ᐅᐸᒍᑎᔪᖃᑦᑎᐊᙱᖢᓂ, ᑲᓇᑕ ᓂᐱᑭᖢᓂ ᐱᒋᐊᖅᑎᑦᑎᕗᖅ ᓄᑖᒥ ᐅᑭᐅᕐᑕᖅᑐᕐᒥᑦ ᐊᑐᐊᒐᓕᕆᓂᕐᒧᑦ ᑎᑎᖃᓂᒃ

ᐅᓪᓘᑉ ᓯᕗᓂᐊᒍᑦ ᑲᓇᑕᒥ ᓂᕈᐊᒐᒃᓴᐅᓂᕐᒧᑦ ᒪᓂᓴᐅᓯᐅᕐᓂᕐᒥᒃ ᐱᒋᐊᕐᓂᐊᓕᖅᑎᓪᓗᒍ, ᓕᐳᕈᓪ ᒐᕙᒪᒃᑯᑦ, ᐅᐸᒃᑕᐅᓯᒪᓗᐊᙱᖢᑎᒃ, ᐱᒋᐊᖅᑎᑦᑎᓚᐅᕐᐳᑦ ᐊᑯᓂᐊᓗᒃ ᐅᑕᖅᑭᔭᐅᓯᒪᔪᒥᑦ ᐅᑭᐅᕐᑕᖅᑐᕐᒥᑦ ᐊᒻᒪ ᐅᑭᐅᕐᑕᖅᑐᕐᒦᑦᑐᓄᑦ ᐊᑐᐊᒐᓕᕆᓂᕐᒧᑦ ᖃᓄᐃᓕᖓᔪᒃᓴᓂᒃ ᓯᑎᐱᕆ 10-ᖑᑎᓪᓗᒍ.

ᐅᓇ ᑎᑎᖃᖅ, ᓴᕿᑎᑦᑎᒍᑎᐅᔪᖅ ᓯᕗᓪᓕᖅᐹᒥ ᐱᓕᕆᔾᔪᑎᕕᓂᕐᓂᒃ ᑲᔪᓯᒍᑎᐅᔪᒥᑦ ᖃᓄᐃᓕᐅᕐᓂᕐᒧᑦ, ᐃᓇᖏᕐᓯᒍᑎᐅᓂᐊᖅᑐᖅ ᑲᓐᓲᕕᑎᕝᑯᑦ ᑲᓇᑕᒥ ᐊᖓᔪᖅᑳᖑᓚᐅᕐᑑᑉ ᓯᑏᕙᓐ ᕼᐋᐳᕐ 2009-ᒥ ᐅᑭᐅᕐᑕᖅᑐᕐᒧᑦ ᖃᓄᐃᓕᐅᕈᑎᒃᓴᖏᓐᓂᒃ ᐊᒻᒪᓗ ᕼᐋᐴᑉ ᒐᕙᒪᖓᑦᑕ 2010-ᒥ ᐅᖃᐅᓯᕕᓂᖏᓐᓂᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐋᓪᓚᓄᑦ ᐊᑐᐊᒐᓂᒃ.

ᐅᓇ ᐋᕿᒃᓯᒪᓇᓱᒃᑐᖅ ᑐᑭᒧᐊᕈᑎᐅᓂᐊᕐᓗᓂ ᒐᕙᒪᑐᖃᒃᑯᑦ ᐊᑐᐊᒐᖓᓂ ᐅᑭᐅᕐᑕᖅᑐᕐᒥ ᑎᑭᓪᓗᒍ 2030—ᑭᓯᐊᓂᓕ ᐱᑕᖃᙱᒻᒪ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᓂᒃ ᐅᕝᕙᓘᓐᓃᑦ ᒐᕙᒪᓕᕆᓂᒃᑯᑦ ᑐᑭᒧᐊᕈᑎᐅᓇᔭᖅᑐᓂᒃ ᓯᕗᓂᒃᓴᒥᑦ ᖃᓄᐃᓕᐅᕈᑎᒃᓴᓂᒃ.

ᑕᒪᒃᑯᐊᓕ ᐱᓕᕆᐊᖑᓂᐊᖅᑐᑦ ᐊᐃᑉᐸᖓᓂᑦ ᐱᓕᕆᓂᒃᓴᒥᑦ, ᖃᓄᐃᓕᐅᕈᑎᒃᓴᑦ ᐅᖃᕐᓯᒪᔪᑦ.

