ᐋᑐᕚ $1.23 ᒥᓕᐊᓐᓂᒃ ᐊᕐᕕᐊᓂᒃ ᐃᓅᓱᒃᑐᓂᒃ ᐊᖑᓇᓱᒃᓂᕐᒥᒃ ᐃᓕᓐᓂᐊᕈᑎᓄᑦ ᐊᑐᖅᐳᑦ
“ᐅᓇ ᓵᓚᒃᓴᕐᓂᐅᔪᖅ ᑕᒪᐃᓐᓄᑦ,” ᐅᖃᖅᑐᖅ ᐅᑭᐅᕐᑕᖅᑐᕐᒧᑦ ᒥᓂᔅᑕ ᑖᓐ ᕚᓐᑐᓪ
ᔫ ᖃᕆᑕᖅ, ᕿᑎᐊᓃᑦᑐᖅ, ᐃᓅᓱᒃᑐᓂᒃ ᐊᖑᓇᓱᒃᑎᓂᒃ ᐃᒡᓗᓕᐅᖅᐸᓪᓕᕐᒥᑦ ᖃᐅᔨᑎᑦᑎᕙᓪᓕᐊᔪᖅ ᐊᕐᕕᐊᑦ ᓯᓚᑖᓂ ᒫᑦᓯ 23, 2016-ᒥᑦ. ᐃᓅᓱᒃᑐᑦ ᐊᖑᓇᓱᖕᓂᕐᒥᒃ ᐃᓕᐊᓐᓂᐊᖅᑎᑕᐅᓕᓚᐅᕐᓯᒪᔪᑦ 2012-ᒥᑦ ᐊᔪᕈᓐᓃᕐᓴᖅᑎᑦᑎᓪᓗᑎ ᖃᓄᖅ ᐊᖑᓇᓱᒍᓐᓇᕐᓂᕐᒥᒃ ᓂᕿᒃᓴᓂᒃ ᐊᒻᒪᓗ ᐱᓕᕆᐊᖑᔪᖅ ᐊᖏᒡᓕᒋᐊᖅᑕᐅᓯᒪᓕᖅᖢᓂ ᐊᕙᑎᒋᔭᒥᑦ ᖃᐅᔨᓴᕐᓂᕐᒥᒃ ᐱᓕᕆᐊᖑᓕᕐᓗᓂ ᐊᒻᒪᓗ ᒐᕙᒪᑐᖃᒃᑯᓐᓂᑦ ᐃᑲᔫᑎᑖᖅᐸᒃᖢᑎᒃ. (ᐊᔾᔨᓕᐅᕆᔨ ᑎᓚᓐ ᑲᓛᒃ)
For an English version of this story, see Ottawa spends $1.23 million on Arviat’s young hunters program
ᐊᕐᕕᐊᓂᒃ ᐱᐅᒋᔭᐅᑦᑎᐊᖅᑐᖅ ᐃᓅᓱᒃᑐᓂᒃ ᐊᖑᓇᓱᖕᓂᕐᒧᑦ ᐃᓕᓐᓂᐊᕈᑎ ᑐᓂᔭᐅᓂᐊᖅᑐᖅ ᒫᓂᒃ $1.23 ᒥᓕᐊᓐᓂ ᒐᕙᒪᑐᖃᒃᑯᓐᓂᒃ ᒫᓐᓇᒥ 2022 ᑎᑭᓪᓗᒍ, ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᑐᑦ.
ᐅᓇ ᑐᓴᖅᑎᑦᑎᓂᖅ ᐱᔾᔪᑎᖃᕈᑎᖃᖅᑐᑦ ᑭᕙᓪᓕᕐᒧᑦ ᐳᓛᓚᐅᕐᓯᒪᖕᒪᑦ ᐅᑭᐅᕐᑕᖅᑐᕐᒧᑦ ᒥᓂᔅᑕ ᑖᓐ ᕚᓐᑐᓪ, ᑲᖏᖅᖠᓂᕐᒧᙵᐅᓚᐅᕐᓯᒪᓪᓗᓂ ᐊᒻᒪ ᐊᕐᕕᐊᓕᐊᖅᖢᓂ ᐱᖓᑦᓯᕐᒥ, ᕕᕗᐊᕆ 12, ᑕᕝᕙᓂ ᑲᑎᖃᑎᖃᓚᐅᕐᑐᖅ ᓯᕗᓕᐅᕐᑎ ᔫ ᓴᕕᑲᑖᕐᒥᑦ, ᑖᓐᓇ ᒪᓕᒐᓕᐅᕐᑎᐅᖕᒥᖕᒪᑦ ᐊᕐᕕᐊᑦ ᓂᒋᐊᓄᑦ.
