ᐃᕗᔨᕕᒃᒥᑦ ᐃᓕᓐᓂᐊᖅᑏᑦ ᐃᓕᓴᕆᔭᐅᔾᔪᑎᑖᖅᑐᑦ ᐅᓂᒃᑳᖅᑐᐊᕐᒥ ᐅᖃᓕᒫᒐᓕᐊᕆᔭᖓᓐᓄᑦ

For the English version of this story, see Ivujivik students win award for adapting traditional story into book.

ᑲᓪᓕᖅᒥ ᓴᖅᑭᑦᑐᖃᑳᓪᓚᖅᖢᓂᑦ ᑕᕐᕋᕐᒥᒃ ᓴᖅᑭᑦᑐᖃᖅᑐᖅ — ᐃᓄᒐᕈᓪᓕᖅ.

ᐅᓇ ᓴᖅᑭᔮᖅᑐᓂᒃ ᐃᓚᒋᔭᐅᔪᖅ ᐅᕙᙵᑦ L’inugagullirq, ᐃᓕᓴᕆᔭᐅᔾᔪᑎᑖᕈᑎᐅᓯᒪᔪᖅ 7-ᓄᑦ ᐃᓕᓐᓂᐊᕐᑎᓄᑦ ᓄᕝᕕᑎ ᐃᓕᓐᓂᐊᕐᕕᒃᒥᑦ ᐃᕗᔨᕕᒃᒥᑦ, ᓄᓇᕕᒃᒥ ᓄᓇᓕᒃ ᐃᓄᖃᖅᑐᖅ ᒫᓂ 415-ᓂᒃ.

ᐅᓇ ᐅᓂᒃᑳᖅᑐᐊᖅ ᐆᒪᔪᕕᓂᕐᒥᒃ ᑕᐃᔭᐅᔪᒥᒃ ᐃᓄᒐᕈᓪᓕᖅᒥᒃ. ᒥᑭᖢᓂ, ᐊᒻᒪᓗ ᐊᑐᒡᒍᓪᓗᓂ ᕿᓯᖕᓂᒃ ᐊᒻᒪᓗ ᐅᔭᖅᑲᑦ ᐊᑖᓃᑉᐸᒃᖢᓂ ᐊᓯᐅᕙᒃᖢᓂ ᑕᑯᔭᐅᑐᐊᕌᖓᑦ. ᑭᓯᐊᓂᓕ ᐸᒡᕕᓵᕆᔭᐅᒍᓂᒃ ᐊᖓᒃᑰᓂᕐᒥᓂᒃ ᐊᑐᖃᑦᑕᖅᑐᖅ ᓯᓐᓇᕆᒃᓯᑎᑦᑎᕙᒃᖢᓂ ᐸᒡᕕᓵᕆᔪᓂᒃ.

ᐅᓂᒃᑳᒥ, ᐊᑖᑕᒋᔭᐅᔪᖅ ᐃᓚᒥᓂᒃ ᐱᖃᑎᖃᖅᖢᓂ ᑕᓯᐅᑉ ᓴᓂᑦᑎᐊᖓᓂ ᐳᐱᕐᓯᒪᔪᖅ ᐅᐱᕐᖔᒃᑯᑦ ᑕᑯᕗᖅ ᐃᓄᒐᕈᓪᓕᖅᒥᒃ ᐅᓐᓄᒃᑯᑦ ᓯᓚᓗᒃᑎᓪᓗᒍ. ᑖᓐᓇ ᐅᖃᐅᓯᕆᙲᓐᓇᖅᖢᓂᐅᒃ ᐃᓚᒥᓄᑦ, ᑭᓯᐊᓂᓕ ᓯᓐᓇᒃᑐᖃᑦᑕᓕᖅᖢᓂ ᑖᔅᓱᒥᖓ. ᐊᓱᐃᓛᒃ ᓄᓇᐊᓂ ᐅᖃᐅᑎᑕᐃᓐᓇᖅᖢᓂᐅᒃ.

ᐅᓇ ᐅᓂᒃᑳᖅᑐᐊᖅ ᐅᓂᒃᑳᕆᔭᐅᕙᒃᑐᖅ ᐃᓐᓇᕐᓄᑦ ᑕᐃᒪᓕ ᑕᑯᓐᓂᕈᕕᑦ ᐃᓄᒐᕈᓪᓕᖅᒥᒃ ᑕᐃᒪᓕ ᑲᐱᐊᓱᔾᔮᖏᓐᓇᕕᑦ ᐊᒻᒪᓗ ᐊᖅᑐᖅᓯᕙᙱᓪᓗᑎᑦ ᑖᔅᓱᑐᓇ ᐊᖑᑎᑐᑦ.

