ᐊᐅᐸᓗᒃ ᐱᕗᖅ ᐊᖏᓂᖅᓴᒥ, ᐱᐅᓂᖅᓴᒥ ᐋᓐᓂᐊᕕᖕᒥ

For the English version of this story, see Judge reserves decision on whether Nunavik class action lawsuit can go forward.

ᐊᐅᐸᓗᖕᒥ ᓄᑖᖑᔪᒥ ᐋᓐᓂᐊᕕᖓ ᒪᑐᐃᓪᓚᕆᒃᐳᖅ, ᐃᓇᖏᖅᓯᓪᓗᓂ “ᓄᑕᐅᙱᑦᑐᒥ ᐊᒻᒪ ᓱᕋᑦᑎᕙᓪᓕᐊᔪᒥ” ᐋᓐᓂᐊᕕᖕᒥ ᐅᕙᙶᖅᑐᒥ 1979−ᒥ.

ᓄᑖᖑᔪᒥ ᐋᓐᓂᐊᕕᒃ ᐱᓕᕆᐊᖑᕙᓪᓕᐊᓯᒪᕗᖅ ᑕᐃᒪᙵᓂ 2015−ᒥ ᓯᕗᓂᐊᓂ ᐃᒡᓗᕐᔪᐊᖅ ᐱᐅᙱᕐᔪᐊᓕᓚᐅᕐᒪᑦ, ᔭᓇᕗ ᒥᐅᓂᒃ−ᐅᐊᑦᑭᓂᔅ, ᐃᓱᒻᒥᖅᑐᐃᔨᐅᔪᖅ ᓄᓇᕕᖕᒥ ᐊᕕᒃᑐᖅᓯᒪᔪᓄᑦ ᑲᑎᒪᔨᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ, ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

“136−ᐸᓗᖕᓂ ᑭᑉᐹᕆᒃᑐᓂ ᒦᑕᐸᓘᓚᐅᖅᐳᖅ, ᐊᒻᒪ ᓄᑕᐅᙱᕐᔪᐊᖅᖢᓂ ᐊᒻᒪ ᓱᕋᑦᑎᕙᓪᓕᐊᓪᓗᓂ,” ᐅᖃᓚᐅᖅᐳᖅ.

“ᐱᔭᕆᐊᖃᓚᐅᖅᐳᑦ ᓄᑖᖑᔪᒥ ᐃᓘᕐᔪᐊᒥ. ᐅᐱᓐᓇᕐᔪᐊᓚᐅᖅᐳᖅ ᓄᓇᓕᖕᓄᑦ.”

ᓄᑖᖅ ᐃᒡᓗᕐᔪᐊᖅ, ᒪᑐᐃᓪᓚᕆᓚᐅᖅᑐᒥ ᐱᓇᑐᐊᕈᓯᐅᔪᓂ ᒪᕐᕉᓕᖅᑐᓂ, 2,035 ᑭᑉᐹᕆᒃᑐᓂ ᒦᑕᐅᕗᖅ ᐊᖏᓂᖓᓂ ᐊᒻᒪ ᐊᑭᖃᓚᐅᖅᐳᖅ $45 ᒥᓕᐊᓐ ᐅᖓᑖᓂ ᓴᓇᓂᕐᒧᑦ. ᑮᓴᐅᔭᖃᖅᑎᑕᐅᓚᐅᖅᐳᖅ ᑯᐸᐃᖕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ ᒥᓂᔅᑕᖃᕐᕕᐅᔪᒥ.

ᐃᒡᓗᕐᔪᐊᖅ ᐃᒡᓗᖃᖅᑎᑦᑎᕗᖅ ᓱᐊᕕᕐᓇᖅᑐᒥ ᐃᒡᓗᕈᓯᕐᒥ ᐆᒻᒪᖅᑎᑦᑎᓇᓱᐊᕐᓂᐅᔪᒥ ᐃᒡᓗᕈᓯᖃᖅᑐᒥ, ᒪᕐᕉᖕᓂ ᑭᒍᑎᓕᕆᕝᕕᖕᓂ, ᐊᒻᒪ ᐃᓂᒃᓴᖃᖅᖢᓂ ᒪᒃᑯᒃᑐᓄᑦ ᓴᐳᔾᔭᐅᓯᒪᓂᐅᔪᒥ ᐱᓕᕆᔨᐅᔪᓄᑦ ᐊᒻᒪ ᒪᓕᒐᓕᕆᓂᕐᒧᑦ ᐱᔨᑦᑎᕋᕐᓂᕐᒧᑦ.

