ᐃᖃᓗᒐᓱᖕᓂᕐᒥ ᖃᖓᑕᔪᓐᓇᖅᑐᓕᕆᓂᕐᒧᑦ, ᐱᓕᕆᐊᒃᓴᐃᑦ ᐊᔪᕈᓐᓃᕐᓴᕈᑎᐅᔪᑦ ᓄᓇᐃᓐᓇᕐᒦᓐᓂᕐᓂᒃ ᐃᓄᖕᓂ ᐃᓅᓱᒃᑐᓂᒃ

For the English version of this story, see From fishing to flying drones, program teaches land skills to youth.

ᐱᓕᕆᐊᒃᓴᖅ ᐃᓕᓐᓂᐊᖅᑎᑦᑎᔾᔪᑎᐅᓪᓗᓂ ᐃᓕᖅᑯᓯᓕᕆᓂᕐᒥᒃ ᐊᒻᒪ ᐱᓕᕆᔾᔪᑎᓕᕆᓂᕐᒥᒃ ᐃᓅᓱᒃᑐᓂᒃ ᐃᓄᖕᓂ ᐅᓄᕐᓯᕙᓪᓕᐊᔾᔪᑎᐅᓯᔪᖅ ᕿᑎᕐᒥᐅᓂᒃ.

ᐅᓇ ᓄᓇ ᐸᑎᔅ (Nuna Buddies) ᖃᔭᑲᑕᖕᓂᕐᒥᒃ ᐃᖃᓗᒐᓱᖕᓂᕐᒥᒃ ᐊᒻᒪ ᐃᑭᑎᑦᑎᔪᓐᓇᕐᓯᓂᕐᒥᒃ ᐊᔪᕈᓐᓃᕐᓴᖅᑎᑦᑎᔾᔪᑎᐅᔪᑦ ᐅᓪᓗᓂ 10ᓂ 14ᓄ ᓄᓇᐃᓐᓇᕐᒥ ᐃᓅᓱᒃᑐᓂᒃ ᐅᔾᔨᕈᓱᓕᖅᐹᓪᓕᖅᑎᑦᑎᔾᔪᑎᐅᓪᓗᓂ ᐃᓕᖅᑯᓯᐅᓚᐅᕐᓯᒪᔪᓂᒃ ᐊᒻᒪ ᐊᕙᑎᒋᔭᖏᓐᓂᒃ. ᐅᓇ ᐊᐅᓚᑕᐅᔪᖅ ᕿᑎᕐᒥᐅᑦ ᐃᓚᒌᓄᑦ ᑲᑐᔾᔨᖃᑎᒌᓂᒃ.

ᓄᓇ ᐸᑎᔅ ᐃᓅᓱᒃᑐᓄᑦ ᐱᓕᕆᐊᒃᓴᓂᒃ ᐃᓚᐅᓚᐅᕐᑐᖅ ᕗᕌᖕᒃ ᐊᓇᓗᒃ, ᓴᐅᒥᐊᓂ, ᐊᔪᕈᓐᓃᕐᓴᖅᑐᖅ ᐊᔾᔨᓕᐅᕈᑎᓕᖕᒥ ᖃᖓᑕᔪᓐᓇᖅᑐᒦᑦᑐᒥᒃ ᐅᑯᐊᓗᒃ ᑰᕕ ᐊᒻᐳᕗ, ᕿᑎᐊᓂ ᐊᒻᒪ ᒧᕆᓴ ᐅᕕᓗᖅ ᐃᖃᓗᒃᑑᑦᑎᐊᑉ ᓯᓚᑎᑦᑎᐊᖓᓂᒃ ᐅᓪᓗᓂ 14ᓂ ᐱᓕᕆᐊᖃᖅᑎᓪᓗᒋᑦ ᑕᖅᑭᐅᓚᐅᕐᑐᒥᒃ. (ᐊᔾᔨᙳᐊᖅ ᐅᑯᓇᙵᑦ ᕿᑎᕐᒥᐅᑦ ᐃᓚᒌᓄᑦ ᑲᑐᔾᔨᖃᑎᒌᓂᒃ)