ᐃᓕᓐᓂᐊᕐᑏᑦ ᑖᔅᓱᒥᖓ ᐅᖃᓕᒫᒐᓕᐅᓕᓚᐅᕐᓯᒪᔪᑦ ᐅᒃᑑᐱᕆᐅᑎᓪᓗᒍ ᐊᒻᒪᓗ ᐱᐊᓂᒃᑕᐅᓪᓗᓂ ᒫᔅᓯᒥ.

ᑖᓐᓇ ᐱᓕᕆᐊᖑᓂᐊᓵᖅᖢᓂ ᐃᓕᓴᐃᔨ ᓇᓕ ᑐᕕᒃ ᒪᕐᕉᖕᓂ ᐃᓐᓈᖕᓂ ᐃᓕᓐᓂᐊᕐᕕᒃᒧᐊᖅᑎᑦᑎᓚᐅᕐᓯᒪᔪᖅ, ᖁᒪᖅ ᒪᖏᐅᒃ ᐃᔭᐃᑦᑐᖅᒥᒃ ᐊᒻᒪ ᐸᓴ ᒪᖏᐅᒃ. ᑕᒪᕐᒥᒃ ᑖᒃᑯᐊ ᓱᕈᓯᕐᓄᑦ ᐅᓂᒃᑳᓂᒃ ᐅᓂᒃᑳᖃᑦᑕᓚᐅᖅᑑᑦ.

ᐃᓐᓇᖅ ᖁᒪᖅ ᐃᔭᐃᑐᒃ ᑎᑎᕋᐅᔭᒐᕐᓂᒃ ᑕᑯᑎᑦᑎᔪᖅ ᐃᓕᓪᓂᐊᖅᑎᓂᒃ, ᑖᒃᑯᐊᑦᑕᐅᖅ ᐃᓱᒪᒋᔭᖏᓐᓂᒃ ᑎᑎᕋᑐᐃᓐᓇᕆᐊᖃᖅᓯᒪᓪᓗᑎᒃ. (ᐊᔾᔨᙳᐊᖅ ᐅᕙᙵᑦ ᓇᓕ ᑐᕕᒃ)

“ᐃᓐᓇᕐᓂ ᐃᓕᓐᓂᐊᕐᕕᒃᒧᐊᖅᑎᑦᑎᓪᓗᓂ ᐃᑲᔪᕈᑎᒻᒪᕆᐅᓚᐅᕐᑐᖅ ᐃᓕᓐᓂᐊᕐᑐᓂᒃ, ᓲᖃᐃᒻᒪ ᖃᓄᖅ ᐱᒋᐊᕈᑎᒃᓴᖏᓐᓂᒃ ᖃᐅᔨᑎᑕᐅᓚᐅᕐᒪᑕ ᐅᖃᓕᒫᒐᓕᐅᕈᒪᑎᓪᓗᒋᑦ, ᑐᕕᒃ ᐅᖃᕐᑐᖅ.

ᐃᓕᓐᓂᐊᖅᑎᑕᖏᑦ ᒍᕇᑦ 5-ᒥ ᐊᒻᒪ 6-ᒥ ᐅᓂᒃᑳᒥ ᑎᑎᕋᐅᓯᖃᓚᐅᕐᑐᑦ ᐅᐃᕖᑐᑦ ᐊᒻᒪᓗ ᒍᕇᑦ 7 ᐃᓄᒃᑎᑑᓕᕆᓪᓗᑎᒃ. ᑕᒪᕐᒥᒃ ᒍᕇᑦᒦᑦᑐᑦ ᐱᖓᓱᓂᒃ ᐃᓚᐅᓚᐅᕐᑐᑦ ᑎᑎᕋᐅᔭᒐᕐᓂᒃ ᑎᑎᕋᐅᔭᖅᑎᓪᓗᒋᑦ.

ᐱᓇᓱᐊᕈᓰᑦ ᐅᓄᙱᑦᑐᑦ ᐊᓂᒍᖅᑎᓪᓗᒋᑦ ᐅᓇ L’inugagullirq ᒫᓐᑐᕆᐊᒧᑦ ᐊᐅᓪᓚᖅᑎᑕᐅᔪᓐᓇᕐᓯᓚᐅᖅᑐᖅ ᐅᖃᓕᒫᒐᓕᐊᖑᕐᓂᐊᖅᒪᑦ.

