᖅᑏᑦ ᐃᙱᐅᓯᖏᓐᓂᒃ ᐆᑐᓇᖅ ᓲᓴᓐ ᐊᒡᓘᒃᑲᖅᑎᑐᑦ, ᐸᐃ ᒑᓚᖃᐅᑏᑦ, ᐅᕙᒍᑦ ᐊᒻᒪᓗ ᓗᐃ ᐋᕆᐊᒃ.

ᐃᙱᐅᓰᓐᓇᐃᑦ ᐱᐅᓯ-ᓗᐃᔅ ᐃᙱᖃᑦᑕᕐᓯᒪᔭᖏᑦ ᐅᑯᐊᓗ ᐃᓄᒃᓱᒃ ᕿᓚᐅᔾᔭᖅᑎᑦ, ᐃᓕᓐᓂᐊᖅᑏᑦ ᐃᙱᕐᑏ ᐃᓕᓐᓂᐊᖅᑎᖃᑦᑕᖅᑕᖏ ᐃᓕᓐᓂᐊᕐᕕᒃᒥᑦ.

“ᑭᖑᓂᐊᓂᓪᓕ, ᐃᓄᐃᑦ ᑲᑎᕐᓱᐃᓯᒪᔪᑦ ᓱᕈᓯᕐᓄᑦ ᐃᙱᐅᓯᓂᒃ ᐊᒻᒪ ᑕᐃᒪᐃᑦᑐᕈᔪᖕᓂ ᐃᓄᒃᑎᑐᑦ… ᑭᓯᐊᓂᓕ ᕿᓂᕋᑦᑕ ᐃᙱᐅᓯᑐᐃᓐᓇᕐᓂᒃ ᖁᕕᐊᓇᕈᓘᔭᖅᑐᓂᒃ ᓱᕈᓯᕐᓯᐅᑎᑐᐃᓐᓇᐅᙱᑦᑐᓂᒃ,” ᐅᖃᕐᑐᖅ.

ᐃᙱᐅᑎᓕᐊᖑᓯᒪᔪᑦ ᐃᓕᓐᓂᐊᕈᑎᐅᑉ ᓴᓂᑦᑎᐊᖓᓂ ᐆᒪᓗ ᓂᐱᓕᐅᕈᑎ CD, ᐊᑐᓂ ᐃᙱᐅᓰᑦ ᐅᖃᓕᒫᒐᕐᒥ ᐃᓚᖃᖅᑐᐃᓐᓇᐃᑦ ᐃᙱᐅᓯᕐᓂᒃ ᐃᓄᒃᑎᑐᑦ ᐊᒻᒪ ᖃᓕᐅᔭᖅᐸᐃᑐ ᐊᒻᒪᓗ ᖃᓪᓗᓈᑐᑦ ᑐᑭᓕᐅᕆᓯᒪᓪᓗᓂ ᐃᓚᖏᓪᓗ ᐅᐃᕖᑐᑦ.

“ᐃᓕᓐᓂᐊᕐᑐᓂᒃ ᓄᑲᖅᖡᖅᐹᑦ ᐅᓄᒻᒪᕆᒃᑐᑦ ᐃᓄᒃᑎᑐᑦ ᐃᓕᓐᓂᐊᕐᒪᑕ ᓯᕗᓪᓕᐅᙱᖢᓂ ᐅᖃᐅᓯᖏᓐᓂ … ᑕᐃᒪᓕ ᑐᑭᓕᐅᕆᔭᐅᓯᒪᓂᖓ ᐱᒻᒪᕆᐊᓗᒃ ᑭᓇᑐᐃᓐᓇ ᑐᑭᖓᓂ ᖃᐅᔨᔪᒪᔪᖅ ᖃᐅᔨᑦᑎᐊᕈᓐᓇᕐᓂᐊᕐᒪᑦ ᐃᙱᐅᓯᐅᑉ,” ᐱᐅᓯ-ᓗᐃᔅ ᐅᖃᕐᑐᖅ.

“ᐊᒻᒪᓗ ᐃᓕᓐᓂᐊᓕᕌᖓᒥᒃ ᑐᑭᓕᐅᕆᔭᐅᓯᒪᔪᒥᒃ ᐅᕝᕙᓘᓐᓃᑦ ᐅᖃᓪᓚᓕᕌᖓᒥᒃ ᐃᓄᖕᓄᑦ ᐃᙱᐅᓯᕐᓂᒃ ᑎᑎᕋᖅᑎᓂᒃ ᑕᐃᒪᓕ ᑐᑭᓯᓯᒪᑦᑎᐊᕈᓐᓇᕋᔭᕐᒪᑦ ᑖᓐᓇ ᐃᙱᐅᓯᖅ ᑐᑭᖃᕈᑎᖓᓂᒃ. ᑕᒪᓐᓇᓕ ᐃᓄᒃᑎᑐᑦ ᐃᓕᓐᓂᐊᕈᑎᑦᑎᐊᕙᒃ, ᐊᒃᑐᐊᔾᔪᑎᖃᖅᖢᓂ.”

