ᐃᖃᓗᐃᑦ ᐃᑎᔪᒥ ᑐᓚᒃᑕᕐᕕᖓ ᓯᕗᓪᓕᖅᐹᒥ ᐅᒥᐊᕐᔪᐊᕐᒥ ᑐᓚᒡᕕᐅᕗᖅ

For English version, see Iqaluit’s deepsea port sees 1st sealift come to dock

ᐅᕙᓂ ᐃᖃᓗᐃᑦ ᐃᑎᔪᒥ ᑐᓚᒃᑕᕐᕕᒋᓕᖅᑕᖓᓂ ᐅᓄᕈᓘᔭᒻᒪᕆᒃᑐᑦ ᓴᐴᓕᑕᐅᑉ ᐃᓗᐊᓃᑦᑐᓂᒃ ᓄᓇᓯᐅᑎᒐᓚᐃᑦ, ᐅᒥᐊᕐᔪᐊᕐᒥ ᐴᒃᓴᓂᒃ ᐊᒻᒪᓗ ᐃᒡᓗᒃᓴᓂᒃ ᐊᖏᕐᕋᕆᔭᐅᓂᐊᖅᑐᓂᒃ ᐱᑕᖃᐅᕈᓘᔭᕐᑐᖅ.

“ᐅᓇ ᐱᐅᓯᕚᓪᓕᕈᑎᐅᖃᑕᐅᒻᒪᕆᒃᑐᖅ,” ᐅᖃᕐᑐᖅ ᐳᕋᐃᐊᓐ ᑕᑦᑐᐃᓂ, ᐱᓕᕆᐊᓂ ᐱᕙᓪᓕᐊᔪᓕᕆᓂᕐᒧᑦ ᐊᐅᓚᑦᑐᔨ ᐅᑯᓇᓂ ᓄᓇᕗᒥᑦ ᐅᒥᐊᕐᔪᐊᓕᕆᔨᒃᑯᓐᓂᒃ ᓰᓕᖕᒃ ᐊᒻᒪ ᐱᖁᑎᓕᕆᔨᒃᑯᓐᓂ (Nunavut Sealink and Supply Inc.).

ᐅᖃᓪᓚᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᕝᕙᓂ ᑐᓚᒃᑕᕐᕕᒃᒥ ᐋᒐᓯ 16ᖑᑎᓪᓗᒍ ᑕᒪᒃᑯᐊ ᑲᑭᐊᓖᑦ ᓱᒃᑲᓕᑲᑕᒃᑎᓪᓗᒍᑦ ᓯᒡᔭᓕᐊᑲᑕᒃᑐᑦ ᐅᕙᙵᑦ ᐅᒥᐊᕐᔪᐊᕐᒥ MV ᔨᓛᑕ ᑎ ᐊᒻᒪᓗ ᐱᖁᑎᓕᕆᔨᒃᑯᓐᓂ ᑖᓐᓇ ᐅᓯᖏᖅᑕᐅᕙᓪᓕᐊᑎᓪᓗᒍ ᐅᒥᐊᕐᔪᐊᑉ ᑭᕕᒃᓯᔾᔪᑎᖏᓐᓄᑦ.

ᑕᐃᑲᙵᑦ ᐃᓂᖃᑦᑎᐊᓚᐅᕐᑐᑦ ᐱᖁᑎᓂᒃ ᐅᓯᖏᖅᓯᕙᓪᓕᐊᑎᓪᓗᒋ ᓄᓇᓯᐅᑎᓄᑦ ᐊᐃᔭᐅᑐᐃᓐᓇᕆᐊᖃᓕᖅᖢᑎ ᓄᓇᓕᐸᐅᔭᓄᑦ.

ᐅᓇ ᐅᒥᐊᕐᔪᐊᖅ ᔨᓛᑕ ᑎᒐᓃ ᓯᕗᓪᓕᖅᐹᖑᓚᐅᕐᑐᖅ ᑐᓚᒃᑐᓂᒃ ᐊᒻᒪ ᐅᓯᖏᖅᓱᖅᑕᐅᓪᓗᓂ ᑕᕝᕗᖓ ᐃᖃᓗᐃᑦ $84.9 ᒥᓕᐊᓐ ᑖᓚᑐᕐᑐᖅ ᑐᓚᒃᑕᕐᕕᒃᒧᑦ, ᑖᓐᓇᓕ ᒪᑐᐃᓚᐅᕐᓯᒪᔪᖅ ᔪᓚᐃ 25ᖑᑎᓪᓗᒍ. ᒪᕐᕉᒃ ᑭᖑᓕᕇᒃᑕᖅᖢᑎᒃ ᐱᓕᕆᐊᖃᖅᑑᒃ ᐅᒥᐊᕐᔪᐊᖅᒥ ᐅᓯᖏᕐᓰᑎᓪᓗᒋᑦ.