ᑕᐃᒪᐃᕈᓘᔭᕋᓗᐊᕐᑎᓪᓗᒋ, ᐅᓇ ᐱᒋᐊᕈᑎᒋᔭᐅᔪᖅ ᐅᕙᙵᑦ ᑭᐅᕈᓕᓐ ᐸᓇᑦ, ᒥᓂᔅᑕ ᒐᕙᒪᒃᑯᑦ-ᓄᓇᖃᖅᑳᖅᑐᓪᓗ ᐱᓕᕆᐊᖏᓐᓄᑦ ᐊᒻᒪ ᐅᑭᐅᕐᑕᖅᑐᕐᓕᕆᓂᕐᒧᑦ, ᐅᖃᓚᐅᕐᑐᖅ ᐅᓇ ᐊᑐᐊᒐᓄᑦ ᑎᑎᖃᖅ ᓴᕿᑎᑦᑎᓯᒪᓂᖓᓂᒃ “ᐊᖏᔪᐊᓗᒃᑯᑦ ᐊᓯᙳᕐᓂᐊᕐᓂᖓᓂᒃ ᑐᕌᕈᑎᐅᓯᒪᔪᑦ ᑲᓇᑕᐅᑉ ᒐᕙᒪᖓᓄᑦ.”

ᑖᔅᓱᒪ ᐊᑐᐊᒐᐅᑉ ᓴᖅᑭᑕᐅᓂᖓ ᑭᖑᕙᕐᓯᒪᒋᔭᐅᔪᖅ ᓂᕆᐅᒋᔭᐅᕝᕕᒋᓚᐅᕐᑕᖓᓂᒃ. ᑕᒪᑐᒪᓂ ᐅᑭᐅᕐᒥ, ᐸᓇᑦ ᐅᖃᓚᐅᕐᒪᑦ ᑖᓐᓇ ᐊᑐᐊᒐᖅ ᓴᕿᑕᐅᓛᕆᐊᒃᓴᖓᓂᒃ ᔫᓂᒥ.

ᓰᐲᓰᑯᑦ ᑐᓴᒐᒃᓴᖃᓚᐅᕐᑐᑦ ᑕᒪᓐᓇ ᑕᖅᑭᖅ ᐱᒋᐊᕐᓯᒪᓂᕐᓴᐅᑎᓪᓗᒍ ᑐᓴᒐᒃᓴᓕᐅᕐᓇᐅᓂᐊᓚᐅᕐᑐᖅ ᔭᓗᓇᐃᒥᑦ ᐋᒐᓯᐅᓕᕈᓂ ᓄᖅᑲᖅᑎᑕᐅᓚᐅᕐᓂᖓᓂᒃ.

ᓕᐳᕈᒃᑯᑦ ᐊᑐᐊᖓᓂ 8-ᖑᔪᑦ “ᑐᕌᒐᒃᓴᑦ,” ᐃᓚᖃᖅᖢᑎᒃ ᖃᓄᐃᓕᐅᕈᒪᔾᔪᑎᓂᒃ, ᐊᒻᒪᓗ ᖁᓕᓂᒃ (10) “ᑐᙵᕕᒻᒪᕆᖕᓂᒃ.”

ᐅᖃᐅᓯᖃᕐᓯᒪᔪᑦ ᐅᓄᕈᓘᔭᕐᑐᓂᒃ ᐊᑐᐊᒐᓕᕆᓂᕐᒨᖓᔪᓂᒃ, ᐃᓚᖃᖅᖢᑎᒃ ᓄᓇᓕᖕᓂᑦ ᐊᒻᒪ ᐊᕕᒃᑐᕐᓯᒪᓂᒃᑯᑦ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᔪᓕᕆᓂᕐᒥᒃ, ᐃᒡᓗᖁᑎᓕᐅᕐᓂᕐᒥᒃ, ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ, ᐊᕙᑎᒋᔭᒥᒃ ᓴᐳᔾᔨᓯᒪᓂᕐᒥᒃ, ᑲᓇᑕᒥ ᓴᐳᓐᓂᐊᖅᑎᓂᒃ ᐊᒻᒪᓗ ᐋᓪᓚᓕᕆᓂᕐᒧᑦ ᐊᑐᐊᒐᓂᒃ.

