ᐃᖃᓗᖕᓂ ᐃᒪᕐᒧᑦ ᑐᐊᕕᕐᓇᕐᓂᐅᔪᒥ ᐱᑎᑦᑎᕗᖅ ᖁᕝᕙᕆᐊᕐᓂᐅᔪᒥ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᐱᔪᒪᓂᐅᔪᒥ
ᖃᔪᖅᑐᕐᕕᒃ ᓄᓇᓕᖕᓂ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᐃᓱᒻᒥᖅᑐᐃᔨᖓ ᐅᖃᖅᐳᖅ ᖃᓄᐃᓐᓂᐅᔪᖅ ᑕᑯᒃᓴᐅᑎᑦᑎᕗᖅ ᐱᔭᕆᐊᖃᕐᓂᐅᔪᒥ ᓄᑖᙳᕆᐊᖅᑎᑦᑎᓂᕐᒥ ᐃᒪᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕗᓕᒫᒥ
ᕋᐃᑦᓱᓪ ᐸᓚᐃ ᐃᓱᒻᒥᖅᑐᐃᔨᐅᕗᖅ ᖃᔪᖅᑐᕐᕕᖕᒥ, ᐃᖃᓗᖕᓂ ᓄᓇᓕᖕᓂ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ. (ᐊᔾᔨᓕᐅᖅᑕᐅᔪᖅ ᒥᓚᓂ ᕆᑦᓱᑦᒧᑦ)
For an English version of this story, see Iqaluit’s water emergency caused surge in food centre demand
ᐊᒃᓱᕈᕐᓇᕐᓂᐅᖏᓐᓇᖅᑐᑦ ᐃᖃᓗᖕᓂ ᐃᒥᖅᑕᐅᕙᒃᑐᒥ ᐃᒪᖓᓐᓂ ᖃᐅᒻᒪᒃᑎᑦᑎᕗᖅ ᐃᑯᒪᔪᒥ ᐊᑦᑕᓇᖅᑐᒥ ᐃᒥᖅᑕᕐᕕᐅᔪᒥ ᐊᒃᑐᐃᔪᓐᓇᕐᓂᖓᓂ ᐃᓄᖕᓄᑦ ᐊᑐᐃᓐᓇᖃᕐᓂᖓᓂ ᓂᕿᓄᑦ.
ᕋᐃᑦᓱᓪ ᐸᓚᐃ ᐊᐅᓚᑦᑎᓲᖑᕗᖅ ᖃᔪᖅᑐᕐᕕᖕᒥ, ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᐃᖃᓗᖕᓂ. ᖃᐅᑕᒫᒥ ᓄᓇᓕᖕᓂ ᓂᕆᔭᒃᓴᒥ ᑐᓂᓯᓲᖑᓂᖏᓐᓂ ᑭᓇᑐᐃᓐᓇᒧᑦ ᐱᔭᕆᐊᖃᖅᑐᓄᑦ.
ᐅᖃᖅᐳᖅ ᐅᓄᓛᖑᔪᓂ ᐃᓄᖕᓂ ᐱ)ᒃᑐᓂ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᐹᖏᓐᓂ ᐃᖃᓗᖕᓂ ᐃᒥᖅᑕᕐᕕᖓ ᓱᕈᖅᑎᓪᓗᒍ ᐅᖅᓱᐊᓗᖕᒥ ᐅᒃᑐᐱᕆᒥ.
“ᑕᑯᓚᐅᖅᐳᒍᑦ ᐅᓄᕐᓂᐅᔪᓂ ᐃᓄᖕᓂ ᐊᑐᐃᓐᓇᖃᖅᑐᒥ ᐱᔨᑦᑎᕋᕐᓂᐅᔪᒥ ᖁᕝᕙᕆᐊᕐᔪᐊᓚᐅᖅᐳᖅ ᐅᓐᓄᐃᓐᓇᕐᒥ,” ᐸᓚᐃ ᐅᖃᓚᐅᖅᐳᖅ.
“ᓄᓇᓕᖕᒥᐅᑦ ᐊᑐᐃᓐᓇᖃᕆᐊᖃᓚᐅᖅᓯᒪᙱᑦᑐᓂ ᑕᐃᔅᓱᒥᖓ ᐱᓕᕆᐊᕆᔭᑦᑎᓐᓂ ᐅᐸᖃᑦᑕᓕᖅᐳᑦ ᖃᐅᑕᒫᒥ ᓂᕆᔭᒃᓴᓂ ᓂᕿᓕᐅᕈᓐᓇᙱᒻᒪᑕ ᖃᓄᐃᙱᑦᑎᐊᖅᑐᒥ, ᐊᑦᑕᓇᙱᑦᑐᒥ ᓂᕆᔭᒃᓴᓂ ᐃᒻᒥᖕᓄᑦ.”
ᑭᓱᑐᐃᓐᓇᐃᑦ ᓲᕐᓗ ᐱᕈᖅᑐᕕᓂᕐᓂ ᐅᐊᓴᕐᓂᕐᒥ ᐅᕝᕙᓘᓐᓃᑦ ᖃᓛᖅᑎᑦᑎᓂᕐᒥ ᓂᕿᓂᑦ ᐊᓛᓯᒥᓪᓘᓐᓃᑦ ᐊᒃᓱᕈᕐᓇᖅᓯᓚᐅᖅᐳᖅ ᐃᒪᖃᕐᓇᑎᒃ. ᑐᓐᓂᖅᓴᖅᑕᐅᓚᐅᖅᑳᕋᓂ ᓄᓇᓕᐸᐅᔪᒧᑦ, ᐃᓚᖏᑦ ᓂᕿᒧᑦ ᑮᓇᐅᔭᖏᓐᓂ ᐊᑐᖅᓯᒪᕗᑦ ᐴᖅᓯᒪᔪᓄᑦ ᐃᒪᕐᒧᑦ.
ᑕᐃᒪᐃᒐᔪᒃᑐᒥ, 100−ᓂ 150−ᓄᑦ ᓂᕆᔭᒃᓴᓂ ᐊᑐᓂ ᐅᓪᓗᕐᒥ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ, ᑭᓯᐊᓂ ᑎᑭᐅᑎᔪᒧᑦ 250−ᓂ ᓂᕆᔭᒃᓴᓂ ᐱᔭᕆᐊᖃᓚᐅᖅᐳᑦ ᑐᐊᕕᕐᓇᕐᓂᐅᑎᓪᓗᒍ.
“ᓇᓗᓇᙱᑦᑐᒥ ᓴᙱᔪᒥ ᐱᓕᕆᖃᑎᖃᕐᓂᖓᓂ ᐅᕙᓂ ᐅᑯᓇᓂ ᐃᒪᑦᑎᐊᕙᖃᕐᓂᕐᒥ ᐊᒻᒪ ᓂᕿᒃᓴᖃᑦᑎᐊᕐᓂᕐᒥ,” ᐸᓚᐃ ᐅᖃᓚᐅᖅᐳᖅ.
ᐅᖃᓚᐅᖅᐳᖅ ᐅᖃᓪᓚᖕᓂᖃᐃᓐᓇᖅᐳᖅ ᐃᖃᓗᖕᓂ ᐊᒻᒪ ᑲᓇᑕᓕᒫᒥ ᖃᓄᖅ ᐊᓂᑦᑕᐃᓕᒪᔭᕆᐊᖃᕐᓂᐅᔪᓂ ᐊᒻᒪ ᑮᓇᐅᔾᔭᒃᓴᓂᕐᒧᑦ ᐊᓯᐅᔨᓂᐅᔪᒥ ᓄᕙᒡᔪᐊᕐᓇᖅ-19−ᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐊᒃᑐᐃᓯᒪᓂᖓᓂ ᐃᓄᐃᑦ ᐱᔪᓐᓇᕐᓂᖏᓐᓂ ᐊᑐᐃᓐᓇᖃᕐᓂᕐᒧᑦ ᓂᕿᓂᑦ.
ᑭᓯᐊᓂ ᐅᓄᕐᓂᖅᓴᐅᔪᓂ ᐃᓄᖕᓂ ᐊᑐᐃᓐᓇᖃᓚᐅᖅᐳᑦ ᖃᔪᖅᑐᕐᕕᐅᑉ ᐱᔨᑦᑎᕋᕐᓂᖓᓂ ᐃᒪᕐᒥ ᑐᐊᕕᕐᓇᕐᓂᐅᑎᓪᓗᒍ ᐆᒪᙵᑦ ᓯᕗᓪᓕᖅᐸᐅᔪᒥ ᐊᐃᑦᑐᐃᓂᐅᔪᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ ᓄᓇᕗᒻᒥ
ᐸᓚᐃ ᐅᖃᖅᐳᖅ ᖃᓄᐃᓐᓂᐅᔪᖅ ᐃᖃᓗᖕᓂ ᑕᑯᒃᓴᐅᑎᑦᑎᕗᖅ ᐱᑕᖃᑐᐃᓐᓇᕆᐊᖃᕐᓂᖓᓂ ᖃᓄᐃᑦᑐᓐᓇᕐᓂᖓᓂ ᓇᓕᐊᑐᐃᓐᓇᓂ ᓄᓇᕗᒻᒥ ᓄᓇᓕᐅᔪᒥ ᒐᕙᒪᑐᖃᒃᑯᑦ ᑲᑎᖅᓱᖅᑕᐅᕙᓪᓕᐊᑎᑦᑎᙱᒃᑯᑎᒃ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᑎᑕᐅᔪᓄᑦ ᓄᑖᙳᖅᑎᑦᑎᓂᕐᒥ ᓄᑕᐅᔪᓐᓃᖅᑐᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕗᓕᒫᒥ.
“ᓄᓇᕗᑦ ᓂᕿᒃᓴᖃᑦᑎᐊᙱᓛᖑᐊᓂᒃᐳᖅ ᐊᕕᒃᑐᖅᓯᒪᓂᐅᔪᒥ ᐅᐊᖕᓇᒥ ᐊᒥᐊᓕᑲᒥ,” ᐸᓚᐃ ᐅᖃᓚᐅᖅᐳᖅ.
“ᐃᒪᕐᒥ ᑐᐊᕕᕐᓇᕐᓂᐅᔪᓂ ᓄᓇᓕᑦᑎᓐᓂ ᓱᒃᑯᑎᑦᑎᕐᔪᐊᕋᔭᖅᐳᖅ ᑕᐃᒃᑯᓂᖓ ᓂᕿᒃᓴᖃᑦᑎᐊᙱᐊᓂᒃᑐᓂ ᐊᕕᒃᑐᖅᓯᒪᓂᐅᔪᓂ.”
ᓄᓇᕗᒻᒥ, 87 ᐳᓴᓐᑎᒥ ᐃᒪᕐᒥ ᓴᓗᒻᒪᖅᓴᐃᕝᕕᖕᓂ ᐱᓕᕆᕝᕕᓂ ᐊᒻᒪ 85 ᐳᓴᓐᑎᒥ ᐃᒥᖅᑕᕐᕕᐅᔪᓂ ᐅᓂᒃᑳᕆᔭᐅᓚᐅᖅᐳᑦ ᐱᐅᙱᑦᑑᓂᖏᓐᓂ ᖃᐅᔨᓴᕐᓂᐅᓚᐅᖅᑐᒥ ᐱᓕᕆᐊᖑᔪᒥ ᐃᓄᐃᑦ ᑕᐱᕇᑦ ᑲᓇᑕᒥ 2020−ᒥ.
ᐃᓄᐃᑦ ᓄᓇᖓᓐᓂ, ᓱᓪᓗᑯᑖᓄᑦ ᐃᒥᖅᑕᕐᕕᐅᔪᓂ ᐊᕐᕌᒍᒐᓵᓗᖕᓂ ᓄᑕᐅᙱᓐᓂᖅᓴᐅᕗᑦ ᑐᕌᒐᕆᔭᖓᓂ ᐃᓅᓯᓪᓗᐊᖏᓐᓂ ᐊᒻᒪ ᐊᓯᖏᓐᓂ ᐃᒪᕐᒧᑦ ᐱᓕᕆᔾᔪᓯᐅᔪᑦ ᓱᕋᒃᓯᒪᓂᖃᒐᔪᒃᐳᑦ, ᖃᐅᔨᓴᕐᓂᖅ ᐅᖃᖅᓯᒪᕗᖅ.
ᐊᐅᓱᐃᑦᑐᕐᒥ, ᓄᓇᕘᑉ ᐅᐊᖕᓇᐅᓛᖑᔪᒥ ᓄᓇᓕᖓ, ᐊᑕᐅᓯᖅ ᒪᕐᕉᖕᓂ ᐃᒥᖅᑕᐅᑎᓂ ᓄᓇᓯᐅᑎᓂ ᐃᖏᕐᕋᔪᓐᓇᖅᓯᒪᕗᖅ ᑕᐃᒪᙵᓂ ᐅᑭᐊᒃᓵᖑᔪᒥ, ᕼᐋᒻᓚᒃᑯᓐᓂ ᐱᐅᖅᓱᐊᕆᐊᖃᖅᑎᑦᑎᓪᓗᓂ ᐃᒪᖕᒥ.
“ᐅᓇ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑐᐊᕕᕐᓇᕐᓂᐅᕗᖅ, ᐃᒪᕐᒧᑐᐊᖅ ᑐᐊᕕᕐᓇᕐᓂᐅᙱᑦᑐᖅ ᐊᒻᒪ ᓄᓇᕗᓕᒫᒦᑉᐳᖅ,” ᐸᓚᐃ ᐅᖃᓚᐅᖅᐳᖅ.
“ᐱᓪᓚᕆᐅᕗᖅ ᒐᕙᒪᒃᑯᑦ — ᐱᓗᐊᖅᑐᒥ ᒐᕙᒪᑐᖃᒃᑯᑦ — ᑭᐅᓂᖏᓐᓂ.”
ᓗᐊᕆ ᐃᓪᓚᐅᑦ, ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᖅ, ᒫᓐᓇᓕᓴᐅᔪᒥ ᖃᐃᖁᔨᓂᖃᓚᐅᖅᐳᖅ ᒐᕙᒪᑐᖃᒃᑯᓐᓂ ᑐᓂᓯᓂᕐᒥ ᐃᖃᓗᖕᓂ $180 ᒥᓕᐊᓐᓂ ᐋᖅᑭᒃᓯᓂᕐᒧᑦ ᐃᒪᕐᒧᑦ ᐱᓕᕆᔾᔪᓯᖓᓐᓂ.
ᓱᓕ ᑭᐅᔭᐅᓚᐅᙱᓚᖅ, ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᕕᕗᐊᕆ 1−ᒥ.
ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᖅ ᐅᕙᓂ ᑕᑯᒃᓴᐅᕗᖅ ᖃᔪᖅᑐᕐᕕᖕᒥ ᐅᓐᓄᖓᓂ ᓂᕈᐊᖅᑕᐅᓚᐅᖅᑎᓪᓗᒍ. (ᐊᔾᔨᖁᑕᐅᔪᖅ ᑕᐃᕕᑦ ᕕᐊᓐᒧᑦ)
ᐃᓪᓚᐅᑦ ᐅᖃᓚᐅᖅᐳᖅ ᐊᖏᖃᑎᖃᖅᐳᖅ ᑲᑎᖅᓱᖅᑕᐅᕙᓪᓕᐊᔭᕆᐊᖃᕐᓂᖏᓐᓂ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᓄᑖᙳᖅᑎᑦᑎᓂᕐᒥ ᐃᒪᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕗᓕᒫᒥ.
“ᐃᓱᒪᕗᖓ ᐊᖏᓂᖓᓂ ᐃᖃᓗᖕᓕᓂ ᐊᒻᒪ ᐊᖓᔪᖅᑳᖃᕐᕕᐅᓂᖓᓂ ᓄᓇᕗᒻᒥ ᓴᖅᑭᔮᕐᓂᖅᓴᐅᓂᖃᓚᐅᕐᓂᖓᓂ, ᑭᓯᐊᓂ ᓄᓇᓕᒃᑕᖃᐅᕌᓂᒃᐳᖅ ᐊᑐᖅᑐᓂ ᐃᒪᕐᒥ ᖃᓛᖅᑎᑦᑎᔭᕆᐊᖃᕐᓂᖏᓐᓂ,” ᐅᖃᓚᐅᖅᐳᖅ.
2021−ᒥ, ᓄᓇᕗᑦ ᐊᑐᓚᐅᖅᐳᑦ ᐊᕐᕌᒍᓄᑦ−ᑕᓪᓕᒪᓄᑦ ᖁᑦᑎᖕᓂᐅᔪᒥ ᐃᒪᕐᒧᑦ ᐃᓂᖅᑎᕆᓂᐅᔪᓂ ᓇᐃᓴᐃᓇᑎᒃ ᐃᒪᕐᒧᑦ ᑐᐊᕕᕐᓇᕐᓂᐅᔪᒥ ᐃᖃᓗᖕᓂ.
ᐊᕐᕌᒍ ᓄᖑᓚᐅᙱᑎᓪᓗᒍ, 14−ᓂ ᐃᒪᕐᒧᑦ ᐃᓂᖅᑎᕆᓂᐅᔪᓂ ᑐᓂᔭᐅᓯᒪᕗᑦ 7−ᓂ ᓄᓇᓕᐅᔪᓂ ᐊᖓᔪᖅᑳᖃᕐᕕᐅᑉ ᓄᓇᓕᐸᐅᔭᐅᑉ ᓯᓚᑖᓂ, ᐱᖓᓱᐃᓪᓗᐊᖅᑐᒥ ᐅᖓᑖᓂ ᑎᓴᒪᓂ ᐃᓂᖅᑎᕆᓂᐅᔪᓂ ᑐᓂᔭᐅᔪᓂ 2017−ᒥ.
ᑲᖏᖅᖢᒑᐱᒃ ᐊᑕᐅᓯᐅᓪᓗᓂ ᐆᒃᑑᑎᐅᕗᖅ, ᐃᒪᕐᒧᑦ ᓴᓗᒻᒪᖅᓴᐃᕝᕕᖓ ᐊᒻᒪ ᐳᓪᓚᒃᓴᐅᑎᖓ ᓱᕋᖕᓂᖓᓂ ᐱᑎᑦᑎᓚᐅᖅᐳᖅ ᐃᒪᕐᒥ ᖃᓛᖅᑎᑦᑎᔭᕆᐊᖃᕐᓂᐅᔪᒥ ᐃᓂᖅᑎᕆᓂᐅᔪᒥ ᐃᓕᔭᐅᓂᖓᓂ ᑕᒪᕐᒥᒐᓚᒃ ᓄᕕᐱᕆᒥ.
“ᐃᒪᕐᒥ ᖃᓛᖅᑎᑦᑎᔭᕆᐊᖃᕐᓂᐅᔪᒥ ᐃᓂᖅᑎᕆᓂᐅᔪᒥ ᑕᐃᒪᐃᖏᓐᓇᕐᓂᐊᖅᐳᖅ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᒫᓐᓇᒨᓕᖓᓕᖅᑎᑕᐅᙱᒃᑯᑎᒃ,” ᐃᓪᓚᐅᑦ ᐅᖃᓚᐅᖅᐳᖅ.
ᐅᖃᓚᐅᖅᐳᖅ ᐃᓂᖅᑎᕆᓂᐅᔪᑦ ᑭᐅᔭᐅᕙᙱᓚᑦ ᐊᑯᓂᐊᓗᒃ ᐃᓚᖏᓐᓂ ᓄᓇᓕᐅᔪᓂ ᓄᓇᖃᖅᑎᐅᔪᑦ ᖃᓛᖅᑎᑦᑎᖃᑦᑕᕈᓐᓃᑦᑎᐊᒻᒪᕆᒃᐳᑦ.
ᐃᓪᓚᐅᑦ ᐃᖅᑲᐅᒪᕗᖅ ᐅᖃᓪᓚᖃᑎᖃᕐᓂᖓᓂ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᓕᖅᑐᓂ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᒥᓂᔅᑕᖓᓂ ᐹᑎ ᕼᐊᔾᑑᒥ, ᓇᓗᓇᐃᖅᓯᓚᐅᖅᑐᒥ ᐃᓱᓕᑦᑎᓂᐊᕐᓂᖓᓂ ᐃᒪᕐᒧᑦ ᐃᓂᖅᑎᕆᓂᐅᔪᓂ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓄᑦ ᓯᕗᓪᓕᖅᐸᐅᔾᔭᐅᔭᕆᐊᖃᕐᓂᖓᓂ ᑎᑎᕋᖅᓯᒪᔭᖏᓐᓂ.
“ᐊᔭᐅᕇᓐᓇᑐᐃᓐᓇᕆᐊᖃᖅᐸᕗᑦ,” ᐃᓪᓚᐅᑦ ᐅᖃᓚᐅᖅᐳᖅ ᒐᕙᒪᑐᖃᒃᑯᓐᓂ.
ᖄᖓᒍᑦ ᓄᑖᖑᔪᓂ ᐅᕝᕙᓘᓐᓃᑦ ᒫᓐᓇᒨᓕᖓᓕᖅᑎᑕᐅᔪᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐃᓪᓚᐅᑦ ᐅᖃᓚᐅᖅᐳᖅ ᒐᕙᒪᑐᖃᒃᑯᑦ ᐊᑭᓖᔭᕆᐊᖃᖅᐳᑦ ᐱᓕᒻᒪᒃᓴᐃᓂᕐᒧᑦ ᐃᓄᖕᓂ ᐋᖅᑭᐅᒪᑎᑦᑎᓂᕐᒧᑦ ᐃᒥᖅᑕᕐᕕᐅᔪᓄᑦ, ᓴᖅᑭᑎᑦᑎᓇᔭᖅᑐᒥ ᓄᓇᓕᖕᓂ ᐃᖅᑲᓇᐃᔮᒃᓴᐅᔪᓂ.
“ᐱᓕᕆᓂᖃᓪᓗᐊᖅᐳᖅ ᓇᓗᓇᐃᖅᓯᓂᕐᒥ ᐅᑯᐊ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐋᖅᑭᐅᒪᑎᑕᐅᔪᓐᓇᕐᓂᖏᓐᓂ,” ᐅᖃᓚᐅᖅᐳᖅ.
(0) Comments