ᐃᖃᓗᐃᑦ ᓄᓇᓕᐸᐅᔭᖓ ᓂᐅᕕᖁᔭᐅᓂᖏᓐᓂᒃ ᐅᕌᑲᑦ ᑲᓚᑉᒥ ᖄᖏᖅᑎᑦᑎᑐᐃᓐᓇᖅᐳᑦ

For English version, see City of Iqaluit passes on offer to buy racquet club

ᐃᖃᓗᐃᑦ ᓄᓇᓕᐸᐅᔭᖓ ᓂᐅᕕᔾᔮᙱᑦᑐᖅ ᕗᕉᐱᓱ ᐅᕌᑲᑦ ᑲᓚᑉᒥ, ᐃᒡᓗᓕᕆᓂᕐᒧᑦ ᐱᓕᕆᔩᑦ ᐃᓱᒪᓚᐅᕐᓯᒪᒐᓗᐊᖅᖢᑎᒃ ᐃᓅᓱᒃᑐᓄᑦ ᐅᐸᒡᕕᒃᓴᐅᔪᓐᓇᕋᔭᕐᓂᖓᓂᒃ.

ᑲᑎᒪᔩᑦ ᐱᖁᔨᕗᖔᕈᑎᒥᒃ ᐊᓂᒍᐃᑎᑦᑎᓚᐅᕐᓯᒪᔪᑦ ᔭᓄᐊᕆᐅᓚᕐᓯᒪᔪᒥᒃ ᐊᕐᕌᓂ ᐊᐅᓚᑦᑎᔨᓂᒃ ᐅᖃᓪᓚᖃᑎᖃᖁᔨᓪᓗᑎᒃ ᐃᒡᓗᓂ ᓇᖕᒥᓂᖃᖅᑎᐅᔪᓂᒃ. ᑕᐃᔅᓱᒪᓂᓕ ᒪᐃᔭᐅᓚᐅᕐᓯᒪᔪᖅ ᑭᐊᓂ ᐱᐊᓪ ᐅᖃᓚᐅᕐᓯᒪᔪᖅ ᐅᑯᐊ ᐅᕌᑲᑦ ᑲᓚᑉ ᓄᓇᓕᐸᐅᔭᓄᙵᓚᐅᕐᓯᒪᓂᕋᖅᖢᓂᒋᑦ ᐃᒡᓗᒥ ᓂᐅᕕᕈᓐᓇᖅᑎᑦᑎᓪᓗᑎᒃ, ᑖᓐᓇᓗ ᐊᑕᓪᓗᓂ ᓄᓇᓕᐸᐅᔭᐃᑦ ᓇᖕᒥᓂᖅ ᑰᓕᖕᕕᖓᓄᑦ.

ᒫᔅᓯ 23ᒥ ᑐᓴᒐᒃᓴᓕᐅᖅᑎᓪᓗᒋᑦ, ᓄᓇᓕᐸᐅᔭᐃᑦ ᐅᖃᖅᑎᖓ ᑭᐊᓐ ᑐᕆᔅᑯᓪ ᐅᖃᓚᐅᕐᓯᒪᔪᖅ ᑖᔅᓱᒥᖓ ᐅᖃᐅᓯᖃᑲᑕᓚᐅᖅᖢᑎᒃ “ᓄᓇᓕᐸᐅᔭᐃᑦ ᐃᓱᒪᓚᐅᕐᑐᑦ” ᑖᔅᓱᒥᖓ ᐃᒡᓗᒥ ᓂᐅᕕᕈᒪᙱᖢᑎᒃ.

“ᐋᖅᑭᒃᓱᐃᕙᓪᓕᐊᓂᖅ ᐸᕐᓇᐅᓯᐅᕐᓂᕐᒥᒃ ᐊᒻᒪᓗ ᐃᑲᔫᑎᑖᕋᓱᖕᓂᖅ ᐱᒋᐊᓕᓵᕐᓯᒪᖕᒪᑦ ᐊᒻᒪᓗ ᐱᕚᓪᓕᓗᐊᖅᓯᒪᙱᖢᑎᒃ,” ᐅᖃᕐᓯᒪᓚᐅᕐᑐᑦ ᑐᓴᒐᒃᓴᓕᐊᖑᔪᑦ.

ᓄᓇᓕᐸᐅᔭᐃᑦ ᑐᓴᖅᑎᑦᑎᖁᔭᐅᓚᐅᕐᓯᒪᔪᑦ ᐅᑯᓇᙵᑦ ᕗᕉᐱᓱ ᐅᕌᑲᑦ ᑲᓚᑉᑯᓐᓂᒃ, ᑐᕆᔅᑯᓪ ᑎᑎᕋᐅᓯᖃᓚᐅᕐᑐᖅ ᐅᖃᐅᓯᐅᔪᓂᒃ.

ᕗᕉᐱᓱ ᐅᕌᑲᑦ ᑲᓚᑉ ᐊᐅᓚᑦᑎᔨᖓ ᐊᒻᒪ ᓇᖕᒥᓂᖃᖃᑕᐅᔪᖅ ᐅᕌᐳᑦ ᐴᓐ ᐅᖃᕐᕕᐅᔪᓐᓇᖅᓯᓚᐅᕐᓯᒪᙱᒻᒪᑦ ᑕᒪᑐᒧᖓ.

ᓄᓇᓕᐸᐅᔭᐃᑦ ᐊᐅᓚᑦᑎᔨᒋᑲᐃᓐᓇᖅᑕᖓ, ᕌᑦ ᒪᒡᕗᑦ, ᑐᓴᖅᑎᑦᑎᒋᐊᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐅᖃᐅᓯᖃᑲᑕᖕᓂᖅ ᓱᓕ ᐱᒋᐊᖅᐸᓪᓕᐊᓕᓵᕐᓂᖓᓂᒃ ᐊᒻᒪᓗ ᐃᖅᑲᓇᐃᔭᖅᑎᐅᔪᑦ ᐊᔾᔨᒌᙱᑦᑐᓂᒃ ᐃᑲᔫᑎᒃᓴᓂᒃ ᕿᓂᕋᓱᒃᖢᑎᒃ.

ᐊᐱᕆᔭᐅᑎᓪᓗᒍ ᑕᒪᓐᓇ ᖃᓄᖅ ᑐᑭᖃᕋᔭᕐᒪᖓ ᐃᓅᓱᒃᑐᓄᑦ ᐃᖃᓗᖕᓂ, ᒪᒡᕗᑦ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐱᓕᕆᑎᑦᑎᓂᕋᖅᖢᓂᒋᑦ ᐅᖃᓪᓚᖃᑎᖃᑲᑕᒃᑐᒥᒃ ᐱᔭᐅᔭᕆᐊᓕᖕᓂ ᖃᐅᔨᓇᓱᖕᓂᕐᒥᒃ ᐃᓅᓱᒃᑐᓄᑦ ᓈᒻᒪᙱᓕᐅᕈᑎᖃᓗᐊᖅᑐᓄᑦ ᐊᒻᒪᓗ ᐊᖏᕐᕋᖃᕈᓐᓃᖅᑎᑦᑎᑦᑕᐃᓕᓂᕐᒥᒃ ᑖᓐᓇᓗ ᐅᐸᒡᕕᐅᓇᔭᕐᑐᖅ ᑕᒪᐅᓈᕋᔭᖅᖢᓂ.

“ᐅᓇ ᓄᓇᓕᐸᐅᔭᓂᒃ ᑐᓴᐅᒪᓂᒃᑯᑦ ᐃᓱᒪᓕᐅᕆᔾᔪᑎᐅᓂᐊᕐᑐᖅ ᑖᔅᓱᒧᖓ ᐱᓕᕆᐊᒧᑦ, ᑐᑭᓯᓯᒪᑦᑎᐊᑐᐊᕈᑎᒃ ᐱᓕᕆᐊᒃᓴᖅ ᑭᓱᒨᕐᓂᖓᓂᒃ, ᑐᕌᒐᕆᔭᐅᔪᓂᒃ ᐊᒻᒪᓗ ᓯᕗᒧᑦ ᐱᕙᓪᓕᐊᔾᔪᑎᒃᓴᓕᕆᓂᕐᒥᒃ,” ᒪᔅᕗᑦ ᑎᑎᕋᓚᐅᕐᑐᖅ ᖃᕋᓴᐅᔭᒃᑯᑦ.