ᐅᓇ ᑲᓇᑕᐅᑉ ᐊᖓᔪᖅᑳᖓ ᔭᔅᑎᓐ ᑐᕉᑑ, ᑎᓯᐱᕆ 20, 2016-ᒥ, ᑐᓴᖅᑎᑦᑎᑎᓪᓗᒍ ᒐᕙᒪᖏᑦ ᓄᑖᓂᒃ ᐊᑐᐊᒐᕐᓂᒃ ᐋᕿᒃᓱᐃᔪᒪᓂᕋᖅᖢᓂᒋᑦ, ᐅᖃᒻᒪᕆᓚᐅᕐᓯᒪᔪᖅ “ᐋᕿᒃᓱᐃᖃᑎᒌᖕᓂᒃᑯᑦ” ᐱᓕᕆᐊᖑᓂᐊᕐᓂᕋᖅᖢᓂᐅᒃ ᐅᑭᐅᕐᑕᖅᑐᕐᒥ ᒐᕙᒪᐅᔪᓂᒃ ᐊᒻᒪ ᓄᓇᖃᖅᑳᖅᑐᑦ ᑲᑐᔾᔨᖃᒌᖏᓐᓂᒃ.

ᑕᐃᒪᐃᓐᓂᖓᓄᑦ, 25 ᐅᖓᑖᓃᑦᑐᑦ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᑦ, ᐃᓚᖃᖅᖢᑎᒃ ᓄᓇᕗᑦ ᒐᕙᒪᖓᓂᒃ, ᓄᓇᑦᓯᐊᕐᒥᑦ, ᔫᑳᓐ, ᒫᓂᑑᐸ, ᑯᐸᐃᒃ ᐊᒻᒪ ᓂᐅᕙᐅᓐᓛᓐ-ᓛᐸᑐᐊᒥᑦ, ᐃᓚᐅᓕᓚᐅᕐᐳᑦ ᐋᕿᒃᓱᐃᖃᑎᒌᖕᓂᕐᒥᒃ.

“ᐋᕿᒃᓱᐃᖃᑎᒌᖕᓂᒃᑯᑦ ᑲᓇᑕᐅᑉ ᐅᑭᐅᕐᑕᖅᑐᕐᒧᑦ ᐊᒻᒪ ᐅᑭᐅᕐᑕᖅᑐᕐᒥᐅᓄᑦ ᐊᑐᐊᒐᓕᕆᓂᕐᒧᑦ ᖃᓄᐃᓕᐅᕈᑎᒃᓴᓂᒃ, ᐱᓕᕆᖃᑎᒋᔭᕗᑦ ᐅᕙᑦᑎᓐᓂ ᐃᑲᔪᓚᐅᕐᒪᑕ ᑐᑭᓯᑎᑦᑎᓪᓗᑎᒃ ᐊᒻᒪ ᖃᐅᔨᕚᓪᓕᖅᑎᑦᑎᓪᓗᑎᒃ ᐊᑐᖅᑕᐅᕙᓗᐊᙱᑦᑐᓂᒃ ᐱᔪᓐᓇᐅᑎᐅᓇᔭᖅᑐᓂᒃ ᐊᒻᒪ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐊᔾᔨᒌᙱᑦᑐᓂᒃ ᐊᕕᒃᑐᕐᓯᒪᓂᒃᑯᑦ, ᑲᒪᒋᔭᒃᓴᓂᒡᓗ ᐊᒻᒪ ᓄᓇᖃᕐᓂᕐᒧᑦ ᐱᔪᓐᓇᐅᑎᓂᒃ ᐅᑭᐅᕐᑕᖅᑐᓕᒫᒥᑦ,” ᐸᓇᑦ ᐅᖃᓚᐅᕐᑐᖅ ᑐᓴᒐᒃᓴᓕᐊᑎᒍᑦ.

ᐊᒻᒪᓗ ᐃᓚᖏᑦ ᐱᓕᕆᖃᑎᒋᔭᐅᔪᑦ ᑎᑎᕋᓚᐅᕆᓪᓗᑎᒃ ᖃᓄᐃᓕᐅᕈᓯᖏᓐᓂᒃ, ᑖᒃᑯᐊᓗ ᓴᕿᑎᑕᐅᓯᒪᓪᓗᑎᒃ ᐊᓯᐊᒎᖓᓪᓗᑎᒃ ᐊᑐᐊᒐᓄᑦ ᑎᑎᖃᓂᒃ.

