ᐃᖃᓗᖕᓂ ᓄᓇᖃᖅᑐᖅ ᐊᕐᓇᖅ ᓂᕿᓂᒃ ᐅᓄᒻᒪᕆᒃᑐᓂᒃ ᓂᕿᓂᒃ ᑐᓐᓂᔭᐅᕗᖅ ᐅᕘᓇ ᑎᒃᑖᒃ ᐃᓚᒋᔭᐅᔾᔪᑎᖓᒍᑦ

ᑭᐅᕋ ᕕᓕᐅᕋᑎ ᐊᑐᓪᓚᕆᓚᐅᕐᑐᖅ ᑎᒃᑖᒃ ᓴᙱᑎᒋᓂᖓᓂᒃ ᓴᖅᑭᑎᑦᑎᑎᓪᓗᒍ 25,000 ᖃᓂᒋᔭᖓᓂ ᑖᔅᓱᒥᖓ ᒪᓕᖃᑦᑕᖅᑐᓄᑦ ᓄᓇᕗᒥ ᓂᕿᐅᑉ ᐊᑭᖏᓐᓂᒃ.

ᑖᒃᑯᐊᓗ ᑖᔅᓱᒥᖓ ᖁᙱᐊᖅᐸᒃᑐᑦ ᑐᓵᕙᒃᖢᑎᒃ. ᐊᐅᓚᑦᑎᖃᑦᑕᕐᓂᖓ ᖃᕋᓴᐅᔭᒃᑯᑦ ᓴᖅᑭᔮᕐᕕᒋᔭᖓᓂᒃ ᐃᓚᖃᒃᑲᓐᓂᓕᕐᒪᑦ ᐅᓄᖅᑐᒻᒪᕆᐊᓗᖕᓂᒃ ᓂᕿᓂᒃ ᐴᕐᓯᒪᐅᕐᑐᓂᒃ ᑲᒪᒋᔭᖃᕆᐊᖃᓕᕐᓂᕐᒥᒃ, ᒪᑯᓂᖓᓗ ᓴᓗᒪᔾᔪᑎᒃᓴᕈᓘᔭᕐᓂᒃ ᐊᒻᒪ ᐊᓯᖏᓐᓂᒃ ᐱᖁᑎᓂᒃ ᖁᙱᐊᖃᑦᑕᖅᑐᓄᑦ ᓇᒡᓯᐅᔾᔭᐅᑲᑕᒃᑐᓂᒃ ᐃᖃᓗᖕᓄᑦ ᑎᑎᖃᒃᑯᕕᖓᓄᑦ ᐃᑲᔪᕈᑎᒃᓴᐅᓂᐊᖅᑐᓂᒃ.

“ᐊᐅᔭᐅᑎᓪᓗᒍ ᒫᓃᖃᑦᑕᓚᐅᕐᑐᑦ 40-ᓂᒃ 50-ᓄᑦ ᐴᕐᓂᒃ ᓇᒡᓯᐅᔾᔪᓯᐊᖅᐸᒃᖢᖓ ᐱᓇᓱᐊᕈᓯᑕᒫᖅ,” ᐅᖃᓚᐅᕐᑐᖅ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᑎ ᐊᒻᒪ ᐊᓈᓇᒋᔭᐅᓪᓗᓂ ᐱᖓᓱᓄᑦ. “ᖁᕕᐊᓇᖅᑐᐊᓗᒃ, ᑕᐃᒪᓐᓇ ᓂᕆᐅᓚᐅᙱᑦᑎᐊᖅᑐᖓ.”

ᐅᐃᖓᑕ ᐃᑲᔪᖅᖢᓂᐅᒃ, ᑖᒃᑯᐊ ᑎᑎᖃᒃᑯᕕᒃᑯᑦ ᑎᑭᑉᐸᓪᓕᐊᔪᑦ ᐲᒃᑲᒃᑕᓐᓂᖅᖢᓂᔾᔪᑦ ᐊᒻᒪ ᐊᔾᔭᖅᑐᐃᕙᒃᖢᑎᒃ ᐃᓛᒌᓄᑦ ᐃᖃᓗᖕᓂ.

