ᐃᓄᒃᑐᑦ ᐅᖃᓕᒫᒐᕐᓂᒃ ᐴᖅᓯᒪᔪᓂᒃ ᓄᓇᕗᒧᙵᐅᔪᖃᓯᕗᖅ ᓱᕈᓯᕐᓄᑦ ᐅᖃᓕᒫᖅᑕᐅᖃᑦᑕᕐᓂᐊᖅᑐᓂᒃ

ᓄᓇᕗᑦ ᑐᙵᕕᒃᑯᑦ ᐱᓕᕆᖃᑎᖃᖅᐳᑦ ᐃᓐᕼᐊᐱᑦ ᒦᑎᐊᑯᓐᓂᒃ ᐃᓄᒃᑐᑦ ᐅᖃᓕᒫᒐᕐᓂᒃ ᐱᑖᖅᑎᑦᑎᓇᓱᒃᖢᑎᒃ ᐃᓄᖕᓂ ᓱᕈᓯᕐᓂᒃ ᓄᓇᕗᒦᑦᑐᓂᒃ.

ᑐᕌᒐᖃᕋᓱᒃᑐᓪᓕ ᐃᑲᔪᕈᑎᐅᓂᐊᕐᓗᑎᒃ ᐅᖃᐅᓯᖅᒥᒃ ᐃᓕᓐᓂᐊᖃᑦᑕᕐᓂᖅᒥᒃ ᐊᖏᕐᕋᖏᓐᓂᒃ, ᐅᖃᓚᐅᖅᑐᑦ ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᓕᐊᖓ ᐅᖃᓕᒫᒐᐃᑦ ᒥᒃᓵᓄᑦ.

“ᓄᓇᕗᑦ ᑐᙵᕕᒃᑯᑦ ᐃᑲᔪᖅᑐᐃᔨᐅᖕᒪᑕ ᐃᓄᒃᑐᑦ ᐅᖃᐅᓯᖅᒥᒃ ᐱᕙᓪᓕᐊᑎᑦᑎᓂᖅᒥᒃ, ᐃᓕᓐᓂᐊᖅᑕᐅᑎᑦᑎᓂᖅᒥᒃ ᐊᒻᒪᓗ ᓴᖅᑭᑎᑦᑎᓂᖅᓴᐅᓂᖅᒥᒃ,” ᐅᖃᓚᐅᖅᑐᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓴᒐᒃᓴᑎᒍᑦ.

“ᑕᒪᒃᑯᐊ ᓄᓇᕋᐃᑦ ᐃᓕᓐᓂᐊᖃᑦᑕᖅᑐᑦ ᐃᑲᔪᕈᑎᒃᓴᓂᒃ ᑐᓯᓪᓗᒋ ᐊᔪᕈᓐᓃᖅᐹᓪᓕᕐᓂᐊᖅᒪᑕ ᐅᖃᐅᓯᑦᑎᓐᓂᒃ, ᐱᔪᓐᓇᓕᖅᑎᓯᒪᔭᕗᑦ ᐃᓄᒃᑐᑦ ᐅᖃᐅᓯᖅᒥᒃ ᐱᕙᓪᓕᐊᔪᓐᓇᕐᓂᖅᒥᒃ.”

ᒫᓂ 2,000-ᖏᓐᓃᑦᑐᑦ ᐴᖅᑲᖅᓯᒪᐅᖅᑐᑦ ᐅᖃᓕᒫᒐᒃᓴᑦ ᐊᐅᓪᓚᖅᑎᑕᐅᓚᐅᖅᓯᒪᔪᑦ ᒫᔅᓯ 26-ᒥᑦ, ᓄᓇᕗᑦ ᑐᙵᕕᒃᑯᑦ ᐅᖃᓚᐅᖅᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐃᓚᒌᓄᙵᐅᔪᑦ ᕿᑐᕐᖓᖃᖅᑐᓄᑦ ᐃᓕᓐᓂᐊᓕᓵᖅᑐᓂᒃ ᐊᒻᒪ ᒍᕇᑦ 1-ᒥᒃ, ᑭᓯᐊᓂᓕ ᐃᓚᖃᐅᕐᒥᔪᑦ ᐅᖃᓕᒫᒐᕐᓂᒃ ᐃᑲᔪᕈᑎᐅᔪᓐᓇᖅᑐᓂᒃ ᐃᓚᒌᓕᒫᓄᑦ, ᓄᓇᕗᑦ ᑐᙵᕕᒃᑯᑦ ᐅᖃᓚᐅᖅᑐᑦ.

ᐊᑐᓂ ᐴᖅᑲᖅᓯᒪᔪᑦ ᐃᓗᓕᖃᖅᑐᑦ ᐊᔾᔨᙳᐊᖃᖅᑐᓂᒃ ᐅᖃᓕᒫᒐᕐᓂᒃ, ᒪᕐᕉᖕᓂ ᐃᓐᓇᕐᓄᑦ ᐅᖃᓕᒫᒐᕐᓂ, ᑕᓪᓕᒪᓂᒃ ᓱᕈᓯᓛᓂᒃ ᐃᓕᓐᓂᐊᖅᑎᑦᑎᒍᑎᓂᒃ, ᐱᖓᓱᓂᒃ ᐴᖕᓂ ᑕᒪᕐᒥᒃ ᖁᓕᒃ ᐅᖃᓕᒫᒐᖃᖅᖢᑎᒃ, ᑎᓴᒪᓂᒃ ᖃᓄᐃᓕᐅᕈᑎᒃᓴᓕᖕᓂᒃ ᐅᖃᓕᒫᒐᖃᖅᖢᑎᒃ ᐊᒻᒪᓗ ᑎᓴᒪᓂᒃ ᐃᓅᓱᒃᑐᓄᑦ ᐅᖃᓕᒫᒐᒃᓴᓂᒃ.