“ᐅᖃᐅᓯᖃᑲᑕᖕᒥᔪᒍᑦ ᒪᑯᓂᖓ ᐃᓱᒪᒃᑯᑦ ᐋᓐᓂᐊᖃᕐᓇᒥ ᒪᑯᑎᒎᓇᖅ ᐊᑐᓗᐊᔭᓐᓂᒃᑯᑦ ᐋᖓᔮᕐᓇᖅᑐᓂᒃ, ᓯᒡᒐᓖᖅᑐᖃᑦᑕᕐᓂᕐᒥᒃ, ᐊᐃᑉᐸᕇᖕᓂᕐᒥᒃ, ᓴᓗᒪᓇᓱᒋᐊᖃᕐᓇᒥᒃ, ᐊᒻᒪᓗ ᐅᖃᐅᓯᖃᕈᓘᔭᖅᐸᒃᖢᑎᒃ ᖃᐅᑕᒫᑦ ᐃᓅᓯᕆᕙᒃᑕᖏᓐᓂᒃ ᐃᑲᔫᑎᐅᔪᓐᓇᖅᑐᓂᒃ,” ᐅᖃᓚᐅᕐᑐᖅ ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᕗᕌᓐᓯᔅ ᐅᑑᕈ.

ᐅᓇ ᐱᓕᕆᐊᒃᓴᖅ ᐊᕐᕌᒍᓂ ᐱᖓᓱᓂ ᐱᓕᕆᐊᖑᓯᒪᓕᕐᑐᖅ ᐊᒻᒪᓗ ᒪᓂᒻᒪᐃᓯᒪᓪᓗᓂ ᐃᓅᓱᒃᑐᓄᑦ ᐅᐸᒃᑕᐅᔪᓐᓇᖅᑐᓂᒃ ᐃᖃᓗᒃᑑᑎᐊᒥᑐᐃᓐᓇᐅᙱᑦᑐᖅ ᑭᓯᐊᓂᓕ ᑕᒪᐃᓐᓂ ᑕᓪᓕᒪᓂᒃ ᕿᑎᕐᒥᐅᑦ ᓄᓇᓕᖏᓐᓂᒃ.

25 ᐃᓚᐅᔪᑦ ᐃᖃᓗᒃᑑᑦᑎᐊᕐᒥ ᐅᑎᓚᐅᕐᑐᑦ ᔪᓚᐃ 5ᒥ ᐅᓪᓗᕐᓂ 14ᓂ ᓄᓇᐃᓐᓇᕐᒦᓚᐅᖅᖢᑎᒃ, ᐊᒻᒪᓗ ᑖᒃᑯᐊ ᐱᓕᕆᐊᒥᒃ ᐱᓕᕆᐊᖃᖅᑐᑦ ᐅᖅᓱᖅᑑᖅᒧᙵᐅᓕᓚᐅᖅᖢᑎᒃ ᔪᓚᐃ 7ᒥ ᐱᓕᕆᐊᖃᕆᐊᖅᑐᓕᕆᓪᓗᑎᒃ ᑕᐃᑲᓂ.

ᑲᐃᓴᓐ ᑯᓕᒃᑖᓇ, 13, ᐅᖃᓚᐅᕐᑐᖅ ᖃᓄᐃᓕᐅᕐᓂᖏᑦ “ᖁᕕᐊᓇᑦᑎᐊᓚᐅᕐᑐᑦ.” ᖁᕕᐊᒋᓛᕆᓚᐅᕐᑕᖓᓕᒃ ᖃᔭᑲᑕᒃᑎᓪᓗᒋᑦ ᐊᒻᒪ ᐸᐃᓯᑰᑲᑕᒃᑎᓪᓗᒋᑦ.

ᒫᑲᔅ ᒪᓚ, 11, ᐅᑎᓚᐅᕐᑐᖅ ᐊᔪᕈᓐᓃᕐᓯᒪᓕᖅᖢᓂ ᖃᔭᖅᑐᕆᐊᒃᓴᖅ, ᓯᑯᒥ ᐊᐅᓚᓴᑲᑕᖕᓂᕐᒥᒃ ᐊᒻᒪᓗ ᐃᑯᒪᓕᐅᕐᓂᕐᒥᒃ.

ᐅᓇ ᐱᓕᕆᐊᒃᓴᖅ ᓄᓇᓕᖕᓄᐊᑲᑕᓕᓵᖅᑐᑦ ᐊᒻᒪᓗ ᓄᑖᓂ ᖃᓄᐃᓕᐅᕈᑎᒃᓴᒃᑲᓐᓂᕐᓂᒃ ᐱᓕᕆᐊᖃᓕᕆᓪᓗᑎᒃ. ᐃᓅᓱᒃᑐᑦ ᐸᐃᓯᑯᑲᑕᒍᓐᓃᕌᖓᑕ ᐅᕝᕙᓘᓐᓃᑦ ᐃᖃᓗᒐᓱᖕᓂᕐᒥ ᐊᔪᕈᓐᓃᕐᓴᕈᓐᓃᕌᖓᑕ ᐊᔪᕈᓐᓃᕐᓴᓕᖅᐸᒃᖢᑎᒃ ᖃᖓᑕᑎᑦᑎᓂᕐᒥᒃ ᖃᖓᑕᔪᓐᓇᖅᑐᓂᒃ ᐊᒻᒪ ᐊᔾᔨᓕᐅᕆᑲᑕᖕᓂᕐᒥ ᐊᕙᓗᒥᖕᓂᒃ ᖃᖓᑕᔪᖅ ᐊᑐᖅᖢᒍ.

“ᐊᕐᕌᓂ ᑖᒃᑯᐊ ᐊᔾᔨᓕᐅᕈᑎᑦ ᑕᒪᐅᙵᓚᐅᕐᓯᒪᔭᕗᑦ ᐊᒻᒪ ᐊᓯᖏᑦ ᐊᑐᖃᑦᑕᖅᑕᕗᑦ ᓄᓇᐃᓐᓇᕐᒥ ᐊᒻᒪᓗ ᖃᐅᔨᓚᐅᖅᖢᑎᒃ ᐊᔾᔨᓕᐅᕆᑲᑕᖕᓂ ᖁᕕᐊᒋᔭᐅᑦᑎᐊᖅᑐᖅ, ᐅᕝᕙᓘᓐᓃᑦ ᐅᖄᓚᐅᑎᑦᑎᓐᓂ ᐊᑐᖅᖢᑎᒃ ᐃᒻᒥᖕᓂ ᐊᔾᔨᓕᐅᕆᕙᒃᖢᑎᒃ,” ᐅᑑᕈ ᐅᖃᕐᑐᖅ.

ᐃᖅᑲᓇᐃᔭᖅᑎᐅᔪᑦ ᖃᐅᔨᒐᒥᒃ ᐃᓅᓱᒃᑐᑦ ᐃᓕᓐᓂᐊᕈᒪᓂᖏᓐᓂᒃ ᐱᓕᕆᔾᔪᑎᓕᕆᓂᕐᒥᒃ, ᕿᑎᕐᒥᐅᑦ ᐃᓚᒌᓄᑦ ᑲᑐᔾᔨᖃᑎᒌᑦ ᓄᑖᓂ ᐊᔾᔨᓕᐅᕈᑎᑖᓕᓚᐅᕐᓯᒪᔪᑦ ᐊᒻᒪ ᖃᖓᑕᔪᓐᓇᖅᑐᓂᒃ ᐊᒻᒪᓗ ᐃᓚᐅᔪᓂᒃ ᑖᒃᑯᓂᖓ ᐊᔪᕈᓐᓃᖅᓴᖅᑎᑦᑎᕙᒃᖢᑎᒃ.

“ᑲᒪᓇᒻᒪᕆᒃᑐᖅ ᖃᓄᑎᒋ ᐊᔪᙱᓐᓂᖏᓐᓂᒃ ᐃᓅᓱᒃᑐᑦ ᖃᓄᐃᓕᐅᓕᕌᖓᒥᒃ ᖃᐅᔨᑎᑕᐅᓚᐅᖅᖢᑎᒃ ᖃᖓᑕᑎᑦᑎᔪᓐᓇᕐᓂᕐᒥᒃ ᑖᒃᑯᓂᖓ,” ᐅᑑᕈ ᐅᖃᕐᑐᖅ.

ᐃᓚᐅᔪᑦ ᐊᔪᕈᓐᓃᕐᓴᓚᐅᕐᑐᑦ ᐊᔾᔨᙳᐊᓂ ᐋᖅᑭᒃᓱᐃᔪᓐᓇᕐᓯᓪᓗᑎᒃ ᐊᒻᒪ ᑕᕐᕆᔭᒐᓕᐊᖏᓐᓂᒃ ᖃᖓᑕᔪᒃᑯᑦ ᐊᔾᔨᓕᐅᕐᓯᒪᔭᖏᓐᓂᒃ ᐊᒻᒪᓗ ᑖᓐᓇ ᐱᓕᕆᐊᒃᓴ ᐋᖅᑭᒃᑕᐅᔪᒪᓪᓗᓂ ᔫᑑᑉᑯᑦ (YouTube) ᓴᖅᑭᑎᑦᑎᓂᐊᕐᒪᑕ ᐃᓅᓱᒃᑐᑦ ᑕᕐᕆᔭᒐᓕᐊᖏᓐᓂᒃ.