ᐃᓚᖏ ᐅᖃᐅᓯᐅᔪᑦ ᐅᖃᐅᓯᖃᙱᓚᑦ ᒐᕙᒪᑐᖃᒃᑯᑦ ᐊᑐᐊᒐᖓᓂᒃ

ᓲᕐᓗ ᐃᒪᓐᓇ, ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᑦ ᒐᕙᒪᖓᑦ, ᓄᓇᑦᓯᐊᑉ ᒐᕙᒪᖓᑦ ᐊᒻᒪᓗ ᐱᖓᓱᑦ ᐊᕕᒃᑐᕐᓯᒪᓂᒃᑯᑦ ᒐᕙᒪᐅᔪᑦ ᑲᑐᔾᔨᓪᓗᑎᒃ ᓇᖕᒥᓂᖅ ᐃᒻᒥᖕᓅᖓᔪᓂᒃ ᐅᖃᐅᓯᕐᓂᒃ ᑐᓂᓯᓯᒪᕗᑦ.

ᑭᓯᐊᓂᓕ ᖃᓄᐃᓕᐅᕐᓂᖅᑕᖃᖅᖢᓂ. ᑕᒪᒃᑯᐊ ᑎᑎᕋᐅᓯᐊᑦ ᑐᓐᓂᖁᑎᐅᓯᒪᔪᑦ ᐋᕿᒃᓱᐃᖃᑕᐅᔪᓂᒃ ᑭᒡᒐᖅᑐᐃᔪᓐᓇᙱᑐᐃᓐᓇᕆᐊᖃᕐᒪᑕ ᒐᕙᒪᑐᖃᒃᑯᑦ ᐊᑐᐊᒐᖓᓂᒃ.

ᐅᓇ ᓲᕐᓗ ᓇᓗᓇᐃᒃᑯᑎᐅᔪᖅ ᒐᕙᒪᑐᖃᒃᑯᑦ ᓈᒻᒪᙱᓕᐅᕈᑎᓂᒃ ᑐᓗᖅᑕᑐᐃᓐᓇᕆᐊᖃᕐᓂᖏᓐᓂᒃ ᐊᖏᕋᔭᖅᑐᓂᒃ ᐅᑯᓇᙵᑦ 31 ᐅᖓᑖᓃᑦᑐᓂᒃ ᐱᓕᕆᖃᑎᒌᒃᑐᓂᒃ.

“ᑕᒪᓐᓇ ᖃᓄᐃᓕᐅᕐᓂᐊᕐᓂᕐᒧᑦ ᑎᑎᕋᐅᓯᐅᔪᑦ ᐃᓚᒋᔭᐅᑎᓪᓗᒋᑦ ᖃᓄᐃᓕᐅᖅᐸᓪᓕᐊᓂᕐᒧᑦ, ᓇᓗᓇᒃᑯᑎᒻᒪᕆᐅᙱᑦᑐᑦ ᐃᓱᒪᒋᔭᐅᔪᓂᒃ ᒐᕙᒪᑐᖃᒃᑯᓐᓂᒃ ᐅᕝᕙᓘᓐᓃᑦ ᐊᓯᖏᓐᓂᒃ ᐱᓕᕆᖃᑎᒌᖑᖃᑕᐅᔪᓂᒃ,” ᖃᓄᐃᓕᐅᖅᐸᓪᓕᐊᓂᕐᒧᑦ ᑎᑎᖃᑦ ᐅᖃᕐᓯᒪᔪᑦ.

ᑎᑎᕋᕐᓯᒪᔪᑦ ᐅᖃᕐᓯᒪᖕᒥᔪᑦ ᐊᖏᖅᑕᐅᓂᕆᔭᖏᑦᑎᒍᑦ ᐊᒃᓱᕈᓐᓇᓚᐅᕐᓂᖓᓂᒃ.

“ᐃᓱᒪᐊᕆᔭᐅᔪᑦ, ᖃᓄᐃᓕᐅᕈᑎᐅᔪᒪᔪᑦ ᐊᒻᒪ ᑐᕌᒐᕆᔭᐅᔪᑦ ᐊᒻᒪ ᐱᔭᐅᔪᒪᔪᑦ ᑲᑎᒪᓂᒃᑰᖓᔪᖅ ᐊᒥᓱᓂᒃ ᐃᓱᒪᓂᒃ ᐊᒻᒪ ᐃᓱᒪᒋᔭᐅᓂᑯᓂᒃ. ᐅᓇ ᑐᑭᖃᖅᑐᖅ ᐊᖏᖃᑎᒌᒍᑎᖃᓚᐅᖅᐸᒃᖢᑎᒃ ᒐᕙᒪᑐᖃᒃᑯᓪᓗ ᓄᓇᖃᖅᑳᖅᑐᓪ ᐱᓕᕆᖃᑕᐅᔪᑦ ᐊᖏᖅᑕᐅᓇᓱᒃᑎᓪᓗᑕ.”