ᑕᑦᑐᐃᓂ ᐅᖃᓚᐅᕐᑐᖅ ᐅᓕᑉᐸᓪᓕᐊᓂᖓ ᓈᒻᒪᓚᐅᕐᓂᖓᓂᒃ ᑖᓐᓇ ᐱᓕᕆᕝᕕᐅᕙᓪᓕᐊᓂᐊᖅᑎᓪᓗᒍ ᐅᓇ ᔨᓛᑕ ᑎᒐᓃ ᑎᑭᑎᓪᓗᒍ ᐋᒐᓯ 13ᒥ.

“ᐱᒻᒪᕆᐊᓘᖕᒪ ᑕᒪᓐᓇ ᐱᓇᓱᒃᑯᑦᑎᒍᑦ,” ᐅᖃᕐᑐᖅ ᑕᑦᑐᐃᓂ.

“ᐊᔾᔨᓕᐅᕆᑲᑕᓚᐅᕋᒪ ᐱᓕᕆᔨᐅᔪᓄᑦ ᐊᒻᒪᓗ ᐊᖓᔪᖅᑳᕆᐅᔭᐅᔪᖅ ᑎᑎᕋᖅᐸᓪᓕᐊᓯᒪᓪᓗᓂ — ᑎᑎᕋᖅᐸᓪᓕᐊᒐᑦᑕ ᖃᓄᖅ ᐃᖃᓗᐃᑦ ᐱᔨᑦᑎᕋᑦᑎᐊᒃᑲᓐᓂᕈᓐᓇᕐᒪᖔᑎᒍᑦ.”

ᐅᓇ ᐱᓕᕆᔾᔪᓯ ᐊᔾᔨᒋᙱᒻᒪᕆᒃᑕᖓ ᐅᒥᐊᕐᔪᐊᓕᕆᓂᕐᒧᑦ ᐊᑐᕐᑕᐅᕙᓚᐅᕐᓯᒪᔪᒥᒃ.

ᑲᖓᒃᑲᓐᓂᕐᓕ ᒪᑯᐊ ᓯᑲᐅᑦ ᐱᖁᑎᓂᒃ ᐅᓯᓪᓗᑎᒃ ᐅᒥᐊᕐᔪᐊᕐᒥ ᑐᓚᒃᓯᒪᔪᒥᒃ ᑲᖏᖅᖢᒥ. ᐅᑯᐊ ᓯᑲᐅᑦ ᑕᒪᒃᑯᓂᖓ ᓯᒡᔭᓕᐊᕈᔾᔨᕙᒃᖢᑎᒃ ᐊᒻᒪᓗ ᑭᒃᑯᑐᐃᓐᓇᑦᑎᐊᕐᓄᑦ ᐱᔭᐅᔪᓐᓇᖅᖢᑎᒃ.

ᑕᐃᒪᓐᓇ ᐱᓕᕆᖃᑦᑕᓚᐅᕐᓯᒪᔪᑦ ᐅᓪᓗᓂ 7ᓂ ᐱᓕᕆᓪᓗᑎᒃ.

ᐅᓇ ᐊᑯᓂᕈᓗ ᐅᑕᖅᑭᔭᐅᓯᒪᓂᑯ ᐃᑎᔪᒥᒃ ᑐᓚᒃᑕᕐᕕᒃᓴᖅ ᐅᒥᐊᕐᔪᐊᑦ ᕿᓚᒥᐅᓂᕐᓴᖅ ᐅᓯᖏᕐᓰᖃᑦᑕᕐᓂᐊᕐᒪᑕ, ᐅᓗᕆᐊᓇᙱᓐᓂᕐᓴᒃᑯᓪᓗ ᐊᒻᒪ ᐊᑐᐃᓐᓇᐅᓗᐊᙱᓐᓂᕐᓴᐅᓗᓂ.

ᑭᓯᐊᓂᓕ ᐅᒥᐊᕐᔪᐊᑦ ᑐᓚᒃᑕᕐᕕᒃᒧᑦ ᑐᓚᑲᑕᑲᐅᑎᒋᓚᐅᙱᑦᑐᑦ ᒪᑐᐃᕌᓂᒃᑎᓪᓗᒍ.

ᑖᒃᑯᐊ ᐅᒥᐊᕐᔪᑦ ᑭᓴᕐᓯᒪᑲᑕᓚᐅᕐᑐᑦ ᑲᖏᖅᖢᒥ, ᑕᒫᓂᓗ ᐅᓯᖏᕐᓱᐃᓪᓗᑎ ᐅᓯᖏᕐᓱᐃᕝᕕᒃᒥᑦ ᐃᑎᔪᒥ ᐊᑐᖅᖢᑎᒃ ᓯᑲᐅᓄᑦ ᓲᖃᐃᒻᒪ ᑎᓂᒃᑲᐅᓗᐊᕐᓂᖓᓄᑦ ᐅᒥᐊᕐᔪᐊᑦ ᑎᓂᔾᔪᔾᔭᐅᒍᑎ ᑕᒪᒃᑯᐊ ᑭᕕᒃᓯᔾᔪᑏᑦ ᐅᓗᕆᐊᓇᓕᕋᔭᕐᒪᑕ ᐊᑐᕐᓇᐅᓇᓱᒡᓗᑎᒃ ᑕᐃᒪᐃᑎᓪᓗᒍ.

ᑖᓐᓇ ᐅᓯᖏᕐᓰᕝᕕᒃ ᐊᒻᒪ ᐊᒻᒪ ᓯᑲᐅᓂ ᐊᑐᑲᑕᖕᓂᐅᔪᖅ ᑕᐃᒪᓐᓇᑦᑕᐃᓐᓇᐅᖂᔨᒐᓗᐊᖅᑎᓪᓗᒍ ᓄᓇᒦᑦᑐᓄᑦ, ᐅᓇ ᓄᑖᖅ ᐅᓯᖏᕐᓰᕕᒃ ᐊᑐᖅᑕᐅᓪᓗᓂ ᐅᓪᓘᖕᓂ ᒪᕐᕉᖕᓂ ᓇᑉᐸᕐᒥᓪᓗ ᐃᓯᖏᕐᓱᐃᔾᔪᑎᐅᔪᓐᓇᓚᐅᕐᑐᖅ.

ᐅᓯᖏᕐᓱᐃᓂᖅ ᑐᓚᒃᑕᕐᕕᒃᒧᑦ ᐅᒥᐊᕐᔪᐊᕐᒦᑦᑐᓂᒃ ᑭᕕᒃᑕᕈᑎᓂᒃ ᐊᑐᖅᖢᓂ ᓱᒃᑲᓂᕐᓴᒻᒪᕆᐊᓗᒃ, ᐅᖃᕐᑐᖅ ᑕᑦᑐᐃᓂ.

ᓇᓗᓇᕐᑐᖅ ᖃᓄᑎᒋ ᓱᒃᑲᓂᕐᓴᐅᒐᓗᐊᕐᒪᖓᑦ, ᐅᖃᕐᑐᖅ, ᓲᖃᐃᒻᒪ ᔨᓛᑕ ᑎᒐᓃ ᐅᓯᖕᒪᑦ 30 ᐳᓴᓐᑎᒥ 40 ᐳᓴᓐᑎᒧ ᐊᖏᓂᕐᓴᓂ ᐊᑐᖅᑕᐅᖃᑦᑕᕐᓯᒪᔪᓂᒃ ᑐᓚᒃᑕᕐᕕᒃᒥ.

“ᑕᐃᒪᓐᓇᑦᑕᐃᓐᓇ ᐱᓕᕆᓐᓇᕐᑐᖅ ᐱᖁᑎᓂ ᐱᓕᕆᐊᖃᕐᓂᕐᓴᐅᒐᓗᐊᖅᖢᓂ,” ᑕᑦᑐᐃᓂ ᐅᖃᕐᑐᖅ.

“ᖃᓄᐃᓕᐅᕆᐊᖃᙱᓐᓂᕐᓴᐅᒻᒪᕆᒃᑐᒍ ᓴᓂᑦᑎᐊᖓᓃᖢᓂ ᑐᓴᒃᑕᕐᕕᐅᑉ. ᑕᐃᒪᓐᓇ ᓱᑲᓐᓇᕐᓂᕐᓴᒻᒪᕆᐅᔪᖅ.”

ᑕᑦᑐᐃᓂ ᐅᖃᓚᐅᕐᑐᖅ ᕿᓚᒥᐅᓗᐊᕐᓂᖓᓂᒃ ᐅᖃᕆᐊᒃᓴᖅ ᐅᓇ ᑐᓚᒃᑕᕐᕕᒃ ᐱᓕᕆᕙᓪᓕᐊᓂᕐᒧᑦ ᓯᕗᒧᑦ ᐱᕙᓪᓕᐊᔾᔪᑎᐅᓇᔭᕆᐊᒃᓴᖓᓂᒃ.

ᓱᓕ ᐅᖃᓪᓚᒍᑎᐅᕙᓪᓕᐊᔪᖅ, ᐅᖃᕐᑐᖅ, ᑭᓯᐊᓂᓕ “ᐃᓱᒪᒋᔭᐅᓯᒪᓂᑯ ᑲᔪᓯᕙᓪᓕᐊᑎᐊᖅᑐᖅ.”