ᑭᐊᓇ ᐃᒃᐸᑯᕼᐊᒃ, ᓴᐅᒥᐊᓂ, ᐊᒻᒪ ᑭᐊᓇ ᐊᕐᐱᒃ ᓵᓐᕗᑦ ᐃᖃᓗᒃᑕᖏᓐᓂᒃ ᑕᑯᖅᑯᔾᔨᔫᑦ ᓄᓇ ᐸᑎᔅ ᖃᓄᐃᓕᐅᕐᓇᒥ 14ᓂ ᐅᓪᓗᓂ ᓄᓇᐃᓐᓇᒥ ᐃᖃᓗᒃᑑᑦᑎᐊᑉ ᓯᓚᑖᓂ ᑕᖅᑭᐅᓚᐅᕐᑐᒥᓐ. (ᐊᔾᔨᙳᐊᖅ ᐅᑯᓇᙵᑦ ᕿᑎᕐᒥᐅᑦ ᐃᓚᒌᓄᑦ ᑲᑐᔾᔨᖃᑎᒌᓂᒃ)

ᕖ ᓂᒡᓚᒃ, 15, ᐃᓚᐅᓚᐅᕐᒥᔪᖅ ᑕᒪᑐᒪᓂ ᐊᕐᕌᒍᒥ ᐊᐃᑉᐸᕆᓕᖅᖢᓂᐅᒃ. ᖃᖓᑕᑲᑕᒃᑐᒥ ᐱᓕᕆᐊᖃᕆᐅᓚᐅᕐᑐᖅ ᐊᒻᒪ ᖃᓄᐃᓕᐅᕈᓘᔭᕐᓇᖅᖢᓂ ᑖᔅᓱᒧᖓ ᑭᓯᐊᓂᓕ ᐅᖃᓚᐅᕐᑐᖅ ᐊᕐᕌᒍ ᐃᓚᐅᒃᑲᓐᓂᕋᓱᓛᕐᓂᕋᖅᖢᓂ ᐱᓕᕆᐊᖃᒃᑲᓐᓂᕐᓂᐊᕈᒪᓪᓗᓂ.

“ᖃᐅᔨᒪᓚᐅᙱᓐᓇᒪ ᐅᒥᐊᖅᑐᕆᐊᒃᓴᖅ ᐊᒻᒪᓗ ᐃᓚᖏᓐᓄᑦ ᓱᕈᓯᕐᓄᑦ ᖃᐅᔨᑎᑕᐅᓚᐅᕐᑐᖓ,” ᐅᖃᕐᑐᖅ ᐃᒡᓚᖅᖢᓂ ᑭᐊᓇ ᐊᕐᐱᒃ ᓵᕗᑦ, 17, ᑖᓐᓇᓗ ᐃᓚᐅᓕᓚᐅᖅᖢᓂ ᓄᓇ ᐸᑎᔅᓄᑦ ᓯᕗᓪᓕᖅᐹᒥ ᐃᖅᑲᓇᐃᔭᖅᑎᐅᓕᓵᖅᖢᓂ.

ᐅᖃᓚᐅᕐᑐᖅ ᐃᓅᓱᒃᑐᓄᑦ ᖃᓄᐃᓕᐅᒐᒃᓴᐃᑦ ᐱᒻᒪᕆᐊᓘᓂᕋᖅᖢᓂᒋ ᓲᖃᐃᒻᒪ ᐅᓗᕆᐊᓇᙱᑦᑐᒦᓐᓇᕐᒪᑕ ᐊᒻᒪᓗ ᐃᓚᐅᖃᑕᐅᔾᔪᑎᐅᔪᓐᓇᖅᖢᑎᒃ ᐃᓅᓱᒃᑐᓄᑦ.

“ᐅᓄᕈᓘᔭᕐᒪᑕ ᓱᕈᓰᑦ ᒫᓂ ᐊᖏᕐᕋᖃᑦᑎᐊᙱᑦᑐᑦ ᐊᒻᒪᓗ ᓄᓇᐃᓐᓇᕐᒦᖢᓂ ᐃᓅᓯᖏᓐᓄᑦ ᐃᖢᐊᕐᓂᖅᓴᐅᓪᓗᓂ.” ᐅᖃᕐᑐᖅ.

“ᑕᒪᕐᒥ ᑕᒫᓂ ᐃᖢᐊᖅᑐᒦᖃᑦᑕᕐᒪᑕ ᓲᖃᐃᒻᒪ ᓂᐱᖃᙱᒻᒪᑦ, ᐊᒻᒪᓗ ᐃᓱᒫᓘᑎᖃᕐᓇᙱᖢᓂ ᑭᓯᐊᓂ ᐃᒻᒥᓂᑐᐊᖅ ᑕᐃᕙᓃᓐᓂᖏᓐᓂᒃ.”