ᐃᓕᓐᓂᐊᖅᑎᑕᖏᑦᑕ ᐱᐅᒋᓛᖏᑦ ᐃᙱᐅᓰᑦ ᐅᑯᐊᖓᔪᖅ ᐃᓅᓯᕗᑦ ᐅᑯᓇᙵᑦ ᐃᖃᓗᖕᒥᐅᑕᓄᑦ ‘ᐅᕙᒍᑦ’, ᑖᔅᓱᒪᓗ ᐱᐅᓯ-ᓗᐃᔅ ᑕᐃᓯᒪᓪᓗᓂᐅᒃ ᐱᐅᓪᓚᕆᒃᑐᐊᓗᒃ ᐃᙱᐅᓯᖅ ᐃᒻᒥᓂᒃ ᑭᓇᐅᓂᖓᓂᒃ ᐱᒃᑯᒋᓯᒪᓪᓗᓂ.

“ᐃᓚᖓ ᐃᙱᐅᓯᐅᑉ ᐅᖃᕐᓯᒪᖕᒪᑦ, ‘ᐃᓐᓇᑐᖃᕘ ᐊᐱᕐᓱᓚᐅᕐᓚᕗᑦ ᖃᐅᔨᒪᓂᐊᕋᑦᑕ,’” ᐅᖃᕐᑐᖅ.

“ᐅᖃᐅᓯᖃᕐᒪᓐ ᖃᓄᖅ ᐊᖓᔪᖅᑳᑦ ᐃᓕᖅᑯᓯᖏ ᐅᖃᐅᓯᖓ ᕿᑐᕐᖓᖏᓐᓄᑦ ᐊᑐᖅᑕᐅᑎᖃᑦᑕᕐᒪᖔᑦ.”

ᐸᐃ ᒑᓚᖃᐅᑏᑦ ᐃᙱᐅᓯᖓ ᐃᖅᑲᓇᐃᔭᕈᒪᓐᓂᑦᑐᒥ (ᑎᑎᕋᖅᑕᐅᓯᒪᕙᖕᒥᔪᖅ ᐃᖅᑲᓇᐃᔭᕈᒪᙱᑦᑐᖓ) “ᓱᒃᑲᔪᕈᓘᓪᓗᓂ,” ᐅᖃᕐᑐᖅ ᐱᐅᓯ-ᓗᐃᔅ ᑖᒃᑯᓇᙵᓪᓗ ᐃᓕᓐᓂᐊᖅᑎᑕᖏᓐᓄᑦ ᖁᕕᐊᒋᔭᐅᕙᒃᖢᓂ.

“ᐱᔾᔪᑎᖃᕐᒪᓐ ‘ᐃᖅᑲᓇᐃᔭᕈᒪᙱᑦᑐᖓ, ᓇᑦᑎᕋᓱᒍᒪᔪᖓ’…ᐅᓇ ᖁᕕᐊᓇᑐᐃᓐᓇᕐᒪᓐ.”

ᐃᓕᓐᓂᐊᖅᑎᑦᑎᓪᓗᓂ ᐃᙱᐅᓯᕆᔭᐅᕙᒃᑐᓂᒃ ᐃᓄᒃᑎᑐᑦ ᖃᐅᔨᕚᓪᓕᕈᑎᐅᖕᒪᑦ ᐃᓕᓐᓂᐊᖅᑎᓂᒃ ᓄᓇᓕᖕᓂ ᐃᙱᖅᑎᐅᕙᒃᑐᓂᒃ, ᐃᓚᖏᓪᓘᓐᓃᑦ ᐃᓕᓐᓂᐊᖅᑎᑕᖏᓐᓄᑦ ᐅᐸᒍᑎᓯᒪᔪᑦ ᐃᙱᖃᑎᖃᕆᐊᖅᑐᖅᖢᑎᒃ.

“ᐅᓄᕐᓂᕐᓴᐃᑦ ᖁᕕᐊᓱᑦᑎᐊᕐᒪᑕ ᑎᑕᐅᓯᓕᕆᓂᕐᒥᒃ ᐃᓕᓐᓂᐊᕐᓂᖏᓐᓂᒃ, ᑭᓯᐊᓂᓕ ᐅᖃᓕᒫᒐᐃᑦ ᑭᓇᑐᐃᓐᓇᕐᒧ ᐃᓕᓐᓂᐊᕈᑎᐅᔪᓐᓇᕐᓯᖕᒪᑕ ᐊᒻᒪᓗ ᑎᑕᐅᓯᖏᑦ ᐅᖓᓯᒃᑐᒧᑦ ᑐᓴᖅᑕᐅᔪᓐᓇᕐᓯᓗᑎᒃ,” ᐱᐅᓯ-ᓗᐃᔅ ᐅᖃᕐᑐᖅ.

“ᑭᓇᑐᐃᓐᓇ ᐃᓕᖅᑯᓯᕐᒥ ᖃᐅᔨᕚᓪᓕᕈᒪᔪᖅ ᑎᑕᐅᓯᕆᓂᒃᑯᑦ ᐊᑐᕈᓐᓇᖅᑐᑦ ᐅᖃᓕᒫᒐᕐᒥᒃ.”