“ᐅᓇ ᖃᓄᐃᑉᐹᓪᓕᕈᑎᒻᒪᕆᐅᖕᒪᑦ ᐊᒻᒪ ᐃᓅᓱᒃᑐᓅᖓᓪᓗᓂ, ᐃᓅᓱᒃᑐᑦ ᐃᓐᓇᑐᖃᕐᓂᒃ ᐱᖃᑎᖃᖅᑎᑕᐅᕙᒃᖢᑎᒃ, ᐊᔪᕈᓐᓃᕐᓴᖅᖢᑎᒃ ᐃᓅᓱᕐᒥ ᐃᓕᖁᓯᒃᑯᑦ, ᐊᖑᓇᓱᖕᓂᕐᒥᓐ, ᓂᕿᓕᕆᓂᕐᒥᓐ ᐊᒻᒪ ᑕᒪᐅᓐᓇᑦᑕᐃᓐᓇᖅ, ᐃᓚᐅᓪᓗᑎᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᖃᓄᐃᓕᐅᖁᑎᐅᔪᓂᒃ,” ᕚᓐᑐᓪ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᑲᖏᖅᖠᓂᕐᒦᖢᓂ ᐊᕐᕕᐊᓕᐊᖅᐸᓪᓕᐊᓕᖅᑎᓪᓗᒍ.
ᐃᓅᓱᒃᑐᓂᒃ ᐊᖑᓇᓱᖕᓂᕐᒥ ᐃᓕᓐᓂᐊᕐᑎᑦᑎᓂᖅ, ᐱᒋᐊᖅᑕᐅᓂᑯ 2912-ᒥᑦ, ᐊᐅᓚᑕᐅᔪᖅ ᐅᑯᓇᙵᑦ ᐋᖅᑭᐅᒪᕝᕕᒃ, ᐊᕐᕕᐊᓂ ᒪᒥᓴᕐᕕᓕᕆᔨᒃᑯᑦ.
ᐱᔾᔪᑎᖃᕐᑐᖅ ᓄᓇᓕᖕᓂ ᐃᓐᓇᑐᖃᐃᑦ ᐊᓯᖏᓪᓗ ᐃᓕᓐᓂᐊᖅᑎᑦᑎᔨᐅᔪᑦ ᐊᔪᕈᓐᓃᕐᓴᖅᑎᑦᑎᓗᑎᒃ ᐃᓅᓱᒃᑐᓂᒃ 8-ᓗ 18-ᓗ ᐊᑯᓐᓂᖓᓃᑦᑐᓂᒃ ᐊᖑᓇᓱᒍᓐᓇᕐᓂᕐᒥᒃ ᓂᕿᒋᔭᐅᓇᔭᖅᑐᓂᒃ.
ᐊᒻᒪᓗ, ᐊᔪᕈᓐᓃᕐᓴᖅᑎᑕᐅᖃᑦᑕᖅᑐᑦ ᐊᕙᑎᒋᔭᒥᑦ ᖃᐅᔨᓴᕐᓂᕐᒥᑦ, ᐱᓗᐊᕐᑐᒥᓐ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐅᕘᓇ ᐱᓕᕆᐊᕆᔭᐅᔪᑎᒍ ᑕᐃᔭᐅᔪᒥᒃ ᐅᔾᔨᖅᓱᐃᓂᖅ ᐱᓕᕆᐊᒃᓴᖅ.
“ᐅᔾᔨᖅᓱᐃᓂᖅ” ᑐᑭᖃᖅᑐᖅ ᖃᐅᔨᓴᖅᐸᓪᓕᐊᓂᕐᒥᒃ ᐊᒻᒪ ᐱᓕᕆᐊᖃᕈᓐᓇᕐᓂᒃᑯᑦ, ᐅᓇ ᐋᖅᑭᐅᒪᕝᕕᒃ ᖃᕋᓴᐅᔭᒃᑯᑦ ᓴᖅᑭᔮᒐᖓᑦ ᐅᖃᕐᓯᒪᔪᖅ.
ᐱᓕᕆᐊᖑᔪᖅ ᐱᓕᕆᐊᖑᔪᓐᓇᖅᑎᑕᐅᔪᑦ ᐃᑲᔫᓯᐊᖅᑖᕐᓯᒪᓪᓗᓂ ᐱᖓᓱᓂᒃ ᒐᕙᒪᑐᖃᒃᑯᑦ ᐱᓕᕆᐊᖏᑦᑎᒎᖓᔪᓂᒃ:
- $412,062 ᐊᕐᕌᒍᓂ ᐱᖓᓱᓄᑦ, 2018-ᒥᑦ 2021-ᒧᑦ, ᐅᑯᓇᙵᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐸᕐᓇᒃᐸᓪᓕᐊᓂᕐᒧᑦ, ᐅᑯᓇᙵᑦ ᐊᐅᓚᑕᐅᓪᓗᓂ ᒐᕙᒪᒃᑯᑦ-ᓄᓇᖃᖅᑳᖅᑐᓕᕆᔨᓄᓪᓗ ᑲᓇᑕᒥ.