ᒥᐅᓂᒃ−ᐅᐊᑦᑭᓂᔅ ᐅᖃᓚᐅᖅᐳᖅ ᐊᔾᔨᒌᙱᕈᓘ.ᖅᑐᓂ ᑎᒥᒧᑦ ᐃᖃᐃᓕᓴᑉᕈᕐᑕᖃᕐᓂᐊᖅᐳᖅ ᐊᒻᒪ ᓯᖓᐃᔪᓄᑦ ᐃᕐᓂᕋᑖᕕᓂᕐᓄᑦ ᐱᔨᑦᑎᕋᕐᓂᐅᔪᒥ ᐊᑐᐃᓐᓇᖃᕐᒥᓗᓂᓗ.

ᐊᑎᖓ — ᖃᓪᓕᓴᕐᕕᒃ ᐋᓐᓂᐊᕕᒃ — ᓂᕈᐊᖅᑕᐅᓚᐅᖅᐳᖅ ᓄᓇᓕᖕᓂ ᐊᐅᐸᓗᖕᒥ.

ᐅᖃᖃᑎᖃᕐᓂᕐᒥ ᐃᓄᑐᖃᕐᒥ, ᒥᐅᓂᒃ−ᐅᐊᑦᑭᓂᔅ ᐃᓕᑦᑎᓚᐅᖅᐳᖅ ᑐᑭᖓᓂ ᐊᑎᖓᓂ ᐱᔾᔪᑎᖃᖅᐳᖅ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓅᓕᓴᐅᑎᖏᓐᓂ.

“ᑕᐃᔅᓱᒪᓂᑐᖃᖅ, ᐃᓄᐃᑦ ᐊᑐᖅᐸᓚᐅᖅᐳᑦ ᐊᕕᙵᐅᑉ ᐊᒥᖓᓂ ᐊᔪᐊᑉ ᖄᖓᒍᑦ ᒥᓪᓗᐊᖅᓯᓂᐊᕐᒪᑦ ᐊᔪᐊᖓᓂ,” ᐅᖃᓚᐅᖅᐳᖅ.

ᐱᔾᔪᑎᖃᖅᐳᖅ ᓄᓇᕕᐅᑉ ᒥᑭᓛᖑᔪᒥ ᓄᓇᓕᖓᑕ ᓄᑖᖑᔪᖅ ᐋᓐᓂᐊᕕᖓ ᐊᖏᔪᐊᓘᓂᖓᓂ, ᐅᖃᓚᐅᖅᐳᖅ ᒥᐅᓂᒃ−ᐅᐊᑦᑭᓂᔅ.

“ᐱᕈᖅᓴᕙᓪᓕᐊᔪᓂ ᐃᓄᒋᐊᖕᓂᖃᖅᐳᒍᑦ ᐅᑭᐅᖅᑕᖅᑐᒥ,” ᐅᖃᓚᐅᖅᐳᖅ, ᐅᓂᒃᑳᖅᖢᓂ ᐊᒥᓱᓂ ᓄᓇᕕᐅᑉ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑕᑖᖅᑐᒥ ᐱᔪᓐᓇᕐᓂᖃᕐᓂᖓᓂ ᐱᓕᕆᐊᒃᓴᖅ ᐱᔭᕇᖅᑕᐅᒍᓂ.

