ᐃᓅᓱᒃᑐᖅ ᐸᓯᔭᒃᓴᐅᓕᕐᑐᖅ ᐅᐸᒃᑐᐃᓚᐅᕐᓂᕋᖅᑕᐅᓪᓗᓂ ᐃᓕᓴᐃᔨᒥᒃ ᓴᓂᕋᔭᒃᒥ

For English version, see Youth faces charges after allegedly attacking educator in Sanirajak

ᐃᓅᓱᒃᑐᖅ ᓴᓂᕋᔭᒃᒥ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᐋᓐᓂᖅᓯᓂᖓᓂᒃ ᐃᓕᓴᐃᔨᒥ ᐅᐸᒃᑐᐃᑎᓪᓗᒍ ᐳᐊᕐᕆᔭᐅᑎᒥ ᐱᓯᒪᓪᓗᓂ.

ᐸᓖᓯᒃᑯᑦ ᐅᖃᕐᑎᖓ ᓯᑖᕝ ᓵᔾᔭᓐ ᒪᐃᔪ ᐹᓖᓐ ᒥᓛᓐᓴ ᓇᓗᓇᐃᓚᐅᕐᑐᖅ ᐸᓖᓯᒃᑯᑦ ᓴᓂᕋᔭᒃᒥ ᖃᐅᔨᓴᕐᓂᕋᖅᖢᓂᒋᑦ ᖃᓄᐃᓕᐅᕈᑎᐅᓚᐅᕐᑐᒥ ᓄᕕᐱᕆ 20-ᐅᑎᓪᓗᒍ.

ᐃᓅᓱᒃᑐᖅ ᐃᓄᒃ ᐸᓯᔭᒃᓴᙳᖅᑎᑕᐅᔪᖅ ᓱᒋᐅᑎᖃᖅᖢᓂ ᐊᒻᒪ ᐅᖃᓪᓚᒃᖢᓂ ᐅᓗᕆᐊᖅᓵᕆᓪᓗᓂ ᐃᓕᓐᓂᐊᕐᕕᒃᒥ ᐃᓕᓴᐃᔨᒥ ᓂᐊᖁᐊᒍᑦ ᐊᓇᐅᓯᐊᓪᓚᓚᐅᖅᖢᓂ ᐳᐊᕐᕆᓯᒧᑦ, ᓄᓇᑦᓯᐊᕐᒥ ᐱᕙᓪᓕᐊᔪᑦ ᖃᐅᔨᓕᓚᐅᕐᑐᑦ.

ᓄᓇᕗᒥᑦ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᖓ ᔮᔅᑎᓐ ᒫᑦᓴᑦ ᐅᖃᓚᐅᕐᑐᖅ ᑲᑐᔾᔨᖃᑎᒌᑦ ᖃᐅᔨᓚᐅᕐᓂᖏᓐᓂᒃ ᖃᓄᐃᓕᐅᕈᑎᒥ ᐊᒻᒪᓗ ᐅᖃᖃᑎᖃᕐᓯᒪᓪᓗᑎᒃ ᐃᓕᓴᐃᔨᒥ ᐃᑲᔪᖅᑐᐃᓇᓱᒃᖢᑎᒃ.

“ᐅᖃᕈᓐᓇᕐᑐᖓᓕ ᐅᔾᔨᕆᓂᑦᑎᓐᓂᒃ ᐅᓄᕐᓯᕚᓪᓕᖅᑐᓂᒃ ᐱᑦᑎᐊᙱᓐᓂᐅᓗᐊᖅᑐᐊᓗᖕᓂᒃ,” ᒫᑦᓴᑦ ᐅᖃᕐᑐᖅ.

ᐅᖃᓚᐅᕐᑐᖅ ᐃᓕᓴᐃᔨ ᓂᐊᖁᐊᒍᑦ ᒥᕐᓱᖅᑕᐅᔭᕆᐊᖃᓚᐅᕐᓂᖓᓂ ᑭᓕᖅᑕᐅᓂᑯᐊ ᒪᑐᔭᐅᓇᓱᒃᖢᓂ.

“ᑕᑯᕙᓪᓕᐊᒐᑦᑕ ᐱᑦᑎᐊᙱᓗᐊᖃᑦᑕᓕᖅᑐᓂᒃ ᐋᓐᓂᕐᓯᕆᔪᓂᓪᓗ ᐅᖃᒃᑯᑐᐃᓐᓇᐅᙱᑦᑐᖅ ᐃᓕᓴᐃᔨᑦᑎᓐᓄᑦ,” ᒫᑦᓴᑦ ᐅᖃᕐᑐᖅ. “ᑕᒪᓐᓇ ᐃᓱᒫᓗᖕᓇᕐᓯᔪᖅ.”

ᐃᓕᓐᓂᐊᕐᓂᓕᕆᔨᒃᑯᑦ ᐅᖃᖅᑎᖓ ᑯᕆᔅᑕ ᐊᐃᒥ ᐅᖃᓚᐅᕐᑐᖅ ᐃᓕᓐᓂᐊᕐᓂᓕᕆᔨᒃᑯᑦ ᑕᒪᑐᒧ ᐅᖃᕈᓐᓇᙱᓐᓂᖏᓐᓂᒃ ᐸᓖᓯᓄᑦ ᓱᓕ ᖃᐅᔨᓴᖅᑕᐅᓂᖓᓄᑦ.

“ᐱᒻᒪᕆᐅᒋᓛᕆᔭᕗᓪᓕ ᖃᓄᐃᖁᓇᑦᒍᑦ ᐃᓕᓐᓂᐊᖅᑎᐅᔪᑦ ᐊᒻᒪ ᐃᓕᓐᓂᐊᕐᕕᒃᒥᑦ ᐃᖅᑲᓇᐃᔭᖅᑎᕗᑦ,” ᐅᖃᕐᑐᖅ.