ᐊᑦᑕᑕᐅᑎᓂᒃ ᓇᓂᓯᔪᓐᓇᖅᑐᓯ ᐅᑭᐅᕐᑕᖅᑐᕐᒧᑦ ᐊᑐᐊᒐᓂᒃ ᐅᕙᓂ ᓴᕿᔮᒐᒃᑯᑦ. (Website)

8 ᑐᕌᒐᐃᑦ

ᐅᕝᕙᐅᑯᐊ 8-ᖑᔪᑦ ᑐᕌᒐᐃᑦ ᖃᓄᐃᓕᐅᕈᑎᒃᓴᒃᑯᑦ, ᓴᕿᔮᖅᑎᑦᑎᓪᓗᑎᒃ ᒐᕙᒪᑐᖃᒃᑯᑦ ᐱᓇᓱᐊᕈᒪᔭᖏᓐᓂᒃ.

• ᓴᙱᔪᒥᑦ, ᐊᑐᖃᑦᑕᐃᓐᓇᕈᓐᓇᖅᑐᒥᒃ, ᐊᔾᔨᒌᙱᑦᑑᑎᐅᓯᒪᔪᓂᒃ ᐊᒻᒪ ᐱᑕᖃᐃᓐᓇᕈᓐᓇᖅᑐᓂᒃ ᓄᓇᓕᖕᓂᒃ ᐊᒻᒪ ᐊᕕᒃᑐᕐᓯᒪᓂᒃᑯᑦ ᑮᓇᐅᔭᓕᐅᕈᑎᒃᓴᓂᒃ.
• ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐊᒻᒪ ᐅᑭᐅᕐᑕᖅᑐᕐᒥᐅᑕᑦ ᓄᓇᖃᖅᑳᖅᑐᑦ ᐱᓇᓱᐃᓐᓇᕈᓐᓇᕐᓗᑎᒃ ᐊᒻᒪ ᖃᓄᐃᙱᓪᓗᑎᒃ.
• ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐊᒻᒪ ᐅᑭᐅᕐᑕᖅᑐᕐᒥᐅᑕᑦ ᐃᓄᐃᑦ ᖁᐊᕐᓵᕐᓇᙱᑦᑐᒦᓪᓗᑎᒃ ᐊᒻᒪ ᓴᐳᔾᔭᐅᓯᒪᑦᑎᐊᕐᓗᑎᒃ.
• ᓴᙱᓐᓂᕐᓴᒥᑦ ᐱᓕᕆᕝᕕᖃᕐᓂᕐᓴᐅᓕᕐᓗᑎᒃ ᐊᔾᔨᒋᔭᐅᙱᔾᔪᑏᑦ ᑲᓇᑕᐅᑉ ᐊᓯᐊᓂᒃ ᐋᕿᒃᑕᐅᒃᑲᓐᓂᕈᓐᓇᕐᓗᑎᒃ.
• ᐱᖁᔭᓂᒃ ᑐᙵᕕᖃᖅᑐᑦ ᐅᑭᐅᕐᑕᖅᑐᕐᒥ ᐊᑑᑎᖃᑦᑐᒃᑯᑦ ᐱᓕᕆᔾᔪᑎᐅᓗᑎᒃ ᓄᑖᓂᒃ ᖃᓄᐃᓕᐅᕈᑎᒃᓴᐅᔪᓐᓇᖅᑐᓂᒃ ᐊᒻᒪ ᐱᕕᒃᓴᐅᔪᓐᓇᖅᑐᓂᒃ.
• ᖃᐅᔨᒪᓂᒃᑯᑦ ᐊᒻᒪ ᑐᑭᓯᐅᒪᓂᒃᑯᑦ ᑐᑭᒧᐊᕈᑎᓂᒃ ᐃᓱᒪᓕᐅᕈᑎᓕᕆᓂᕐᒧᑦ.
• ᑲᓇᑕᐅᑉ ᐅᑭᐅᕐᑕᖅᑐᖓ ᐊᒻᒪ ᐅᑭᐅᕐᑕᖅᑑᑉ ᐆᒪᔾᔪᑎᖏ ᖃᓄᐃᙱᓪᓗᑎᒃ ᐊᒻᒪ ᐱᓇᓱᐃᓐᓇᕐᓗᑎᒃ.
• ᐋᕿᒃᓱᐃᖃᑎᒌᖕᓂᖅ ᐃᑲᔪᕈᑎᐅᕗᖅ ᐱᓇᓱᐃᓐᓇᕋᓱᖕᓂᕐᒥᒃ ᐊᒻᒪᓗ ᐅᒃᐱᕆᖃᑎᒌᒃᑲᓐᓂᕈᑎᐅᓪᓗᓂ ᓄᓇᖃᖅᑳᖅᑐᓂᒃ ᐊᒻᒪ ᓄᓇᖃᖅᑳᙱᑦᑐᓂᒃ ᐃᓄᖕᓂᑦ.