“[ᒫᓐᓇ] ᓴᓇᓲᖑᕗᒍᑦ ᐊᖏᓂᖅᓴᐅᔪᓂ ᓂᕆᐅᒋᔭᐅᓇᔭᕐᓂᖓᓂ, ᑕᐃᒫᒃ ᑲᓱᒃᑐᕆᐊᖃᔾᔮᙱᓐᓇᑦᑕ ᒐᕙᒪᒃᑯᑦ ᐹᖏᓐᓄᑦ ᐊᐱᕆᓇᓱᖕᓂᕐᒧᑦ ᐊᖏᓂᖅᓴᓂ ᐃᒡᓗᕐᔪᐊᖅᑖᕈᒪᓂᕐᒧᑦ,” ᐅᖃᓚᐅᖅᐳᖅ.

ᑯᐸᐃᖕᒥ ᒐᕙᒪᖓ ᑭᖑᕙᕆᐊᖅᑎᑦᑎᓚᐅᖅᐳᑦ ᐋᓐᓂᐊᕕᐅᑉ ᒪᑐᐃᖅᑕᐅᓪᓚᕆᖕᓂᖓᓂ ᓯᕗᓪᓕᐅᔪᒥ ᐅᓪᓗᖓᓂ 2021−ᒥ ᐱᔾᔪᑎᖃᖅᑐᒥ ᓇᑉᐸᖅᑎᕆᓂᕐᒧᑦ ᑭᖑᕙᕆᐊᕐᓂᐅᔪᓄᑦ ᐱᑎᑕᐅᔪᓂ ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒧᑦ. ᑕᐃᔅᓱᒪᓂ, ᓄᓇᓖᑦ ᓇᑉᐸᖅᑎᕆᓂᕐᓂ ᐱᓕᕆᐊᒃᓴᓂ ᐱᔭᕇᖅᓯᓂᖃᓚᐅᙱᓚᑦ

ᐱᓗᐊᖅᑐᒥ, ᐋᓐᓂᐊᕕᖕᒥ ᑭᖑᕙᕆᐊᖅᑕᐅᓂᐅᔪᑦ ᐱᔾᔪᑎᖃᓚᐅᖅᐳᑦ ᓇᑉᐸᖅᑎᕆᓂᐅᔪᓂ ᐃᒡᓗᒃᓴᓂ 11−ᓄᑦ ᓴᓇᔨᒃᓴᓄᑦ ᐸᖅᑭᓇᔭᖅᑐᓂ ᐃᒡᓗᕐᔪᐊᒥ.

ᐃᒡᓗᕐᔪᐊᖅ ᐃᒻᒥᓂᒃ ᐊᔾᔨᐅᙱᑦᑐᒥ ᐃᒡᓗᓕᐅᖅᑕᐅᓯᒪᓂᖓᓂ ᓴᓇᓯᒪᓂᖃᖅᐳᖅ. ᐊᑕᐅᓯᐅᔪᒥ ᐃᓂᓪᓚᕆᐅᔪᒥ ᐃᓕᖅᑯᓯᒧᑦ ᐃᒡᓗᕈᓯᐅᕗᖅ, ᓴᓇᓯᒪᓪᓗᓂ ᐊᖕᒪᓗᒐᓚᒃᑐᒥ ᖁᓪᓕᖃᖅᖢᓂ ᕿᑎᐊᓂ. ᐃᓅᓯᓕᕆᓂᕐᒧᑦ ᑐᕌᖓᕗᖅ.

ᒥᐅᓂᒃ−ᐅᐊᑦᑭᓂᔅ ᐃᖅᑲᐅᒪᕗᖅ ᑕᑯᓂᕐᒥ ᖃᓄᖅ ᖁᕕᐊᓱᖕᓂᖏᓐᓂ ᓄᓇᓕᖕᒥᐅᑕᓂ ᐋᓐᓂᐊᕕᐅᑉ ᒪᑐᐃᖅᑕᐅᓪᓚᕆᖕᓂᖓᓂ.

“ᐅᑕᖅᑭᔪᓐᓇᙱᓚᖓ ᑕᐃᒪᐃᑦᑐᖃᕐᓂᖓᓂ ᑕᒪᒃᑭᓂ 13−ᖑᔪᓂ ᐊᒥᐊᒃᑯᔪᓂ ᓄᓇᓕᐅᔪᓂ,” ᐅᖃᓚᐅᖅᐳᖅ.