- $375,000 ᐊᕐᕌᒍᓂ ᐱᖓᓱᓄᑦ, 2018-ᒥᑦ 2021-ᒧᑦ ᓄᓇᖃᖅᑳᖅᑐᓂᒃ ᐱᓕᕆᐊᕆᔭᐅᔪᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᐅᑯᓇᙵᑦ ᐊᐅᓚᑕᐅᓪᓗᓂ ᒐᕙᒪᒃᑯᑦ-ᓄᓇᖃᖅᑳᖅᑐᓕᕆᔨᓄᓪᓗ ᑲᓇᑕᒥ.
- $439,954 ᐊᕐᕌᒍᓂ ᑎᓴᒪᓄᑦ, 2018-ᒥᑦ 2022,-ᒧᑦ ᐅᑯᓇᙵᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒻᒪ ᐋᓐᓂᐊᖃᖅᑕᐃᓕᓂᓕᕆᓂᕐᒧᑦ ᐱᓕᕆᐊᓂᒃ, ᐊᐅᓚᑕᐅᔪᕐᓗ ᐅᑯᓇᙵᑦ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᒃᑯᓐᓂᒃ ᑲᓇᑕᒥ.
“ᓯᓚᐅᑉ ᐊᓯᙳᖅᐸᓪᓕᐊᓂᖓ ᐱᒻᒪᕆᐊᓘᖕᒪᑦ ᐅᑭᐅᕐᑕᖅᑐᕐᒥ. ᓯᓚᐅᑉ ᐊᓯᙳᖅᐸᓪᓕᐊᓂᖓ ᐱᖓᓱᐃᖅᖢᓂ ᓱᒃᑲᓕᓂᕐᓴᐅᖕᒪ ᑕᒫᓂ ᖃᓪᓗᓈᑦ ᓄᓇᖓᓂᓪᓕ, ᐊᒻᒪᓗ ᑲᑎᖃᑎᒌᖕᓂᑦᑎᐊᕙᐅᓪᓗᓂ ᐃᓅᓱᒃᑐᓂᒃ ᐃᓐᓇᑐᖃᕐᓂᒡᓗ, ᐊᔪᕈᓐᓃᕐᓴᖅᑎᑕᐅᓪᓗᑎ ᓂᕿᓂᒃ ᓂᕆᓂᕐᓴᐅᖃᑦᑕᕐᓂᕐᒥᓐ, ᐊᒻᒪᓗ ᐊᖑᓇᓱᒍᓐᓇᕐᓂᕐᒥᒃ ᐊᒻᒪ ᐆᒪᓇᓱᖕᓂᕐᒥᓐ,” ᐅᖃᖅᑐᖅ.
“ᑕᒪᐅᓇᑦᑕᐃᓐᓇᖅ, ᓯᑯᒦᖃᑦᑕᖅᑐᑦ, ᓯᓚᒥ, ᓯᑰᑉ ᐃᔨᔪᓂᖏᓐᓂᒃ ᐆᒃᑐᕋᑲᑕᒃᖢᑎᒃ ᐊᒻᒪ ᐃᓕᓐᓂᐊᖅᐸᓪᓕᐊᓪᓗᑎᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ. ᑕᐃᒪᓕ ᓵᓚᒃᓴᕐᓂᐅᕗᖅ ᑕᒪᐃᓐᓄᑦ.”
ᐅᓇ ᕚᓐᑐᓪ ᓯᕗᓪᓕᖅᐹᒥ ᐳᓛᕈᑎᒋᓚᐅᕐᑕᖓ ᓄᓇᕗᒧᑦ ᑕᐃᒪᙵᑦ ᑎᒃᑯᐊᖅᑕᐅᓚᐅᕐᒪᑦ ᐅᑭᐅᕐᑕᖅᑐᕐᒥᐅᑕᓕᕆᔨᐅᓂᕐᒧᑦ ᓄᕕᐱᕆ 20-ᐅᓚᐅᕐᓯᒪᔪᒥᒃ.
ᐱᔪᓐᓇᕐᓂᕆᓕᕐᑕᖓᒍᑦ ᐳᓛᕐᓯᒪᓕᕐᑐᖅ ᕗᐊᐃᑦᕼᐅᐊᔅᒥᑦ, ᔭᓗᓇᐃ ᐊᒻᒪ ᑰᔾᔪᐊᕌᓗᖕᒧᑦ ᐊᒻᒪᓗ ᐋᑐᕚᒥ ᑲᑎᖃᑎᖃᕐᓯᒪᓕᕐᖢᓂ ᐊᔾᔨᒌᙱᑦᑐᓂᒃ ᑎᐅᕆᑑᕆᓄᑦ ᓯᕗᓕᐅᕐᑎᓂᒃ ᐊᒻᒪ ᐊᓯᖏᓐᓂᒃ ᐅᑭᐅᕐᑕᖅᑐᕐᒥᑦ ᓯᕗᓕᐅᕐᑎᓂᒃ.
(0) Comments