ᑖᒃᑯᐊ ᑐᕌᒐᕆᔭᐅᔪᑦ ᐱᒋᐊᕈᑎᖃᖅᑐᑦ ᐊᔾᔨᒌᙱᑦᑑᑎᓂᒃ “ᐱᓕᕆᐊᖑᔪᒪᔪᓂᒃ” ᓇᓗᓇᐃᖅᑕᐅᓯᒪᒃᑲᓐᓂᕐᓯᒪᔪᓂᒃ.

ᖁᓖᑦ ᑐᙵᕕᒻᒪᕇᑦ

ᑕᒪᒃᑯᐊᓗ ᐱᓕᕆᐊᖑᓂᐊᕐᓗᑎᒃ ᑐᕌᒐᐃᑦ ᐊᒻᒪ ᐱᓕᕆᐊᖑᔪᒪᔪᑦ, ᐊᑐᐊᒐᐃᑦ ᑎᑎᖃᑦ ᓇᓗᓇᐃᔭᐃᓯᒪᔪᖅ ᑐᙵᕕᒻᒪᕆᖕᓂᑦ ᐊᑖᒍᑦ, ᑖᒃᑯᐊᓗ ᐋᕿᒃᑕᐅᓂᑯᓪᓘᑎᒃ “ᑐᑭᒧᐊᕈᑎᐅᖏᓐᓇᕐᓂᐊᕐᒪᑕ ᐊᑐᓕᖅᑎᑦᑎᓂᕐᒧᑦ ᐱᓕᕆᐊᒃᓴᒥᑦ”:

• ᐃᓱᒪᓕᐊᕆᔭᐅᔪᑦ ᐅᑭᐅᕐᑕᖅᑑᑉ ᒥᒃᓵᓄᑦ ᐋᕿᒃᑕᐅᖃᑦᑕᕐᓂᐊᕐᑐᑦ ᐱᓕᕆᖃᑎᒌᖕᓂᒃᑯᑦ ᐊᒻᒪ ᐅᑭᐅᕐᑕᖅᑐᕐᒥᐅᑕᑦ ᐃᓚᐅᑎᑕᐅᕙᒡᓗᑎᒃ, ᐱᔪᓐᓇᐅᑏᑦ ᓴᖅᑭᔮᕐᑎᓪᓗᒋ, ᐱᔭᐅᔭᕆᐊᓖᑦ ᐊᒻᒪᓗ ᐅᑭᐅᕐᑕᖅᑐᕐᒥᐅᓄᑦ ᐱᓇᓱᐊᒐᕆᔭᐅᔪᒪᔪᓂᒃ.
• ᐱᔪᓐᓇᐅᑎᒋᔭᐅᔪᑦ ᐊᒻᒪ ᐃᓂᒋᔭᐅᔪᑦ ᑲᓇᑕᐅᑉ ᒐᕙᒪᖓᑦ, ᐊᕕᒃᑐᕐᓯᒪᐅᕐᓂᒃᑯᑦ, ᐳᕌᕕᓐᓯᑎᒍᑦ ᓄᓇᖃᖅᑳᖅᑐᑦ ᐊᒻᒪ ᓄᓇᓕᖕᓂ ᒐᕙᒪᐅᔪᑦ ᐃᓱᒪᒋᔭᐅᑦᑎᐊᕐᓂᐊᖅᑐᑦ.
• ᐋᕿᒃᓱᐃᕙᓪᓕᐊᓂᖅ ᐊᑐᖅᑕᐅᔪᓐᓇᕆᐊᖃᖅᑐᖅ ᐊᒻᒪ ᐅᒃᐱᕆᔭᐅᓗᓂ, ᐃᓅᖃᑎᒌᖕᓂᕐᒥᑦ, ᐃᓕᖁᓯᕐᓂᒃ, ᑮᓇᐅᔭᓕᐅᕋᓱᖕᓂᕐᒥᒃ ᐊᒻᒪ ᐊᕙᑎᒋᔭᒥᒃ ᐃᓱᒪᖃᕐᓗᑎᒃ.
• ᑲᑎᖃᑎᒌᒃᐸᓪᓕᐊᓂᖅ ᓄᓇᖃᖅᑳᖅᑐᓂᒃ ᑲᔪᓰᓐᓇᕐᓗᓂ, ᐊᑐᕐᓗᑎᒃ ᐱᓕᕆᐊᖑᓂᑯᑦ ᓱᓕᔪᓂᒃ ᐊᒻᒪ ᑲᑎᖃᑎᒌᒃᑲᓐᓂᕐᓂᕐᒧᑦ ᑲᒥᓴᓐ ᐱᒋᐊᕈᑎᐅᓯᒪᓗᓂ, ᐊᓂᒍᐃᑦᑎᐊᕈᑎᐅᓇᔭᖅᑐᖅ.
• ᓯᓚᐅᑉ ᐊᓯᙳᖅᐸᓪᓕᐊᓂᖓ ᐱᓪᓚᕆᐅᑎᓪᓗᒍ ᑕᒫᓂ ᓄᓇᒥ, ᖃᓄᐃᓕᐅᕈᑎᒃᓴᓂᒃ ᐱᓕᕆᐊᖃᕐᓂᐊᖅᑐᑦ ᐊᔾᔨᒌᙱᑦᑐᓂᒃ ᐊᒃᑐᖅᑕᐅᓯᒪᔪᓄᑦ, ᐃᓚᖃᕐᓗᑎᒃ ᐊᒃᑐᐃᒍᑎᖓ ᓄᓇᖃᖅᑳᖅᑐᓄᑦ, ᑖᒃᑯᐊ ᓄᓇᒥ ᓂᕐᔪᑎᓂᒡᓗ ᐊᑐᖃᑦᑕᐃᓐᓇᐅᔭᕐᓂᖏᓐᓄᑦ ᐃᓕᖁᓯᕆᓪᓗᒍ, ᑮᓇᐅᔭᓕᐅᕈᑎᐅᔪᓐᓇᖅᑐᓂᒃ ᐊᒻᒪ ᓂᕿᖃᖅᑎᑦᑎᑦᑎᐊᕐᓂᕐᒥᓐ.
• ᐊᑐᐊᒐᖅ ᐊᒻᒪ ᐱᓕᕆᐊᖃᖅᑎᑦᑎᓂᖅ ᓇᓗᓇᐃᒃᑯᑎᐅᓂᐊᖅᑐᖅ ᐊᔾᔨᒌᙱᓐᓂᐅᔪᓂᒃ ᐊᒻᒪ ᐊᔾᔨᒌᒃᑎᑦᑎᕙᖕᓂᕐᒥᒃ, ᐊᒻᒪᓗ ᐊᑐᖅᑕᐅᑎᑦᑎᓗᑎᒃ ᐱᓕᕆᔾᔪᑎᒃᓴᐅᓂᐊᖅᑐᓂᒃ ᒪᑯᑎᑐᓇᖅ ᐊᕐᓇᓄᑦ/ᐊᖑᑎᓄᑦ ᑐᕌᖓᔪᓂᒃ ᖃᐅᔨᓴᕈᑎ (Gender-Based Analysis Plus) ᐊᑐᖅᑕᐅᓂᐊᖅᑐᒥᒃ ᐊᒃᑐᐃᒍᑎᐅᓕᑐᐃᓐᓇᕆᐊᓕᖕᓂ ᐊᔾᔨᒌᙱᑦᑑᑎᓂᒃ ᐃᓅᖃᑎᒌᖕᓂᒃ.
