ᐊᑦᒪᓐᑕᓐ ᑲᓇᑕᒥ ᕗᑦᐹᓪ ᓖᒡ ᐱᙳᐊᖅᑎᖏ ᐊᑎᕐᒥᖕᓂ ᐊᑐᕈᓐᓃᖅᐳᑦ

ᑖᒃᑯᐊ ᐱᙳᐊᖅᑎᐅᔪᑦ ᑭᖑᓪᓕᖅᐹᒻ ᐅᖃᖃᑎᒌᖕᓂᖓᓂ ᖃᐅᔨᓕᓚᐅᕐᐳᑦ “ᐃᒡᓗᐊᓄᖔᖅ ᐃᓱᒪᖃᓕᓚᐅᕐᓯᒪᕗᑦ ᑖᒃᑯᐊ ᐊᑎᖓ ᐃᓱᒪᒋᔭᐅᓂᖓᓄᑦ”

ᐅᑯᐊ ᐱᙳᐊᖅᑎᑦᑎᔨᐅᔪᑦ ᓄᑖᒥᒃ ᐊᑎᖅᑖᓚᐅᙱᓐᓂᖏᓐᓂᒃ, ᐊᑦᒪᓐᑕᓐ ᑲᓇᑕᒥ ᕗᑦᐹᓪᓕᕆᔨᒃᑯᑦ (CFL) ᐃᒪᓐᓇ ᑕᐃᔭᐅᖃᑦᑕᕐᓂᐊᖅᑐᑦ EE Football Team (ᐄᐄ ᕗᑦᐹᓪ ᑏᒻ) ᐊᒻᒪᓗ Edmonton Football Team (ᐊᑦᒪᓐᑐ ᕗᑦᐹᓪ ᑏᒻ). (ᐊᔾᔨᙳᐊᖁᑎᒋᔭᐅᔪᖅ)

By ᓴᐃᕋ ᕌᔾᔪᔅ

For an English version of this story, see Edmonton CFL team officially drops name

ᐅᑯᐊ ᑲᓇᑕᒥ ᕗᑦᐹᓪ ᓖᒡᑯᑦ ᐊᑦᒪᓐᑕᓐᒥ ᐱᙳᐊᖅᑎᖏ ᐱᒻᒪᕆᙳᖅᑎᑦᑎᕗᑦ: ᑕᖅᑭᒐᓴᖕᓂ ᐅᖃᖃᑎᖃᑲᑖᓪᓚᓚᐅᖅᖢᑎᒃ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐱᓕᕆᐊᖑᓯᒪᓂᖏᓐᓄᑦ, ᑖᒃᑯᐊ ᐱᙳᐊᖅᑎᒋᔭᐅᔪᑦ ᐊᑎᕐᒥᖕᓂᒃ ᐊᑐᔾᔮᔪᓐᓃᖅᑐᑦ.

ᐅᑯᐊ ᕗᑦᐹᖃᑦᑕᖅᑐᑦ ᐃᓚᒌᑦ ᑐᓴᖅᑎᑦᑎᓕᓚᐅᕐᑐᑦ ᐃᓱᒪᒋᔭᐅᔪᑐᖃᕐᒥ ᐊᑎᕆᔭᕐᒥᖕᓂ “ᐊᔅᑭᒨᔅ” ᐊᑐᖃᑦᑕᔾᔮᔪᓐᓃᕐᓂᕋᖅᖢᓂᔾᔪᒃ ᐅᖄᓚᐅᑎᑎᒍᑦ ᑲᑎᒪᑎᓪᓗᒋᑦ ᐊᐃᑉᐹᓂᒃ, ᔪᓚᐃ 21-ᒥᑦ.

“ᐊᕐᕌᒎᕋᑖᖅᑐᓂᒃ ᑐᑭᓯᕙᓪᓕᐊᓯᒪᒐᑦᑕ ᐃᓱᒫᓘᑎᒋᔭᐅᔪᒥ ᐊᑎᕆᔭᐅᔪᒥᒃ,” ᐅᖃᖅᑐᖅ ᔮᓂᔅ ᐊᒡᕆᐅᔅ, ᐃᒃᓯᕙᐅᑕᖅ ᐱᙳᐊᖅᑎᐅᖃᑎᒌᓄᑦ. “ᖃᐅᔨᒪᒐᑦᑕ ᑕᐃᒃᑯᐊ ᓯᕗᓪᓕᖅᐹᑦ ᐊᑎᕐᒥ ᓂᕈᐊᖅᑐᕕᓃᑦ ᓈᒻᒪᙱᓕᐅᕈᑎᖃᕋᔭᕆᐊᒃᓴᖓᓂ ᐃᓱᒪᓚᐅᕐᓯᒪᙱᒻᒪᑕ ᐃᓱᒪᖃᑦᑎᐊᙱᓐᓂᒃᑯᑦ ᐅᕝᕙᓘᓐᓃᑦ ᑭᓲᙱᑎᑦᑎᒐᓱᖕᓂᒃᑯᑦ; ᐃᒻᒪᖄᑦ, ᐃᒡᓗᖔᖓᓄᑦ—ᐅᐱᒍᓱᓚᐅᕐᓯᒪᖕᒪᑕ ᓴᙱᔪᓂᒃ ᐊᑎᖃᕐᓂᖏᓐᓂᒃ ᐃᒻᒥᑎᑐᑦ.

“ᑭᓯᐊᓂᓕ, ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᖃᐅᔨᒪᑐᐃᓐᓇᕆᐊᖃᕋᓗᐊᖅᖢᑕ, ᑕᒪᓐᓇᓕ ᑐᑭᖃᙱᑦᑐᖅ ᑲᔪᓯᒍᑦᑕ ᐊᑎᕐᒥ ᐊᑐᕐᓂᕐᒥᑦ.

ᐊᕐᕌᒍᓕᒫᖅ ᐃᓄᐃᑦ ᓄᓇᓕᖏᓐᓂᒃ ᐅᖃᖃᑎᖃᑲᑖᓪᓚᐅᖅᖢᑎᒃ, ᐅᑯᐊ ᕗᑦᐹᓕᕆᔨᒃᑯᑦ ᑐᓴᖅᑎᑦᑎᓕᓚᐅᕐᑐᑦ ᕕᕗᐊᕆᐅᓚᐅᕐᑐᒥ ᐱᓯᒪᓂᐊᕐᓂᕋᖅᖢᓂᔾᔪ 100-ᓕᖅᑐᖅ ᐊᑎᖓ. ᑖᒃᑯᐊ ᐱᙳᐊᖅᑎᐅᔪᑦ ᐅᖃᓚᐅᕐᓯᒪᖕᒪᑕ ᓈᒻᒪᒃᓴᙱᑦᑐᓂᒃ ᑖᒃᑯᐊ ᐊᑐᖃᑦᑕᕐᓂᖏᓐᓂᒃ ᐊᑎᕐᒥᑦ, ᐃᓚᖏᑦ ᐃᓄᐃᑦ ᑕᒪᑐᒥᖓ ᓈᒻᒪᒃᓴᙱᒃᑲᓗᐊᖅᑎᓪᓗᒋᑦ

ᑭᓯᐊᓂᓕ ᐅᖃᓗᑲᑕᓕᖅᑐᓄᑦ ᐅᐱᕐᖔᖅ ᑕᒪᒃᑯᐊ ᐱᙳᐊᖅᑎᐅᖃᑎᒌᑦ ᐊᑎᖏᓐᓂᒃ ᐊᑐᖁᔭᐅᙱᓕᕐᖢᑎᒃ ᓄᓇᖃᖅᑳᖅᑐᑦ ᐊᑎᖏᓐᓂᒃ ᒪᑯᐊᓘᓐᓃᑦ ᐃᑲᔪᖅᑎᙳᐊᕆᕙᒃᑕᖏᑦ. ᒥᐊᓕᒐᕐᒥ ᕗᑦᐹᓪ ᓖᒡᑯᑦ ᐱᙳᐊᖅᑎᖏᑦ ᐅᐊᓯᖕᑕᓐ ᐅᕆᐊᑦᓯᑭᓐᔅ (Washington Redskins) ᐊᑎᕐᒥᖕᓂ ᐊᑐᔾᔮᔪᓐᓃᕐᓂᕋᖅᖢᑎᒃ ᑕᕐᓴᖓᓂᒡ ᑕᒪᓐᓇ ᑕᖅᑭᖅ ᐱᒋᐊᓕᖅᑎᓪᓗᒍ.

ᐱᓕᕆᐊᖑᕙᓪᓕᐊᓂᖏᓐᓄᑦ ᑕᒪᐃᓐᓄᑦ ᖁᙱᐊᖅᑎᐅᕙᒃᑐᓄᑦ ᐊᒻᒪ ᑮᓇᐅᔭᑎᒍᑦ ᐃᑲᔪᖅᐸᒃᑐᓄᑦ, ᐅᑯᐊ ᐃᐊᑦᒪᓐᑕᓐ ᐱᙳᐊᖅᑎᑦ ᐱᓕᕆᐊᖃᕈᒪᓕᓚᐅᕐᓯᒪᔪᑦ ᑐᓴᕋᓱᒃᑲᓐᓂᕋᓱᒍᒪᓕᕐᖢᑎᒃ ᐃᓄᐃᑦ ᓄᓇᓕᖏᓐᓂᒃ ᐊᒻᒪ ᑎᒍᒥᐊᖅᑎᓄ ᑕᒪᓐᓇ ᑕᖅᑭᖅ ᐱᒋᐊᓕᓵᖅᓯᒪᓕᕐᑎᓪᓗᒍ.

ᑖᒃᑯᓄᖓ ᐱᙳᐊᖅᑎᓄᑦ ᐊᖓᔪᖅᑳᖅ ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨ ᑯᕆᔅ ᐳᕋᔅᓴᓐ ᐅᖃᓚᐅᕐᑐᖅ ᑭᖑᓪᓕᖅᐹᑦ ᐅᖃᖃᑎᒌᖕᓂᐅᔪᑦ “ᐊᔾᔨᒋᙱᓪᓚᕆᒃᑕᖓᓂ ᐃᓱᒪᖃᕈᑎᐅᓕᖅᖢᓂ ᑖᓐᓇ ᐊᑎᖅ ᐊᑐᖅᑕᐅᓂᖓᓄᑦ.”

ᐳᕋᔅᓴᓐ ᐅᖃᓚᐅᕐᑐᖅ ᐋᖅᑭᒃᓯᓯᒪᙱᓐᓂᖏᓐᓂᒃ ᓱᓕ ᖃᓄᖅ ᐊᒻᒪ ᖃᑯᒍ ᓄᑖᖅ ᐊᑎᕆᓂᐊᖅᑕᖓᑦ ᓂᕈᐊᖅᑕᐅᓂᐊᕐᒪᖔᑦ. ᑕᐃᒪᐃᓕᐅᕐᑎᓪᓗᒋᑦ, ᑖᒃᑯᐊ ᐱᙳᐊᖅᑎᐅᔪᑦ ᐊᑎᖃᕐᓂᐊᖅᑐᑦ ᐃᒪᓐᓇ EE Football Team ᐊᒻᒪᓗ Edmonton Football Team.

ᓄᑖᒥ ᐊᑎᖅᑖᖅᐸᓪᓕᐊᓇᓱᒃᑎᓪᓗᒋᑦ, ᑖᒃᑯᐊ ᐱᙳᐊᖅᑎᐅᔪᑦ ᐅᖃᓚᐅᕐᑐᑦ ᐃᓄᐃᑦ ᐃᓚᐅᖁᓪᓗᒋ ᑕᐃᒪᐃᓕᐅᕐᑎᓪᓗᒋᑦ.

“ᐱᓇᓱᐊᒐᖃᕋᑦᑕ ᐱᓕᕆᖃᑎᖃᕐᓂᕐᒥᑦ ᐅᑭᐅᕐᑕᖅᑐᕐᒥ ᓄᓇᓕᖕᓂᒃ, ᐱᓗᐊᕐᑐᒥ ᐅᐊᓕᓂᕐᒥᐅᓂᒃ, ᑕᐃᑲᓂᓕ ᐱᓕᕆᖃᑎᖃᑯᑖᒃᓯᒪᒐᑦᑕ,” ᐳᕋᔅᓴᓐ ᐅᖃᖅᑐᖅ. “ᐃᓱᒪᔪᖓ ᑕᐃᒪᐃᒃᑯᑦᑕ ᑐᑭᖃᕋᔭᑦᑎᐊᕐᓂᖓᓂᒃ.”

ᐃᓄᐃᑦ ᑕᐱᕇᑦ ᑲᓇᑕᒥ ᑐᙵᓱᒃᑎᑦᑎᓚᐅᕐᑐᑦ ᐊᑎᕐᒥ ᐊᓯᔾᔨᖅᑕᐅᓂᐊᖅᑐᒥ ᔪᓚᐃ 21-ᖑᑎᓪᓗᒍ, ᑖᓐᓇᓗ ᓇᓪᓕᐅᑎᓪᓗᓂ ᐊᕐᕌᒍᑦ ᑕᓪᓕᒪᑦ ᓯᕗᓂᐊᓂ ᐅᓇ ᐊᖓᔪᖅᑳᖅ ᓇᐃᑕᓐ ᐅᐱᐊᑦ, ᓯᕗᓪᓕᖅᐹᕐᒥ ᑎᑎᕋᓚᐅᕐᓯᒪᑎᓪᓗᒍ ᖃᓄᐃᒻᒪ ᑖᓐᓇ ᐊᑎᕆᑎᑕᐅᔪᖅ ᐋᓐᓂᕈᑎᐅᔭᓐᓂᖓᓂᒃ ᐃᓄᖕᓄᑦ.

“ᐃᓄᑦ ᑕᐱᕇᑦ ᑲᓇᑕᒥ ᑕᐃᒪᙵᑦ ᐱᓕᕆᐊᖃᐃᓐᓇᖅᑐᑦ ᐱᙳᐊᖅᑎᐅᔪᑦ ᐊᑎᖓ ᓱᕋᐃᒍᑎᐅᓂᖓᓂᒃ ᐃᓄᖕᓂᒃ ᐊᒻᒪᓗ ᒪᒥᓴᖅᐸᓪᓕᐊᓂᕐᒧᑦ,” ᑲᑐᔾᔨᖃᑎᒌᑦ ᐅᖃᓚᐅᕐᓯᒪᔪᑦ ᔪᓚᐃ 22-ᒥᑦ. “ᐱᓕᕆᕙᓪᓕᐊᓂᖅ ᐃᓕᓴᕐᓯᓯᒪᓂᕐᒥ ᐊᒻᒪ ᑭᐅᓯᕙᓪᓕᐊᓂᕐᒥᑦ ᑕᒪᒃᑯᓂᖓ ᐋᓐᓂᕈᑎᐅᔭᑦᑐᓂᒃ ᐱᒻᒪᕆᐅᖕᒪᑦ ᐃᓄᐃᑦ ᒪᒥᓴᖅᑎᓪᓗᒋᑦ ᐅᑯᓄᖓ ᑲᓇᑕᒧᑦ, ᐊᒻᒪᓗ ᐃᓚᒋᔭᐅᓕᑐᐃᓐᓇᖅᖢᓂ ᒪᑯᓄᖓ ᓄᖑᑎᑕᐅᓇᓱᒃᑐᓄᑦ ᐊᔾᔨᒌᙱᑎᑦᑎᔭᕐᓂᕐᒥ ᐃᓅᖃᑎᒌᖕᓂᒃᑯᑦ.”

“ᖁᔭᓕᕗᒍᑦ ᐃᐊᑦᒪᓐᑕᓐ ᐱᙳᐊᖅᑎᖏ ᐃᓱᒪᓕᐅᕆᓕᓚᐅᕐᒪᑕ ᑖᔅᓱᒥᖓ ᐱᒻᒪᕆᖕᒥ ᐊᒻᒪᓗ ᐊᓂᒍᐃᑦᑎᐊᕐᓂᐊᖁᓪᓗᑎᒍᑦ ᓄᑖᒥ ᐊᑎᖅᑖᕋᓱᒃᑎᓪᓗᒋᑦ,” ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᓚᐅᕐᑐᑦ.

“ᖁᔭᒋᖕᒥᔭᕗᑦ ᐱᓕᕆᖃᑎᖃᓕᕐᓯᒪᓂᖏᓐᓂᒃ ᐃᓄᖕᓂ ᐊᕐᕌᒍᒐᓴᐅᓕᖅᑐᓂᒃ ᐊᒻᒪᓗ ᑲᔪᓯᑐᐃᓐᓇᖁᓐᓇᖅᖢᑎᒃ ᐃᓄᖕᓂ ᑖᒃᑯᓂᖓ ᐃᑲᔪᖅᑐᐃᔪᓂᒃ ᐊᒻᒪ ᐱᓕᕆᖃᑎᖃᕈᓐᓇᕐᓂᐊᕐᓂᖏᓐᓂᒃ ᐃᓄᖕᓂ ᓄᓇᑦᑎᓐᓂᑦ.”

Share This Story

(0) Comments