ᑖᒃᑯᐊ ᓱᕈᓰᑦ ᑕᑯᓚᐅᙱᑦᑐᑦ ᖃᓄᐃᓕᐅᖅᑕᕕᓂᕐᒥᖕᓂᒃ ᑕᖅᑭᒐᓴᖕᓂᒃ.

“ᐱᓇᓱᐊᕈᓯᖅ ᐊᑕᐅᓰᖅᑕᐅᓪᓗᓂ ᐊᐱᕆᔭᐅᖃᑦᑕᓚᐅᕐᑐᖓ, ‘ᓇᐅᒃᑕᐃᒪ ᐅᖃᓕᒫᒐᖅ, ᖃᑯᒍᓕ ᑕᑯᓂᐊᕋᑦᑎᒍᑦ?’” ᑯᕕᒃ ᐅᖃᓚᐅᕐᑐᖅ. “ᐳᐃᒍᙲᓐᓇᖅᖢᑎᒃ.”

ᑕᒪᑐᒥᖓ ᐃᓱᒪᒋᔭᖃᐃᓐᓇᓚᐅᕐᑐᑦ ᑭᓯᐊᓂ ᑎᒍᒥᐊᕈᓐᓇᖅᓯᒐᒥᒡᔪᒃ. ᒪᑐᐃᑐᐊᕋᒥᔾᔪᒃ ᐊᒃᓱᐊᓗᒃ ᐅᐱᒍᓱᓚᐅᕐᑐᑦ ᑎᑎᕋᐅᔭᒐᖏᓐᓂᒃ ᐋᖅᑭᒃᓱᖅᑕᕕᓂᖏᓐᓂᒃ, ᑐᕕᒃ ᐅᖃᕐᑐᖅ.

“ᐃᔨᖏᑦ ᖃᐅᒻᒪᑦᑎᐊᓚᐅᕐᑐᑦ,” ᐅᖃᕐᑐᖅ. “ᐅᓇ ᐱᓪᓚᕆᙳᓚᐅᕐᒪᑦ ᐊᒻᒪᓗ ᐱᒃᑯᓕᑦᑎᐊᖅᖢᑎᒃ.”

ᑭᖑᓂᐊᒍᑦ ᑐᕕᒃ ᐃᓕᓐᓂᐊᕐᑎᓪᓗ ᐋᖅᑭᒃᓯᓕᓚᐅᕐᑐᑦ ᐅᖃᓕᒫᒐᖅ ᓴᖅᑭᑕᐅᔾᔪᑎᐊᓂᒃ.

ᓄᓇᓖᑦ ᑕᒪᕐᒥᐸᓗᒃ ᐃᓕᓐᓂᐊᕐᕕᐅᑉ ᐃᖃᐃᓕᓴᕐᕕᖓᓄᐊᓚᐅᕐᓯᒪᔪᑦ ᐅᑕᕿᔪᑦ ᖃᓄᐃᓕᐅᕈᑎᕕᓂᕐᓂᒃ. ᑐᕕᒃ ᐅᖃᓚᐅᕐᑐᖅ “ᐅᓇ ᓯᕗᓪᓕᖅᐹᖅ ᐅᓄᕈᓘᔭᖅᑐᓂᒃ ᑕᑯᓪᓗᑕ ᐃᓕᓐᓂᐊᕐᕕᖕᒧᐊᖅᑐᓂᒃ.”

ᓯᕗᓪᓕᕐᒥᒃ ᐅᓇ, L’inugagullirq ᑐᓂᐅᖃᖅᑕᐅᔾᔮᓚᐅᙱᑦᑑᒐᓗᐊᖅ. ᑭᓯᐊᓂᓕ ᐃᕗᔨᕕᒃᒥᑦ ᐱᔭᐅᔪᒪᓪᓚᕆᓚᐅᕐᒪ ᑕᐃᒪᓗ ᐅᓄᕐᓂᖅᓴᓂᒃ ᓴᓇᔭᐅᑎᑦᑎᔭᕆᐊᖃᓕᓚᐅᕐᑐᑦ.

“ᐅᒃᐱᕐᓇᓚᐅᙱᑦᑐᖅ,” ᐅᖃᕐᑐᖅ ᑖᓂᐅᓪ ᓵᑎᐄ, ᐅᖃᓕᒫᒐᕐᒥᒃ ᐋᖅᑭᒃᓱᐃᔨ.

ᓵᑎᐄ ᐱᓕᕆᖃᑎᖃᖃᑦᑕᖅᑐᖅ ᓚᐳᕋᑑᕆᒥ ᐅᑭᐅᕐᑕᖅᑐᕐᒥ ᑎᑎᕋᐅᔭᒐᕐᓂᒃ, ᑖᓐᓇᓗ ᐱᒋᐊᖅᑎᓚᐅᖅᓯᒪᓪᓗᓂᐅᒃ ᑯᐸᐃᒃ ᔫᓂᕗᓯᑎᒥ ᒪᓐᑐᕆᐊᒥ ᐱᓕᕆᖃᑎᖃᖅᐸᒃᑐᑦ ᐊᒥᓱᓂᒃ ᐅᑭᐅᕐᑕᖅᑐᕐᒥ ᓄᓇᕐᔪᐊᓕᖕᓂ ᖃᐅᔨᓴᕐᓂᕐᒥᒃ ᐅᑭᐅᕐᑕᖅᑐᕐᒥᒃ.

ᑐᕕᒃ, ᐃᓕᓐᓂᐊᕌᓂᒃᓂᑯ ᔫᓂᕘᓯᑎᒥ ᑯᐸᐃᒃᒥ ᒪᓐᑐᕆᐊᒥᒃ ᐱᓕᕆᖃᑎᖃᓚᐅᕐᑐᖅ ᓵᑎᐄᒥ ᐊᒻᒪ ᔫᓂᕘᓯᑎ ᑯᐸᐃᒃᒥ ᒫᓐᑐᕆᐊᒥᒃ ᐱᓕᕆᐊᖓᓂᒃ ᐆᒥᖓ Un Livre à la fois ᐱᓕᕆᐊᒥᒃ, ᐱᓕᕆᔾᔪᑎ ᐃᓕᓐᓂᐊᖅᑎᓂᒃ ᐊᒻᒪ ᔫᓂᕘᓯᑎᒥ ᐃᓕᓐᓂᐊᖅᑎᓂᒃ ᐅᖃᓕᒫᒐᓕᐅᕐᓂᕐᒧᑦ.

ᑮᓇᐅᔭᓂ ᐃᑲᔫᑎᖃᖅᖢᑎᒃ ᑲᓇᑕᒥ ᐃᑦᑕᕐᓂᓴᓕᕆᔨᒃᑯᓐᓂᒃ ᑖᒃᑯᓂᖓ ᐱᓕᕆᔪᓂᒃ ᐃᕗᔨᕕᒃᒧᐊᖅᑎᑦᑎᔪᓐᓇᓚᐅᕐᑐᑦ ᐃᑲᔪᕆᐊᖅᖢᑎᒃ ᑐᕕᒃᒥ ᐱᐊᓂᒐᓱᖕᓂᖓᓂᒃ ᐅᖃᓕᒫᒐᕐᒥᒃ.

ᖄᖓ L’inugagullirq, ᑎᑎᕋᖅᑕᐅᓯᒪᔪᖅ, ᑎᑎᕋᐅᔭᖅᑕᐅᓪᓗᓂᓗ ᐊᒻᒪ ᑐᑭᓕᐅᕆᔭᐅᓪᓗᓂ ᐃᓕᓐᓂᐊᖅᑎᓂᒃ ᐃᕗᔨᕕᒃᒥ. (ᐊᔾᔨᙳᐊᖅ ᐅᕙᙵᑦ Laboratory on the images of the North, winter, cold and the Arctic)

ᓵᑎᐄ 120 ᐅᖃᓕᒫᒐᕐᓂᒃ ᓴᓇᔭᐅᑎᑦᑎᓚᐅᕐᓯᒪᔪᖅ ᐃᓄᖕᓄᑦ ᐃᕗᔨᕕᒃᒧᑦ, ᓈᒻᒪᓪᓗᐊᖅᖢᑎᒃ ᓄᓇᓖᑦ ᐃᓄᖏᑦᑕ ᓇᑉᐸᖏᓐᓄᑦ.