ᒫᓐᓇᓕ ᐱᔭᒃᓴᖃᕈᓘᔭᓕᖅᖢᓂ ᓯᕗᓪᓕᖅᐹᓂ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᓕᖅᑎᓪᓗᒍ ᓄᓇᕗᑦ ᓯᓚᑦᑐᖅᓴᕐᕕᒃᒥ, ᕕᓕᐅᕋᑎ ᓱᓕ ᓇᒡᓯᐅᔾᔪᓯᐅᖃᑦᑕᖅᑐᖅ ᖁᓕᓪᓗᐊᓂᒃ ᐴᕐᓂᒃ ᐱᓇᓱᐊᕈᓯᑕᒫᑦ ᐊᒻᒪᓗ ᑖᒃᑯᓂᖓ ᖁᙱᐊᖅᑎᒋᕙᒃᑕᖏᓐᓄᑦ ᐅᖃᖅᓯᒪᓪᓗᓂ ᐃᑲᔪᕈᒪᒍᑎ ᓂᕿᑖᕐᕕᖕᓄᑦ ᑐᓂᓯᖃᑦᑕᕈᓐᓇᕐᓂᕋᖅᖢᓂᒋᑦ.

ᕕᓕᐅᕋᑎ ᐅᖃᓚᐅᕐᑐᖅ ᐃᓚᒋᔭᐅᔾᔪᑎᖃᓕᓚᐅᕐᓯᒪᓂᖓᓂᒃ ᐸᓂᖏᑦᑕ ᐅᖃᐅᑎᒻᒪᒍ ᑖᔅᓱᒥᖓ ᐃᓚᒃᓴᒥᒃ. ᐱᒋᐊᓕᓚᐅᕐᓯᒪᔪᖅ ᑕᕐᕆᔭᒐᓕᐊᖏᓐᓂᒃ ᐃᓕᖅᑯᓯᖓᓂᒃ ᓴᖅᑭᔮᖅᑎᑦᑎᕙᒃᖢᓂ ᐊᒻᒪ ᓄᓇᕗᑦ ᐊᖓᔪᖅᑳᖃᕐᕕᐊᓂ ᐃᓅᓯᐅᕙᒃᑐᓂᒃ.

ᐊᐱᕆᔭᐅᔭᕌᖓᓪᓗ ᑭᐅᑲᑕᒃᐸᒃᖢᓂ ᒪᑯᓂᖓ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐱᓕᕆᐊᖑᔪᒥᒃ, ᐅᑭᐅᕐᑕᖅᑐᕐᒦᔾᔪᑎᒧᑦ ᐃᑲᔪᕈᑎᒃᓴᐃᑦ ᐊᒻᒪᓗ ᐃᒡᓗᒥ ᐊᑐᕐᑐᐊᕐᓗᓂ ᖃᔅᓯᑐᕐᒪᖔᑦ.

ᑖᔅᓱᒥᖓ ᖁᙱᐊᖃᑦᑕᖅᑐᒥᒃ ᐊᐱᕆᔭᐅᒐᒥ ᓴᖅᑭᑎᑦᑎᔪᓐᓇᕆᐊᒃᓴᖓᓂᒃ ᓂᐅᕕᕐᕕᒃᒥᑦ ᐊᑭᒋᔭᐅᔪᓂᒃ ᖃᓂᒋᔭᖓᓃᑦᑐᓂᒃ, ᕕᓕᐅᕆᑎᐅᑉ ᓴᖅᑭᑎᑲᑕᒃᑕᖏᑦ ᑕᑯᔭᐅᖃᑦᑕᓕᓚᐅᕐᑐᑦ ᐅᓄᖅᑐᒻᒪᕆᐊᓗᖕᓂᑦ.

“ᖃᐅᔨᒃᑲᓐᓂᕈᒪᔪᓄᑦ ᐊᒻᒪᓗ ᓄᓇᕗᒥᐅᑕᒥᒃ ᑐᓴᕈᒪᔪᓂᒃ ᓱᓕᔪᓂᒃ ᐱᓪᓚᕆᐅᒋᔭᐅᓚᐅᕐᒪᑦ ᐃᓄᖕᓄᑦ,” ᐅᖃᖅᑐᖅ.

ᑕᐃᒪᙵᓪᓕ ᒪᐃᖑᓚᐅᕐᑐᒥᒃ, ᕕᓕᐅᕋᑎ ᓴᖅᑭᑎᑦᑎᓯᒪᖕᒪᑦ 12 ᐅᖓᑖᓂ ᑕᕐᕆᔭᒐᕐᓂᒃ ᓴᖅᑭᔮᖅᑎᑦᑎᓯᒪᔪᓂᒃ ᐊᑭᓕᒐᒃᓴᐅᙱᑦᑐᓂᒃ ᓂᕿᓂᒃ ᐊᒻᒪ ᐊᖏᕐᕋᒥ ᐱᖁᑎᒋᔭᐅᔭᕆᐊᓕᖕᓂ ᐃᖃᓗᖕᓂ ᐊᒻᒪᓗ ᐊᓯᖏᓐᓂ ᓄᓇᓕᖕᓂ.