ᐱᑕᖃᕆᓪᓗᓂ ᑕᕐᕆᔭᒐᒃᓴᒥᑦ DVD ᐃᓄᖕᓄᑦ ᐅᓂᒃᑳᕆᔭᐅᔪᓂᒃ, ᐴᕐᓯᒪᔪᓂᒃ ᑕᑯᒃᓴᐅᓐᓇᒧᑦ ᐊᑕᐅᓯᖅᒨᖓᔪᓂᒃ ᑕᕐᕆᔭᒐᒃᓴᓂᒃ ᐆᒥᖓ ᐊᓈᓇᐅᑉ ᑐᐱᖓ, ᐊᒻᒪᓗ ᓂᐱᓕᐅᒐᐃᑦ ᐊᓈᓇᐅᑉ ᑐᐱᖓᓂᒃ ᐃᙱᐅᑎᓂᒃ ᐊᒻᒪ ᐃᓄᒃᑐᑦ ᐃᙱᐅᑎᓂᒃ.

ᑕᒪᐃᓐᓂᒡᓗ ᐴᖃᖅᓯᒪᔪᑦ ᐅᖃᓕᒫᒐᖃᖅᖢᑎᒃ ᐃᑲᔪᕈᑎᒥᑦ ᐅᖃᓕᒫᖃᑦᑕᕐᓂᖅᒥᒃ ᐊᖏᕐᕋᒥᒃ.

ᐃᓕᓴᐃᔩᑦ ᐃᓕᓐᓂᐊᓕᓵᖅᑐᓂᒃ ᐊᒻᒪ ᒍᕇᑦ 1-ᒥ ᓄᓇᕗᒥᑦ ᐃᓕᓐᓂᐊᕐᕕᖕᓂ ᓇᒡᓯᐅᔾᔪᓯᐊᖅᓂᐊᖅᑐᑦ ᑖᒃᑯᓂᖓ ᐊᒻᒪᓗ ᑐᓂᐅᖅᑲᓗᓂᔾᔪᒃ ᐃᓕᓐᓂᐊᖅᑎᑕᖏᓐᓄᑦ ᐃᓕᓐᓂᐊᖅᕕᒃᒥᑦ, ᓄᓇᕗᑦ ᑐᙵᕕᒃᑯᑦ ᐅᖃᓚᐅᖅᑐᑦ.

ᑖᒃᑯᐊ ᐋᖅᑭᒃᑕᐅᓯᒪᔪᑦ ᐊᑭᖃᖅᑐᑦ $1.3 ᒥᓕᐊᓐᓂᒃ. ᑖᓐᓇ ᑮᓇᐅᔭᖅ ᐅᑯᓇᙶᖅᓯᒪᔪᑦ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᐃᑲᔪᖅᑐᐃᓂᖅᒧᑦ ᐃᑲᔪᕈᑎᓂᒃ ᑲᓇᑕᐅᑉ ᒐᕙᒪᖓᓂᒃ, ᑖᒃᑯᐊᓗ ᓄᕕᐱᕆᐅᓚᐅᖅᑐᒥ ᑐᓂᓯᓚᐅᖅᓯᒪᓪᓗᑎᒃ ᓄᓇᕗᑦ ᑐᙵᕕᒃᑯᓐᓄᑦ $7.7 ᒥᓕᐊᓐᓂᒃ.

“ᓄᓇᕗᒥᑦ ᐃᓄᐃᑦ ᓄᓇᕋᖏᑦ ᑐᓗᖅᑕᖅᕕᖃᒻᒪᕆᖃᑦᑕᖅᒪᑕ ᐊᒃᑐᐃᒍᑎᖃᖅᖢᑎᒡᓗ ᐃᓕᓐᓂᐊᕐᓂᖏᓐᓄᑦ ᐆᒧᖓ ᐋᓐᓂᐊᕕᒡᔪᐊᕐᓇᒧᑦ ᒪᑐᔭᐅᓯᒪᓂᖏᓐᓄᑦ ᐃᓕᓐᓂᐊᖅᕕᐅᔪᑦ.” ᐅᖃᓚᐅᖅᑐᖅ ᓄᓇᕗᑦ ᑐᙵᕕᒃᑯᑦ ᑐᓴᐅᒪᔪᒃᓴᓕᕆᓂᖅᒧᑦ ᐅᖃᓪᓚᒃᑎᖓᑦ ᑭᐅᕋᓐ ᕕᓕᐅᕋᑎ.

ᐊᕐᕌᓂᐅᓚᐅᕐᑐᖅ, ᓄᓇᕗᑦ ᑐᙵᕕᒃᑯᑦ ᐊᒻᒪ ᐃᓐᕼᐊᐱᑦ ᒦᑎᐊ ᐱᓕᕆᖃᑎᒌᓕᓚᐅᖅᓯᒪᖕᒪᑕ ᐃᓄᒃᑐᑦ ᐅᖃᓕᒫᒐᐃᑦ ᐊᑐᐃᓐᓇᐅᔪᓐᓇᓕᖅᑎᑕᐅᔪᒪᓪᓗᑎᒃ ᐊᑭᖃᙱᓪᓗᑎᒃ ᖃᕋᓴᐅᔭᒃᑯᑦ ᐋᓐᓂᐊᕕᒡᔪᐊᕐᓇᐅᓂᖓᓂᒃ.