• ᐅᓇ ᐱᓕᕆᔾᔪᑎᐅᓂᐊᕐᑐᖅ ᐃᓱᒪᒋᔭᖃᕐᓂᒃᑯᑦ ᐊᔾᔨᒌᙱᑦᑐᓂᒃ ᑐᙵᕕᖃᕐᓂᒃᑯᑦ ᐱᒋᐊᕈᑎᓂᒃ ᒪᑯᐊ ᐱᔪᓐᓇᐅᑏᑦ, ᐱᔪᒥᒋᔭᐅᔪᑦ ᐊᒻᒪ ᖃᓄᐃᓕᖓᓂᕐᒨᖓᓂᐅᔪᑦ ᒪᑯᓄᖓ ᐃᓄᖕᓄᑦ, ᐅᑭᐅᕐᑕᖅᑐᕐᒥᑦ ᓄᓇᖃᖅᑳᖅᑐᑦ ᐊᓪᓚᐃᑦ ᐊᒻᒪ ᐊᓪᓚᖓᔪᐃᑦ ᐃᓱᒪᒋᔭᐅᑦᑎᐊᕐᓗᑎᒃ, ᓇᓗᓇᐃᑦᑕᐅᑦᑎᐊᕐᓗᑎᒃ ᐊᒻᒪ ᐊᑐᓕᖅᑎᑕᐅᓗᑎᒃ.
• ᑲᓇᑕᐅᑉ ᒐᕙᒪᖓ ᐃᓕᓴᖅᓯᓯᒪᔪᑦ ᐃᓄᐃᑦ, ᓄᓇᖃᖅᑳᖅᑐᑦ ᐊᓪᓚᐃᑦ ᐊᒻᒪ ᐊᓪᓚᖓᔪᐃᑦ ᓄᓇᖃᖅᑳᖅᓯᒪᓂᖏᓐᓂᒃ ᑲᓇᑕᒥᒃ, ᐃᒪᐃᓕᖓᓂᒃᑯᑦ ᐊᔾᔨᒌᙱᓐᓂᒃᑯ, ᐱᔪᓐᓇᐅᑎᖃᕐᓂᕐᒥᑦ ᖃᐅᔨᒪᔪᑦ ᓄᓇᓖᑦ, ᓇᖕᒥᓂᖅ ᐊᑐᓂᑯᑕᖃᖅᖢᑎᒃ, ᐃᓚᖃᖅᖢᓂ ᒐᕙᒪᑐᖃᒃᑯᓐᓂᒃ.
• ᐱᓕᕆᓂᖅ ᐱᓕᕆᖃᑎᒌᒍᓐᓇᕐᓂᕐᒥᒃ ᑐᙵᕕᖃᕐᓗᓂ ᐱᔪᓐᓇᐅᑎᖃᕐᓂᖏᓐᓂᒃ, ᐃᓱᒪᒋᔭᖃᑦᑎᐊᕐᓂᕐᒥᒃ, ᐱᓕᕆᖃᑎᒌᖕᓂᕐᒥᒃ ᒪᑯᓂᖓ ᓴᕿᔮᖅᑎᑦᑎᒍᑎᐅᔭᕆᐊᖃᖅᑐᑦ ᐱᔭᐅᔪᒪᓯᒪᔪᓂᒃ, ᓯᕗᓪᓕᐅᑎᑕᐅᓯᒪᔪᓂᒃ ᐊᒻᒪ ᖃᓄᐃᓕᖓᔾᔪᑎᒋᔭᐅᓂᐅᔪᓂᒃ ᐃᓄᖕᓂᑦ ᐊᑐᓂ.
• ᑕᒪᕐᒥ ᑲᑐᔾᔨᖃᑎᒌᑦ, ᒪᑯᓇᙵᑦ ᐃᒻᒥᒃᑰᖓᔪᓂᙶᖅᑐᓂᒃ ᒪᐅᖓ ᓯᓚᑦᑐᖅᓴᕐᕕᒡᔪᐊᓄᑦ ᐊᒻᒪ ᓯᓚᑦᑐᖅᓴᕐᕕᖕᓄᑦ, ᒪᑯᐊᓗ ᑮᓇᐅᔭᓕᐅᕋᓱᒐᑎᒃ ᐱᓕᕆᐊᖃᖅᑐᑦ, ᓄᓇᓕᖕᓂ ᑲᑐᔾᔨᖃᑎᒌᖑᔪᑦ ᐊᒻᒪ ᐃᒻᒥᒃᑰᖓᔪᑦ ᑲᓇᑕᒥᐅᑕ, ᐱᔭᒃᓴᖃᒻᒪᕆᖕᒪᑕ ᐱᕈᖅᑎᑦᑎᕙᓪᓕᐊᓂᕐᒥᒃ ᓴᙱᓂᕐᓴᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ.