ᐋᑐᕚᒥ ᐃᓱᒪᔪᑦ ᐋᓂ ᐳᑐᒍᖅ ᒥᕐᖑᐃᕐᓯᕕᒃᒥᑦ

ᐃᓱᒪᓕᐊᕆᔭᐅᔪᑦ ᒥᕐᖑᐃᕐᓯᕕᒃᒥᑦ ᐊᑎᕐᓯᔪᒪᓂᖅ ᐆᒥᖓ ᐃᓅᔪᓐᓃᕐᓯᒪᔪᒧᑦ ᑎᑎᕋᐅᔭᒐᖅᑎᒥ ᐋᑐᕚ ᓄᓇᓕᐸᐅᔭᓄᑦ ᑲᑎᒪᔨᓄᑦ ᓴᖅᑭᑕᐅᓂᐊᕐᑐᖅ

ᓄᓇᓕᐸᐅᔭᐃᑦ ᐋᑐᕚᒥ ᐊᑎᖅᑖᖅᑎᑦᑎᓂᐊᓕᕐᑐᑦ ᒥᕐᖑᐃᕐᓯᕕᒃᒥᑦ ᐆᒧᖓ ᐃᓄᖕᒧᑦ ᑎᑎᕋᐅᔭᒐᑎᐅᓚᐅᕐᑐᒧᑦ ᐋᓂ ᐳᑐᒍᖅ, ᑖᓐᓇ ᐋᑐᕚᒥ ᐃᓅᔪᓐᓃᓚᐅᕐᓯᒪᔪᖅ 2016-ᒥᑦ. (ᐊᔾᔨᙳᐊᖁᑎᒋᔭᐅᔪᖅ)

By ᔨᒻ ᐱᐊᓪ

For an English version of this story, see Ottawa’s Annie Pootoogook Park is a done deal

ᑲᓇᑕᐅᑉ ᐊᖓᔪᖅᑳᖃᕐᕕᖓ ᖃᓂᒡᓕᕚᓪᓕᕐᐳᖅ ᐊᑦᑎᕐᓯᓂᕐᒥ ᑐᖑᔪᕈᔪᖕᓂᕐᒥᒃ ᓄᓇᒥ ᐋᑐᕚᑉ ᕿᑎᐸᓗᐊᓂ ᐆᒥᖓ ᑎᑎᕋᐅᔭᒐᖅᑎᐅᓚᐅᕐᓯᒪᔪᒥᒃ ᐋᓂ ᐳᑐᒍᖅ.

ᐋᑐᕚᒥ ᓄᓇᓕᐸᐅᔭᓄᑦ ᑲᑎᒪᔨᒃᑯᑦ ᑲᑎᒪᔨᕋᓛᖏᑦ ᓄᓇᓕᕆᓂᕐᒧᑦ ᐊᒻᒪ ᖃᓄᐃᑎᑦᑎᑦ, ᖃᕋᓴᐅᔭᒃᑯᑦ ᑲᑎᒪᑎᓪᓗᒋᑦ ᕕᕝᕗᐊᕆ 18-ᒥᑦ, ᐃᓱᒪᓕᐅᕆᓚᐅᕐᓯᒪᕗᑦ ᐅᓇ ᓵᓐᑎ ᕼᐃᐅᓪ ᒥᕐᖑᐃᕐᓯᕕᒃ ᐊᑎᖃᖅᑎᑕᐅᖔᓕᕐᓗᓂ ᐋᓂ ᐳᑐᒍᖅ ᒥᕐᖑᐃᕐᓯᕕᒃᒥᑦ ᐆᒧᖓ ᑎᑎᕋᐅᔭᒐᖅᑎᒻᒪᕆᐅᓚᐅᕐᑐᒧᑦ ᑭᙵᓂ ᓄᓇᖃᕐᓂᑯᒧᑦ.

ᑲᑎᒪᔨᕋᓛᒃᑯᑦ ᐃᓱᒪᓕᐊᖓᑦ ᐱᖁᔨᕗᖔᕈᑎᒃᑯᑦ ᐊᖏᖅᑕᐅᔭᕆᐊᖃᕐᒪᑦ ᓄᓇᓕᐸᐅᔭᐃᑦ ᑲᑎᒪᔨᓕᒫᙱᓐᓄᑦ ᓯᕗᓂᑦᑎᓐᓂᑦ ᑲᑎᒪᓂᒃᓴᖓᓂᒃ ᐊᕐᑎᖅᑖᖅᑎᑦᑎᓇᓱᖕᓂᖓ ᐱᓪᓚᕆᐅᓕᓚᐅᙱᓐᓂᖓᓂᒃ.

“ᓴᖅᑭᑎᑦᑎᓯᒪᓂᖅ ᐱᒻᒪᕆᐅᖕᒪᑦ. ᐊᕐᓇᐃᑦ ᐱᒻᒪᕆᐅᖕᒪᑕ. ᑎᑎᕋᐅᔭᒐᐃᑦ ᐱᒻᒪᕆᐅᖕᒪᑕ. ᐊᒻᒪᓗ ᐱᓛᖑᓪᓗᓂ, ᐃᓄᐃᑦ ᐱᒻᒪᕆᐅᖕᒪᑕ.” ᓯᑕᕙᓂ ᐸᓛᓐᑦ, ᑳᕐᑕᓐ ᓯᓚᑦᑐᖅᓴᕐᕕᐊᓗᖕᒥᑦ ᐃᖅᑲᓇᐃᔭᖅᑎ ᓵᓐᑎ ᕼᐃᐅᓪ ᒥᒃᓵᓂ ᐃᒡᓗᖃᖅᖢᓂ, ᐅᖃᓚᐅᕐᑐᖅ ᑲᑎᒪᔨᕋᓛᓄᑦ.

ᐸᓛᓐᑦ ᑕᒪᑐᒥᖓ ᐱᓕᕆᐊᖃᓕᓚᐅᕐᓯᒪᔪᖅ ᐊᑎᕐᒥ ᐊᓯᙳᖅᑎᑦᑎᔪᒪᓂᕐᒥᒃ ᑎᓯᐱᕆ 2019-ᒥᑦ.

ᐊᐱᖅᓱᖅᑕᐅᑎᓪᓗᒍ ᑲᑎᒪᓚᐅᕐᑎᓐᓇᒋᑦ, ᐅᖃᓚᐅᕐᑐᖅ ᐅᓄᙱᓗᐊᕐᑐᑦ ᓄᓇᓕᖕᓄᑦ ᖃᓄᐃᓕᐅᕐᕖᑦ ᐋᑐᕚᒥ ᐊᑎᖃᖅᑎᑕᐅᖕᒪᑕ ᐊᕐᓇᓄᑦ, ᐊᒻᒪ ᐅᓄᙱᒋᐊᓪᓚᒃᑐᑦ ᓄᓇᖃᖅᑳᖅᑐᓂᒃ ᐊᑎᖃᖅᑎᑕᐅᖕᒪᑕ.

ᑕᐃᒪᓕ ᑕᒪᑐᒥᖓ ᐱᓇᓱᒻᒪᕆᓕᓚᐅᕐᓯᒪᔪᖅ ᐃᓱᒪᒋᓪᓗᒍ ᐋᓂ ᐳᑐᒍᖅ, ᓲᖃᐃᒻᒪ ᑕᒫᓂ ᐃᓄᒃᑕᖃᐅᕈᓘᔭᖃᑦᑕᕐᒪᑦ, ᐅᖃᖅᑐᖅ.

ᐅᓇ ᒥᕐᖑᐃᕐᓯᕕᒃ ᒫᓃᑦᑐᖅ ᓵᓐᑎ ᕼᐃᐅᓪ ᓄᓇᓕᖕᓄᑦ ᐅᐸᒡᕕᐅᑉ ᐅᖓᑖᓂ ᐅᕙᓂ 250 ᓴᒧᓴᑦ ᓯᑐᕇᑦ ᐄᔅᑦ, ᐅᖓᓯᒃᓴᓗᐊᙱᖢᓂ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕐᕕᒃᒥᑦ ᕇᑑ ᓯᑐᕇᑦ ᖃᓂᒋᔭᖓᓂ.

ᑕᒫᓂᑦᑕᐅᖅ ᐃᓄᖕᓄᑦ ᐸᐃᕆᕝᕕᒃᑕᖃᕆᓪᓗᓂ — ᐊᒻᒪᓗ ᐸᓛᓐᑦ ᐅᖃᖅᖢᓂ ᑖᒃᑯᐃ ᐃᓄᐃᑦ ᓱᕈᓯᖏᑦ ᑕᑯᔭᕆᐊᖃᕐᒪᑕ ᐳᑐᒎᑉ ᐃᓅᓯᕆᓚᐅᕐᑕᖓ ᐃᓱᒪᒋᔭᐅᑦᑎᐊᕐᓂᖓᓂ.

“ᐃᖅᑲᐅᒪᔭᕆᐊᖃᕋᑦᑎᒍᑦ ᐋᓂ ᐱᒻᒪᕆᐅᓚᐅᕐᓂᖓᓂ ᓱᖃᐃᒻᒪ,” ᐸᓛᓐᑦ ᐅᖃᖅᑐᖅ.

ᐸᓛᓐᑦ ᐱᓕᕆᐊᖃᓚᐅᕐᑐᖅ ᑎᑎᖃᓂᒃ ᐃᑲᔪᖅᑐᖅᑕᐅᔪᒪᑲᑕᒃᖢᓂ ᑕᒪᑐᒥᖓ ᐅᑯᓄᖓ ᓄᓇᕗᒥᑦ ᓯᕗᓕᐅᕐᑎᒧᑦ ᔫ ᓴᕕᑲᑖᖅ, ᑭᙵᐃᑦ ᒪᓕᒐᓕᐅᕐᑎᖓᓄᑦ ᑕᐃᕕᑎ ᔪᐊᓇᓯ ᐊᒻᒪᓗ ᐅᓄᕈᓘᔭᕐᑐᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐅᖃᓚᐅᕐᒥᔪᖅ ᐳᑐᒎᑉ ᐃᓚᖏᓐᓄᑦ ᐋᑐᕚᒦᑦᑐᓂᒃ ᐊᒻᒪ ᑭᙵᓃᑦᑐᓂᒃ ᑕᒪᑐᒥᖓ ᐱᓕᕆᐊᖃᕈᒪᓂᕐᒧᑦ ᐊᖏᖅᑕᐅᓚᐅᕐᓯᒪᓂᖓᓂᒃ.

ᐳᑐᒍᖅ, ᓵᓚᒃᓴᓚᐅᕐᓯᒪᔪᖅ ᓲᐱ ᑎᑎᕋᐅᔭᒐᕐᓂᒃ ᐃᓕᓴᕆᔭᐅᔾᔪᑎᒥᒃ (Sobey Art Award) 2006-ᖑᑎᓪᓗᒍ ᐊᒻᒪᓗ ᓄᓇᕐᔪᐊᒥ ᐃᓕᓴᕆᔭᐅᓕᕐᖢᓂ ᑎᑎᕋᐅᔭᒐᖏᓐᓄᑦ, ᐃᓅᔪᓐᓃᕐᓯᒪᔪᖅ ᓇᓂᔭᐅᓚᐅᕐᓯᒪᖕᒪᑦ ᓯᑎᐱᕆ 2016-ᒥ, ᐆᒪ ᕇᑑ ᑰᑉ ᖃᓂᒋᔭᖓᓂᒃ ᓄᓇᓕᒃᑰᖓᔪᒥᑦ.

ᐱᓇᓱᐊᕈᓯᕐᓂ ᑭᖑᓂᐊᒍᑦ ᐃᓅᔪᓐᓃᓚᐅᕐᑎᓪᓗᒍ, ᑐᓴᐅᒪᔾᔪᑎᓕᕆᔨᑦ ᑐᓴᐅᒪᑎᑦᑎᓕᓚᐅᕐᑐᑦ ᐋᑐᕚᒥ ᐸᓖᓯᒃᑯᑦ ᖃᐅᔨᓴᕐᓂᖏᓐᓂᒃ ᑖᔅᓱᒥᖓ, ᑕᒪᓐᓇᓗ ᐊᑎᖓᓂᒃ ᖃᐅᔨᒪᔭᐅᓕᖅᑎᑦᑎᓕᖅᖢᓂ ᐅᓄᕐᑐᓄᑦ ᐋᑐᕚᒥᐅᑕᓂ ᖃᐅᔨᒪᓚᐅᙱᑦᑑᒐᓗᐊᓂᒃ ᓯᕗᓂᐊᒍᑦ.

ᑲᑎᒪᔨᕋᓛᑦ ᑲᑎᒪᑎᓪᓗᒋ ᐊᑕᐅᓯᕐᒥ ᐃᓄᒃᒥ ᐅᐸᒍᑎᔪᖃᓚᐅᕐᓯᒪᔪᖅ, ᑕᕐᕋᓕᒃ ᐹᑐᕆᔾ, ᖃᐅᔨᑎᑦᑎᓇᓱᒃᖢᓂ ᑲᑎᒪᔨᕋᓛᓂ ᐊᑯᓂᐊᓗᒃ ᐃᓄᖕᓂ ᐱᑕᖃᕐᓯᒪᓕᕐᓂᖓᓂᒃ ᐋᑐᕚᒥᑦ, ᐅᖃᖅᖢᓂ ᐃᓄᐃᑦ ᓄᓇᕗᒦᑦᑐᓐᓃᕐᑐᑦ ᐅᓄᕐᓂᕐᓴᐃᑦ ᐋᑐᕚ ᒥᒃᓵᓂᒃ ᓄᓇᖃᕐᓯᒪᓕᕐᓂᖏᓐᓂᒃ.

“ᐅᓇ ᐱᕕᖃᕐᕕᒃᓴᑦᑎᐊᖅ ᐃᓄᐃᑦ ᐃᓕᓴᕆᔭᐅᓯᒪᓂᖏᓐᓂᒃ ᐃᓄᒋᐊᓄᑦ ᐅᐸᒃᕕᐅᕙᒃᑐᓂᒃ … ᐋᓂ, ᐃᓅᓯᖓᓂᒃ, ᐃᒃᐱᒋᔭᖃᖅᑐᒃᓴᐅᓚᐅᕐᓯᒪᔪᖅ ᑐᙵᓱᖕᓇᙱᑦᑐᒥ ᐃᓄᒋᐊᒃᑐᓄᑦ ᐅᐸᒡᕕᐅᕙᒃᑐᓂᒃ, ᐊᒃᓱᕈᑲᑕᒃᓯᒪᓂᖓᓄᑐᐊᖅ. ᐅᓇ ᐋᖅᑭᒍᑎᐅᔪᓐᓇᖅᑐᖅ ᑕᒪᑐᒥᖓ,” ᐹᑐᕆᔾ ᐅᖃᕐᑐᖅ.

ᐹᑐᕆᔾ, ᓄᓇᕕᒃᒥᐅᑕᕕᓂᖅ, ᑕᐃᒪᙵᓂ 2020-ᖑᓚᐅᕐᑐᒥᑦ ᑐᑭᒧᐊᖅᑎᑦᑎᔨᐅᔪᖅ ᓄᐊᑎᒃ ᖃᐅᔨᓴᕐᕕᒃᒥᑦ (Nordic Lab), ᐃᓚᒋᔭᐅᔪᖅ ᑕᑯᔭᒐᖃᕐᕕᒃᒥ SAW Gallery ᐅᕙᓂ ᓂᑯᓚᔅ ᓯᑐᕇᑦᒥᑦ.

ᐅᖃᓚᐅᕐᑐᖅ ᒥᕐᖑᐃᕐᓯᕕᒃᒥ ᐊᒃᑎᕐᓯᒃᑲᓐᓂᕐᓂᕐᒧᑦ ᐱᓕᕆᔾᔪᓯᖅ ᓄᓇᓕᐸᔭᐃᑦ ᐱᓕᕆᖃᑎᖃᕐᓂᐊᕐᑐᑦ ᐱᓕᕆᖃᑎᒌᖑᔪᓂᒃ ᐆᑯᑎᑐᓇᖅ ᐃᓄᐃᑦ ᑐᙵᓱᕝᕕᖓᑦ ᐊᒻᒪᓗ ᐋᑐᕚᒥ ᓱᕈᓯᓕᕆᕝᕕᒃᒥᑦ, ᐊᒻᒪᓗ ᑎᑎᕋᐅᔭᒐᓕᕆᓂᕐᒧᑦ ᐱᓕᕆᔨᒻᒪᕆᐅᔪᓂᒃ ᐱᓕᕆᐊᒃᓴᐅᓂᐊᕐᑐᒥᒃ ᐱᓕᕆᐊᖃᕐᓂᐊᕐᑐᓂᒃ.

ᐊᒻᒪᓗ ᐳᑐᒍᕐᒧᑦ ᐃᖅᑲᐅᒪᔾᔪᑎᑕᖃᕐᓂᐊᕐᑐᒃᓴᐅᓪᓗᓂ ᑎᑎᕋᕐᓯᒪᔫᑉ ᐊᓯᐊᒍᑦ. ᑖᓐ ᓴᓂᐃ, ᓄᓇᓕᐸᐅᔭᓄᑦ ᐊᐅᓚᑦᑎᔨ ᒥᕐᖑᐃᕐᓯᕕᖕᓂᒃ, ᐅᖃᓚᐅᕐᑐᖅ ᑲᑎᒪᔨᕋᓛᓄᑦ ᐱᓕᕆᕝᕕᖓ ᑕᒪᑐᒥᖓ ᕿᒥᕐᕈᐊᕐᓂᐊᕐᓂᕋᖅᖢᓂᒋᑦ ᐃᓚᓯᓂᕐᒥ ᐋᓂᐅᑉ ᑎᑎᕋᐅᔭᒐᕕᓂᖓᓂᒃ ᓯᓚᒥ ᓴᖅᑭᔮᕐᓂᐊᕐᑐᒥᒃ, ᑭᓯᐊᓂᓕ ᐅᖃᕐᒥᔪᖅ ᒫᓐᓇ ᑕᒪᓐᓇ ᖃᓄᐃᖏᓐᓇᔭᕆᐊᒃᓴᖓᓂᒃ.

ᑭᓯᐊᓂᓕ ᐅᖃᓚᐅᕐᑐᖅ ᐱᓕᕆᕝᕕᖓ ᐸᕐᓇᒃᓯᒪᓂᖏᓐᓂᒃ ᓴᖅᑭᔮᖅᑐᒃᓴᓂ ᕿᒥᕐᕈᐊᖅᑎᑦᑎᓂᐊᕐᓂᕐᒥᒃ ᓇᓕᐊᓐᓂ ᑎᑎᕋᐅᔭᒐᕕᓂᖏᓐᓂᒃ ᐅᑯᐊ ᐋᑐᕚᒥ ᓄᓇᓖᑦ ᑲᑎᕐᓱᒐᖏᓐᓂᒃ ᑎᑎᕋᐅᔭᕋᕐᓯᒪᔭᖏᓐᓄᑦ ᐅᕙᓂ ᓵᓐᑎ ᕼᐃᐅᓪ ᓄᓇᓕᖕᓄᑦ ᐅᐸᒡᕕᒃᒦᑦᑐᓂᒃ.

ᐊᒻᒪᓗ ᑖᓐᓇ ᓇᓗᓇᐃᒃᑯᑎ ᐊᑎᖓᓄᑦ ᐃᓄᒃᑎᑐᑦ ᑎᑎᖃᖃᕐᓂᐊᖅᖢᓂ ᐊᒻᒪ ᖃᓪᓗᓈᑐᑦ ᐊᒻᒪ ᐅᐃᕖᑐᑦ, ᓴᓂᐃ ᐅᖃᖅᑐᖅ.

ᒫᑎᐅ ᕗᓘᕆ, ᓄᓇᓕᐸᐅᔭᓄᑦ ᑲᑎᒪᔨᐅᖃᑕᐅᔪᖅ ᕇᑑ-ᕙᓂᐃᒧᑦ, ᐃᓚᖃᖅᖢᓂ ᓵᓐᑎ ᕼᐃᐅᓪᒥᑦ, ᑕᒪᑐᒥᖓ ᓴᖅᑭᑎᑦᑎᓚᐅᕐᓯᒪᔪᖅ.

ᑲᓇᑕᒥ ᑎᑎᕋᐅᔭᒐᕐᓂᒃ ᓴᖅᑭᔮᒐᖃᕐᕕᒃ ᐊᒻᒪᓗ ᐋᑐᕚᒥ ᑎᑎᕋᐅᔭᒐᕐᓂᒃ ᓴᖅᑭᔮᒐᖃᕐᕕᒃ ᐃᑲᔪᖅᑐᐃᓚᐅᕐᒥᔪᑦ ᐊᑎᕐᓯᓂᕐᒥ ᐱᓇᓱᒃᑕᐅᔪᓂᒃ.

Share This Story

(0) Comments

Join the Conversation

Your email address will not be published. Required fields are marked *

*