ᑭᓯᐊᓂᓕ ᐃᓕᓴᕆᔭᐅᔾᔪᑎᖏᑦ ᑕᐃᑯᖓ ᓄᖃᑐᐃᓐᓇᓚᐅᙱᑦᑐᑦ. ᐅᓇ L’inugagullirq ᓂᕈᐊᕆᔭᐅᓚᐅᕐᓯᒪᔪᖅ ᑯᐸᐃᒃ ᒐᕙᒪᒃᑯᓐᓄᑦ ᐅᖃᓕᒫᒐᓕᕆᓂᕐᒧᑦ ᐃᓕᓴᕆᔭᐅᔾᔪᑎᒧᑦ (Reading Recognition Awards). ᑐᕕᒃ ᐅᖃᐅᔾᔭᐅᓚᐅᙱᑦᑐᖅ ᓇᓕᐊᓐᓂ ᐃᓕᓴᕆᔭᐅᔾᔪᑎᒥ ᐱᓂᐊᕆᐊᒃᓴᖓᓂᒃ ᐊᒻᒪᓗ ᐱᖓᓱᓂ ᐃᓕᓐᓂᐊᕐᑎᓂᒃ ᐱᖃᑎᖃᕐᓗᓂ ᑯᐸᐃᒃ ᓯᑎᒧᑦ ᐅᐸᒍᑎᓛᖅᑐᑦ ᖁᕕᐊᓲᑎᐅᑎᓪᓗᒋᑦ ᑯᐸᐃᒃᒥ ᓯᑎᒥ ᒪᐃ 26-ᖑᓕᖅᐸᑦ ᖃᐅᔨᓛᖅᖢᓂ.

ᓵᑎᐄ ᐅᖃᓚᐅᕐᑐᖅ ᐅᖃᓕᒫᒐᓕᐅᕐᓂᖅ ᐃᑲᔪᕈᑎᒻᒪᕆᐅᓂᕋᖅᖢᓂᐅᒃ ᐃᓕᓐᓂᐊᕈᑎᓄᑦ.

“ᐊᒃᑐᐃᓂᖃᓕᕈᑎᐅᖕᒪᑦ ᐃᓕᓐᓂᐊᕐᕕᒃᒧᑦ,” ᐅᖃᕐᑐᖅ.

“ᐅᖃᓕᒫᖃᑦᑕᕐᓂᖅ ᐱᒻᒪᕆᐅᓕᖅᑎᑕᐅᓪᓗᓂ, ᓲᖃᐃᒻᒪ ᐊᒃᑐᐃᓂᖃᓪᓚᕆᖕᒪᓐ ᐃᓕᓐᓂᐊᕐᑎᓄᑦ ᐃᓕᓐᓂᐊᕐᓂᕐᒥᒃ ᐊᒃᓱᕈᓗᐊᖅᐸᙱᑦᑐᓄᑦ.”

ᑐᕕᒃ ᐅᖃᓚᐅᕐᑐᖅ ᐸᕐᓇᒃᐸᓪᓕᐊᔪᒪᓂᕋᖅᖢᓂ ᑕᐃᒪᓐᓇ ᐊᔾᔨᐸᓗᐊᓂᒃ ᐊᕐᕌᒍᒧᑦ, ᓄᑖᓂ ᐃᓕᓐᓂᐊᕐᑎᓂᒃ ᐱᓕᕆᖃᑎᖃᕐᓗᓂ ᐊᒻᒪᓗ ᓄᑖᒥ ᐅᓂᒃᑳᓕᕆᓗᑎᒃ ᐅᑯᓇᙶᕐᓂᐊᖅᑐᓂᒃ ᐃᓅᓱᒃᑐᓂᒃ ᐃᕗᔨᕕᒃᒥᑦ.

ᑕᒪᕐᒥᒃ ᐅᖃᓕᒫᒐᖅ ᐊᒻᒪ ᑐᓵᔭᐅᔪᓐᓇᖅᑐᖅ ᐅᖃᓕᒫᒐᖅ ᐅᖄᓕᒫᖅᑕᐅᓪᓗᓂ ᐃᓕᓐᓂᐊᖅᑎᓄᑦ ᓇᓂᔭᐅᔪᓐᓇᖅᑐᖅ ᖃᕋᓴᐅᔭᒃᑯᑦ ᐅᑯᐊ Un Livre à la fois ᖃᕋᓴᐅᔭᒃᑯᑦ ᓴᖅᑭᔮᒐᖓᓂᒃ.