ᐊᒥᐊᓕᑲᒥᐅᑕᖅ ᐊᖑᓂ ᐅᑭᐅᕐᑕᖅᑐᕐᒥᐅᑕᑦ ᓴᐃᒻᒪᑎᖏᓐᓂᒃ ᓴᖅᑭᔮᖅᑎᑦᑎᕗᖅ ᑲᓇᑕᐅᑉ ᓂᒋᐊᓂ

ᕆᑦᓱᑦ ᒧᐊ ᐃᖅᑲᐅᒪᔪᖅ ᓯᕗᓪᓕᖅᐹᑦᑎᐊᕐᒥᓐ ᐅᑭᐅᕐᑕᖅᑐᕐᒧᐊᖅᑎᓪᓗᒍ.

ᑲᖏᖅᖠᓂᖅᒦᓚᐅᕐᓯᒪᔪᖅ, ᒥᒃᑕᕐᕕᒃᒧᑦ ᓂᐅᓪᓗᓂ ᐊᓄᕆᒧᑦ ᓴᙱᔪᐊᓗᖕᒧᑦ ᑲᓴᒃᑕᐅᑳᓪᓚᒃᖢᓂ ᑎᑭᖃᑎᒋᓵᖅᑕᖏᓪᓗ.

“ᐃᓱᒪᓚᐅᖅᓯᒪᔪᖓ ᑎᒃᑕᐅᓂᐊᕆᐊᒃᓴᓐᓂᑦ ᐃᐅᕈᑉᒧᓕᒫᖅ,” ᐅᖃᖅᑐᖅ ᐅᖄᓚᐅᑎᒃᑯᑦ ᐊᐱᖅᓱᖅᑕᐅᑎᓪᓗᒍ ᐊᖏᕐᕋᖓᓃᖢᓂ ᐅᐹᓇ, ᐃᓕᓄᐊᐃᒥᑦ, 200 ᑭᓛᒥᑕ ᖃᓂᒐᔭᖓᓂ ᓯᑳᑰᑉ ᓂᒋᐊᓂᒃ.

“ᓇᓴᐃᑦ ᐊᑐᖅᑕᐅᔫᒐᓗᐊᑦ ᑎᒃᑕᐅᑲᑕᓕᖅᖢᑎᒃ ᓇᒧ ᕿᕕᐊᖅᖢᓂ.”

ᑖᓐᓇ ᐳᐃᒍᕈᓐᓇᐃᓪᓕᓯᒪᔭᖓ, ᑭᓯᐊᓂᓕ ᐃᓐᓇᐅᓂᖅᒧᑦ ᐃᖅᑲᓇᐃᔭᕈᓐᓃᖅᓯᒪᔪᖅ ᐅᕙᙵᑦ ᔫᓂᕘᓯᑎ ᐃᓕᓄᐊᐃᒥ ᐃᓕᓴᐅᔨᐅᓂᑰᓂᖅᒥᒃ ᐃᓱᒪᒋᔭᐅᕙᒃᑐᓄᑦ ᐊᒻᒪ ᐊᑐᖅᑐᕕᓂᑐᖃᕐᓄᑦ ᐃᖅᑲᐅᒪᖕᒥᔪᖅ ᐊᓯᖏᓐᓂᒃ ᑲᓇᑕᐅᑉ ᐅᐊᖕᓇᖓᓂᒃ ᐱᐅᑎᒋᓂᖓᓂᒃ ᓄᓇᐅᑉ, ᐃᓕᖅᑯᓯᖏᓐᓂᒃ ᐊᒻᒪ ᐃᓄᖏᓐᓂᒃ. ᐅᖃᓚᐅᕐᑐᖅ ᑕᑉᐸᐅᙵᕈᑎᒋᓂᕋᖅᖢᓂᒋᑦ ᐅᑯᓄᖓ ᐃᖃᓗᐃᑦ, ᑭᙵᐃᑦ ᕿᑭᖅᑖᓘᑉ ᓂᒋᐊᓄᑦ, ᓄᓇᕕᒃᒧᑦ ᐊᒻᒪ ᓄᓇᑦᓯᐊᕗᑦᒧᑦ ᐊᕐᕌᒍᑦ ᖁᓕᑦ ᐃᓗᐊᓂ.

ᑭᓯᐊᓂᓕ ᐅᓇ ᐋᓐᓂᐊᕕᒡᔪᐊᕐᓇᖅ ᐱᒋᐊᖅᑎᓪᓗᒍ ᐊᒻᒪᓗ ᖃᐅᔨᒐᒥ ᖃᓂᑦᑐᒃᑯᑦ ᑕᑉᐸᐅᙵᔾᔮᙱᓐᓂᕐᒥᓂᒃ, ᒧᐊ ᐃᓱᒪᓕᓚᐅᕐᑐᖅ ᑕᑉᐸᖕᓇ ᐃᒻᒥᓄᐊᖅᑎᖔᕈᒪᓪᓗᓂᐅᒃ.

ᑖᒃᑯᐊᓕ ᑕᒪᑐᒧᖓ ᐋᖅᑭᒍᑎᒃᓴᖓ ᑎᑭᓚᐅᕐᑐᖅ ᑕᒪᑐᒪᓂ ᑕᕿᕐᒥ ᐃᒪᐃᓕᖓᓪᓗᑎᒃ ᐊᐅᓱᐃᑦᑑᑉ ᓴᐃᒻᒪᑎᖓ, ᓄᓇᑦᓯᐊᕗᑦ ᓴᐃᒻᒪᑎᖓ ᐊᒻᒪᓗ ᓄᓇᕕᒃᒧᑦ ᓴᐃᒻᒪᑎᒃᓴᒥᒃ. ᒧᐊ ᐊᒥᐊᓕᑲᒥᐅᑦ ᑮᓇᐅᔭᖏᑦᑎᒍᑦ ᐊᑐᓚᐅᖅᓯᒪᔪᖅ $200-ᓂᒃ ᑖᒃᑯᐊ ᓴᓇᔭᐅᑎᓐᓇᓱᒃᖢᓂᒋ ᐊᒻᒪᓗ ᐅᑕᖅᑭᓪᓗᓂ ᑕᕿᓂᒃ 9-ᓂᒃ. ᑭᓯᐊᓂᓕ ᐅᖃᓚᐅᖅᑐᖅ ᐅᑕᕿᔾᔪᑎᖓ ᖃᓄᐃᓚᐅᙱᑦᑎᐊᕐᓂᕋᖅᖢᓂᐅᒃ.

“ᐊᒃᓱᐊᓗᒃ ᐱᐅᖕᒪᑕ,” ᐅᖃᖅᑐᖅ. “ᐅᓇ ᐊᐅᓱᐃᑦᑑᑉ ᓴᐃᒻᒪᑎᖓ, ᐅᓇ ᓲᕐᓗ ᓄᓇᐃᓐᓇᕐᒧᑦ ᐃᓯᕆᐊᕐᕕᒃ. ᐅᓇᓕ ᓄᓇᕕᒃᒧᑦ ᓴᐃᒪᑎᒋᔭᐅᔪᒪᔪᖅ ᐆᒪ ᑑᒪᓯᐅᑉ [ᒪᙱᐅᒃ] ᐃᓱᒪᓕᐊᕆᓂᑯᖓ, ᓴᓇᓯᒪᓂᖓ ᐱᐅᔪᐊᓘᖕᒪᑦ … ᑭᓯᐊᓂᓕ ᑕᒪᕐᒥᒃ ᑖᒃᑯᐊ ᐱᖓᓱᑦ ᐃᖅᑲᐅᒪᔾᔪᑎᒋᔪᓐᓇᕋᒃᑭᑦ ᖃᓄᐃᓕᐅᓚᐅᕐᓯᒪᔭᓐᓂᒃ.”

ᒧᐊ ᐃᓱᒪᒋᔪᖅ ᐃᒻᒥᓂᒃ ᓴᐃᒻᒪᑎᓂᒃ ᖃᐅᔨᒪᑦᑎᐊᕐᓂᕋᕐᑐᖅ ᐊᒻᒪᓗ ᐊᕙᑎᑲᓐᓂᕐᓂᒃ (20) ᐊᖏᕐᕋᖓᓃᑦᑐᖃᖅᖢᓂ, ᑭᓯᐊᓂᓕ ᐊᔪᕐᓇᕈᓘᔭᕐᓂᕋᓚᐅᖅᑕᖓ ᑖᒃᑯᓂᖓ ᐱᖓᓱᓂᒃ ᐱᓇᓱᒃᖢᑎ. ᑕᒪᒃᑯᐊ ᓴᐃᒻᒪᑏᑦ ᓂᐅᕕᐊᒃᓴᐅᓗᐊᖅᐸᙱᒻᒪᑕ ᓴᐃᒻᒪᑎᓕᐅᖅᑐᑎᒍᑦ ᐅᑯᓇᙵᓪᓘᓐᓃᑦ ᐱᖁᑎᖃᖅᑎᑦᑎᔨᐅᔪᓂᒃ, ᐅᖃᕐᑐᖅ.

ᐆᒧᖓ ᑑᒪᓯ ᒪᙱᐅᒃᒧᑦ, ᑖᓐᓇᓗ ᑎᑎᕋᐅᔭᖅᓯᒪᓪᓗᓂ ᓄᓇᕕᒃᒧᑦ ᓴᐃᒻᒪᑎᐅᓕᖁᔭᐅᔪᒥᒃ, ᑕᒪᓐᓇ ᓴᓇᓯᒪᔭᖓ ᓴᖅᑭᔮᖅᑎᑕᐅᓂᖓ ᒧᐊᒧᑦ ᐃᒃᐱᖕᓇᖅᓂᕋᖅᖢᓂᐅᒃ, ᐱᓗᐊᖅᑐᒥ ᐊᐱᕆᔭᐅᖅᑳᖅᓯᒪᓂᖓᓄᑦ.

“ᐅᓇ ᓴᐃᒻᒪᑎ, ᓇᓗᓇᐃᒃᑯᑎᐅᔪᖅ ᓄᓇᕕᒻᒥᐅᓂᒃ, ᐃᓕᖅᑯᓯᑦᑎᓐᓂᒃ, ᐊᑐᕈᒪᔭᑦᑎᓐᓂᒃ, ᐱᓇᓱᐊᕋᓱᒃᑕᑦᑎᓐᓂᒃ,” ᒪᙱᐅᒃ ᐅᖃᓚᐅᖅᑐᖅ ᐊᐱᖅᓱᖅᑕᐅᑎᓪᓗᒍ. “ᑕᑯᓪᓗᓂ ᐃᓄᖕᓂ ᓇᑭᙶᕈᓘᔭᖅᑐᓂᒃ ᓄᓇᕐᔪᐊᒥᒃ, ᓴᐃᒻᒪᑎ ᓴᓇᔭᐅᑎᑕᐅᓂᖓ ᐊᒻᒪᓗ ᓂᕕᖓᓕᕐᓂᖓ ᐃᓕᓴᕆᔾᔪᑎᒋᓪᓗᒍ ᐊᒻᒪ ᐃᖅᑲᐅᒪᔾᔪᑎᒋᓪᓗᒍ ᓄᓇᑦᑎᓐᓂᒃ, ᑖᓐᓇᓕ ᐊᑭᒃᓱᐊᓗᒃ ᓴᓇᑦᑎᐊᖅᓯᒪᔪᖅ.”

ᒧᐊ ᐅᖃᓚᐅᕐᑐᖅ ᐋᓐᓂᐊᕕᒡᔪᐊᕐᓇᖅᒧᑦ ᖃᓄᐃᓕᐅᕈᑎᒋᔭᖓ ᖃᐅᔨᒪᔭᐅᑎᓐᓂᕋᖅᖢᓂᐅᒃ ᑲᓇᑕᒥ ᐱᖃᓐᓇᕆᔭᖏᓐᓄᑦ ᐊᒻᒪᓗ ᐃᓄᐃᑦ ᓴᓇᙳᐊᒐᖏᓐᓂᒃ ᐱᓕᕆᐊᖃᖅᐸᒃᑐᓄᑦ, ᐅᖃᓚᐅᖅᑐᖅ ᑕᒪᓐᓇ ᐅᔾᔨᕆᔭᐅᕚᓪᓕᕈᑎᑐᐃᕐᓇᐅᙱᓐᓂᖓᓂᒃ ᕼᐋᒻᒪᓚᓂᒃ ᐊᒻᒪ ᓄᓇᒋᔭᖏᓐᓂᒃ, ᑭᓯᐊᓂᓕᑦᑕᐅᖅ ᑕᒪᒃᑯᐊ ᓴᐃᒻᒪᑏᑦ ᐱᔭᐅᔪᓐᓇᕐᓂᖅᓴᐅᓕᕈᓐᓇᖁᓪᓗᓂᒋ. ᐅᖃᖅᖢᓂ, ᐅᑭᐅᕐᑕᖅᑐᖅ ᐃᓅᓯᖓᓄᑦ ᐊᒃᑐᐃᓯᒪᓪᓚᕆᖕᓂᖓᓄᑦ ᑕᐃᒪᓕ ᑕᒪᐅᓇ ᐃᑲᔪᕈᑎᖃᕈᓐᓇᕐᓂᕋᖅᖢᓂ.