ᑲᑎᕐᓱᐃᓪᓗᓂ ᐊᔾᔨᙳᐊᓂᒃ ᐱᖃᓐᓇᕆᔭᖏᓐᓂᒃ ᐊᒻᒪ ᑕᐅᑐᖃᑦᑕᖅᑐᓂᒃ ᓄᓇᕗᒥᑦ, ᓴᖅᑭᔮᖅᑎᑦᑎᔪᓐᓇᖅᓯᓯᒪᔪᖅ ᖃᓄᑎᒋ ᑕᒪᓐᓇ ᓈᒻᒪᙱᓕᐅᕈᑎᐅᓯᒪᖕᒪᖔᑦ, ᐃᓚᖃᖅᖢᓂᓘᓐᓃᑦ $67 ᖁᐃᖏᓕᓴᐃᑦ ᑲᖏᖅᖠᓂᕐᒥᒃ.

ᐊᑭᒋᔭᐅᔪᓪᓕ ᐊᐅᓱᐃᑦᑐᕐᒥ, ᐅᐊᓇᒦᓛᖅ ᓄᓇᓕᖕᓂ ᓄᓇᕗᒥᑦ, ᑲᒪᒋᒻᒪᕆᓚᐅᕐᒥᔭᖏᑦ, ᕕᓕᐅᕋᑎ ᐅᖃᖅᑐᖅ.

ᑕᕐᕆᔭᒐᓕᐊᖓ ᓴᖅᑭᑎᑦᑎᓚᐅᕐᑐᖅ 12 ᒪᓐᓃᑦ $11-ᑐᖅᑐᓂᒃ, ᓯᕙᕋᓛᑯᓗᐃᑦ ᑕᕆᐅᓖᑦ $18-ᑐᖅᖢᑎᒃ ᐊᒻᒪᓗ ᕼᐊᓂ ᐊᑭᖃᖅᖢᓂ $30.

“ᑖᒃᑯᐊ ᑲᒪᒋᓗᐊᓚᐅᕋᒃᑭ, ᐊᒃᓱᐊᓗ ᐅᔾᔨᕈᓱᓕᓗᐊᕐᓇᖅᑐᖅ,” ᐅᖃᖅᑐᖅ.

ᐃᓄᖕᓂ ᐃᓕᓐᓂᐊᖅᑎᑦᑎᓇᓱᒃᖢᓂ ᐃᓄᐃᑦ ᐃᓕᖅᑯᓯᖏᓐᓂᒃ, ᐊᐱᖅᑯᑎᓂᒡᓗ ᑭᐅᓯᑲᑕᒃᖢᓂ ᐅᑭᐅᕐᑕᖅᑑᑉ ᒥᒃᓵᓄᑦ, ᐊᒻᒪᓗ ᖃᐅᔨᒪᓇᓱᒋᓗᐊᖅᑐᓂᒃ ᓂᐱᖃᕈᓐᓃᖅᑎᑦᑎᕙᒃᖢᓂ, ᕕᓕᐅᕋᑎ ᐅᖃᓚᐅᕐᑐᖅ ᑕᕐᕆᔭᒐᓕᐅᑲᑕᖕᓂᖓᓄ ᐃᓕᓐᓂᐊᑲᑕᖕᓂᕋᖅᖢᓂ.

“ᐊᐱᕆᔭᐅᔭᕌᖓᒪ ᐊᒻᒪᓗ ᖃᐅᔨᒫᓂᙱᓗᐊᕐᓗᖓ ᑕᐃᒪᓕ ᐊᐱᕐᓱᖃᑦᑕᕋᒪ ᖃᐅᔨᒪᔪᓂᒃ ᐅᕝᕙᓘᓐᓃᑦ ᖃᐅᔨᓇᓱᓕᖅᖢᒍ,” ᐅᖃᖅᑐᖅ ᕕᓕᐅᕋᑎ.

ᓲᕐᓗ, ᑖᔅᓱᒥᖓ ᑕᐅᑐᖃᑕᐅᖃᑦᑕᖅᑐᖅ ᐊᐱᕆᑎᓪᓗᒍ ᒐᕙᒪᑐᖃᒃᑯᑦ ᐃᑲᔫᑎᒋᕙᒃᑕᖓᓂᒃ ᐅᑯᑎᒎᓇᖅ ᓂᕿᑦᑎᐊᕙᓕᕆᓂᕐᒥᒃ ᐅᑭᐅᕐᑕᖅᑐᕐᒥ, ᕕᓕᐅᕋᑎ ᑕᒪᑐᒧᖓ ᖃᐅᔨᓇᓱᒃᑲᒥ ᐅᖃᐅᓯᖃᓕᓚᐅᕐᑐᖅ ᑖᓐᓇ ᐃᑲᔫᑎ ᐊᑐᖅᑎᑕᐅᓇᓱᒃᑐᓄᐊᕈᓐᓇᓗᐊᙱᓐᓂᖏᓐᓂᒃ.

ᐅᒃᑑᐱᕆ 5-ᒥ, ᕕᓕᐅᕋᑎ ᐱᓕᕆᐊᒃᑲᓐᓂᕐᒥᓂᒃ ᐱᒋᐊᖅᑎᑦᑎᓚᐅᕐᑐᖅ, ᐆᒥᖓ ᖃᕋᓴᐅᔭᒃᑯᑦ ᑮᓇᐅᔭᓂ ᐃᑲᔫᑎᒃᓴᓂᒃ ᐅᑭᐅᕐᓯᐅᑎᓂᒃ ᑲᒥᖕᓂ ᓂᐅᕕᕈᑎᐅᔪᓐᓇᕐᓂᐊᖅᑐᓂᒃ ᐱᕈᖅᑎᑦᑎᓇᓱᒃᖢᓂ ᓄᓇᓕᖕᓃᑦᑐᓄᑦ.

“ᐃᒻᒪᖄᓪᓘᓐᓃᒃ ᓯᓐᓇᒃᑑᑎᒋᒻᒪᕆᓚᐅᕐᑕᕋ ᐅᓐᓄᐊᖅ,” ᐅᖃᖅᑐᖅ ᐃᒡᓚᖅᓯᓪᓗᓂ.

“ᐃᖅᑯᒻᒪᕋᒪ, ᐃᓱᒪᓚᐅᕐᑐᖓ ᑖᓐᓇ ᐃᓱᒪᒋᔭᒃᓴᑦᑎᐊᕙᐅᓂᖓᓂᒃ, ᐊᒻᒪᓗ ᐃᓱᒪᓪᓗᖓ ᑕᐅᑐᖃᑦᑕᖅᑐᑦ ᐅᕙᓐᓂ ᑎᒃᑖᒃᑯᑦ ᐊᒻᒪᓗ ᐱᖃᓐᓇᕆᔭᒃᑲ ᐃᖃᓗᖕᓂ ᑕᒪᑐᒥᖓ ᐃᑲᔪᕈᓐᓇᕐᓂᐊᖅᖢᑎᒃ.”

ᐃᓕᓐᓂᐊᕆᐊᖅᐸᒃᖢᓂ ᐅᓪᓗᓕᒫᖅ, ᐊᓈᓇᐅᓪᓗᓂ, ᐋᖅᑭᒃᓱᐃᓯᒪᓪᓗᓂ ᓄᓇᕗᒥᐅᑕᓂ ᐊᒻᒪ ᐱᐅᓴᕈᓐᓇᕐᓂᕐᒥᒃ ᑕᕐᕆᔭᒐᒃᓴᓂᒃ ᑎᒃᑖᒃᑯᑦ, ᐊᒻᒪᓗ ᐊᒡᔭᖅᑐᐃᕙᒃᖢᓂ ᓂᕿᓂᒃ ᐊᒻᒪ ᐊᑐᖅᑕᐅᔭᕆᐊᓕᖕᓂ, ᕕᓕᐅᕋᑎ ᐅᖃᓚᐅᕐᑐᖅ 1 ᐳᓴᓐᓗᐊᒥ “ᐃᒻᒥᓄᑐᐊᖅ” ᐱᕕᖃᖅᑎᑦᑎᕙᒃᑐᖅ ᐅᓪᓗᖅ ᐃᓱᓕᑦᑕᕌᖓᑦ.

ᑭᓯᐊᓂᓕ “ᐃᓱᒪᓯᒪᒐᒪ ᐊᑯᓂᕈᓗᒃ ᖃᓄᖅ ᐃᑲᔪᕈᓐᓇᕆᐊᒃᓴᓐᓂᒃ ᓄᓇᓕᖕᓂ.” ᐅᖃᖅᑐᖅ.